Lumud nasapon sa mga mananagat
Ni: Boy Luzon
Hulyo 27, 2008

Usa ka Lumud (Dolphin) nga adunay gitas-on kapin sa usa ug tunga ka dupa ug usa ka ruler ang gidak-on sa lawas ug dili mominus sa 80 kilos ang timbang nasapon sa duha ka mga mananagat didto sa sitio Moalong, Barangay Basak, Loon, Bohol. Ang maong Lumud adunay mga samad sa lawas niini. Gitambalan kini sa mga tinugyanan sa Provincial Veterinary Office ug gibuhian usab ngadto sa lawod. (Boy Luzon)

LOON - Usa ka Lumud (Dolphin) nga adunay gitas-on usa ka dupa ug tunga, usa ka ruler ug tunga ang gidak-on sa lawas ug dili mominos ang timbang sa 80 kilos ang nakuha sa panagatan ni kanhi barangay kagawad Moises Labastida sa may ala una ang takana sa kaadlawon niadtong Hulyo 24, 2008 didto sa kadagatan sa barangay Basak, Loon.

Gumikan sa iyang kahadlok ug kahingawa iya kining gibuhian, ug sayo sa buntag laing mananagat ang nakasakop ug nailhan sa ilang mga pangalan Cresencio Palomares, 38, minyo ug Alipio Sedero 28, mga molupyo sa Sitio Moalong, Basak, Loon.

Ilang nakit-an ang dolphin ga naglutaw-lotaw sa kadagatan. Nasayran ang maong Dolphin adunay mga samad, usa niini sa may tiyan, sa may ikog, gidudahan nga gisapang sa wala mailhi nga mananagat.

Ang mga elemento sa kapolisan sa maong lungsod pinangulohan ni P/Sr Inspector Cesar Degamo Cañete ug iyang kauban SPO1 Alfredo Ancheta Jr., PO1 Jake Catane, PO1 Donald Nuera ug PO3 Romy Pacot miresponde dayon sa dihang sila gipahibalo aron makuhaan og mga detalye kon unsay hinungdan sa pagkadagsa sa maong dolphin.

Subay niini si Cañete mitawag dayon ni Mayor Lopez, ug matod pa sa Mayor iyang pahibaloon ang mga tinugyanan sa BFAR aron kahimoan kon unsay maayong disposasyon ang Dophin, labi na kay dunay mga samad ang lawas.

Dugang niini ang maong Dolphin gidala sa mga mananagat sa dunggoanan ug gihiktan ang ikog aron dili mawala.

---

Makita sa hulagway ang mga opisyales sa Brgy. Cogon Norte sa lungsod sa Loon atol sa aktwal nga demsonstrasyon kabahin sa paggama og kompost laba-yanan og mga malata nga basura pinanguluhan ni Carmelita Florenosos, technician sa Municipal Agricultural Office sa maong lungsod. Subay niini, gipa-hingusgan sa LGU ang maong programa aron makabaton og kalimpyo sulod ug gawas sa palibot sa panimalay, ingon man ang kalikupan ug ang kadagatan. (Boy Luzon)

---

Brgy. Cantaogon adunay mga butang pagpalambo sa turismo sa Loon
Ni: Boy Luzon
Hulyo 27, 2008

Tipik lang kini sa hulagway ang makitang Pi-ong ug Cabantian Falls sa Brgy. Cantaogon sa lungsod sa Loon, nga makahatag og maanindot nga talan-awon sa natad sa turismo. Boy Luzonniini gipahingusgan sa LGU ang maong programa aron makabaton og kalimpyo sulod ug gawas sa palibot sa panimalay, ingon man ang kalikupan ug ang kadagatan. (Boy Luzon)

LOON – Dakong kalipay ang gibati ni Brgy. Capt. Narciso Florenosos, nga ang Brgy. Cantaogon usa sa mga mahimong tourist destination ning lungsod, gumikan sa duha ka mga maanindot nga gasa sa kinaiyahan – ang Pi-ong ug Cabantian Falls.

