بهو فندق ... بلد غربي... في فصل الصيف
على ميعاد أو صدفة جمع أجناس مختلفه
ما فيهم أحد وافق أحد ثاني على تعريف للمنطق
بهو فندق فيه الناس مكتظه
فخامة تكسي الجنبات
نادل يحمل الطلبات
على أواني من فضه
هنا تجار يحكوا اسهم وسندات
هنا سمسار...هنا شاعر...هنا بنيــات
هنا فلكي...هنا صاحب سمو حركي
هنا فنان...هنا متعهد السهرات
هنا يحكوا عن الاوضه
هنا يحكوا عن الموضه
هنا يحكوا عن السادات
وبركنٍ ماهو للصفوه
بجنب الباب كرسيين
حوار يدور بين اثنين
ملامحهم تودي يم شرق اوسط
حيل اصحاب وهيئتهم بسيطه أو بعد أبسط
شف سايح من اليابان يداعب آلة التصوير
يغازل آلة التصوير
- سايح هذا يا غلبان؟!!!
هذا السايح البارح كانت صورته تحكي بصدر الصفحه الاولى
يقولوا خامس أغنى شخص في العالم
واظن انه وربي وحده العالم
جمع هالمال والثروه في استيراد او تصدير
- نسى الكاميرا على الكرسي!!!
- لا ياشيخ مثل هذول ما ينسوا!!!
- صدقني نسى الكاميرا على الكرسي!!!
لا والله رجع خذها
ظنك وين هو رايح؟
- أكيد يزور له متحف
- سخيف وهوايته اسخف!!!!
- شفه مستني جنب الباب،، وش ينطر؟
- اظنه ينتظر تاكسي
ركب تاكسي
- اقول عدنان فاخر حيل هالفنجان
خذ شايك قبل يبرد
- اقول احمد،، هذاك هناك هو منهو؟
- اي واحد؟
- هذاك اللي معه واجد
- تخطرف انت أو عميان؟
هذاك فلان ... هذاك فلان
هذاك اللي كلامه منتهى الحكمه وجوده مثل غيث السحب
هذاك اللي اللي لاجله ترخص ايامك وتقضي النحب
هذاك اللي يهينك وانت تتلقى إهاناته بصدرٍ رحب
هذاك اللي شعورك نحوه مبين مزيج من الغلا والحب
هذاك اللي إذا لا قدر الله راح يغطي حزنك الدنيا وتهمس راح ابن الكلب!!!
كذا يا احمد؟
 شايفني انا منافق
انا ما اسمح ولا اوافق
تظن اني بقلب اسود
كذا يا احمد؟
لا تزعل انا آسف
ترا الدعوى سوالف
شف هذا خفيِف دم
يضحك هذا من هذا
خفيف دم
ويعطونه
- يعطونه؟!!!!!
- يعطونه
يرجع باكر لهذا
يقطع ذاك
يشرشح اصله وفصله بخفة دم
- ويعطونه؟!!!
- يعطونه
ويرجع بالاخير ضاحك على هذا وعلى هذا
اقول احمد ظنك هو رصيده كم؟!!!
دقيقة صمت فرضها جيت النادل يشيل الشاي
ويقول ان العصير اللي يبونه لحظتين وجاي
- شف الشاعر
هذيك الحلوه تضحك له!!
- اي واحد؟
- شفه واقف يوقع دفتر لطفله
تخيل... ياخي يقولوا انه يشتري شعره
من الشاعر اللي الشاعر المشهور يكتب له
ياحظه وسيم مشهور ياليتي اكون مثله
قوم نتصور معه
- نقوم نتصور معه؟!!!
ماباقي سوى هذا نكبر راس هالمغرور
خفيف انت وغبي احمد
ودايم فيك هالعله
اقول عدنان...
ترا صاير طويل لسان
- احمد ياخي لاتزعل
ترانا اخوان
تعوذ بس من الشيطان
وانا اسف
ترا الدعوى سوالف
فخمه حيل هالكيسان
- اشرب
- لاتزودها ترا يبين عليك تعبان!!!
- شف مو هذي صاحبتك؟!!!
- هلا والله... إلا والله صاحبتي
تدري...تموت هي فيني
- يارجال خليني... خادعتك
تراها والله خادعتك
- اقول احمد...
عشان انسرقت فلوسك من زبيده!!!
صرت تشوف كل وحده هي زبيده!!!
- ياعدنان خادعتك
انا قصدي لمصلحتك
شفها تكلم الرجال
- اي رجال؟!!!!
اخوها ذاك !!!
- ياعدنان خادعتك
- اقولك ماتبي غيري!!!
- ياعدنان طع شوري
مشاعرها وهم كذبه
- احمد...احترم نفسك
- افا عدنان تمد يدك علي
وهذي السبه؟!!!!
صفعه دوت بركنٍ قريبٍ من هل الصفوه
عراك في بهو فندق جمع اجناس مختلفه
مافيهم احد وافق احد ثاني على تعريف للمنطق
خارج صالة الفندق, شرطيين
يقودوا بالحديد اثنين
ملامحهم تودي يم شرق اوسط
وهيئتهم بسيطه او بعد ابسط
كانوا اصحاب في داخل بهو فندق بلد غربي في فصل الصيف