地鐵影畫戲
o係地鐵條隧道壁裏面畫d連環圖落去，咁架車一開咪好似睇緊動畫咁囉，唔駛大家搭車你眼望我眼咁悶丫嘛，又可以賣下廣告咁。既有錢賺又可以娛樂下d乘客，何樂而不為呢？
呢樣野o係我好細個已經諗到架喇，呀，幾激氣呀，前一兩年我睇報紙（東方日報），真係有個英國業餘工程師提出喎，跟住我即刻同我阿媽提起呢件事啦，佢都感嘆左一句﹕「唉.....你又唔早ｄ講.....」。呢個technique o係去新機場條路度都有用到架，路邊咪有d飛下飛下o既木雀仔o既，你唔好以為佢地無意思呀，其實係同一隻雀仔飛行o既動作黎架！大家不妨留意下！
砌波鞋
波鞋o既款式日日都唔同，時時都有新貨，又air
max、又uptempo、又呢又路，花喱花碌，又蝦人著喎。不過如果要追得齊呢d款式就唔係人人都有呢個能力喇。所以我諗過鞋廠可以出一隻最
primitive o既波鞋先，好似白飯魚咁o既，但係隻鞋有d砌野o既位o既（好似 lego咁呢）。跟住就出其他配件喇，例如舊air啦，可以出到細細舊淨係腳跟先有o既，又可以出到成腳都係o既，跟住最簡單o既就係鞋帶啦，可以係普通鞋帶，又可以係而家都幾興o既血管鞋帶喎。仲有就係d花紋o既外「殼」啦，亦都可以出顏料俾ｄ人自己油顏色都得架！有得換殼，有得換下繩，好似palm或者電話咁。另一方面佢又好環保，買一對
primitive 鞋就可以變化出萬千o既款式喇，咁當然樣樣配件都要同樣咁襟用啦。hehehehe........
以前見到d曳曳o既同學仔將對白飯魚油到一邊addidas，另一邊就好似nike咁樣，仲有埋"air"字樣添。 砌機、砌 lego就係人都識o者，但係唔知砌波鞋會點架呢？
屋村咖啡茶座
好多屋村都有好多無乜人用，但係排得好靚o既座位同埋檯，圓形o個隻呢，如果可以俾人租用一下，擺下露天茶座都幾好架，一黎有租收，二黎大家個feel休閒d嘛可以。d老人家又唔駛四圍坐，d飛仔又唔會咁多地方聚集喎，一舉幾得，係咪幾得呢？再唔係，日頭搞茶座賣咖啡，夜晚就搞酒吧，嘩.....真係大小通吃呀！
重建信心籃球隊
呢個係大安諗o既，佢話可以搞隊球隊幫人練波，但係就要次次都輸，幫我地o既顧客重建信心，o係呢個人人都無乜自信o既社會，我諗呢行都有得做。
國際水網
雖然話有water
cycle，但係我地一向賴以為生o既water cycle似乎唔係咁準繩，令到度度o既降雨量都唔同，support唔到全人類。香港o既雨水雖然都唔少，好多時水塘仲要排洪黎防止滿瀉添，但係與此同時我地會聽大陸某些地方發生「特大旱災」，所以我覺得呢個世界，又或者起碼中國國內o既水源分配得好唔平均。為左令到水更加有效地被分配，我有諗過將全世界（或者開頭係全中國先）o既水利設備同埋水管接合，萬一有地方發生旱災，就由其他無旱災甚至係要排洪o既地方輸水過去。係咪好理想呢，如果真係實現到，呢個浪費食水o既情況就唔會咁嚴重lu。當然，技術上地理上o既問題就有待解決啦，如果真係可以伸展到國際間都有呢個網絡而又無人或者組織從中搞破壞的話，我相信世界o既資源一定可以好好咁利用，唔駛將有用o既淡水流入大海咁浪費。
PT補習社
好多時諗，讀PT有時都好無guidelines，可能會花好多時間去睇一d無必要睇o既書，到頭黎又係無用（例如有無人問過你個頭ｄsinus
o既名？如果無，我地讀黎有乜用？）。出placement又唔識同人social或者表現自己，同埋運用自己已學識o既野。所以好想搞間補習社，一來賺錢，二來可以幫下期後o既同學仔。我諗個課程大約有幾方面啦﹕本科課程（真係最基本要識o既anatomy、physiology同埋某d
concept咁）、人際關係及溝通技巧，自信心培養課程同埋placement 準備工作坊咁樣。我相信人際關係同埋信心培養o個兩part會係戲玉。
出左咁耐placement，都知道呢個咁o既死人遊戲點玩法。我出到一鑊泡咁全部 "straight c或者c+" 就話返唔到轉頭o者，而家讀緊o既同學得丫嘛。我覺得出placement 最叻o既人唔一定係識好多野o既人，而係一d識得運用自己所學同埋識得同人相處、溝通同埋有自信o既人。成日都聽到﹕「唔識唔緊要，最緊要問得有sense」，好多同學仔有時好想問野，但係又唔識問，搞到原本美好o既一番熱情，變成揭露自己乜都唔識，無prepare到咁o既下場。有d又唔識同CE溝通，再加上遇人不淑俾人玩針對，結果搞到個placement 一鑊粥。其實我地問心丫，係咪白費左呢d同學o既才幹同埋冷卻左佢地o既熱情呢？一路都出得咁好就無野好講啦，但係我好想一d有興趣有俾時間去prepare o既同學都可以獲得同其他人一樣合理o既分數。講左咁耐，其實都係講緊我聽聽埋埋或者遇到o既出placement 經驗，聽到其實都覺得好可惜。而始終CE都係人，placement永遠唔會係公平o既，但係我想將一d最basic o既野，同埋一d令到自己同CE溝通得好少少o既技巧介紹俾d同學，等佢地o係呢個過程中識得一d 基本PT skills 同埋communication skills，令到佢地出placement有d渣拿，以後無咁多冤案。