Gipahigayon ang ika duhang pagsurvey niadtong milabayng semana, inabagan ni Mayor Lloyd Peter Lopez, Ricky Masamayor, Chairman on Eco-tourism and Peace & Order Committee, Chen Reyes Mecias, Chariman sa Environmental Protection and Conservation, expert in eco-tourism development sa kaulohan, chief barangay tanod Dodoy Almedilla, Brgy. Capt. sa Canmaag Zacarias Simacon, mga tourist guide gipangulohan ni Redemptor Razalo, Clent Suello, Ruel Garnica, Lino Lasco, ug Dwight Longos, ingon man usab Reigh Monreal secretary sa buhatan sa maypr, ug Je-je Mesina sa NGO’s.

Ang maong kalihukan maoy gitutokan ni Mayor Lopez lang pag-ugmad sa mga maanindot nga butang rekursos naturales nga gasa sa kinaiyahan nga ang Canatogon posibvleng usa sa mahimong tourist destination sa pagpaningkamot ni Brgy. Capt. Florenosos.

Dugang niini ang Moalong River adunay sentimental values sa panahon nga diin nagmalampuson ang mga guerilyang Bol-anona nakig-bisog sa mga pwersang Hapon, ug ang Cantumacad sa mga unggoy nag nabuhi sa maong lugar, ug ang isla sa Cabilao sa mga manindot nga beach ug resort, ug uban pang mga barangay, nga makahatag og pagpalambo sa natad sa turismo sa maong lungsod.

Suspek sa pagpangawat og santos nasikop
Ni: Boy Luzon
Hulyo 27, 2008

LOON – Nagmalampuson ang mga elemento sa kapolisan ning lungsod, pinangulohan ni SPO2 Alfredo Ancheta Jr., PO3 Emerito Paulinio, PO2 Ambrosio Geolina, PO2 Alexander Nunez ug PO1 Jakae Catane, ug sa pagtambabayayong sa mga kapolisan sa lungsod sa Maribojoc sa pagsikop sa usa ka suspetsado nga nahilambigit sa kasong pagpangawat og santos imahen didto sa lungsod sa Corella.

Nasikop kini niadtong Hulyo 10 sa may alas 6:00 pasado sa hapon samtang nagsakay og truck de pasaheroan didto sa Maribojoc.

Ang suspetsado giila nga si Franklin Calipes y Oarminto alyas Pangag, 35 anyos, ulitawo, nagpuyo sa Brgy. Catagbacan Sur, Loon.

Pinasikad sa warrant of arrest nga giluwatan ni Judge Achilles Melicor sa RTC Branch 4 sa dakbayan sa Tagbilaran sa Criminal Case No. 13834.

Si Calipes nabilanggo sa Loon PNP Jail ug pagkakaron gibalhin ngadto sa BDRC sa Brgy. Cabawan sa Tagbilaran. Si Calipes nag-atuang og sumbong basi sa salaod nga iyang nabuhat ug girekomindar ang pyansa nga P34,000 alang sa iyang temporaryong kagawasan.

Mga kapitanes nagtuki sa turismo
Ni: Boy Luzon
Hulyo 20, 2008

Si Chen Reyes Mecias (ang nagsulti, nagkupot og mikropono) atubangan sa mitambong kapin sa 40 ka mga partisipante atol sa maong seminar sa turismo. (Boy Luzon)

LOON – Si Mayor Lloyd Peter Lopez mipahigayon og hiniusang tigum dili pa lang dugay tali sa 15 ka mga barangay kapitan, mga NGO’s, ug mga nagkadaiyang head of office sa LGU, mge sakop sa Sangguniang Bayan uban ni Bise Mayor Edwin Ladeza, mga pribadong sektor sa katilingban, ug ingon man gilangkoban kapin sa 40 ka mga partisipante kabahin sa orientation seminar on eco-tourism, nga pinasiugdahan ni Chen Reyes Mecias, consultant on Tourism Planning and Environmental Management.

