კომენტარი თემის ფორუმებზე განხილვისას:
მაგრამ ყველაზე ობიექტური, მტკიცე და დამაჯერებელ-უტყუარი საბუთი ისაა, რომ გვარდია ფინანსდებოდა (ანუ გვარდიელები ხელფასს იღებდნენ) -- მხოლოდ და მხოლოდ შსს ხაზით -- დაფინანსების არავითარი სხვა ლეგალური საშუალება მისი შექმნისას საბჭოთა კავშირში არ არსებობდა (დაფინანსება კი უზენაესი საბჭოს დამტკიცებული ბიუჯეტით ხდებოდა და მასში არავითარი სხვა მუხლი არ არსებობდა).
მოგეხსენებათ ხელფასი ყველას სჭირდება -- ხელფასის ფონდს ბიუჯეტი იძლევა -- ბიუჯეტი სამინისტროების მიხედვით შედგება -- და რომელი სამინისტროს ბიუჯეტით შეიძლებოდა დაფინანსებულიყო გვარდია? ჯანდაცვის? თუ განათლების? ისე, რომ ყველაფერი იმდროინდელ ობიექტურ რეალობაზე დაიყვანება.
ყველაზე ტრაგიკომიკული იმ დროს კი ის იყო, რომ საქართველოს ბიუჯეტით გათვალიწინებული მთელი ფული (დიახ სწორედ ნაღდი ფული -- ურომლისოდაც არც ერთ ოჯახს არ შეუძლია არსებობა) -- მოსკოვიდან მოდიოდა -- უზენაესი საჭოს თავმჯდომარის ზვიად გამსახურდიას ხელფასისთვისაც და მისი პრემიერ-მინისტრის ხელფასისთვისაც (ისევე, როგორც ყველა სხვა დიდი თუ პატარა მოხელისათვის -- მინისტრიდან დაწყებული და რიგითი მასწავლებლით ან ექიმით დამთავრებული) - საბჭოთა სისტემის თვალსაზრისითაც კი კანონიერი საქართველოს ხელისუფლების უზენაესი საბჭოს მიერ ასევე საბჭოთა კანონების სრული შესაბამისობით დამტკიცებული სახელმწიფო ბიუჯეტის გასავლის ნაწილის შესაბამისად.
თვით გვარდიის სტუქტურული ერთეულის დასახელება „გვარდიის მთავარი სამმართველო“ იმაზე მიუთითებდა რომ იგი არ იყო სამინისტროს დონისა - ასეთები იყვნენ მხოლოდ სამინისტროები და სახელმწიფო კომიტეტები. დასახელება სამმართველო (თუნდაც მთავარი) კი იმაზე მიუთითებს, რომ ეს ერთეული სამინსტროზე ან სახელმწიფო კომიტეტზე დაბალი დონისაა და რომელიღაც სამინისტროში ან სახელმწიფო კომიტეტში შედის. ეს რკინის ლოგიკაა!
სიგუა-კიტოვანისა და სხვა პუტჩისტების სპეკულაციები კი გაუთვითცნობიერებელ ხალხზე იყო გათვლილი - და იმუშავა კიდეც -- ასეთები მრავლად იყვნენ -- სამწუხაროდ.
***
რაც შეეხება შინაგან საქმეთა სამინისტროს - შინაგან საქმეთა სამინისტრო ძალზე ფართო ცნებაა და მილიცია(პოლიცია)-ზე მისი დაყვანა საბჭოთა გადმონაშთია. მხოლოდ - როგორც მახსოვს, 1991 წლის აგვიტოს შემდეგ - ალბათ სექტემბერში (უკვე სიგუა-კიტოვანის ტყეში გაჭრის შემდეგ) შეიქმნა თავდაცვის სამინისტრო (წლიურ ბიუჯეტში გათვალისწინებული დაფინანსების გარეშე - რაც უდიდეს პრობლემებს გვიქმნიდა) და აგრეთვე გენერალური შტაბი (ორივეში სულ 25 ადამიანი მსახურობდა).
ეს ყველაფერი სულაც არ ამცირებს არც გვარდიას და არც სხვათა შორის შინაგან ჯარს - რომლის მრავალმა მებრძოლმა გმირულად იბრძოლა 1991-1992 წლების პუტჩის დროს.
მაგალითად მინისტრთა საბჭოს შენობას -- ანუ თქვენი მონა-მორჩილის სხეულს -- მხოლოდ შავფორმიანი შინაგანი ჯარის მებრძოლები იცავდნენ. აგრეთვე -- თქვენი მონა მორჩილისა და თვით პრეზიდენტის დაცვაც სწორედ და ზუსტად შსს სამინსტროში იყო გაფორმებული და ხელფასს იქიდან იღებდა.
ეს ყველაფერი ობიექტური რეალობა იყო -- იმდროინდელი (გარდამავალი პერიოდის) ფორმალური სახელმწიფო მოწყობიდან გამომდინარე.
