|
BALITANG LOKAL (TALIBON)
Apostolic Nuncio nga taga-Talibon nagselebrar og
“Misa Pasalamat”
Ni: Admi Valmores
Hulyo 27, 2008
|
TALIBON - Si Archbishop Bernardito “Barney” Cleopas Auza (Papal Ambassador) sa Haiti, Titulo Archbishop of Suacia, kinsa lumad sa barangay Balintawak ning lungsod niduaw dinhi sa iyang yutang natawhan, nakighimamat sa iyang mga kabanay ug mga kahigalaan ug nagselebrar siya og “Misa Pasalamat sa niaging, Hulyo 19 sa alas 10:00 sa buntag sa Most Holy Trinity Cathedral Parish sa Talibon, Bohol.
Siya nagtubo nga usa ka buotan ug masinabuton nga anak sa mga ginikanan nga maligdong: Meliton Auza ug Magdalena Cleopas sa naaso’yng barangay.
Ikawalo siya nga anak sa dose ka managsuon. Ang mga kadagkoan sa Simbahang Katoliko nga nanambong naglakip nila ni Ricardo Cardinal Vidal, Bishop Christian Vicente Noel sa Diocese sa Talibon, laing tulo ka Obispo sa nagkalaing-laing dapit, Msgr. Ignacio “Nash” H. Reyes Parish priest sa Most Holy Trinity Cathedral Parish sa Talibon, mga kaparian sa Diocese sa Talibon ug Diocese sa Tagbilaran, mga madre, ug choir nga mga seminarista.
Diha usab si Gov. Erico B. Aumentado ug iyang kapikas Perigrina Cabagnot Aumentado, Congressman Roberto C. Cajes, Bohol 2nd District ug iyang kapikas Mayor Judith Cajes sa lungsod sa Trinidad, Mayor Juanario A. Item ug mga Municipal Officials sa lungsod sa Talibon, ug mga Provincial Officials sa Bohol.
Sa iyang nakab-ot nga katungdanan, naghatag siya og garbo sa lungsod sa Talibon ug dungog sa tibuok nasod sa Pilipinas.
Lain na usab kini nga mahipatik sa bulawanong panid sa kasaysayan sa tibuok kalibutan. Human sa iyang Misa Pasalamat, ang pagdawat sa mga bisita didto himoa sa CPG Multi-Purpose Complex.
Ang mga VIPs, mga pari, mga provincial ug municipal opisyal, ug personal guests ni Archbishop Barney didto dawata sa Café Regine, Talibon Pension House.
Human sa gidulot nga mga pagkaon ngadto sa mga bisita, gisunod dayon ang Testimonial Program agi og pasidungog kang Archbishop Auza.
Si Archbishop “Barney” (maoy matam-is og common niyang angga nga itawag kaniya sa iyang mga kabanay ug mga kahigalaan) nipalanog sa iyang mensahe agi og pagtubag sa kahimoan og kalamposan sa makasaysayanong kalihokan, human sa mga nanag-unang numero sa programa sama sa invocatory dance sa Blessed Trinity College, sa presentasyon sa Blessed Trinity Elem. School, testimonial message sa Auza Clan representative Prudencio Lopena og Cleopas Clan representative Lucy Cleopas Leoligao.
Si Archbishop Barney, sa iyang mensahe, nag-ingon nga atong puy-an ang atong hugot nga pagtuo sa Dios, pinaagi sa pagtan-aw sa atong kaugalingon, og pagtan-aw usab sa kalibutan.
Si Judge Avelino Puracan, maoy nihatag sa closing message. Si Mr. Romeo C. Alvarez mao ang program host. Sa laing bahin, dako kaayo ang gitahas ug gikatampo sa Auza Clan ug Cleopas Clan sa mga preparasyon alang sa kalamposan sa maong kalihokan.
K-of-C District V-39 nagpahigayon og
Organizational Meeting
Ni: Admi Valmores
Hulyo 20, 2008
|
TALIBON - Ang Knights of Columbus, District V-39 nagpahigayon og Organizational Meeting sa Hulyo 13, Dominggo didto sa Blessed Trinity Formation Center ning lungsod.
Gitambongan kini sa mga bag-ong napili nga mga Council Officers sa Blessed Trinity Council 9245 sa Talibon, Holy Child Council 10447 sa Bien Unido, og sa San Roque Council 13727 sa Bagacay.
