Pro la amo de l' Sinjoro

Pro la amo de l' Sinjoro
    Ne timos ni.
Ne ŝanĝiĝas Difavoro,
    Ne timos ni.
Nin vivigas Krista morto,
Instruadas lia vorto,
Ŝirmas nevenkebla forto:
    Ne timos ni.

Se nin tentos akra provo,
    Ne timos ni.
Plene savos Dia povo,
    Ne timos ni.
Dion amu do kun fido,
Kriston servu kun avido,
Sekvu al Spirita gvido:
    Ne timu vi.

Lumas antaŭ ni la vojo,
    Ne timas ni.
Fido kantas en malĝojo;
    Ne timas ni.
Nin ĉirkaŭos amo Dia,
Zorgos pri bezono ĉia,
Dum la tuta vivo nia
    Ne timos ni.