ai raushniyon ke shehar

- Faiz Ahmed 'Faiz'

sabza-sabza sookh rahi hai pheeki, zard dopehar
deevaron ko chaat rahaa hai tanhai ka zehar
door ufaq tak ghat'ti, barhti, uth'ti, girti rehti hai
kohr ki soorat beraunaq dardon ki gadli lehar
bastaa hai is kohr ke peechhe raushniyon ka shehar

ai raushniyon ke shehar
kaun kahe kis samt hai teri raushniyon ki raah
har jaanib benoor kharhee hai hijr ki sheharpanaah
thak kar har soo baith rahi hai shauq ki maand sipaah

aaj mera dil fikr men hai
ai raushniyon ke shehar
shabkhoon se munh pher na jaaye armaanon ki rau
khair ho teri lailaaon ki, un sab se keh do
aaj ki shab jab diye jalaaen, oonchi rakhen lau