ORIGINAL
LATINO
Thomas Walden, Doctrinale antiquitatum fidei ecclesiæ catholicæ.
Tomus Primu (De vera religione). Liber Secundus: de Ecclesia. Art.
III. De membris Ecclesiae Iesu Christi secundum professiones suas
et officia. Cap. 51: Respondetur ad argumenta, quod oportet esse
papam quamvis perpendiculariter Christus resideat in cælo super
omnes justos.
Flamma hæc hæretica quæ comburit montes, præsidentes scilicet
in tota ecclesia Jesu Christi, diffundit super fornacem suum per
tria argumenta spiritus vastatoris, dissolvens super Romani præsulatus
officium, et probare conata quod inutiliter præsidet papa mundo:
[Arg. 1.] Quia Christus qui directe residet in cælis super
fideles per se satis abunde ministrat omnem gratiam spiritualem
petentibus sine papa. Unde conclusione inter damnatas LX.
[Arg. 2.] Experimento cognoscimus quod papa vel mortuo vel
deposito cum suis cardinalibus et prælatis Cæsareis non minus
sed amplius prosperaretur ecclesia. Nam quantum ad sacramentum
confirmationis, cum sacramento ordinis et benedictione chrismatis
cum ecclesiis dedicandis quæ appropriantur episcopis, videtur
quod Christus perpendiculariter residens in cælis super justos
presbyteros daret illis potestatem talia faciendi.
[Arg. 3.] Blasphemias loquuntur qui dicunt quod oportet cælestem
radium de cælo descendere super Romanum pontificem et ab ipso
reflecti secundum angulum ad provincias adjacentes per terras et
maria, ac si prima veritas quæreret angulos nec omne donum aut
datum optimum descenderet a patre luminum sic quod Deus non sit
perpendiculariter super caput uniuscujusque hominis, sed quod
magis hæreticum cum Deus ex immensitate sua necessario sit
ubique.
Procul dubio hæc mystica allegoria de perpendiculis, quam vix in
scripturis habemus duobus in locis, oppositos etiam supradictæ
jam hæresi facit egressus.
Hic enim, ut
patet ex perpendiculari Dei supersessu, arguit [mystica
allegoria de perpendiculis]
evacuandam Romanam sedem pontificis —lege Isaiam 34—
et propter perpendicularem Dei residentiam per sententiam vindicem
aufertur de Sion omnis potestas nobilium atque reguum, ut sic
redigatur in nihilum et fiat perpendiculum in desolationem. Textus
est iste: Dies ultionis Domini, annus retributionum judicii
Sion. Et convertentur torrentis ejus in picem et humus ejus in
sulphur. Sequitur: Extendetur super eam mensura, ut redigatur
ad nihilum et perpendiculum in desolationem. Nobiles ejus non
erunt ibi; regem potius invocabunt, et omnes principes ejus erunt
in nihilum. Et orientur in domibus ejus spinæ et urticæ, etc.
Super quem locum in commentario Isaiæ libro nono:
HIERONYMUS: “[…] et hoc fiat, quia funiculus Domini atque
perpendiculum, id est sententia illius non valeat immutari.
Nobiles ejus, id est Apostoli atque credentes, non erunt ibi, nec
perditorum numero conjungentur: sed regem potius Christum
invocabunt.”
Hoc est
ergo perpendiculum desolationis et destructionis quod primo tollit
Apostolos et successores eorum episcopos ut etiam diruatur et
redigatur ad nihilum.
Lege iterum in Zacharia perpendiculum reformationis et gratiæ
quando reædificanda erat domus Domini sub Zorobabel et Jesu filio
Josedech.
Textus est iste:
Hæc dicit Dominus, Revertar ad Jerusalem in misericordiis, et
domus mea ædificabitur in ea, ait Dominus exercituum, et
perpendiculum extendetur super Jerusalem.
