Shirkii dib u heshiisiinta Soomaalida ee ka socday magaalada Eldoret ayaa shalay gaaray guul weyn oo taariikhi ah oo qabanqaabiyaasha shirku ay ka niyad-samaadeen. Waxa ay shalay kooxuhu saxiixeen labadii dokumenti ee shirku ku socon lahaa, horeyna loo soo bandhigay. Mid ka mid ah waxa uu ahaa xal dhab ah oo loo helo Soomaaliya. Arrintan waxa ay ka dhigan tahay in shirku ka gudbay wejigii ama marxaladihii hore, una gudbay wejiga labaad. Ka gudbidda uu marxaladdii hore ka gudbay shirka ayaa loo arkaa inay tahay mid horumar laga gaaray wada hadalladii socday. Inkastoo, guul kama dambays ah oo shirku gaaro ay ku xiran tahay wejiyada kale ee shirka Raga saxiixay heshiiskan waxa ay isugu xigeen sidan: Xasan Abshir Faarax, Cabdalla Deerow Isaaq, Cabdullaahi Yuusuf Axmed, Xuseen Maxamed Caydiid, Xasan Maxamed Nuur (Shaargaduud), Maxamed Qanyare Afrax, Xasan Cabdulle Qalaad, Mowliid Macaani Maxamuud, Muuse Suudi Yalaxow, Cumar Maxamed Maxamuud (Cumar Finish), Cusmaan Xasan Cali (Caato), Maxamuud Sayid Aadan, Maxamed Cumar Xabeeb (Maxamed Dheere), Cabdirisaaq Isaaq Biixi, Jen. Maxamed Saciid Xersi (Morgan), Barre Aadan Shire (Barre Hiiraale), Cabdullaahi Sheekh Ismaaciil, Hilowle Imaam Cumar, Cabdicasiis Sheekh Yuusuf, Jen. Aadan Cabdullaahi Nuur (Gabyow), Dr. Maxamed Aadan Waayeel iyo Shariif Saalax Maxamed Cali oo ku saxiixay magaca Civil Society oo lagu waday inay ku saxiixdo Marxuumad Istarliin Cabdi Caruush. Waxaa kaloo heshiiskan saxiixay Ergayga Kenya ee shirka Elijah Mwangale, Xoghayaha Guud ee IGAD Cabdalla Xaamud Bashiir, “waxaa markanna saxiixaya Safiirka Jamhuuriyadda aan walaalaha nahay ee Jabuuti, Ismaaciil Gudaal Buddun,” ayuu yiri shir-guddoonka Mowliid Macaani markii la soo saaray Jabuuti, safiirka Itoobiya ee Soomaaliya Cabdilcasiis Axmed, Safiirka Talyaaniga ee Soomaaliya, Carlo Ungaro, Wakiilka Jaamacadda Carabta Maxamed Saalim Al-Xuseyni, Sarkaalka Mareykanka u qaabishan Soomaaliya Glenn Warren, Sarkaalka dowladda Masar uga wakiilka ah shirka Mustafa Cali, Sarkaalka uga wakiilka ka ah Midowga Yurub shirka Waliid Muusa. Markii saxiixu uu marayey Warren ayay dhammaan ergooyinku hal mar ku qayliyeen “USA. USA. USA. UP.” Sidoo kale, markii uu saxiixayey heshiiska Ambassador Ungaro ayay yiraahdeen “VIVA. VIVA. VIVA. Italy.” Waxaa kaloo loo sacbiyey Wakiilka Masar iyo Waliid Muusa oo ah nin Suudaani ah, laakiin wakiil ka ah Midowga Yurub oo iyagu si aad ah isugu howlay wejiga hore ee guusha shirka. Mowliid Macaani oo ahaa shir-guddoonka intii wejiga hore uu socday ayaa u mahad-celiyey dhinacyadii u doortay Guddoomiyaha Shirka. “Laba is dishay isma daaweyso” ayuu yiri Mowliid Macaani oo sheegay inuu isagu yahay Qooley, “Qoolleyna wax ma qaladdo” ayuu yiri. Ergayga Kenya, Elijah Mwangale ayaa isna sheegay inaysan weligiis u suura gelin inuu la kulmo munaasabadda saxiixa heshiiskan oo kale. “Weligey kuma fekerin in hoggaamiyeyaasha Soomaalidu ay gaarayaan heshiis kan oo kale ah, sidaas darteed waxaan idinkugu hambalyeynayaa magaca Madaxweyneheyga” ayuu yiri Mwangale oo sheegay in Madaxweynaha Kenya uu imaan doono Eldoret maalinta Khamiista, si uu ula kulmo saxiixayaashii heshiiskan. “Runtii markii aan xalay u sheegay Madaxweynaha inaad aqbasheen heshiiskan wuu qaadan waayey, macquulna ma ahan ayuu yiri, wixii aan ka filayey wax aan ahayn ayay go’aansadeen kooxaha Soomaalidu ayuu igu yiri Madaxweynahayga” ayuu yiri Mwangale oo sheegay in saxiixani uu dabaaldeg u noqonayo carruurta iyo haweenka Soomaaliyeed oo dhibaato aan la xisaabi karin ka dhaxlay dagaalka sokeeye. Waxa uu sheegay Elijah Mwangale in wejiga labaad la dhisi doono guddiyo dib u heshiisiin ah, mid ka mid ahna ay howshiisu noqon doonto dhulalka la kala haysto. “Heshiiskan qodobadiisa waxaa ku jirta in la dhowro midnimada ummadda Soomaaliyeed” ayuu yiri Mwangale. “Dhammaan axdiyada adduunka, gaar ahaan kuwa IGAD waxay ku saleysan yihiin inaan Soomaaliya la kala goyn” ayuu ku sii daray isagoo sheegay in Somaliland ay ku soo biiri doonto shirka inta uu socdo.

