38
1567, mayo, 10. Alhambra.
Autos de la denuncia del fiel de la Alhambra
contra Alonso de Talavera y María de la Cruz, taberneros de la Alhambra,
por vender vino blanco a más precio de la postura.
AHA, Leg. 223, p. 205, 1 fol.
(Cruz). En el Alhambra de la çiudad de Granada, a diez dias del mes de mayo de mill e quinientos e sesenta e siete años.
Antel señor Pedro Silvente de Mieres, alcalde mayor en la dicha Alhambra, paresçió presente Françisco Marañon, vezino della e fiel en la dicha Alhambra, e denunçió de Alonso de Talavera e de Maria de la Cruz, su muger, taverneros en esta Alhambra, questandoles puesto el vino blanco por açunbre a diez e seys maravedis lo an vendido e venden a treynta e dos maravedis, por lo qual pidió que se proçeda contra ellos.
E juró la denunçiaçion en forma.
Confesion de Alonso de Talavera e de Maria de la Cruz, su muger.
E luego, yncontinente, en este dicho dia e mes e año susodicho, el dicho señor Pedro Silvente de Mieres, alcalde mayor en la dicha Alhambra, tomó e resçibió juramento en forma de derecho de la dicha Maria de la Cruz, muger del dicho Alonso de Talavera.
So cargo del qual dixo ques verdad que a vendido de dos o tres dias a esta parte dos açunbres de vino blanco a razon de treynta e dos maravedis el açunbre e le está puesto a diez e seys maravedis el açunbre. E ques la verdad so cargo del dicho juramento que hizo.
E no lo firmó porque no sabia.
/Sentençia./ E luego, el dicho señor Pedro Silvente de Mieres, alcalde mayor en la dicha Alhambra, dixo que, atenta la confesion fecha por la dicha Maria de la Cruz, muger del dicho Alonso de Talavera, por haver vendido el vino blanco a más preçio por açunbre de como le está puesto, la condenava e condenó en seys reales de pena, los quales aplicava e aplicó a quien e e como la hordenança desta Alhambra los aplica, y en las costas en esta cabsa derechamente fechas, en cuya tasaçion en sí reservó. E por este su abto e sentençia asi lo pronunçió e mandó. E lo firmó
Pedro Silvente de Mieres (rubricado).
/Notificaçion./ En el Alhambra, en este dicho dia, diez de mayo del dicho año, yo, el dicho escriuano, notifiqué lo susodicho e lo proveydo e mandado por el dicho señor alcalde mayor a los dichos Alonso de Talavera e Maria de la Cruz, su muger.
Siendo testigos, Pedro de la Madalena.