Binag-o
Hulyo 6, 2008

WALAY nagbinag-o. Taliwala sa byahe ni Presidente Gloria Macapagal Arroyo ug ang iyang bahan didto sa Tinipong Bansa sa Amerika, nagsibit usab dayon og mga sulsol ang mga tawo nga dugay rang naglaway sa pwesto sa pagka presidente.

Gilampurnas man sa bagyo ang dakong bahin sa nasud, mas “Franka” pa jud ang giluwatan nga mga spekulasyon sa mga buot mopuhag sa mga opisyal sa nasud aron makadama intawon sa natad sa pamuli-han- teka.

Hinuon, sukwahi sa mga ‘kamatuoran nga buot nilang ipaslak” sa atong mga bubonlan, nga dili usab binag-o, dili ikalimod nga bisan lang ug ang mga “commitments” lang alang sa pamuhunan, pagpasugod sa trabaho ug saad sa paglili sa pagnegosyo sa Pilipinas gikan mismo sa mga negosyanteng Kano, dako na nga gasa nga nabitbit alang sa mga Pinoy.

Espuko mo bay: sa personal nga paghangyo sa Presidente sa mga sakop sa Senado sa US, nadawat niini ang pasalig sa pagpasupot sa Philippine Veterans’ Equity Bill nga magtunol sa duolan sa P25 mil nga binuwan nga pension sa mga beterano sa ikaduhang gubat.

Gikan sa kasamtangang P5,000, way molalis nga dili lang kini dakog ikatabang sa mga beterano nga sulod sa 62 ka tuig, nag-antus sa kagamay sa tabang.

Kini maoy bag-o. Usa na lang ka ang-ang ang tikangon sa bill ug mapabalaod na kini sa US, samtang gihipno sa mga tinugyanan sa US kon asa magkuhag pundo alang niini. Bag-o gihapon.

Ikaduha, mipadayag nag pagsalig ang US House nga ipasa ang bill subay sa halapad nga suporta nga na-ani sa mga Pilipino veterans sa pagpakig-bisug kauban ang mga amerikano.

Labaw pa niini, mas gipalig-on pa gihapon ang panaghigalaay ug pakig-alayonay sa mga kagamhanang Pilipinas ug US, butyag sa Presidente.

Gawas sa na-tino nga paglagdaay sa $500 nga kasabutan tali sa Pilipinas ug Libbys sa Amerika, ang pagpakigtigum sa mga tinugyanan sa nasud sa mga dagkong pundok sa mga magpapatigayun sa US lain na usab nga pangampanya aron kahatagan ug bag-ong pagtimbangtimbang ang pagnegosyo sa Pilipinas. Mao ni binag-o.

Nakigtagbo ang Presidente sa Texas Instruments sa US, kinsa mipadayag nga dalhon na dinhi ang usa sa pinaka dako niining pabrika sa mga gamit nga electronic. Dili lang milyon kon dili bilyon ang gihisgutan dinhi.

Sa laing bahin, sa mga nagtilagok na ang laway sa pagpagawas ug mga spekulasyon nga suroy-suroy lang ang gibuhat samtang nag-ilaid ang nasud human laparoha sa bagyo, bisan sa guot nga schedule, walay oras nga wala masayod ang Presidente sa mga panghitabo dinhi.

Gani, nakita sa telebisyon ang iyang gikaintapan nga “kamaldita” dihang gilabhan ang hepe sa Coast Guard kabahin sa mga polisiya nga nalapas sa pagpalarga sa barkong natundag.

Sa mga tawo nga walay pagsalig sa mga kaubanan sa buhat, dili mahimo nga imo lang itugon ang imong trabaho.

Kini maoy dako mo nga suliran, ako-akohon man ka. Ang demalas lang, kay dili ingon ani ang Presidente. Binag-o ning iyaha.

Subay sa katakus sa mga tawo nga iyang gisaligan, kampante si presidente nga mahimo sa mga nahingtungdan ang ilang buluhaton, samtang nagtutok sab siya unsa pay mabuhat gawas sa makaya sa iyang mga sinaligan.

Mao kiniy bag-ong matang sa pangagamhanan nga tingali wala maanad ang Pinoy.
Hinuon, kinahanglang mag-anad na kita kay, kon dili kita sayud niini, may rason nganong hangtud karon, nagpabilin pa gihapon kitang anaa sa duyan ug gitabog na lang sa mga manghud pa nato sa kalibutan.