Ang wa makatambong ning higayona mao ang Council sa Trinidad. Kining naasoy’ng mga Council gidumala na sa bag-o nga District Deputy V-39 SK Lorenzo R. Flores.
Iyang gisugdan si SK Virgilio Autida. Si SK Lazaro Artiaga mao na usab ang Provincial Deputy sa Bohol East nga napuli kang SK Luciano Bintulan, Jr.
Ang motibo sa maong Organizational Meeting mao ang paglig-on sa komunidad sa K of C og pahimog mga estratihiya nga ikaemplimentar ang mga programa sa paguswag sa mga kalihokan og proyekto sa matag Council.
Gikaigoan og gidasig sa Visayas State sa Cebu City bag-o pa lang nga ang Organizational Meeting pagahimoon sa matag District Jurisdiction, ug dugang gikaigoan nga “ No Orgazational Meeting-No Installation” policy nga hugtanon nga pagasundon sa Council sa matag district.
Ang program proper gisugdan sa panalangin nga gipahinungod ni Fr. George J. William nga gipangulohan sa incoming Grand Knight sa BTC 9245 SK Julius Credo, ug gisundan dayon sa pag-awit sa National Anthem og Opening Ode.
Si SK Admiralito Valmores mao ang nagdumala sa Acknowledgement of Participants. Si SK Flores maoy nihatag sa Words of Welcome og Statement of Purpose, ug gisundan sa inspirational message ni SK Roy Artiaga.
Ang mga mamumulong sa nagkalain-laing hilisgotan naglakip nila ni SK Natz Avenido-”Duties and Functions of Council Officers”, SK Virgilio Autida-”Protocol”, SK Apolinario D. Redulla-”Planning-Five Service Areas”, og si Bro. Gregorio Palapos- Columbian Squires”.
Si SK Admiralito C. Valmores mao ang program host.
Tindero gipusil patay
Ni: Admi Valmores
Hulyo 13, 2008
TALIBON - Upat ka inagian sa bala sa tinuyo nga pagpusil naestablisar nga “crime
of murder” nga nakapatay diha-diha sa usa ka Jaime Saldo Aurit, 33 nga nagpuyo
sa Barangay San Agustin ning lungsod sa nilabay’ng Hulyo 7 sa 6:55 sa hapon.
Ang maong biktima sumala pa, usa ka tindero ilawom sa Alturas padulong na mopauli sa iyang pinuy-anan sa San Agustin lulan sa tricycle nga pasaheroan diin naglingkod siya sa luyong lingkoranan sa maong sakyanan nga ang numero niini 304 nga gimaneho sa usa ka Roger Polot y Villafuerte, 30 ug nagpuyo sa samang dapit.
Dihay laing mga pasahero nga naglingkod sa sulod sa tricycle. Matud pa sa Talibon Police spot report sa diha nga nagkaduol na ang tricycle sa Panas Bridge sa San Agustin, duha nga wa ilhi nga lalake nga nagsakay og motorcycle nga nagsunod sa tricycle sa kalit mipusil sa biktima makaupat ka hugna sa duol kaayo nga distansya, usa ka bala mitama sa tuong bahin sa lawas sa biktima, ang usa ka bala sa iyang buko-buko, laing duha ka bala mitama sa walang bukton nga maoy hinungdan sa dali-dali nga kamatayon sa biktima.
Ang driver sa maong tricycle padayon sa taho, naningkamot sa paghunong sa sakyanan sa tuong bahin sa Panas Bridge ug nilayat siya padulong sa basakang kahumayan, samtang ang duha ka pasahero sa kalit niambak og nanalipod sa ilang kaugalingon diha sa railings sa maong taytayan.
Ang mga suspetsado wa makontento mipusil sa tangke sa gasolina ug sa atubangan sa salamin sa sakyanan ug dayon nisibat ang kriminal padulong sa lungsod sa Trinidad.
Ang biktima gihatud pagdali sa driver ngadto sa Garcia Memorial Provincial Hospital, apan sa pag-abot sa doktor nag-ingon nga ang biktima wala nay kinabuhi.
Mga elemento sa kapolisan nga gipangulohan sa hepe PS1 Domino G. Pelecio uban nila ni SPO4 Restituto Auza, SPO3 Rogelio Cleopas, PO3 Melchor Ramos, PO3 Crisanto Bonghanoy, Jr., PO2 Margarito Cagoco, og PO1 Joveniano Lato diha-diha mirespunde sa alarma sa pagpamusil, nakakaplag sa crime scene usa ka kabhang o baseyo sa bala, usa (1) ka cap color dark blue nga adunay marka “Blind”og bugas humay nga nakay-ag sa karsada nga gituhoan gipanag-iya sa biktima.
