Arêkere: Hewes Miro

Waxtê de mordemê wazeno şoro şeher/suke. Makina çina, astore çina se bıkero, gere ebe piyatiye şoro. Şeher xêlê düriyo. Mêrık şodır şawaq ra wurzeno ra, hona çhuçıkanê şodıri veng nêdo, xo pişeno têra şaneno raye... Nêtê mordemi xo ju roje de bıresno şeher. Nınga dano we xêlê rae şono, beno têşan şono hini de ağwe şımeno, tenê bina xo cêno. Dolımêna wurzeno ra şaneno rae. Xêlê qefelino, şeher hona qederê sahate -dı sahata mendo. Endê varaşano qalındo, si cêrê ra, çımê xo nêbırneno ke şeher resno. Niadano ke, dewê vejiyê raa xo ser; Xo 'be xo vano: ›Ğule ana rınde biye, ez emşo na dewe de meyman bi, şodır rew raurzi qederê sahat u nêm de xo erzen şeher‹.           

Êno verê ju çêberi, wayirê çêyi verê çêberi de ronişte beno.

Vano:

"Sılam elekum!"

Wayirê çêyi:

"Ele kumu sılam!"

vano, pers keno:

"Bıra tı nia koti ra êna, şona koti?"

Mêrık vano:

"Ğule bıra ez fılan cara êna, gere şori fılan şeher"

Wayirê çêyi vano:

"Şehero ke tı vana, ita ra hona xêlê onceno. Emşo meymanê mı be, ma şodır to rew wazneme ra, to keme rayşt.."

Mêrık qebul keno. Vano:

"Qa xora waştena mı ki a biye! Çımke ez emşo nêrestênê o şeher..."

Şonê zere, nişenê ro. Kêf halê jubini perskenê. Cirani pê hesinê, ê ki ênê xêlê mucul benê. Şewe bena herê, cirani wurzenê ra, şonê çêanê xo.

Meyman wayirê çêyi ra vano:

"Ğule bıra çê to şê awan bo, non ağwe werdene de qe qusırê çinê bi. Feqeet mı lewê cirana da nêva; mı va şıma zerê xo cênê. Ez anka van: Edetê şımade çay çino, şıma çay nêdanê meymana? Şıma çay nêşımenê?

Wayirê çêyi vano:

"Heq bo bıra, na çan hefteo ke, tenê qıtlığıya şekıri esta, ma ki hondayê goş nêkume çayra..."  

Na qeseykerdene ra dıma, mêrık cênıka xora vano:

"Tı be Heq kena dolımêna niade, hala beki çand xiç şekır esto, meymani rê çay serne! Eke çino ki, ma se bi çand xiça cirana ra deynke."

Cênıke ere cı cêrena, çê de çan xiç şekır vênena. Teze çay nana ser, şekır kena hurdi, heni kena ke, ju xiçê şekırı kena qasê ju nuke. Tebe şuşa nana tepsiye ser, ana verê meymani de nana ro.

Meyman dı xiç şekır erzeno fekê xo, hona ju qulti çay keno re ser. Defê dıde-hirê wayirê çêyi tenê rüyê xo ano pêser, xanıma xo cıra hêrs bena, dızdıya vana:

"Sebi torê, to seba dı xiçi şekır murızê xo ardo pêser, ayb niyo?"

Mêrık vano:

"Eke heniyo, ezı ki ju mesela persken meymani ra, hala bınê na mesela ra vejino?"

Mêrık meymani ra perskeno, vano:

"Bıra gere tı qusırde niamedê, ez tora çiyê pers ken, mebo ke tı zerê xo bıjerê?"

Meyman vano:

"A senê qesawa! Bıra ma ez qey zerê xo bıjeri, ma xorê mobet keme, kerem ke çiyê xo perske!"

Wayirê çêyi vano:

"Nê-nê bıra, tı Heq kena, waxto ke hetê şımade meyit ke bıbo, şıma çand meyıta kenê ju mezele?"

Meyman onci dı xiça erzeno xo fek, qılmê çay keno re ser. Vano:

"Ğule bıra, eke dewa made meyit bıbo, ma ê qıja ra hama dıde-dıde keme mezele, gırsa ra ki ju-ju keme mezele."

Wayirê çêyi huyino, rüyê xo çarneno re xanıma xo, tey pıstneno, vano:

"Erê to di? Meyman bınê persa mıde nêmend, ha."

Cênıke qe goş pıra nêkuna.Wayirê çêyi cêreno re meymani vano: