Hmo ntawv ib hmos kaj ntuj plaws kuv sawv tsees saum txaj los nthos nkaus kuv phau ntawv calendar nthuav zog txog nkaus rau hnub tim 14 lub ob hlis ntuj thiab sau kiag ib qho note tias " hnub no kuv yuav tau nco ntsoov mus ntsib lub me paj ntsuas nplaim uas cua muab tshuab ib vuag rau puas tim qab ntug ib ntus lawm mam li rov hnov dua tus ntxhiab thaum tsib teev tom ntug dej hiav txwv". Kuv sau tag nrho xwb lub phone nrov kiag, kuv mus teb na ua cas yog lub paj ncaim toj hu tuaj yaum kom ib tsam yuav tsuas ntuj wb mus noj hmo ua ke tom tsev noj hmo. Xav zoj ab! yuav ua cas nev, ntsai yuav tau dag nws ib zaug paub. Kuv thiaj li teb nws tias "Me nplooj siab, ntsai kuv tsis khoom ib tsam paub vim tias kuv yuav tau mus saib kuv tus phooj ywg tim tsev kho mob. Yog koj khoom no ces wb mus noj sus ua ke xwb yuam?". Nws thiab li teb tiag, "ua li maj yog koj tsis khoom ib tsam ces ib plaig li kawm ob moos kuv tawm hauj lwm kuv mam li los tos koj mus noj sus ua ke nawb". Hais tag ces kuv thiaj li muaj lub phone khwb lawm. Hnub ntawv ib hnub kuv muab xav mus xav los tsis pom qab ua zaj twg li lauj vim yog kuv tsis xav dag rau ob lub me paj ntawv ib leej ib tug kiag li.
Ib nyuag plaig tav su dua xwb ua cas ib lub tsheb nrov loo tuaj nres nkaus ntawm peb tsev, kuv tawm plaws mus saib na uas ciav yog lub me paj ncaim toj. Kuv thiaj li hnav ris tsho thiab rau khau tsuag tsuag tag nthov khaws nkaus kuv phau ntawv calendar nqa nrog kuv mus rau tom tsheb lawm. Wb mus noj su tag wb hos mus saib movie ua ke tag ces nws thiaj li tau xa kuv los tsev. Thaum wb los txog tsev, kuv saib lub moos na uas cas twg yuav txog tsib teev lauj. Kuv thiaj li tau tawm kiag hauv tsheb thiab dhia ua doj ua des mus rau hauv tsev mus nqa kiag tus key tseb thiab dhia kiag mus tiv cav tsev uas yuav npaj siab mus ntsib lub me paj ntsuas nplaim.
Lub tsheb khiab leej hauv txoj kev, kuv xav mus xav los zoo siab thiab kuv nyuab siab tias yuav ua li cas yog kuv rov pom nws dua. Mus ib nyuag plaig ze ze ntawv ntug dej hiav txwv txog rau ntawm ib lub teeb liam, kuv nres kiag tsheb thiab laj muam ntsia rau ntawm daim iav mus rau tom qab na ua cas pom ib lub tsheb dub muaj ntsis zoo li kuv lub me paj ncaim toj lub. Kuv xav kiag, ab..muaj tsheb ntau ntau zoo ib yam xwb os yeej tsis yog nws ib zaug li. Kuv mus kiag li peb nas this ntxiv txog nkaus ntawm ntug dej hiav txwv thiab nres kiag tsheb rau ntawm qhov chaw nres tsheb. Tawm plaws mus li ob peb kauj ruam ntsia cav tsis pom leej twg li tsuas pom me noog ya dawb vog hos cua tshuab dej ntas ib vuag tim ub ib vuag tim no xwb. Xav kiag tiag, ntsai nws tsis tuaj paub los yog kuv tuaj lig lawm es nws rog qab lawm. Kuv nyuam qhuv zaum kiag ntawm ib tus cav ntoo xwb ua cas tseem siv hnov kiag ib lub suab hu kuv lub npe pem qub qab tuaj. Zoo li leej twg tuaj nraum kuv nrob qaum cia li puag nkaus kuv lub cev. Tig kiag mus na uas cas yog lub me paj ntsuas nplaim tus neeg uas tau ncaim kuv lub siab lawm ntau xyoo. Ntsia tus neeg tseem yog tus qub tiam sis thaum ua pa tuaj tus ntshiab txawv tag lawm tsis yog tus ntxhia qub li yav thaum lawm. Kuv thiaj li nug nws txog ntawm nws lub neej uas dhau los nrog rau txoj kev hlub uas nws tau muab rau lwg tug neeg. Nws tsuas yog pos qhov muag quaj thiab hais