ZINGILÊ
PISINGE
Heqi
Bingol
Endê
payızo peyêno. Herkesi kar u gurê xo doarê. Ewro meyşta vare varena. Qemer ağa
cıla xora vaşt ra, verva pençerê oda şi. Tebera niada “Hona vare
nêvara” va, venga xanıma xo da. Gulizar xanıme biye haşar.
Qemer
Ağa:
-
De ravaze de ravaze roj biyo peroj, tı hona hewndera?
Gulizare
balişna ra sarê xo kerd berz, pençere ra niyada, onciya sarê xo naro.
Qemer
Ağa:
-
Tı hona cıle dera?
Gulizar
xanıme:
-
Ez nêzan ke tı çı wazena, nêvırdana ke ez tayê bêrire xo?
Qemer
Ağa:
-
Noyo ke verva ma êno zımıstano, nê roja kıvşo ke vare varena.
-
Vare varena ma bıvaro, her tevdirê xo u zımıstani ma diyo, xorê qısawete meke.
-
Çı mekeri lo! Qa tı zana ke nê roja meymanê ma ênê. To qe kulinda made niado,
çı esto çı çino?
Gulizare
cıla xora vaşte ra, kıncê xo day xora, kofiyê xo gırêda, şiye bonê çêyi, çıla
desti fişte ta. Verba kulinde şiye, destê xo kerd şaliya xo ver, ebe zonê
kiliti cêrê u xo-xode vaciye:
-
Na xêlê waxto ma qe kilitê kulinde ra nêkerdo. Xwezıla mı xode tenê rono kele
tey biardêne. Jenge eyşto kiliti!
Zon
ard re kiliti, dolımê-dıde çarna, kilit bi ra. Ebe çıla desti wertê kulinde de
amê-şiye. Deboyê qarmi, postıkê toraqi, turıkê niska, hebê gêrmi, çuala
bulğuri, terrene, rono kele.. çı vajê kulinde de esto.
Gulizar
xanıme:
-
Kulinda Qemer Ağay de çı çino ke! Tıvana deryawa, dengıza. Heq kêmasiye nêdo!
Canê
Gulizare qarme wayşt, verba deboyê qarmi şiye, biye çewt ke tikeê qarme bıjero
berzo fekê xo. Niyada ke çı bıvêno..! Fekê deboyê qarmi rakerde mendo. Eke
mereo ju êno, ju şono. Tıvana tede cirit kaykenê. Gulizare nafa ki verba
postıkê toraqi şiye, fekê postıki gırêdaye bi, zerê xo bi rehet. Peyjo çı amê
viri, vake ›hela ez dolımê ki bınê postik de niadi‹. Niada ke çı
niado... mera postık heni kerdo ke, qe cayê de weş tede nêvırdo!
Gulizare
xo-xode vaciye: ›Eza feqire nıka Qemer Ağay ra vaji çı? Nıka ke cêniyê
dewe pêhesiyay, merey kewtê kulinda Qemer Ağay, no namê dêweo gıran rê zaf
ayıbo. Hemı ki cırê kenê tometiye. Namê Qemer Ağay namê de gırano, Qemer Ağa
pilê dewanê mawo...‹
Werte
ra xêlê waxt derbaz bi. Gulizare kulinde ra nêvejiye, tebat nêkewt Qemer Ağay,
o ebe xo şi cêr. Nêrdiwan de raştê jubini bi:
-
Tı ita sekena?
-
Qe, ma se bıkeri, tı 'be çımanê xo şo bıvêne!
Qemer
Ağay va beki dızdi kewtê zerê kulinde. Qe nêame fıkrê dê ke, dızdê kulinde merê
kulindê.
Qemer
Ağay veri deboyê qarmi de niada; cayê xode vınete bi. Postıkê toraqi, galê
genımi, turıkê bulğuri, sirê çêrçiya, çualê piyaza; her çi caê xode bi. Pêê xo
çarna ke Gulizare ra pers kero, Gulizare çina. Thawa nêkewt sarê dê. Canê dê ki
çivikê goşt wayşt.