Ang konsepto sa maong kalihukan aron pagdevelop sa mga maanindot nga butang nga gasa sa kinaiyahan, aron mapalabo ang turismo pinaagi sa suporta sa mga opisyales sa barangay, ug ang mga katawhan.

Kini maoy gitutokan sa kagahanang lokal, ug dugang mga pagtuon aron makabaton ang lungtsod sa teknolohiya sa natad sa turismo.

Subay niini ang lungsod mogahin og ubay-ubayng pondo aron igugol sa natumbok sa giplanong proyekto kay ang lungsod sa Loon usa sa mga tourist destination sa umaabot nga mga katuigan.

Cogon Norte nagbansay-bansay sa Natural Family Planning
Ni: Boy Luzon
Hulyo 20, 2008

Mao kini ang hulagway sa mga partisipante ug mga facilitators atol sa gipahigayong pagbansay-bansay sa Natural Family Planning sa Brgy. Cogon Norte sa Loon. (Boy Luzon)

LOON – Usa ka adlaw ang gipahigayong pagbansay-bansay dili pa lang dugay sa Brgy. Cogon Norte kabahin sa Responsible Parenting Movement Natural Family Planning (RPM-NFP) Program.

Ang maong programa pinasiugdahan sa Commission on Population ug sa pagtambayayong sa Department of Health (DOH), ug ang Local Government Unit sa lungsod.

Ang maong kalihukan gidumala sa mga facilitators sa mga nurse sa DOH, Non-Government Organization, ug ang Department of Agriculture.

Ang konespto sa natumbok nga kalihukan aron pagplano sa pamilya nga adunay maayong kaugmaon, ang mga kabataan, ingon man usab aron dili magkalisud-lisod ang mga ginikanan ug makabaton ug maayong trabaho para sa malipayon ug hamugaway ang entiro pamilya.

Nasayran sa JBBN adunay 15 ka mga barangay ang mipartisipar sa pagbansay-bansay libre sa allowance nga P200 ang madawat sa matag magtiayon, ug libre pa sa snacks, sa usa ka adlawng pagbansay-bansay.

Dugang niini, 11 ka mga magtiayon ang mitambong atol sa maong kalihukan nga nagpangidaron sa 20 ug 45 anyos.

Ecological Solid Waste Management alang sa Loon malampusong gisubhan
Ni: Boy Luzon
Hulyo 20, 2008

Si Mayor Lloyd Peter Lopez ug Bise Mayor Edwin Ladeza, ug mga technical working group atol sa pagsubo sa RA 9003 Ecological Solid Waste Management (ESWM.) (Boy Luzon)

LOON – Nagmalampuson ang gipahigayong adlaw sa pagsubo sa RA 9003 Ecological Solid Waste Management (ESWM) niadtong Hulyo 15 (Martes) nga tinambongan sa mga kawani sa Local Government Unit (LGU) pinangulohan ni Mayor Lloyd Peter Lopez, ug ang mga membro sa Sangguniang Bayan pinangulohan ni Bise Mayor Edwin Ladeza, sama ni Kag. Ricky Masamayor, Kag. Damaso Pasilbas, Kag. Ignacio Castil Jr., Kag. Josephat Palma, Kag. Narsing Neri, Kag. Lokoy Legitimas, ug Kag. Precy Branzuela.

Ingon man ang representante sa Bohol Environmental Management Office (BEMO), Fe Tandugon, mga head of office sa nagkadiyang buhatan, mga kadagkuang opisyales sa Department of Education (Dep-Ed) sa habagatan ug amihanang bahin, mga tinun-an sa nagkalain-laing tulunghaan sa elementarya ug sekondarya, ug sa mga pribaong tulunghaan sa lungsod, mga membro sa Technical Working Group (TWG) sa Solid Waste Management, ug ang mga membro usab sa Liga ng mga Barangay pinanguluhan ni Cesar Pedrigal.

