到六月初五為止，台灣連續八工無出現SARS死亡病例、死亡人數維持在八十一人，初四初五無增加可能病例，累積的可能病例有六百七十七人，其中已經有四百六十三人醫好出院矣，攏總猶有二百十四個SARS可能病例患者在病院治療中。初五世界衛生組織正式邀請咱台灣的專家，去參加六月十七欲在馬來西亞舉行的全球抗SARS會議，這是幾十年來第一擺。聽著遮的消息咱真歡喜，亦應該向所有認真拍拼抗SARS的人，甚至犧牲生命的醫療人員，致最大的敬意。

會記得三月底，公視著播出認識SARS的特別節目，由當時任職國家衛生研究院特聘研究員的蘇益仁教授講解，對SARS是啥物？啥物叫做冠狀病毒？按怎傳染？啥物時陣上危險？應該按怎做好預防、、、做真詳細的講解。公視恐驚有人無看著彼個節目，閣在四月初重播一遍，而且拍字幕講歡迎來討這個節目的錄影帶，免錢送你。我不知影各大病院有去討即塊錄影帶抑無，總是我真懷疑是不是所有的醫療人員攏有看過即塊錄影帶？若是有，無應該遮呢悽慘。若是無，實在是枉費公視及蘇益仁教授的用心！

五月三十，台灣大學研究團隊用二十工的時間，研發出一種全新的無毒有機化合物，號名叫作「抗煞一號」，會當互SARS病毒失去感染力，上緊一個月後著會當製成大量的防護裳及口罩等抗SARS用具，這是全世界第一個經過實驗驗證，有崩解SARS病毒效果的新材料。

六月初二，台大病院發表SARS快速試劑研發成果，表示三十分鐘見效。及台大病院進行技術轉移的台欣科技展示即種快速試劑，表示透過全血的血液樣本，十五分鐘著會當用目睭判定是不是有著著SARS，對醫療單位快速篩檢有真大的幫助。

現任衛生署疾病管制局長蘇益仁講大家較拼一下，攏無閣增加病例，可能病例患者若減到六十人以下，希望六月底著會當對世界衛生組織的SARS感染區除名。伊閣提醒大家著愛提高警戒，秋天冬天、天氣轉涼，SARS病毒有可能閣走出來。伊講得真著，即遍SARS在台灣會湠遐緊湠遐遠、互遐濟人著著，若欲認真講起來是警覺性傷低，著著SARS及死去的人實在真冤枉！

感謝所有在台灣拍拼抗SARS的人，互咱對台灣閣較有信心！（綠色和平廣播電台FM97.3歡迎收聽）