Nabuhay na Pag-Asa
Nagkaroon ng Comprehensive Agrarian Reform Program (CARP) ang DAR noong 1988 at dalawang taon makalipas itong maging batas ay dumulog ang mga magsasaka kay dating kalihim Florencio "Butch" Abad noong Pebrero 22, 1990. Inatasan ni Abad ang Municipal Agrararian Reform Office (MARO) na tingnan ang kasong ito. Matapos mapatunayan ng MARO na agrikultural ang mga lupain ay iniakyat sa mas nakakataas na Provincial Agrarian Reform Office (PARO) ang usapin.
Pebrero 1991 nang itakda ng PARO na "karapat-dapat masaklaw ng CARP" ang mga sakahan kayat iniutos nito sa MARO ang paglalabas ng Notice of Coverage para sa naturang lupain. Batay ito sa Executive Order 407 (Accelerating the acquisition and distribution of agricultural lands, pasture lands...and other lands of public domain suitable for agriculture.) na ipininalabas ng Malacanang noong Hunyo 14, 1990.
Hunyo rin nang mag-petisyon ang administrasyon ng UP sa DAR kontra sa pagsaklaw ng CARP sa mga lupain. Itinigil ang coverage ng CARP sa nasabing mga lupain at ang kaso ay nakabinbin pa rin hanggang ngayon. Sa patuloy na pagpupursige ng mga magsasaka ay kumilos na rin ang DAR ngunit para lamang puntahan ang aktwal na lokasyon at kunan ng video footages.
Muling nabuksan sa publiko ang kalagayan ng mga magsasaka nang lumabas sa Philippine Collegian ang isinagawang paggiba sa palayan sa Libis upang gawing relocation site "habang armadong nakabantay ang UPD Police." ("Sa kabila ng Restraining Order: Mga Sakahang sa Krus na Ligas Pinagiba ng Admi" ni Chat Garrido, Philippine Collegian)
Ubusan ng Lahi
Dahilan sa paglipat ng mga taga-Daang Tubo sa dati'y palayan sa Libis, hindi maalis ang hinanakit ng mga magsasakang tahanan lamang ang itinira. Walang kumpensasyong ibinigay ang Admi para sa nasira nilang kabuhayan habang patuloy ang pagpopondo ng milyun-milyon sa pabahay para sa faculty at empleyado ng UP. Sa kabilang dako ay patuloy ang pagsisiksikan ng ng "iskwaters" sa Libis na binabalak gawing pangkalahatang relocation site.
"Pag-iisahin na namin sila ("iskwater") doon (Libis) para hindi na kami mahirapan sa pagkontrol sa kanila," sabi ni ol. Edgardo Bentain, pinuno ng Anti-Squatting Task Force. "May mga tao nga doon sa Libis pero kakaunti lang sila at malawak yung area," dagdag ni Bentain.
Sa tensyon sa pagitan ng mga luma at bagong residente ng Libis ay namamagitan ang University Student Council (USC) Committee on Students' and Community Rights and Welfare na pinangunahan ni Councilor Carlo Osi.
"We try to pacify andunite them dahil pare-pareho namang nane-neglect ng Admi ang karapatan nila...Sabi nga ng taga-Daang Tubo na si Aling Celing ay ginagawa raw silang paang manok na nilalagyan ng tare at pinagsasabong para magkaubusan ng lahi."
UP: Unibersidad ng Pang-aagaw?
Sa patuloy na pagpapatayo ng pabahay para sa mga guro at non-academic workers ng UP ay marapat lamang purihin ang administrasyon sa pagsulong nito ng karapatan ng kanyang mga empleyado. Hindi kaiga-igayang maulit ang kaso ng "May Teatro, Walang Tahanan" ni Wilfrido Ma. Guererro na isa nang institusyon sa pagtuturo. Matatandaang pinaaalis ang propesor sa bahay na pinatitirhan sa kanya ng administrasyon ng dating UP President Edgardo Angara.
Sa pagtataguyod ng karapatan ng mga grupo ay nasasagasaan ang karapatan ng mga magsasaka at maralitang tagalunsod, mawawala ang kredibilidad ng Iskolar ng Bayang nagmamartsa para ipaglaban ang mga ito; ng mga estudyanteng pinaaaral ng buwis ng sambayanan na dapat sana'y sa sa masa, sa nakararami tumatanaw ng utang na loob.
Marahil ay repleksiyon lamang ito ng pagpapabaya ng mas malaking sistema, ng pamahalaang Aquino sa kabuuan. Kung dinaragdagan sana ang pondo ng edukasyon ay hindi na kailangang sumira ng kabuhayan ng isang sektor para iangat ang kabuhayan ng isa...
Disin sana...