Qapağê
deboyê qarmi kerd berz, destê xo kerd derg ke tikê goşt vêjo, o waxt çiyê de
nerm kewt destê dê ver. Defêna wertê bêçıkanê dêra xelesiya ra, gına zerê deboy
ro. Dolımêna destê xo berd, seke berd heni ki peyde remna. Nafa endi zana ke
mere kewto zerê deboyê qarmi.
Vake:
-Ez
Qemer Ağaê dewa cori bi; merê bukuyê kulinda mı, na bena serevdê sarê m'..!
Peyniya
qesa xo nêşkiya biyaro, venga Gulizare da. Gulizare vengê dê heşna:
-
Ez nawa ita, torê qawaltiye kena hazır!
-
Waxtê noni niyo, rew bê ita lewê mı!
Gulizare,
karo ke dest de cavırda u verba Qemer Ağay şiye.
-Tı
nıka şona koti ra vênena bıvêne, pısıngê de niçirvane vênena ana!
Gulizare
tersa ra qe vengê xo nêkerd, veciye teber şiye... Wertê nê qesa de merê kewtê
şıke-şıke ser ke, Qemer Ağa pısıngê de niçirvane cêreno, ters kewto zerê dina.
Merê pili xebere gurete. Emır da:
-
Ana sate de çıqa merê estê, pêro bêrê mışewre!
Zerê
ju saate de merê têde amê pêser. Mereo pil vejiyo postıkê toraqê weşi ser,
destê xo şanıtê pê qına xo, ebe vengo berz:
-
Goş mı sernê!
Mera
goş na ser.
-
Hatani nıka kulinda Qemer Ağay marê mılk u maş biye. Ma hem werdêne, hemı ki
kerdêne ser u bınê xora. Ewro ra têpia ma zaneme ke na marê nia nêmanena. Rısqê
ma têde bırino!
No
zımıstano ke verbe êno, zımıstanê de zaf çetıno! Zav u zêçê ma vêşaniye ver
mıreno..!
Merê
qıji xo pê nêguret, qesa merê pili bırnê:
-Mereo
pil, tı pilê pilana! Ma za'me ke tı naye rê rayê de rında başe ki vênena!
Mereo
qıj, her çıqa qıj bo ki hetê aqıli ra zaf baqıl bi. Ebe dı hirê qesanê weşa
zerê merê pili kerd weş... Mereo pil, xo-xode şa bi, vengê xo tayina kerd berz:
-
Ez ewro pêhesiya ke Qemer Ağa pısıngê de niçirvane ano. Şıma ki zanê ke waxto
ke a amê, cayê ma endê beno teng, rısqê ma bırino!
Ez
van ke: Her kes şoro çêyanê xo, pers be çêyanê xora kero, xanımanê xo
bıdanışıyo, cirananê xora pers kero mışewrê xo bıkero. Goranê pısınga fendê de
manqul bıvêno.
Qesê
xo jukerê, xebera de pake mırê biyarê..!
Gulizar
xanıme hem şona, hemı ki xo verde qesê kena: ›Ez şori nıka kami ra
pısınge bıwazi. Gereke qe kes pênêhesiyo. Nıka ciran ke pêhesiyay; merê kewtê
kulinda ma, peyjo marê beno serevdê de pil...‹
Gulizar
xanıme qerarê xo da: ›Xorê şori çê waya Zerde. A kesi rê qesê
nêkena.‹
Amê
verê çêberê waya Zerde.
-
Ma be xêrdi waya Zerde!
-
Xêr sılamete waya Gulizare, bê ronişe.
-
Nê ğule, ez nêwazen ke ronişi.
-
Bê satê ronişe, tı onciya şona!
-
Tı ke xatırê mı ana ca, ez satê nişen ro.
