DIRBETA
ZERRİ
Sait
ÇİYA
Lêlê
sodıriyo. Tiji hona zereq nêdo. Asmen gıran gıran beno roşti. Zerrê mıde ju
tengiye esta. Nêzan çıko, çık niyo? Van, beno ke hewnrao, vecun balkon. Hewa
serdıne ke rüyê mı lisena, tenê yen ra xo. Oncia ki tengiya zerrê mı nêvêrena
ra.
Cêron
zere, televizyon kon ra. Televizyon de qalê xepısu kenê. Esker be poleşi estê
ra xepısxaneu ser, her çi têmiya dero. Honde ke vanê, 'wazenime ke gureteu
rareynime!'
İnam
nêkon. Eke wazenê rareynê, ma na poleş u eskeri çıkiyê?
Arezeo
ke, wazenê gırevê vêsaniyeo ke çarniyo gırevê (rozê) merdene, bısıknê!
Pêro
qanalu cêron, jêde zonayis nêdanê.
Zerrabela
mı zon dana, gula mı cêrina... Gırevê merdene ke neway u şêşti de vırajiay bi,
yeno ra mı viri. Resmê des u dı cani ju be ju yenê verê çımunê mı.
Tenê
ke zaman vêreno ra, wastena Dewleta Tırki rınd vecina rüyê roşti.
Wazenê
ke xoverdayena guretey bısıknê, gureteu bırusnê -xepısxaneo ke jê hucrê merdişi
vırajiyo-, xepısxanê F yi.
Televizyonu
de musnenê, dewlete verê çımunê dina de ebe bombey, ebe qersuni, ebe dozer u
tanki dêsunê xepisxaneu hetê ra rıznena, heto bin ra vêsnena! Tı vana, cengê
dina hireyine veciyo! Hard u asmen de esker u poleşi girinê.
Êndi
tengiya zerrê mı bena jêde, ters cêno mı, nêzan ke se kerine?
Zanen,
na dewlete hata ke goni nêrısnê, can nêguret, mırd nêbena!
Jêde
ra nêvêrena, xebera merdene têver-têpey yena. Kamci qanali ke kon ra, veng u
vacu de merdey morinê.
Zerrebela
mı tabat nêkena, vecun teber. Cêron, nison ro tramvay, son zerrê suke. Her kes
kar u gurê xo dero. Meydanê suke de rastê nas u dostu ben. İ ki wazenê ke çiyê
bıkerê. Vanê, 'bêrê, şerime protesto kerime!'
Dine
ra van, 'na dewlete protesto ra fam nêkena. Zobina çi lazımo'. 'Çıko?' vanê.
'Ez ki nêzan, eke bızanêne, mı sımarê ki vatêne.'
Cêron
ra çê. Reyna verê televizyon de nison ro, server u persberê Tırku qeseykenê!
Gore
vatena dine, dewlete, dewletena xo musna!
Raşt
ki heniyo! Dewleta Tırki ke xo musna, xora nia musnena.
Axıri
rüyê Eceviti aseno. Rüyê xuyo serdın u bêreng ra vecino yeno verê qamerau.
O
çıko? Rüyê Ecevit huyino! Vano, 'sımarê xeberunê rındu danime'.
Hukumata
xo goyneno! Tı vana, esto ra dugelu ser, welati guretê xo dest. Rüyê Eceviti
nara vişt u seş serri ra ravêr ki nia huyiyêne. Dewleta Tırki ke Qıbrıs işgal
kerd, qomê Rumi qırr kerd, o zaman ki Servezirê Tırku Ecevit bi. Ecevit goni ra
has keno. Goni ke nêrısnê, permelino sono.
Vano,
'des serre ra tepia ma xepisxaney gureti bınê qontrolê xo'.
O
Ecevito ke amo şindorê merdene, lerze keno, eke fersend ke bivino, reqeşino.
Honde ke zerrê kêfi dero. Qezeteci, gırevê merdene, gureteyê ki kışiyê, dine
pers kenê, O qe hawrê cı niyo, koto ra tewti, xora vêrdo ra, vano, 'ma kotime
ser, dewleta ma kota ra ser...'
May
berbenê. Domani berbenê.
Ecevit
huyino.
Zerrê
mıra goni sona.
Peyniya
kistene nêna. Zındanu ra cınazey; leyê terni vecinê. Zonê mı nêcêreno ke merdu
bımorine. Mırê zor yeno.
O
mabên de ju telefon yeno.
Venga
ke telefon dera, nêşikina qesey bıkero. Ebe berbisi vana, her kes çiyê bıkero.
Ni domanê ma qırr kerdi... Mevinderê...
Wazon
ke çiyê vacine, vengê telefoni bırino.
Honde
ke vengê ae gosunê mıde zıngeno...
Her
kes çiyê bıkero!
Her
kes çiyê bıkero!
Her
kes çiyê...
|