baaGh.e.jannat vo teraa saath baHaar.e.raHmat
dil.o.jaaN hotey haiN pHir aaj nisaar.e.raHmat 

godh teri ke jahaaN maiN tha sawaar.e.raHmat
dey sadaa tu ke juN aasi ko pukaarey raHmat

chaaNw ho jaaye jo chaa jaaye teri yaad ka abR       
dhundh aankhouN me liyey aaye Ghubaar.e.raHmat

teraa aaGhosh hi mere liye aaGhosh.e.hateem
jo tere saath vo har subHo nihaar.e.Rahmat

teri aawaaz teri nazr teraa dast.e.shafeeq
kartaa rehtaa hooN mai aksar yeh sHumaar.e.raHmat

rab karey key tujhey firdaus miley dono jagaah
is duaa sey haiN huwe haath nisaar.e.raHmat

rab se boloun merey Maulaa sar.e.roz.e.mahshar
waaN dikhaai thi jo yaaN par bhi dikhaadey raHmat

deed.e.aaqa se jo maDhosh ho :bedam: us dam
hauz.e.kausar key miley us ko kinaarey raHmat
 
  

Syed Mo`inuddin Hassan :bedam: