| Yohanes Manhitu Pung Puisi Dong Pake Bahasa (Melayu) Kupang Mau baca pantun Melayu Kupang ko? Klik di sini! |
| ==================================== Bukan Hari Pantekosta di sini, api balompat di atas loteng orang dong balari pontang-panting dinding su tabongkar, atap taduduk doi dari pohon keringat jadi bubuk sapa pi tau minyak di mana ba�uap sapa pi lihat angin dari mana batiup lidah api baputar dari bawah merata bukan lidah api di hari Pantekosta rumah pung badan sa yang tabakar dia-pung jiwa tu api sonde sambar karna dia su badiri di atas karang neu katong masih bisa tetap pulang Jogjakarta, 9 Oktober 2004 ============================================= Mari Katong Pi ini kapal baroo ada barang tapo'a tapi panumpang kuat dan pegang satu tekad sampe di pulau harapan ombak son bisa dimasparak biar ko dia terus bermaen gelombang sapa bisa tahan biar ko dia tetap bagulung biar ko hidop ini ada warna biar katong yang pasang mata ada menara tua di sebelah laut di sana ada lampu yang terang dari jauh tacium bau cendana dari akar besar yang dibakar ada suara orang maen sasando anak kici manyanyi bolelebo ada pesta deng daging se'i ada acara minum tuak laru jagung katemak menu utama semua orang tawar senyum Jogjakarta, 9 Oktober 2004 ============================================= Takuju be takuju dalam mimpi be lihat lu balari ke� angin kasih tenga lu-pung bayangan be sonde tau musti karmana, hidop gelap ke� gua Jepang pagi ini beta bangun buru-buru dan ini bukan lai mimpi malam ini realitas di muka be-pung mata Tano jadi saksi katong-pung pisah lu su ilang tartiup, iko angin balari Jogjakarta, 11 Oktober 2004 ============================================ Bahasa Kupang merpati baru turun di Penfui taro kaki di Tanah Bolelebo lidah su son sabar mau manari bagoyang, bapote bahasa Kupang bahasa Kupang ko, sapa takut? bahasa Kupang sapa son kenal lu? bahasa Kupang lu son kenal sapa? lu ika seribu lidah, seribu suara dari tanah Flobamora di satu kota coba tanya ina dong di pasar Oeba bahasa Kupang lu punya badan laen lu punya jiwa juga laen, hidop terus sapa bilang lu perusak lidah lurus? sapa omong lu kasmati suara laen? sapa yang tau lu-pung umur berapa? mari katong tunggu matahari naek mari katong lihat ju bulan terang biar ko gelap ta�ondor pelan-pelan cari tempat laen ko sembunyi badan dan itu terang tutup semua yang gelap Jogjakarta, 11 Oktober 2004 ============================================ Malam di Pante Manikin pasir putih jadi katong-pung kasur empuk dua bukit pasir jadi katong-pung bantal dingin pante jadi katong-pung selimut lampu nelayan jadi katong-pung lilin bulan terang jadi katong-pung saksi gitar pung suara hias malam di pante aer laut naek, cuci tumit dua pasang kapiting dong lihat katong dua ko iri di sebelah, kali kici barisik, ma pelan malam jalan terus, pi katumu deng pagi bulan di atas su cape kasih terang katong hanya lampu bagan di laut yang masih mete kasih sinar aer laut di pinggir kota yang mati ikan yang son sadar ada bahaya takuju taga�e gitar pung suara su lama diam � bosan, mati jangkrik pante dong su hanya satu-dua kata katak besar dong hangat di tengah rumput katong, dua badan, satu rasa, sampe pagi Jogjakarta, 11 Oktober 2004 ============================================ Nirmala Pung Nasib muka hias koran ke� Britney Spears ma son ada senyum lai, ke� nona Irak susah, masih berapa banyak di sana? tahan aer mata, nanti sampe kapan? Timor panas, ma son sampe strika Timor kering, ma son kering hati masih ada lai berapa banyak strika yang su bosan naek di baju-celana? langgar laut, sapa yang son mau? punya doi, sapa yang mau tolak? rasa neraka di dunia, sapa suka? hidop ke� di ring tinju, ada baek? Jogjakarta, 11 Oktober 2004 ============================================ Kalu Anak Su Online anak duduk bae-baek di muka komputer bagitu online badan su satu deng kursi tangan lancar ke� kaki manari likurai muka sebentar terang, sebentar gelap dari dulu dia son lepas chatting yahoo karna dia parcaya di sana hati jujur di muka ada coca-cola, ada ju sprite kacang goreng bawang ponu di mulut bikin gigi son bisa punya waktu istrahat asbak rokok su son bisa terima puntung ini satu rasa enak yang opa dulu son tau ini satu rasa baek yang oma dulu son soa sakarang rasa enak turun dari tiang besi dan rasa senang su mangalir dari kabel yang ikat hati yang jauh-dekat jadi satu dan isap kertas rupiah dong dari saku kantor pos son lama lai pasang iklan ko undang katong pi jadi pelanggan Jogjakarta, 11 Oktober 2004 =========================================== Siang di Kampung Solor Kampung Solor, waktu siang sepi, panas, laut mendidih bemo, bis lewat sat-satu jangan bu parcaya diri ko ayun kaki di jalan bolak-balek di lorong bagaya jual senyum Banyak mata yang liar banyak orang dapa sial hilang jam, hilang ju doi polisi kota ada di kantor pencuri kota tetap di jalan lebe baek tidor di rumah ada doi, aman di dompet Kue Solo dar Sikumana Beking carita di Alabama Kampo Solo dapa nama busuk Beking hati ju jadi tatusuk Nae bemo dar kampo Solo konja masih ma'ale kue Solo Musik barisik talinga mau pica Pe'e garganta kal mau bicara Bemo baoleng ke parau bagoyang tapo'a pi datang basonto kir-kanan Jalan balobang bukan angin topan Son tau doi aspal su lar pimana Catatan: Huruf miring itu Om Kribo Bolelebo pung balasan maut Jogjakarta, 11 Oktober 2004 Mau baca pantun Melayu Kupang ko? Klik di sini! |
 |
| Yohanes Manhitu Pung Puisi Dong Pake Bahasa (Melayu) Kupang Mau baca pantun Melayu Kupang ko? Klik di sini! |