tau tias nws tawg tau txoj kev yuam kev lawm qhov tseeb tus neeg ntawv tsis hlub nws tiag. Thaum ntawv kuv thiaj li tau puag kiag nws rau hauv kuv lub xub ntiag thiab hais rau nws tias, "kuv lub me paj ntsuas nplaim tsis txhob quaj mog txawm yuav zoo li ntawv lawm los ua lub siab loj es thiaj li tsis mob mob koj lub siab". Kuv lub ceb lam puag nws rau hauv kuv lub xub ntiag xwb kuv ob lub kua muag twb ntws leev tawm los. Lub sij hawm ntawv hnov zoo li leej twg rhais kauj ruam tuaj ze zuj zus, ze zuj zus ntawv wb ntawv. Kuv tsa muag ntsia na ua cas yog lub me paj toj ncaim twb sawv tom wb hauv ntej lawm tiag. Nws cuab lo suab tuaj rau wb tias, "kuv nrog neb zoo siab uas thaum kawg neb rov tau los sib ntsib, sib hlub raws li neb ob lub siab xav tseg. Tam sim no kuv mam li paub tias txoj kev hlub zoo tam li tus ntxhiab uas txawm yuav dhau ploj mus lawm tsawg tiam los yog rov hnov dua yeej tseem tseg tsis tau. Kuv mam li ua tus tawm thiab tsuas muaj foom kom neb sib sib hlub mus li es ib leeg ib tug thiab li tsis mob mob siab li yav tag los. Nyob zoo rau neb es kuv mus lawm mog. Mam li sam feej neb tus kheej kom zoo zoo nawb". Hais lo lus tu nrho xwb nws ob lub kua muag nrog teev yees rau hauv pem teb thiab nws cia li rhais ruam deb zuj zus ncaim ntawm wb mus lawm. Kuv xav zoj, ab ua cas es nws hos paub tias kuv tuaj ntsib lub me paj ntshuas nplaim nev, kuv twg tsis tau hais qhia rau leej twg paub li nev. Kuv thiaj li rov muab xav mus xav los na yog kuv qhov qab nqa kuv phau ntawv calendar hauv nws lub tsheb lawm li ntawv nws thiaj paub tuaj nrhiav kuv txog qhov ntawd..
Thaum kuv pom tias lub paj ncaim toj mus deb zuj zus lawm kuv mam li muab kuv txoj kev hlub coj los xav zoo zoo rau kuv tus kheej. Ntsai yuav tau xum hlub nrog tus neeg uas nws hlub yus thiab ib txwm tshua txog yus zoo tshaj tus uas yus hlub nws tiam sis mas nws tsis hlub yus tiag. Txoj kev hlub yav tas txawm yuav ua tau rau kuv los kua muag thiab mob siab npaum cas los tus neeg uas hlub kuv ntawv twb paj tau kuv rov muaj kev kaj siab thiab luag ntxhi tuaj lawm. Ntsai yuav tau ua ib siab rov mus hlub nws kom zoo raws li txoj kev hlub uas nws tau muab rau kuv thiaj li zoo.
Muab xav tag, kuv thiaj li rov tig mus rau lub paj ntshuas nplaim thiab hais tias, "kuv me nplooj siab ntsai kuv yuav ua tsis tau raws li koj lub siab xav nawb mog. Yav tas los muab nws cia ua ib zaj npau suav es txij li no mus thov muab wb txoj kev sib hlub yav tom ntej coj los khaw ua nkauj muam nraug nus os mog. Kuv yeej hlub hlub koj rau yav thaum wb tiam sis mas hnub no kuv lub siab lub ntsws twb hloov tag mus ua ib tug neeg tshiab lawm. Li ntawv ntsai kuv yuav tau mus hlub tus neeg uas hlub kuv, tus uas ua rau kuv rov pom lub ntiaj teb no tshiab dua ib zaug ntxiv. Es mam li nyob zoo koj thiab thov kom koj mus nrhiav tau tus neeg uas hlub hlub koj nawb". Hais los lus tu nrho xwb lub me paj ntsuas nplaim kua muag los teev yees ntawm kuv ib sab. Kuv cia li rhais ruam ncaim ntawm nws mus thiab dhia daws kuv lub me paj toj ncaim qab lawm. Txawm yuav hnov lo lus hu tom qab tuaj thiab, "thov koj tsis txhob ncaim kuv mus os. Thov tsis txhob mus os vim kuv hlub koj" npaum twg los kuv tsis tig ntsia rov tom qab thiab tsuas muaj mus lawm tsis tig rov qab li lawm.
|