Gibutyag sa JBBN maoy unang adlaw ang maong kalihukan nga diin ipatuman sa pagbahin-bahin sa mga basura, nga gilangkuban sa 15 ka mga barangay sa daplin sa National Highway, isip unang hugna sa natumbok nga kalihokan.

Subay niini, nagk-anayon si Mayor Lopez sa iyang mabolokong mensahe, nga gikinahanglan ang hiniusang suporta tali sa mga katawhan, kay ang mga basura hipuson sa tukmang mga pamaagi, kay ang limpyong barangay, maoy gabayan alang sa mauswagon, malambuon ug maprotihiran ang panglawas sa mga katawhan.

Dugang niini, adunay masapi-an kabahin sa mga basura sama sa mga recyclable materials magamit pa nga mabaligya, o mapalit sa mga junkshop nga tindahan.

Ug ang lungsod karon adunay bag-o nga compact truck nga maoy mohipos og kargahanan sa mga delata ug special nga basura.

P3.350M nga tunghaan gisubhan
Ni: Boy Luzon
Hulyo 13, 2008

Nakuhaan og hulagway sa JBBN ang kalihokan atol sa pagsubo sa P2.350M nga kantidad sa upat ka lawak sa publikong tulunghaan sa elementarya sa barangay Basac, Loon. (Boy Luzon)

LOON - Gipahigayon ang pagsubo sa upat ka lawak sa pang publikong tulunghaan sa elementarya ug rehabilitasyon sa Marcos type building didto sa Brgy. Basac, ug ingon man sa Brgy. Ticugan dili pa lang dugay.

Ang proyekto sa Brgy. Basac mikabat og P2.350 milyones ka pesos ang gigugol gikan sa Kagamhanang Nasyonal ubos sa pagpaningkamot ni Estella Orcullo, ug sa iyang kaubang mga magtutudlo ug PTCA President Victorio Malnegro, Jr., uban sa pagsuporta sa mga opisyales ug pagtambayayong ni Kongresista Edgar M. Chatto.

Si Chatto maoy miputol sa
laso inabagan ni Board Member Yul Lopez, Mayor Lloyd Peter Lopez, DPWH Engr. Celestino Adlaon, ug mga kadagkoan sa DepEd Dr. Ma. Linda Namocatcat, Carmelita Restificar and area consultant sa Loon sa amihanang bahin, Francisca Sevilla ang values supersvisor, Fernando Castañares ang schools district supervisor, ug Vicente Sagetarios ang head teacher sa tulunghaan sa Cogon Norte, Brgy. Capt. Judie Marie Veloso ingon man mga kaubang opisyales sa barangay, Avelia De Vera sa De Vera Construction ug mga kapitan sa silingang mga barangay sa Basac.

Samtang ang tulunghaan sa Brgy. Ticugan mikantidad og usa ka milyon ka pesos, diin si Pureza Chatto maoy mitambong atol sa gipahigayong pagsubo niini.

Dakong kalipay ang gibati sa mga magtutudlo ug sa hiniusang suporta sa mga ginikanan nga napatuman ang maong proyekto, nga usa sa labing ulahing kalamboan sa natumbok nga tulunghaan sa amihanang bahin.

Dugang niini, ang maong tulunghaan daghang mga tinun-an, ug misaka ang enrollment karong tuiga. Hinungdan sa pag-ugmad ug dugang edipisyo sama sa upat ka lawak nga labing maanindot, hamogaway ug komportableng tulunghaan.

Kong. Chatto miugmad sa Barangay Scholarship Program
Ni: Boy Luzon
Hulyo 13, 2008

Si Kongresista Edgar Chatto

LOON - Gipahigayon ang espesyal nga tigum sa Liga ng mga Barangay niadtong Hulyo 9, 2008 didto sa Hayahay building ning lungsod pinangulohan ni LnB president Cesar Pedrigal tinambongan sa 67 ka mga kapitan sa lungsod.