Zachar. 1 ubi Glossa: Ædificabitur sub Zorobabel et Jesu filio
Josedech. Et alibi Dominus ex misericordia se eam reædificaturum
promittit, et perpendiculum seu funiculum secundum mensuram et
ordines singulorum in ea esse tenendum.
Residet
ergo Dominus super homines in perpendiculo desolationis et vindictæ
quando tolluntur ecclesiæ prælati et pontifices. Residet
secundum perpendiculum gratiæ, quando sub prælatis ecclesia
sumit ædificium,
et tenentur illi per supra et sub juxta præsidentem ordines
singulorum. Videte scripturas: si mihi non creditis, eis credite. Iste
Vvitcleff docet nos in hoc passu quomodo descendat in nos
perpendiculum severissimæ Dei vindictæ per subtractionem Romani
pontificis et cæterorum subjectorum et antistitum quos
Christus paravit nobis in Apostolo suo Petro in perpendiculo gratiæ
per ordines singulorum.
Sed nollem —inquis— radium divinæ gratiæ ad nos venire per
angulum refractum ad aliquem. Ego vellem fideles non audire te
docentem scripturas ne radius perpendicularis luminis divini in
umbra tua refractus offendat fideles. Scito tamen genu nostrum
curvatum per primum peccatum, et ex eo omnes homines cum Jacob
claudicasse in semitis Dei propter tactum nervi; cujus usum usque
hodie omnes veri Judæi, id est confessores Christi, refugiunt.
Sic enim dicit RABANUS de naturis rerum a Christo genu angulum
esse dictum libro 13 cap. 22: “Angulus tractus est ex Græco
sermoni, id est a gony quod Latine dicitur genu, eo quod influxum
speciem anguli conformi qualitate restituit. Nam apud Græcos
originem sui nominis in derivationibus omnino custodit, ut
tetragonus et pentagonus, et iis similia”.
Curvo genu semper hic incedimus et nunquam aut raro sine vitio,
quia sumus natura filii iræ, declinantes semper in obligationes
ab originali perpendiculo gratiæ. Dicis quod veritas non quærit
angulos. Certe veritas quærens ovem perditam angulos multos quærit.
Et quid dicis, ecclesia Christi militans in hac vita sicut non
erit sine ruga vel vitio, sic nec sine angulo, quia sic dicit
propheta Jeremias cap. 31: Ædificatur civitas Domino a turre
Ananæi usque ad portam anguli. Super quod in commentario lib.
6 HIERONYMUS. “Ædificatur ecclesia a turre obedientiæ sive
gratiæ et donorum Dei. Hoc enim interpretatur Ananael, usque ad
portam anguli, quæ licet initium videatur habere sublime, tamen
quamdiu in ista carne subsistimus rectam veritatis lineam non
possumus possidere, sed in angulo stamus et fractis lineis exit
ultra funiculus mensuræ contra eam, id est portam anguli super
collem Jareb qui in lingua latina scabies vertitur aut incolatus,
aut ut doceat nos advenas esse atque peregrinos et auribus
prurientes, et ad novitatem dogmatum pessimorum facile præbere
consensum.” Sequitur: “Post vides quanta loca habet ecclesia,
et quod illud Apostolicum, ut sit sine macula aut ruga in futuro
et in cælestibus reservetur, audis angulos, audis scabies, audis
ruinas et cineres et regionem mortis et tenebras, et de tua
virtute et impœnitentia gloriaris.”
