Euskaldunok orain, gure nortasuna adierazteko bi agiri desberdin izango ditugula dirudi. Alde batetik ENA elkarteak banatzen duen Euskal Nortasun Agiria eta bestetik, Batasunako hautetsiek kudeatutako Udalbiltzak banatuko duen EHNA. Egoera honen aurrean lehenengo burutapena nahasmenarena izan daiteke, gero harridura etorri daiteke eta azkenik, eta hau da arriskutsuena, gogaipena.

            Euskaldun askok, jada, ENA dugu, 25000 inguru. Agiri honen kualitate nagusiak nere ustez honako hauek lirateke; herri ekimen batek sortua izan dela, eta edozein alderdi edo erakundeen gerizaziotik kanpo mantentzea lortu duela. Honek, ENA  gizartearen oso eremu zabalean onartua izatea ahalbidetu du, eta gaur egungo Euskal Herri polarizatu honetan, hau lortzea danok dakigu zein zaila den.

            Bestalde, herritar askok, ENAk ofizialtasunik ez duenez, maila sinbolikoan geratzeko arrisku handia zuela ikusi zuten eta horregatik, gure babesa eman genion Bai Euskal Herriari deituriko ekimenari. Udalbiltza bateratu batek nortasun agiri bat kaleratzeko ideia oso erakargarria bait zen euskaldun sentitzen garen guztiontzat.

          Gaur egungo egoera ordea, oso bestelakoa da. Alde batetik PNV-EA ren borondate ezak, ezinezkoa  bihurtu du ametsa. Alderdi hauek borroka armatuaren aitzakia jartzen dute horrelako proiektuetatik alde egiteko, baina alderdi hauek ondorengo galdera argitu beharko lukete. Eremu abertzaletik datorren biolentziarik gabeko eszenatoki batean proiektu hau aurrera ateratzeko konpromezua hartuko lukete ?…

            Galdera hau eta beste asko argitu gabe geratu dira, eta ondorioz gaur egun beste egoera honekin egiten dugu topo. Bai Euskal Herriari ekimenak jasotako sinadurak Batasuna-ko hautetsiek kudeatzen duten Udalbiltzaren esku daude. Udalbiltza honek beste agiri bat kaleratzeko asmoa du EHNA, Batasuna-k gehiengoa duen udaletxetatik abiatuz. Laister bi agiriak izango ditugu kalean.

           Beharrezkoa al da gaur egungo egoeran bigarren agiri hau kaleratzea ? Ez al litzateke hobe abertzaleen arteko akordio batetara eta beste textuinguru bati itxoitea ? 

          Bestalde, Udalbiltzak ENA elkarteari ENA-k kaleratzeari utz ziezaiola eskatu zion. ENA elkarteak Durangon ospatutako batzar berezian aurrera jarraitzea erabaki zuen. ENATALDETIK gure oniritzia erabaki honi eta ekimen hau aurrera jarraitu dezan gure laguntza eta babesa izago dutela azpimarratu.