Mitambong atol sa maong tigum si Kongresista Edgar Chatto kinsa mipahibalo sa giumol niini nga programa pagtabang sa mga estudyante nga anak sa mga opisyales sa barangay ingon man ang SK chairman aron makapadayon sa ilang pagtungha nga libre ang matrikula.

Ang Barangay Scholarship Program eksklusibo kining magamit sa CVSCAFT system, ang buhaton sa estudyante mao lamang ang pagkuha og sertipikasyon gikan sa buhatan sa Mayor, DILG, ug dad-on ngadto sa buhatan ni Chatto.

Dugang niini, maoy gitutokan ni Chatto ang kabahin sa inprastraktura, kaugmaran alang sa maayong panglawas, panginabuhian ug sa natad sa edukasyon.

Barangay Hall sa Cogon Norte napanindot na
Ni: Boy Luzon
Hulyo 13, 2008

LOON - Ang bag-o ug modernong pagka desinyo sa barangay session hall sa Cogon Norte sa lungsod sa Loon, nakabaton na og labing maanindot, ug comportable sa ilang tagsa-tagsa kaugalingong lamesa, ug cabinet ang mga barangay officials gumikan sa pagpaningkamot ni Barangay Kapitan Alexander Luzon ug sa hiniusang pagtambayayong sa mga sakop sa Sangguniang Barangay.

Ang maong proyekto nga gigugol nagkantidad og kapin sa P30,00.00 gikan sa IRA fund sa natumbok nga barangay. Kini maoy labing ulahing kalambuan sa barangay.

Apil na niini ang electrical installation ug uban pang mga kahimanan nga iya sa barangay. Nasayran ang maong mga lamesa sa mga barangay official, usa sa mga importanteng kahimanan, ilabi na sa panahon sa ilang pagsesyon.

Gisugdan na niadong Hulyo 1, 2008 ang pagduty sa mga opisyales sa barangay, gikan sa adlawong Lunes ug Byernes, sa matag alas 9:00 ug 11:00 sa buntag, ngadto na sa alas 2:00 ug 4:00 sa hapon, aron paghatag og makiangayong serbisyo sa katawhan.

Public hearing gipahigayon alang sa mga tricycle operator
Ni: Boy Luzon
Hulyo 13, 2008

LOON - Atol sa regular nga tigum sa Liga ng mga Barangay, gipahigayon ang usa ka public hearing kabahin sa pag-usbaw sa pletihan sa tanang mga depasaheroang tricycle sa lungsod sa Loon nga gipasongdahan sa mga presidente sa mga tricycle operators, sama sa loon tricycle association ug ang Nagkahiusang Tricycle Operators and Drivers (NAGTRIOD).

Ang maong kalihokan tinambongan sa presidente sa LnB Cesar Pedrigal, ingon man kagawad Narsing Neri chairman public works and highways, Kagawad Ignacio Castil, Jr. Kagawad Lokoy Legitimas, ug ang 67 ka mga Barangay Kapitan.

Nakab-ot sa maong panagtigum nga ang minimum nga pletihan P7.00, ug 1.00 ang umento sa first five kilometer. Ang maong public hearing nagmalampuson, ug pagadad-on sa Sangguniang Bayan (SB) atol sa ilang session aron pagabuhatan og ordinansa, aron mahimong legal ang pag-
implemintar ngadto sa katawhan.

Subay niini maoy gitotokan sa magbabalaod sa lungsod aron mahatagan ug aksyon ang mga tricycle operators, sa ilang piangayo nga usbaw sa pletihan niining pagtaas sa gasolina.

District Consultative Meeting gipahigayon
Ni: Boy Luzon
Hulyo 6, 2008

LOON - Gipahigayon ang District Consultative Meeting didto sa Barangay Hall sa Cuasi sa lungsod sa Loon di pa lang dugay ubos sa pagpaningkamot ni District Kagawad Ignacio Castil Jr. ug sa pagtambayayong ni Brgy. Kapt. Wilfredo Pergamino, ug sa iyang mga Barangay officials.