Afhayeen u hadlay Maxamed Qanyare Afrax oo si kulul u naqdiyey hadalkii ka soo yeeray Safiirka Itoobiya Maxamed Xaaji (Ingiriis) Eldoret, Kenya E-mail: [email protected] Nin xalay u hadlay ururka Maxamed Qanyare Afrax oo soo saaray qoraal ay ku asteysan tahay magaca Ururka USC ayaa si kulul uga fal-celiyey hadalkii uu dhowaan sii daayey safiirka Itoobiya Cabdilcasiis Axmed ee uu ku sheegay in siyaasiyiin ay isku koox yihiin Qanyare aysan lahayn door siyaasi ah. “Waraysigaas safiirka uu siiyey Ingiriis waa nasiib darro, waanan ka xunnahay sida diblomaasiyad la’aanta ah ee uu u hadlay safiirku” ayuu yiri afhayeenka u hadlay Qanyare oo intaas ku daray in Itoobiya ay ka muuqato inaysan dhex dhexaad ka ahayn arrimaha Soomaaliya. “Inaysan Itoobiya ahayn neutral weligeen ayaan ku cel celin jirnay, waxaana hadallada safiir ku sheegga laga dhadhansan karaa in isaga iyo dowladdiisuba ay doonayaan inay fashiliyaan shirka nabadeynta Eldoret, waxaana ka cad warkiisa in dowladdiisu aysan ka warqabin xaqiiqda waddanka Soomaaliya ee ay ogyihiin wixii ay ku riyoodaan oo keliya” ayuu yiri afhayeenka oo intaas ku daray “waxay moog yihiin wixii la soo dhaafay oo aysan jirin waqti la marin habaabiyo ra’yul caamka adduunka.” Afhayeenku, waxa uu sheegay in Itoobiya ay caadeysatay inay shacabka Soomaaliyeed iyo caalamkaba ay ku qaladdo been abuur aan raadkooda la eegin iyo sal aan lahayn tiir lagu taago. Waxa uu hadalkiisa ku soo afjaray afhayeenka Maxamed Qanyare “ciddii dur carro ah kugu dhufata waxba kuuma dhimin ee caloosheeda ayay ku tustay.” Dhanka kale, Axmed Saadaq Maxamed Faarax oo ka tirsan kooxda Nakuru ee isbahaysiga ah ayaa sheegay in kooxdoodu ay ahayd 8 urur, laakiin afar urur loo oggolaaday shirka, afarta kalena loo diiday. Waxaan ku baaqaynaa ayuu yiri in shirka laga joojiyo fara gelinta, qabsoomiddiisana waxay ku xiran tahay sida Soomaalidu ugu madax bannaanaato arrimahooda. Shirka Eldoret ayaa dowladda Itoobiya ay ku leedahay kaalin muuqata oo cad oo aan laga hadal. Ergada Masar ayaa toddobaadkan si aad ah looga careysiiyey, kaddib markii loo oggolaaday inay shirka u fariistaan laba xubnood, halka Itoobiyana looga oggolaaday afar xubnood. “Annagu Masaari haddaan nahay salaad kasta oo aan tukanno Ilaahay baan u barinnaa Soomaalida inuu dhibka ka qaado, meeshii aan waalidkeen u baryi lahayn, sidan in nala yiraahdana xaq ma ahan” ayuu yiri sarkaal Masaari ah oo magaciisa aan sheegin.

Akhriso Wararkii hore ee la soo dhaafayBack to index