Хаику

Небо без ѕвезди.
Останале да висат
на друго небо.

***

Камбани ѕвонат.
Се буди перуника
до езерото.

***

Есенско утро.
Над куќата се сонча
полжав без куќа.

***

Еден кавал а
звук од четири страни.
Збунети орли.

***

Со чаша врело
млеко во рака гледам
кон Млечниот пат.

Танка

Летна ледина.
Танцуваат ѕвездите
со светулките.

Се слушаат шепоти:
"Дамите избираат!"

***

Ѕвездено небо.
Преплашен ловџија го
фрла снајперот.

Во нишанот му влегла
и Големата Мечка.

***

Младиот Месец
се задскри зад ридот, а
само што стигна.

Со ѕвездата Деница
криенка ли си игра?

***

Со црн туш цртам
крупна топка ... а потем
на радиото

велат дека надвор има
еклипса на луната!

***

Нова осека:
во песокта светкаат
морските ѕвезди.

Ќе се појави ли и
морската месечина?