Ua Siab Tso Koj Mus
Thaum xob quaj ces nag yuav poob xuj xuav saum nruab ntuj, thaum ib tug neeg twg tso yus tseg ces yus cov kua muag iab kua muag daw yuav poob xuj xuav ntawm yus ob lub ntsiab muag. Yog thaum twg txoj kev hlub tu lawm ces yuav tsis muaj kev cia siab los ua neeg nyob ntxiv mus law. Hmo no kuv nyob ib leeg tsis muaj tus los hlub kuv vim yog kuv txoj kev cia siab uas ib txwm muaj tau plog nrog huab nrog cua mus lawm. Txoj kev tu siab thiab lwj siab zoo tam li nag cob nag cua uas nrov nplaim lias los nplawm kuv lub neej. Tsis paub yuav ua li cas tsuas yog xav txog txoj kev hlub uas kuv tau muaj nrog tus hluas nkauj uas dhau los lawm xwb. Kuv nyob nrog rau lub kua muag niaj hnub niaj hmo seev txog tus neeg zoo uas tau ncaim ntawm kuv lub xub ntiag mus ua luag tug. Txhua hnub txhua hmo kuv ua yog toog pom nws lub me ntseg muag luag ntxhi nyob hauv txoj kev npau suav tiam sis mas tsuas yog ib txoj kev npau suav uas dag ntxias kuv lub kua muag kom tsis txhob poob rau hauv pem teb xwb.Hmo no kuv nyob txias to nco dheev txog thawj zaug uas kuv tuaj ntsib pom tus neeg uas kuv hlub nyob rau tom tshav qaib. Pom dheev nws lub me ntsej muag luag ntxhi xws uas li cas kuv lub siab lub ntsws tuag tag. Kuv tsuas yog tias sawv yoob ntxhias yoob tag puas hauv ko taw txog rau saum taub hau thiab tsis paub yuav ua li cas thiaj li yuav zoo vim tias kuv tus kheej nyiam nws heev dhau lawm. Tsuas yog tias sawv ntsoos ntsia ob lub me qhov muag tsis ntsais hos lub siab dhia puj poog vwm tag vim yog nws ib leeg xwb. Kuv tsis paub yuav ua li cas hos tsuas yog nam ntxhias mus ze zuj zus mus rau ntawm nws ib sab xwb twb tsis paub tias yuav hais dab tsi ua ntej li. Thawj thawj los lus rau nws yog hais tias "koj tuaj thiab lov leej muam." Ib los lus nug ua rau kuv tawm ib ce hws hos ntsej muam liab tag nrho vim yog txoj kev txaj muag. Tsis paub xyov kuv yuav ua rau nws poob plig los yog niam kuv li. Tiam sis mas vim muaj poj yawm txwv koob pab es thaum kawg thiaj li tau hnov nws lo lus zoo teb tias "kuv tuaj thiab maj, leej nus". tib los lus los ntawm nws xwb ua rau kuv zoo siab tshaj cuag li nyiaj thiab kub twb paub tsis tau los me lus qab zib ntawm ntawv li. Yog tias ua tau no kuv twb xav nkaj mus ua li lub tsev nyob rau hauv nws lus siab thiaj li tsis muaj hnub ncaim. Tiam sis yog vim ua tsis tau li ntawv kuv thiab li nrog nws tham es tsuas yog tau nws tus xov tooj xwb ces twb zoo zoo siab lawm.
Tom qab ib xyoos dhau mus txog hnub valentine day, kuv thiaj tau yeej thiab txais nws lub me siab hlub uas yog ib yam khoom plig zoo tshaj nyob rau lub neej tiam no. Kuv muab kuv lub siab lub ntsws coj mus khi ruaj ntseg nrog rau nws thiab tsis xav kom muaj ib hnub twg ib tug tau ncaim ib tug mus qhov twg. Lo lus uas hais tias "hlub" no yuas yog ib lo lus uas muab tau rau ib tug xwb yuav tsis muab tau rau tus ob lawm, vim hais tias yog kuv muam nws hais ntau dlau qhov uas kuv yuav hais lawm yuav ua rau nws tsis muaj nqis rau leej twg mus ntxiv lawm.
Kuv txoj kev hlub nyob nrog nws tau muaj tsis tau ntev xwb twb zoo li cov tshuaj ntxuav nyiam uas tau hlav kuv lub siab lub ntsws. Vim tias thaum kuv txoj kev hlub txawj loj lawm nws kuj yuav txawj tawg paj thiab txi txiv mus rau yav tom ntej. Tiam sis mas tsis xav hais tiam vim li cas txoj kev tu siab ho poob lo tau rau kuv uas zoo tam lub paj uas txawj tawm nws ho yuav txawj qhuav ntsws mus hos lub txiv uas txawj loj nws kuj yuav txawj poob lwj mus. Kuv tau ib txoj hmoov phem thaum hnov xov los ntawm ib tus phooj ywg zoo hais tias tus neeg kuv hlub tau raug yuav mus ua luag nyab lawm. Yug los tiam no tsis tau hlub ib tug neeg npaum li nws li es ua cas tej xwm txheej zoo li nov ho txhwm sim los poob rau kuv lub neeg. Kuv xav tsis thoob li vim tias nws zoo li lub me tsev uas nyuam qhuav ua tau xwb cua daj cua dub twb los muab nplawm vau mus lawm.
Kuv txoj siab zoo li yau zuj zus yau zus zus mus lawm xwb thaum tus neeg uas kuv hlub tshaj plaws tam li yog muab kuv txoj siab los pauv los yeej kam twb tau raug yuav mus ua luag tug lawm. Txawm li cas los xij pheem kuv yuav ua ib siab tso nws mus rau luag thiab xav tias txoj kev hlub yav tag los tsuas zoo li ib zaj npau sawb uas nyob rau hmo dhau los lawm xwb. Kuv yuav tsis tu siab li cas rau nws vim tias txawm yuav quaj, yuav seev, yuav nco nws npaum li cas los nws twb mus ua luag tus nyob hauv lug lub sub ntiag lawm. Xav mas qho zoo cia kuv mam li foom lo lus zoo kom nyob nrog nws lub neeg mus tag ib txhiab ib txhi xwb ces yeej zoo zoo kuv siab lawm. Tsuav yog kom tus neeg kuv hlub mus txhais tau lub neej zoo thiab nyob luag ntxhi nrog rau tus neeg uas muaj txoj hmoo zoo tam li tus dej uas muaj ntus xwb tsis muaj tu li xwb ces zoo lawm. Nyob rau ntawm kuv tus kheej ces thov kom nws tsis txhob txhawj txog txhuav kom nco ntsoov kuv lub npe coj mus khaws cia xwb ces txawm yuav muaj ib hnub twg kuv txoj sia tu mus lawm los kuv yeej zoo siab tuag nrog me huabb me cua ya mus ua ib ke.
|