Ang maong kalihokan tinambongan ni Mayor Lloyd Peter M. Lopez, Bise Mayor Edwin Ladeza, mga membro sa Sangguniang Bayan sama ni Kag. Ricky Masamayor, Kag. Manuel Veloso, Kag. Damaso Pasilbas, Kag. Josephat Palma, Kag. Lokoy Legitimas, Kag. Ignacio Castil Jr., Kag. Precy Branzuela, Kag. Narsing Neri, LNB Pres. Cesar Pedrigal, ug ex-officio SK Chairman Evar Axel Ericson, ingon man usab si PNP Chief Cesar Degamo Canete, mga head of office sa nagkadaiyang buhatan, ug ang 9 ka managsilingang barangay kapitan.

Ubay-ubay ang gihisgutan atol sa maong tigum kabahin sa pagpanubig, pagpananom sa mga utanon, ug mga lagotmon nga mga pagkaon, kabahin usab sa kalinaw ug kahusay, ug ang pagpundar og Loon Auxiliary Police aron madugangan ang kwerpo sa kapolisan sa lungsod, sa magbalantay sa kalinaw.

Matod pa ni Mayor Lopez, ang lungsod naggahin og ubay-ubay nang pundo nga P1-Milyon para sa agriculture aron matikad ang mga bakanteng luna ug aron usab makunhoran ang kapit-os nga gipas-an sa mga katawhan.

Dugang niini, may laraw ang lungsod pagpalit og mga ekipos sama sa bulldozer, ug back hoe aron matadlasan og dugang mga farm-to-market roads ang mga kabarangayan aron sayon pagdala ang ilang produkto ngadto sa merkado.

2-anyos gibiyaan sa inahan
Ni: Boy Luzon
Hulyo 6, 2008

Sa hulagway makita si Edna Sitoy nga nagkugos sa iyang bata, milakaw kini ug hangtod karon wala mouli ug gipangita sa iyang bana. Kinsa man ang nakaila niini palihog pagtaho sa JBBN, o sa labing dool nga police station, ug dili ba hinoon sa labing dool nga Barangay Captain. Ang bata nga gikugos wala dad-a sa inahan. (Boy Luzon)

LOON - Si Reynante Magnanao molupyo sa barangay Ticugan, Loon, mipahibalo sa JBBN nga ang iyang asawa si Edna Sitoy milakaw niadto pang Byernes sa buntag Hunyo 27, 2008, ug hangtod karon sa atong pagpatik ning balita wala pa mouli.

Kinsa man ang nakabasa niini ug nakaila ni Edna, gipapauli siya sa iyang bana, kay ang iyang anak nagpangidaron og duha ka tuig nagsige og hilak, kay nangita sa iyang inahan.

Matod pa sa iyang bana si Reynante wala man siya dagmali, ug gikinahanglan ang iyang kaakuhan sa pag-atiman sa ilang anak.

Hinoon wala pa sila makasal kay bag-ohay pa lamang nagpangidaron og 18 anyos si Edna.

Si Reynante andam pagdawat ni Edna sa higayon nga mouli sa ilang pinuy-anan aron magpabilin ang ilang paghigugmaay, ug panaghiusa.

Sa hulagway ang usa ka baksan nga adunay kapin sa duha ka dupa ang gitas-on nga nadakop ni Samuel Paentes didto sa Barangay Ticugan, Loon pinaagi sa pagtikbas sa makadaghan, niadtong milabayng Myerkules alas 2:00 pa sa kadlawon gumikan sa paglugpad sa mga manok nga ilang nahimutangan ug misulod kini sa kusina sa balay ni Paentes. Nasayran nga usa ka manok ang nalamoy sa bitin, hinungdan luya na kini gumikan sa kabusog. (Boy Luzon)