Teipsum quærit Hieronymus, mi Vvitcleff, te interrogat: “Audis
angulos, audis scabies sine quibus non ædificatur civitas Domino
a turre gratiæ. Quid ergo de tua virtute gloriaris, putans in te
sine angulo perpendicularem Dei gratiam residere? Puto te curare
debuisse cum Ethnico si tunc esses. Quomodo collocasset Neronem
luscum super axem æquilibrum ne sedens depressius non suam videat
obliquo sidere Romam. Aut qui solennizandos putas angulos rectos
aut refractos Euclidis et Alacen perspectivi in splendoribus
sanctorum, fac rogo, ne occidentis populi gratiam ejus suscipiant
sub angulo reflexo qui ascendit super cælos cælorum ad Orientem,
aut dicas qualiter omne donum perfectum descendens a patre luminum
veniat in perpendiculo eum non veniat ad nos nisi per filium qui
juxta visionem Stephani in Actibus ad dexteram patris stetis; et
sic describitur consequenter in symbolo.” Sed iis truñs (???)
omissis dicendum secundum evangelicam veritatem quod Christus ipse
angulus est, quia lapis angularis de quo dictum est: Lapidem
quem reprobaverunt ædificantes, hic factus est in caput anguli.
Ideo quicquid pater luminum ad nos transmiserit audacter dico,
venit per angulum, unde super psalmum 84 AUGUSTINUS: “Agnoscamus
lapidem angularem, lapis angularis Christus non potest esse
angulis nisi duos parietes copulaverit; ad angulum de diverso
veniunt sed in angulo sibi adversantur, venit ex alia parte
circumcisio, venit ex alia parte præputium. In Christo ambo
populi concordaverunt, quia ille factus est lapis de quo scriptum
est: Lapidem quem reprobaverunt ædificantes, hic factus est in
caput anguli. Sequitur: Venerunt omnes gentes ad lapidem
angularem, ibi osculum pacis agnoverunt illum unum qui de
duobus fecit unum, non quemadmodum hæretici qui de uno fecerunt
duo. Hoc enim idem ait Apostolus de Domino Christi: Ipse est pax
nostra qui fecit utraque unum.”
Jam scio, jam palam sentio cur Vvitcleff angulum arguit et
detestatur, quia ipse Christo angulo adversatur faciens de uno
duo, de una Christi ecclesia duas partes cum Christi sectatoris
sit in angulo esse et hac via de Judæorum hæresi sectam tenet
qui ideo horruerunt Christum in synagogam recipere ne per angulum
Christum vere fidei soliditas impleretur dicente Rabano de naturis
rerum lib. 14 cap. “De parietibus ædificiorum”. RABANUS:
“Sub allusione fabricantium exponitur inanis opera Judæorum,
soli quippe hominum adhuc in mundo unum Deum colentes ædificare
videbantur dum nationes cæteræ idolorum cultura destruerent. Ædificantes
tendunt semper ad angulum ut commissorum parietum soliditas
impleatur. Judæi vero fidei suæ fabricam minime perfecerunt,
quoniam ipsum qui lapis erat fortissimus angularis more dementium
putaverunt esse contenendum.”
Judaizat ergo Vvitcleff, quando non permittit Christianos ædificare
usque in angulum, sine quo nullum possint ædificium consummare.
De more enim dementium putat esse Rabanus angulum in ædificio
fidei contenentes, et sicut in angulum Christum, ita multo magis
ex eo in angulos Petrum et Paulum et deinceps per vicarium Romanum
pontificem. Sed hoc nescis intelligere quomodo Christus residet
perpendiculariter ad zenith capitis cujuscumque hominis in cælo,
et tamen per vicarium Romanum pontificem, et deinceps cæteros præsules
in homines venit per regulares sacramentorum lineas. Credis forte
divinos radios a perpendiculo declinare si per sacros episcopos et
per humana officia angulos faciant Christiformes. Quod si ita est,
cur tu prædicas ut jactitas verbum Dei, cum Deus residens in cælis
