|
Il-Parroċċa
tal-Madonna ta’ Lourdes
Il-Pawlisti tan-naħa ta’ Triq il-Belt minn żmien ilu kellhom
devozzjoni qawwija lejn il-Madonna ta’ Lourdes, kif tixhed
in-niċċa tagħha li hemm f’dik it triq faċċata
tat-telgħa ta’ Raħal Ġdid.
Wara li fis-snin ħamsin inbnew l-appartamenti ta’ Korradino u
l-poplu hemm kiber, il-Kappillan Xuereb ta’ Raħal Ġdid kellu
f’moħħu li jibni knisja jew kappella, iddedikata lill-Madonna ta’
Lourdes, f’dawk l-inħawi. Meta refa‘ minn Kappillan fl-1962, beda jaħseb għaliha. L-Arċisqof Gonzi, għal dan il
għan tah Lm.500.00. Fil-11 ta’
Frar 1963 sar pellegrinaġġ mill-Parroċċa ta’ Kristi Re
għat-tqegħid tas-salib fuq l-art li kienet immarkata
għalhekk. Fis-7 ta’ Marzu
1963, Monsinjur Xuereb xtara l-art
li kienet għal Lm.1258. Huwa nkariga lill-perit Joe Xuereb,
neputih, li mingħajr ħlas għamel il-pjanti. Fl-24 ta’ Ġunju qabbad lill-bennej
Carmelo Mifsud minn Ħal Qormi u d-ditta S.C. Xuereb li lestew
il-pedament fi żmien xahar u
nofs. Fl-15 t’Awissu, l-Arċisqof
Gonzi mexxa purċissjoni mid-dar ta’ Vincent Bianco għall-
pedamenti u poġġa l-ewwel ġebla. L-għada beda l-bini ‘l fuq mill-qatran u sat-8 ta’
Ġunju 1964 tlestiet sas-saqaf.
Fit-2 ta’ Novembru 1964 saret l-art tal-mużajk tal-Knisja,
tas-sagristija, tal-Kor u tal-post fejn jitgħallmu d-duttrina t-tfal;
tlesta l-artal ta’ l-irħam u sal-31 ta’ Diċembru setgħet
tintuża. Fit-8 ta’ Frar sar it-tberik tal-knisja mill-Arċisqof.
Il-knisja hi mibnija bi stil modern.
Għanda pjanta kwadrangolari bin-naħa tal-kor usa’
min-naħa ta’ wara.
Il-għamla tal-knisja tgħin fil-parteċipazzjoni
tal-poplu fil-quddiesa. Fil-ġenb
tal-knisja hemm kampnar għoli, bi stil romaniku modern.
Wara bdiet tintuża l-knisja.
Fiha kien iqaddes regolarment Monsinjur Xuereb u qassisin minn
Raħal Ġdid. Ta’ l-ewwel
bena wkoll żewġ flats għall-qassisin u s-sagristan (li kellu
jieħu ħsiebha). Saret
ukoll pittura għall-knisja mill-Kav. Emvin Cremona, li swiet
Lm.1600. Fi żmien qasir bdiet
tiffunzzjona regolarment, tant li b’digriet mogħti fil-11 ta’
Settembru 1974, biex ikomplu jitwettqu d-direttivi tal-Konċilju
Vatikan II, l-Arċisqof Mikiel
Gonżi waqqaf il-Parroċċa l-Ġdida taħt it-titlu
tal-Madonna ta’ Lourdes f’Raħal Ġdid, b’seħħ mit-22 ta’
Settembru 1974.
It-territorju tal-parroċċa jinkludi n-naħa t’isfel
ta’Raħal Ġdid (dik il-parti l-eqreb lejn il-Marsa) u
preċiżament dawn it-toroq: partijiet minn triq l-Arkata, Triq
il-Foss, Triq il-Ġdida, Triq Ninu Cremona, Triq is-Sultana, Triq
Valletta kif ukoll dawn it-toroq
Athlone, Britanika, Cameron, Clerence, Corradino, id-Dagħajjes, Inverness, il-Kurvetti, il-Baċir
il-Ġdid, Il-Perit F. Tortell, Renfrew, Wells, Windsor, It-Telgħa ta’ Raħal Gdid, Vjal Sir
Paul Boffa u parti mill-Qasam Industrijali, imsejjaħ tal-Marsa.
L-ewwel kappillan ta’ din il-parroċċa Dun Victor Zammit
Mckeon, fil-waqt li t-tieni kien il-kappillan Dun Raphael Pace li ħa
l-pussess fit-8 t’Ottubru 1980.