Dugang pag-imbestigar sa kapolisan sa nahitabong krimen gipadayon hangtud karon aron matino ang mga angolo ug motibo sa pagpamusil.
Talibon nagsaulog sa 34th Nutrition Month
Ni: Admi Valmores
Hulyo 6, 2008
|
TALIBON - Gisaulog ning lungsod ang 34th Nutrition Month nga nagsugod sa Hulyo 1 hangtud sa Hulyo 31 sa tema: “Sa Wastong Nutrisyon ni Mommy Siguradong Healthy si Baby” nga gipa-ngulohan ni Municipal Mayor Juanario A. Item.
Ang unang adlaw sa kasaulogan nga tugob sa kamabulukon og kasadya nagpasiugdag Nutri-Parade, Literary Musical Program, Band Exhibition nga giapilan sa San Jose National High School og sa Blessed Trinity College og Nutriti-Poster with Slogan Contest.
Ang Nutri-Parade gisalmotan ning mosunod: PNP, BFP, National, Provincial, Local officials and employees, Blessed Trinity Elem. School band, Grade V & VI pupils, Talibon Central Elem. School band, BTC band, 3rd&4th yr. H.S. students, Maranata Christian Academy, SJHNS band, Bohol Institute of Technology IC band, teachers and General Public.
Ang nitambong nga naglingkod sa itaas sa stage naglakip nila Mayor Item; MHO/MNAO Dr. Francisco C. Ngoboc,Jr. ;Carlos P. Garcia Memorial Hospital Chief Dr. Harold Gallego, Mun. Kagawad on Health Thomas Cornelio, MGOO Angelo S. Mahinay, og MPDC Officer Engr. Ednardo Avenido.
Si Mayor Item, sa iyang nutri-message nipalanog sa iyang undanon og haom nga mensahe sa alang sa maong kasaulogan, human sa welcome Address nga gihatag ni Dr. Ngoboc.
Dunay mga intermission number gikan sa BIT-IC, SJNHS, Bohol Maranatha Christian Academy, og BTC. Si Kagawad Cornelio maoy nihatag sa panak-op nga pabig-pulong.
Si Mrs. Alberta B. Lagumbay, sa DSWD sa Talibon gitahasan nga master of ceremony. Sa laing bahin, ang nahukman nga mananaog sa Nutri-Poster with Slogan Contest mao ning mosunod: BTC- 1ST; SJNHS-2nd ; BTC og SJNHS, tie sa 3rd.
SJDVS nagpili’g mga PTA Opisyal
Ni: Admi Valmores
Hulyo 6, 2008
|
TALIBON - Ang St. John D. Vianney School nga nahimutang duol sa duha ka barangay sa Poblacion og sa San Isidro ning lungsod nagpili’g iyang mga opisyal sa Parents-Teachers Association (PTA) sa niaging Hunyo 27 alang sa tuig 2008-2009.
Ang mga napili nga PTA opisyal mao kining musonod: Mary Grace Polestico, Presidente; Teodoro Rosales, Bise-Presidente; Genevive Garcia, Kalihim; Mel Dianne Gabisan, Mamahandi; Imelda Garcia, Tigsusipi; Eunice Ma. Gay Pogoy ug Eugene Apostol, mga tigpamaba; Nida Torrejas, Rhodora Remoreras, ug Ness Valenzuela, mga tigbantay sa kalinaw.
Ang maong bag-ong tulunghaan adunay pagtugot gikan sa Department of Education nga maka-enrol ug pre-schoolers, primary ug elementary schoolers.
Ang environment o palibot sa St. John D. Vianney School kansang area may igong kadak-on ug gilibotan sa mga kakahoyan, adunay pagka little Baguio, hayahay ug may kabugnaw inighuyop sa hangin.
Gidumala kini sa tag-iya nga si Mr. Ricardo Martinez. Si Mrs. Fredeswenda Alcazar gitahasan nga maoy consultant, ug si Mr. Generalito C. Valmores, ang school principal.
Sa pagka-karon aduna lamang pito (7) ka magtutudlo.
TALIBON NEWS ARCHIVES:
Hunyo 2008
Mayo 2008
Abril 2008
Marso 2008
Pebrero 2008
Enero 2008