Een korte Wiehnachtsgeschichte

Vun Johnny Meyer

Glieks to'n Anfang vun Krieg weer us Vadder mit'n Motorrad bi't Militär verunglückt. Mien Süster weer man just 3 Monat old un ick so bi de dree Jahr old, at passeert is.

Dat wi Kinner kienen Vadder mehr harrn, keem us jo noch nich to Besinnung wiel wi jo noch to lütt weern.um de Tiet. Later an at wi wat oller weern un use Novers vun usen Vadder vertelln deen, keem us dat uk in'n Kopp, dat wi doch uk een Vadder hebben schulln, so at in anner Famieljen. Use gooden Navers aver seegen to, dat wi Kinner nich to kort keemen. Uk de Lüüd vun de Füürwehr, wor us Vadder jo uk bi wesen weer, deen veel vor us.

At dat nu in denn Krieg rin gung,un de Tieten vun Daag to Daag slechter wurn, keemt dor up an sick sülvens un anner Lüüd to hölpen so goot at man gung. Use Navers de seegen to dat wi Brause un Koken up'n Disch harrn to'n Geburtsdaag. Wenn ick maal een Platten harr an mien Kinnerfohrrad , denn weern dat de Navers de mi dat woller flicken deen.

Uk bi Unkel Fritz de Schoster in us Dörp, wenn wi dar bi em up'n Dreebeen seten un dar up töven mossen bit he use Schoh woller trecht flick harr, wiel wi jo man blots een paar Schoh harrn. Sien Froh Tante Miene , se gäve us towielen , wenn wi nich to faken keemen, uk woll mal een Appel or een vun de lütjen Ködelbeern de wi jo nich utstahn kunnen.

Jo un denn, at up Wiehnachten to gung, dar keem Unkel Hinnerk vun güntsiet vun de Straat. He wull us even affholen, he wull us mit nehmen in'ne Stadt um denn Wiehnachtsmann to besöken.

Unkel Hinnerk harr sien best Füürwehrtüg an wat he harr un us Mudder harr us Kinner uk moi trecht maakt, so goot at man gung.

In't Grootherzogliche Slott , mitten inne Stadt, wor all de annern Kinner tohoop keemen de ehren Vadder verlorn harrn. De Kinner keemen ut Stadt un Land, se wurn all vun verscheeden Füürwehrlüüd herbrocht.

In denn grooten , breeten Flur wor de Sunn dört Finster scheen, full mien Blick glieks up eenen vun de grooten Glasskasten, de dar stunnen. Dat groote Schlachtschipp harr mi dat furrs andoon. Unkel Hinnerk meende noch dat dat woll de "Bismark" weer, een ganz berühmted Schipp to de Tieten. Dar weern annere Modelle vun Stukas, Messerschmidt's, Schipps, Poppen, Burgen mit Suldoten, Autos, Lastwagen, Rennwagen, Teddybäre un "Mensch ärger dich nicht," all'ns weer dar utstellt. Soveel Speelsaken harr'k mien Leevdaag noch nich seen.

Dar up maal, wat weer dat? Een Tuten un Blosen, rrring, rrring un woller rrring, rrring. All de Kinner leepen nah de Finster to um to sehn wat dar keem.

Buten up de Straat keem een grooten open Füürwehrwagen mit Leddern anne Siet un noch een ganzen Hoopen annere Füürwehrlüüd un noch mehr inpackte Geschenke. De hungen dar all anne Siet umto. Boven up denn Füürwehrwagen seet de Wiehnachtsmann un lachte övert ganze Gesicht. Weer dit een Droom? So wat geev doch nich, een richtigen Wiehnachtsmann?

Dit weer dat eerste maal dat wi een richtigen Wiehnachtsmann to seehn kreegen.

Mien lütje Süster harr sick in een vun de groten Poppen verkeeken just dar at de Wiehnachtmann keem un nu wuss se woll nich recht wor se toeerst henn schull, rein vernarrt weer se. Unkel Hinnerk nehm se gau up'n Arm so dat se beter ut Finster kieken kunn, Minsch wat een Upregung.

In denn grooten Saal mit denn fullwussen Wiehnachtsboom, mit all de brennende Kersen, un de gewaltig grooten Kronlüchters anne Deek, dar in dissen grooten Saal gung de Wiehnachtsmann so gans dicht an us vorbi un mien Süster gung gau een beten nager nah Unkel Hinnerk un is em denn up'n Schoot kroopen, se harr doch woll een beten Angst.

At de Fier denn anfung mit singen un Gedichte upseggen, noch mehr singen un denn wurrn de Geschenke utdeelt an us Kinner. Twüschen dör geevt noch Koken, Bointjen un Nöten De Wiehnachtsmann harr vor jeden een Geschenk, at mien Süster anne Reeg keem dar moss Unkel Hinnerk mit, dat hulp nix, se wull dar nich alleen hen. Harr em bold denn Arm utreeten, wat een Upregung dat weer, over at de Wiehnachtsmann de groote Popp an mien Süster geev un mi dat groote Modell vun de "BISMARK," dar bleev uk mi de Spraak weg. Ick weer in een anner Welt, so wat harr'k noch nich beleevt. Dat groote Schlachtschipp de "BISMARK" wat dar eben noch in denn Glasskasten weer, dat schull ick nu hebben? "Jo" seggt Unkel Hinnerk, dat hett de Wiehnachsmann blots vor di alleen maakt, dat du dar mit speelen kannst un du schass di dar an frein" Dat heff ick uk, vun denn Daag an heff ick noch lang an denn Wiehnachtmann glövt, he hett us uk in tokamen Jahrn nich eenmaal vergeten.