-
Çiyo ke ma bışkime ame ca.
-
Wa-wayê, nê mêratanê zığırtıka (mera) xêlê waxto musê kulinda ma, hona ke
postık-mostıkê ma qule nêkerdê ez wazen ke na pısınga şımawa beleke beri çê ma.
Dı-hirê roji va çê made bımano.
-
Ma ki va hala tı çı wazena! Ju pısınge niya, xorê bıjê bere!
Waya
Zerde pısınga beleke gurete kerde vırana Gulizare. Cırê çêberê teberi kerd ra.
Gulizare veciye teber, pêşmala xo eyşte ser, wa kes mewino.
Qemer
Ağa, verê çêberê kulinde de tik biyo, çımê xo raya Gulizare u pısınge dero.
Gulizarê amê, Qemer Ağay pısınge destê daye ra gurete u eyşte zerê kulinde.
Çêber sero kilit kerd.
Pısınga
beleke, kulinda Qemer Ağay de ğeribêni nêonte. Wertê kulinde de şurê-dıde amê
şiye. Boyê de zaf weşe amê pırnıka dae. Verba deboyê qarmi şiye, viçe-viça mera
amê goşanê dae. Xêlê waxto ke qe vengê de niyanên nêamay bi goşanê dae. Tenê
goş na ser, hêya merê ebe kêf u eşq xecelinê. Hetê ra kılama vanê, hetê ra ki
kay kenê:
Kulinda
Qemer Ağay şê u awabo,
Zerê
kulinde sıfrê ma mera bo.
Pısınga
beleke goş na ser, vake:
Heqi
se mıradê şıma mera kerdo,
zerê
kulinda Qemer Ağay de
hemı
ki mıradê mı bıkero,
wertê
goşt u bulğuri de.
Mera
vengê pısınge heşna, çıqa ke bıtersê ki oncia ki qe nêard xo ser.
Ebe
ju veng:
Kulinda
Qemer Ağay, mılkê mao maşê mao
Tı
şo, kulinda waya Zerde de bıke miyao-miyao.
Pısınga
beleke cuab da:
Şıma
mı naskenê qa ez kama,
wertê
pısınganê dewe de ez pısıngê de niçirvana...
Na
qesa pêyêne ser, merê pili emır kerd:
Mı
şımara waşt bi ke herkes cirananê xode bıfıkrıyo. Mırê fıkrê de baş u manqul
biyarê... Çı qesê şıma esto, a na sate de, a nıka mıra vajê!
Mera
vengê xo bırna. Ju mere dı-hirê gami ravê ame, verê merê pili de ame çoka ser.
Vake:
-
Mereo pil, Mereo pil ez zan ma se keme!
Mereo
pil:
-
Meterse, fıkrê xo vace!
-
Ez van, ma ju zıngıl bıjê'me bıerzime vılê pısınga beleke, waxto ke a verba ma
amê, zıngıl veng dano. Ma ke vengê zıngılı heşna, rememe kume qula xo. Waxto ke
pısınga beleke şiye lewê soba germıne, ma ki qula xora vecime şome dormê qarmi.
Mera
pêrine no fıkır zaf zaf bekem kerd. Têdine piya dest day pıro, kêf kerd. Kılami
vati, govende gırêdê/gurete.
Wertê
nê mera de ju mere bi, ne kêf kerd ne ki kewt govende.
Merê
pili venga cı da:
-
Tı qey kay nêkena, qey kılama nêvana, derdê to çıko?
-
Şıma têde mıra vanê ›Mereo qıj‹ ezı ki wazen ke fıkrê xo vaji, kes
goş nênano mı ser. zerê mı rehet niyo...
-
Zerê to rehet bo! Ma zıngıl erzeme vılê pısınge, xelesime ra!
-
Ma, wertê ma mera de, o mereo jihatiyo ke zıngıl beno erzeno vılê pısınge
kamo?..