Ondêr omnoniyo

     Asmu ra asma wertiye,

     Roza hotine

     Yeneo peroz ra têpia

      Roz cêriya mı sero

      Wertê roji de

      Daê zerrê mı perseno

      Girino gıneno ve qırtıka mı veri

      Jê roza ewroyene yena ra mı viri

      Gula mına verê vore

      Çhemo,  çhemo Munzıri!!!...

      Vılê xo torê nan ro muye ra bari

       Darê Haqiyo to ver de

       Pêskarê roala mı meve!!..

       Hona newe kota des u phonc serri

       Qe ke nê ju roze dên bıde

       Serva mestê!.

       Xeyle hewnê Ebruya mı estê

       Vınde! Mırd vırare pırafiyo

       Rengê pembey u sekerê suru sero

       Gula mına verê vore!..

      Her roza hotine

      Tora heredanune çhemê Munzıri

      Sımara ki!...

      Hardo dewres u asmeno khêwe!

      Se veno reê mıra vazê

     Guna u movalê Ebruya mı çık vi?..

      Mı deşti kerdi ra hetê to ser

      Ajiya cigera xo ver

      Vengê mı bi jê topê adıri

      Jivon, zırçon tora!!!....

      Heştirê mı rışayi, bi laşeri

      Almanya guretê xo ver hata ve Dêrsımi

      Nêmey gınay phêlunê to ro

      Nêmey ki şi zerrê mı ro, bi huski

      Torê ki nêmano Çhemê Munzıri!

    -Ebru Tülek, 01.07.1985- 07.07.00 Çhemê Munzuri de xenekiye.