ad perpendiculum daret aliis Christianis ad plenum sine te verbi
Dei liberrimam facultatem? Cur eminent reges in populo, cur
judices judicant cum Deus residens in cælis faceret ista optime
sine eis? Dic agricolis ne sulcent arva, ne grana sepeliant, ne
saltem maturas segetes demetant, quia Deus in perpendiculo ista
faceret sine eis, et stulte plantavit Paulus aut rigavit Apollo
quia solus Deus in perpendiculo præstitit incrementum. Sed dico
quia Deus qui in perpendiculo residet super homines non declinat a
perpendiculo etiam cum angulum faciat. Sed simul facit in ministro
angulum et servans rectilineum incidit fidelibus et generat
gratiam. Quare si hæc theologia sit tibi difficilis, disce ab
Elia cur dixerit 3 Reg. 17: Vivit Deus, in cujus conspectu sto,
si erit iis annis ros vel pluvia super terram nisi juxta oris mei
verbum. Numquid Deus resedit in cælo perpendiculariter super
capita aliorum hominum, nisi oporteret ipsum de necessitate suæ
naturæ primo descendere per os Eliæ, et tunc reflecti secundum
angulum ad provincias arefactas, quod si concesseris quia Deus sic
dicit, multo magis per os Petri et sucessorum ejus et aliorum in
ecclesia sacerdotum ministrabit Deus regulariter effectum gratiæ
confirmationis et ordinis quibus dixit in Petro: Tibi dabo
claves regni cælorum. Et: Accipite spiritum sanctum …
quorum remiseritis peccata, remittuntur eis, cur ipsi non
dicent ex iis Christi verbis, quia non veniet gratia sacramentalis
roris vel pluviæ nisi juxta verba oris nostri? Et numquid Deus
immediate et perpendiculariter largiebatur postmodum rorem illum
super terram, quamvis per angulum a verbis oris Eliæ, ita dico
ego, quicquid facit sub angulo per ministrum, immediate efficit et
perpendiculariter influit per seipsum. Vide hoc quomodo Cornelius
renatus a Deo per Petrum, per Ananiam Paulus; incarnatus Christus
per Virginem. Ipse ergo angulus et per angulos incidens semper per
perpendiculum quia in ministris suis non patiens obicem tamquam
per corpora supra cælestium orbium penetrat ad fidelem ultimum
per effectum. Quodammodo enim videtur hoc sentire AUGUSTINUS super
psalmum 86 dicens se januam intrare, per januam quod corpora non
possent. “Angustias —inquit— omnia pæne corpora patiuntur,
neque ubique esse possunt nec semper. Divinitas autem quæ ubique
præsto est undique ad eam potest duci similitudo.” Sequitur:
“Et uno loco ambas res dixit. In Evangelio dixit quod pastor per
januam intrat et ibi dixit: Ego sum pastor bonus; et ibi
dixit: Ego sum janua. Pastor intrat per januam, et quis est
pastor qui intrat per januam? Ego sum pastor bonus. Et quæ
est ergo janua qua intras tu, pastor bone? Ego sum janua.
Quomodo ergo tu omnia? Quomodo per me omnia. Verbi gratia, cum
Paulus intrat per januam, nonne Christus intrat per januam? Quare?
Non quia Paulus Christus, sed quia in Paulo Christus, et per
Christum Paulus. Ipse dixit: An experimentum ejus quæritis qui
loquitur in me Christus? Cum sancti ejus et fideles ejus
intrant per januam, nonne Christus intrat per januam?”
Ecce quomodo omnia Christus et per omnia Christus, et in
perpendiculo et in angulo, in seipso et in Paulo idem Christus
semper. Et prosequitur ibi post. AUGUSTINUS: “Quare sunt
fundamenta apostoli et prophetæ? Quia eorum auctoritas portat
infirmitatem nostram. Quare sunt portæ? Quia per ipsos intramus
ad regnum Dei. Prædicat enim nobis, et cum per ipsos intramus per
Christum intramus. Ipse est enim janua, et dicuntur 12 portæ
Christus, quia et in 12 portis Christus.”