Ħadmu wkoll fil-Parroċċa Dun Ġużepp Sammut,
Dun Charles Cordina, Dun Manwel Bugeja, Dun Pawl Raggio, Dun Joe Abela, Dun
Carmel Tanti u Dun Tancred Sultana.
Tagħrif dwar il-Kappillani suċċessivi
tal-parroċċa Madonna ta’ Lourdes jista’ jinkiseb
mill-parroċċa msemmija.
Il-festa tal-Madonna tkun iċċelebrata fit-tielet jew ir-raba’
Ħadd t’Awissu. Issir
purċissjoni bl-istatwa tal-Madonna madwar it-toroq prinċipali u
l-banda G.M. de Paule iddoqq programm mużikali. Il-banda ġdida Madonna ta’ Lourdes
u l-Banda S. Ġorġ ta’
Ħal Qormi jdoqqu programmi fil-vġili u anti-viġilja, fost
il- konkorrenza tal-parruċċani, u mixegħla. L-istatwa hi ta’ l-injam tal-punent li
kien inġieb apposta mill-Italja.
Inħadmet f’Malta minn Samwel Bugeja. Kienet inġiebet fil-Parroċċa
fit-18 t’Awissu 1980. Tirraffigura
lill-Madonna ta’ Lourdes filwaqt li qed tibgħat lil Bernardina
għand il-Kappillan ta’ Massabiele.
Twila 163 ċentimetri.
Il-Knejjes
ta’ Sant Antnin u tan-Nazzarenu
Kif sewwasew tixhed l-istatwa li hemm fin-niċċa ta’ Sant’
Antnin fit-Triq ta’ Bormla, in-nies ta’ Għajn Dwieli għandhom
devozzjoni kbira lejn dan il-Qaddis.
Għalhekk wara li I-patrijiet kapuċċini bidlu d-dar
ta’ Pietru Paul Micallef f’kappella għalihom f’Għajn Dwieli, huma
ddedikaw din il-kappella tagħhom, li tbierket fit-23 t’Awissu 1953
mill-provinċjal tal-kapuċċini Patri Pietru mill-Floriana,
lil Sant’ Antnin u mhux lil San Pietru u San Pawl kif xtaq il-benefattur
tagħhom. Fl-1957-58,
il-patrijiet bnew kappella żgħira, 18-il metru twila u 7 metri
wiesgħa, fuq pjanta ta’ Ġuże D’Amato u tbierket
mill-Provinċjal Patri Timotju mill-Belt fis-6 t’ April 1958. Wara li bnew il-knisja l-ġdida
tagħhom din il-kappella giet profanata u llum isservi ta’ “showroom”
tal-karozzi.
Minħabba li l-poplu ta’ dawk l-inħawi beda jikber,
il-patrijiet kapuċċini ħasew il-ħtieġa ta’ post
akbar . Għalhekk il-patrijiet
fl-1963 krew biċċa art li tmiss ma’ l-iskola Sekondarja Teknika
ta’ Kordin mingħand il-Gvern, b’lira fis-sena. Hemmhekk, l-ewwel bnew
kunvent u wara li l-Perit E. Caruana Montalto ħażżeż
il-pjanti, fil-5 t’April 1964 l-Arċisqof Gonzi bierek l-ewwel
ġebla. Ix-xogħol tmexxa
mill-perit Godfrey Azzopardi u tbierket fl-10 ta’ Lulju 1965 minn Patri
Fortunato, Provinċjal tal-Kapuċċini. Hija mibnija fuq
stil romanesk. Hija twila 40 metru
u wiesgħa 19-il metru. Hi
l-ikbar knisja ddedikata lil Sant’ Antnin f’Malta. Fiha tliet altari.
Il-festa tiġi ċċelebrata fit-13 ta’ Ġunju, jum
it-titular tagħha. Issir
purċissjoni bil-vara fuq iz-zuntier u xi toroq ta’ madwar. Iz-zuntier ikun mixgħul u
mżejjen għall-okkażjoni.
Nies minn Għajn Dwieli, kif ukoll minn xi wħud mill-flats
ta’ Korradino, mill-Fgura u minn kull naħa ta’ Malta huma devoti kbar
ta’ din il-knisja.
Il-Knisja
tan-Nazzarenu
Din il-Knisja hi fi triq Ħal Luqa. Inbniet minn Anġlu Psaila. Hu ħa l-art b’cens fl-1897 u bnieha
fl-1899. Tbierket minn Mons. Salv
Ġrech, il-Vigarju Ġenerali.
Psaila żamm ġuspadronat fuqha u sew hu kif ukoll martu
ndifnu hemm meta mietu.
Tmiem
|
