Leitung pumpi I et velvel chiangin leh gam khangtou mahmah a kigente America, England, Japan, Korea etc. te hauhsaknate ahoh khapeuh in genkhop pha sain ei gamlam hongtun ua hon report chiangun a thupidan kia uh chilphuan kaijen in genjel uhi. Bangchi dan a amau hichi hauhsak tuam uh a de aw chia I dot a, a gamua nek ding leh silh leh ten readymade a ommai a de aw chi a I dot sau chiangin hi zenzen lou e na a hah sepluat jiak uh ahi, hun awl mahmah neilou uh ahi chiin gen jel uhi.

Awle, huchia na a hah sep chiang ua nei ua, haumai ahih uleh, na a sep chiang ua bang bang zang se uhiam chih ngaihsut tham pha hi. A va hoh kha te leh ei ngaihsutna a panin zong a zat te uh thil dang hilou in khut, khe, bil, mit leh khuak te mah ana hiveve dan ahi. Huchi hileh Taksa pumpi a na zang dik uh chihna himai dan eive. Laisiangthou in, 'Na dam sung tengin gimtaka semin a gah na neta ding chih leh a sem tuh loh mutak ahi' chih a taktak a na zui un, Pathian in ana vualjawl dan ahi.

Na a hah sepua, ahong hauh chiangun pil uh bang sa se in ki ngaisang thei law mahmah a, Ei pau ngial ah houh English te bang Sapte I chi ua, a hau(Foolish) om leh zong sapte chi thouthou di I tel veh.

Amauten mit, bil, khut, khe leh khuak te a zat ding bangtak a a zat chiangua hong hichi mai uh ahihleh en zong zang thei lou ding I diam chiin ki dong le, a hangsan te dawnna tuh hithei tham e chih hi pah lian ding hi. Amaute pha thei I hihleh I om maimai ding uam? A dawnna tuh "Om maimai lou hial ding."

Tulel dinmun a ei paidan bel Innkuan khat a Nu leh Pa hiam khat leh nih kia in na semin a dangten a nekkia si, Kaam/Sepna nei te lah a dangten bangmah sepsawm lou a semtu kia loh ngak ngiungeu, adangten bang mah semlou in ut dandan a om in deihdeih gen zangzang; huchia I omleng mi phalou tuanlou, I tenna Manipur a ding banga a pente hilai tel hanga. Huaijiakin kisa thakin eizong apiang teng zat theih dingin ki chiilin a awl mahmah omlou in na sem chiat lehang tunung chiangin khang ahong kidang ding a, ei zong sap I chih zawjen te etton isuak moh kei ding. Amau zong Pathian siam hi ua, eizong amau banga Pathian siam ihih chiangin AMAU SANGIN HAHSIM ZAW IN HAH SEP zaw lehang banghang a amau sanga thupi zaw lou ding. "Mualdawn khuak bilh ningju bang hongthou dia kangtui vualte'n ei sul nung jui ding hi."

Hiai thu ka ngaihtuah lai in a nuaia Lavui ka gelh khia a, ana ngaihtuah mah dih. Dik thei ding, tangtung thei dingin ka um tinten hi.

Ala:
1.Simlei miza'n luntawi phualngou sakmin loh bangmoh e,
A banjal siamsil nel bawl teng pak bang tawi uh
Hizong siam asutna ei toh dang tuamlou.

    Khaile I mit zangni, khaile I bil zangni
    Khaile I khut zangni,khaile I khe zang ni
    Khaile I khuak zangin lungtuak'n mazam khawm le uh
    Ei zong Siansiam hihang kuata'n singzou lou ding

2.Tualniam seinou zatam domsang dingin mazam khawm leng
Kangtui vualte'n ei sulnungjui ding hi.

3.Siamsil momnou aw zuangthouin donkimvel dihve
Pupa patsa giabang jun lel leng jong
Simlei mi za lung va bang hongphawng ding hi.

4. Siamsil sut momnou aw zuangthouin don kimvel dihve
Tualniam seinou zatam lim ngabang bualte,
Nibang elten nuihchiam in lel ding uhi.

(Hiai thugelh EI ZONG SIAN SIAM HIHANG chih Siamsinpawl Annual Magazine, 1995 apan laksawm ahi.- Editor/SB)