<EnJoY LiFe 59> - Ocean Park
之前玩遊戲幫阿妹贏左張海洋公園飛，
所以今日就同媽咪細妹去左海洋公會玩。
唔知係咪因為放完暑假，又未開始哈囉喂，
今日海洋公園都唔算多人，好多野都唔駛排隊，
唔會好迫，玩得好舒服，係天氣熱左少少。
因為上幾次都睇唔到熊貓，
所以今次點都要去睇左熊貓館先。
因為我地好早去到，都唔駛排隊，
一入到已經見到安安坐左係度食緊野喇，
好得意呀，佢仲食一陣，行近啲，
再坐低食一陣，又再行近啲，好近距離呀！
淨係得安安一隻食緊野咋，佳佳仲訓緊，
樂樂盈盈就懶洋洋咁曬緊太陽.....
睇完熊貓，就行去海獅居同海豚學堂，
時間啱啱好，去到海獅居個陣啱啱好夠鐘，
見到兩隻海獅仔衝去個訓練員到食野。
係海豚學堂個邊，今日啲海豚都好活躍，
成日跳出水面，個訓練員又同佢地玩，好搞笑。
之後就搭纜車過另外一邊，
第一次搭纜車唔駛排長龍咋，
真係唔知點解今日成十一點半都無嘜人。
過到個邊，睇左水母館，中華鱘魚同海洋館。
呢隻水母仔，跟住音樂輕快嘅節拍一下一下收縮，
好似跳緊舞咁，圓姑碌碌，好鬼得意！
中華鱘魚，真係無嘜特別.....佢霸左原有嘅鯊魚館。
海洋館當然係為左睇海龜啦，佢地游得好快，
加上啲燈光好暗，好怪難影，試左好多次，
等左好耐先影到張較為好少少嘅。
睇完開始肚餓，買左啲雞脾餐去海洋劇場食，
一邊食野，一邊等開 show。
原來轉左個表演呀，今次多左幾條海豚，
佢地跳得好靚呀，好犀利！
有隻海獅仲搞笑，唔聽訓練員嘅指揮，
游左去第二度，哈哈！
散 show 之後，排隊玩左唯一一個嘅機動遊戲飛天鞦韆。
飛得好高，不過轉左好多個圈都未開始停，都有啲驚.....
我太細膽，無再玩到其他機動遊戲喇！
今日實在太熱喇，我諗應該都有成 34 度，
個人都就嚟曬溶咗喇，係時候要食番個刨冰先。
之後，去睇埋最後一個景點太平洋海岸，
時間又係啱啱好，啲海獅好活躍咁等緊喂野食。
好慘呀，細個隻海獅仔成日都爭唔到黎食.....
最後，見時間尚早，撘番纜車番過去睇多次熊貓，
今次要排隊喇，不過係藉得嘅，因為盈盈同樂樂終於起左身喇！
佢哋兩個背對背咁食緊竹葉，仲爭野食添，非常搞笑！
食食下，其中一隻係第二隻面前拎左一堆竹葉去自己度，
之後另外一隻見唔對路，搶番一堆番黎，搬開繼續慢慢食，哈哈！
而佳佳都係繼續訓緊，安安就周圍走黎走去食竹葉。
熊貓，海豚，海獅，海龜都好得意呀！
好開心今日可以睇到佢哋好可愛，好活躍的一面。
 |
That's my life! =D VienneTTa 20-September-2008 |
-------------------------------------------------------------------------------
~ 保護地球，人人有責 ~