Vides ecce quod cum Apostoli prædicant et per ipsos intramus ad
regnum Dei, per Christum intramus. Quare ergo cum episcopi
ordinant Christus non ordinat? Et cum episcopi confirmant Christus
ipse non confirmat? Omnes illæ sunt portæ, et tamen una porta,
quia in omnibus una porta Christus. Ultimate vero pensandum est
omnibus fidelibus quod ordinem in omnibus rebus non frustra Deus
ipse constituit, sed ipse vermem creat, et tamen influentiam ad
hoc faciendum sol primo concipit et transmittit in causas
proximas. Ita cuncta ministrat hic Christus per gratiam et primum
radium ejus primo suscipit primus minister gratiæ scilicet
episcopus, et inter episcopos primus et per ipsum fluit in alios
secundum quod clare docet cap. 5 ecclesiasticæ hierarchiæ ex
translatione Joanni Scoti, Magnus DIONYSIUS. “Lex quidem hæc
est divinitatis sacratissima per prima secunda ad divinissimam
suam reducere lucem. An non sensibiles elementorum essentias
videmus in magis eis cognata primum venientes et per illa in alia
propriam dividentes operationem.” Sequitur ad propositum:
“Horum igitur est dividere primorum, secundis copiose et in
commensuratione quæ juxta eos est ostendere ab ipsis sacra
contemplata divina spectacula, et docere quæ hierarchica sunt cum
scientia consummativa divinaque eos qui post se sunt hierarchiæ
simul bene docentium, et perfectam bene docendi virtutem
accipientium, tradere secundum dignitatem sacra erudite et integre
participantium sacerdotali consummatione. Horum ergo divinus
pontificum ordo primus quidem divinarum ordinationum.
Sublimissimus autem iterum et novissimus idem. Etenim in ipsum
perficitur et impletur omnis nostræ hierarchiæ dispositio, ut
enim omnem hierarchiam videmus in Jesum consummatam, sic
unamquamque in proprium divinum sacerdotem.”
Ecce sacerdotalis ordo primi suscipit divinos radios et in ordine
illo primo ordo episcopalis, et in toto ordine illo primo primus
episcopus, qui est summus et ultimus in quem consummatur tota
hierarchia viantis ecclesiæ, sicut in Jesum tota hierarchia tam
militantis ecclesiæ quam viantis (???). Unde sanctus Thomas
exponens hoc secundum Vercellensem.
VERCELLENSIS. “Est autem generalis lex hierarchiæ, ut
inferiores per suos superiores sursum agantur ad divinos
splendores illi lucentes, juxta quod videamus in rebus
sensibilibus et elementatis quod cognatiora sibi et propinquiora
prius et familiarius immutant secundum suam similitudinem, et
illis mediantibus extendunt operationem suam ad ulteriora.
Convenienter igitur Deus, qui est principium et fundamentum omnis
visibilis et invisibilis ordinationis, primo influit radios suos
vitales et deificos primis et superioribus sicut sibi
conformioribus, et per illos tamquam idoneos ad lumen divinum et
hauriendum et aliis influendum elucet, et superapparet
inferioribus secundum ipsorum capacitatem.” Sequitur: “Ordo
episcopalis præ cæteris ordinibus ecclesiasticis proximus est
Deo et summus et ultimus et consummativus aliorum, quia in ordine
episcopali consummatur et adimpletur omnis ornatus eclesiasticæ
hierarchiæ, sicut universa hierarchia angelica et humana in
Domino Jesu consummatur. Ita et quælibet specialis hierarchia in
proprio hierarcha. Virtus autem ordinis hierarchiæ continet omnes
virtutes et operationes ecclesiasticas quamvis per inferiores fiat
subministratio, et ipsa operatur ministeria sibi appropriata per
singulos alios ordines.”
Hæc est regularis institutio, ut Christus primo influat in primos
ministros ecclesiæ, qui sunt episcopi, et per ipsos in alios
radios sacramentales et doctrinales. Quamvis aliquando ex
privilegio speciali raro tamen et propter causas quas ipse novit
alicui humili et devotæ personæ gratiam suam influat per
seipsum.
PORTADA
_____________________________________________________
[*]
Colaboración
del señor Patricio Shaw