PT Department 能量轉化
細個讀書o既時候，唔知大家有無讀到「能量轉化」呢樣野呢，例如汽車係由chemical
energy變成kinetic energy呀咁，有一日o係department忽然間諗到一樣野﹕就係將kinetic
energy 變成electrical energy喇。d阿婆好多時都會拉繩呀，踩單車呀，較手呀咁，其實如果將呢d運動工具駁落個發電機度，其實都發到唔少電個喎。日日都有人去做呢d野o既，佢地出o既力又無乜作為咁，不如就唔好浪費，將呢d力量都變成可用o既能量啦。咁呢d能量到底有乜用呢，唔…我諗可以用黎叉下TENS機d電啦，做後備電啦咁，詳細點用就真係要consult下d專家喇。ok，即使有電但係唔係好夠用，我地都可以搞個儲電計劃，定期set一d
goal，例如要較手較到某個電量呀咁，都係一個好objective o既motivation黎架！hahahahaha…
畢業相增值服務
畢業前後，大家都會返poly影相，好多景點都係兵家必爭之地。就好似o個幾塊寫住第x屆畢業禮o個塊板丫，我輪足成個字，仲差d俾個師奶打尖先影到。丁啟船話其實可以自己造塊咁o既板，跟住租俾人影相喎，你去到podium影又得，去到canteen影呢個牌又得，又唔駛迫，係咪正先？我就想加多樣增值服務，就係公仔/假花租借喇，好多時大家手上都好似爭咁d野咁，但係叫你拎扎花或者係公仔返去影相你又嫌阻定，所以如果有得租，用完就還，你話幾好呢？
音樂data entry
做左data
entry呢份工，先發覺原來係咁悶，咁令人昏昏欲睡o既，每次就係o係個keypad度入數字真係好悶，忽然間諗，如果我個keypad有音樂，按個一掣就有'do'音，二掣就有're'音，如此類推，d
data編出黎o既旋律會係一首乜野o既歌呢？我o個排係入一d關於一個練氣功o既study
o既data o既，如果有d client 練功o既招式日日都一樣，可能compose出黎o個隻歌就悶d，黎黎去去都係o個幾句喇，不過如果d
client日日都練唔同招式的話，隻歌又會點呢？仲有喎，我可以一時入快d，一時入慢d，千變萬化，唔知呢個世界上有無呢種keypad賣呢？
天花板電視
呢個idea根本新唔到去邊，有個plasma電視o既廣告已經有呢個idea。不過我真係好想擺部電視o係d
bed bound case 個天花板度，俾佢地知下世界大事，唔駛咁悶，訓到個人傻下傻下咁…
吸煙面罩
唔知呢個世界有無呢種發明，如果有的話真係造福人群。如果由我設計的話，呢個面罩應該有幾部分，分別係面罩啦，入氣口啦，過濾器同埋排氣口，但係個重點係唔可以將一丁點o既二手煙流出面罩之外。點著支煙之後就戴住呢個面罩，面罩可以抽入空氣，幫助支煙o既燃燒，另一方面，吸煙者呼出o既二手煙由過濾器過濾，然後先排出出面，咁樣就可以保護到唔食煙o既人喇。唔，個入氣口應該o係下面，而過濾器應該o係個面罩o既上方，事關d煙係向上走架嘛！係咪？如果第時強制性要用就仲好，希望咁樣令d人怕麻煩而唔食煙，一舉兩得！yeah！
一個人K 'singleway'!!
對於我呢隻
k 精黎講，搵唔齊人搞到唱唔成k其實好可惜，即使搵得齊人，出現「男歌女唱」o既情況亦都令人好沮喪。其實有無諗過唱
k 可以一個人唱呢？d k box其實可以整一d好似電話亭之類o既小空間俾一d單人匹馬想唱k
o既人（咁梗係要有得坐啦），無論ｄ人係約唔齊腳又好，想發洩下又好，都可以賺到佢地錢嘛，而呢個亦都係一個好好o既練歌場地。一個人o既耐力有限，所以佔用
k box o既時間亦都唔駛太長，咁個turnover rate就會好快喇，仲唔客似雲來？再鬼馬d
o既，可以好似影貼紙相咁，錄起d人o既歌聲，然後整個每月投票，咁當然要唱o個個人同意啦，話唔定仲可以搵到明日之星添！
今期主打歌﹕《一個人的精彩》、《一個人飛》
Ｒainbow six 通話器
去網吧打機，最重要都係同班friend有溝通，但現場兵荒馬亂，鬼殺咁嘈，講句野都難啦。如果d網吧可以有呢d好似walkie talkie o既系統，就可以解決呢個問題喇。如果當呢樣野係一種額外o既服務，每個鐘係咁意加番幾蚊，都賺死間網吧啦！
八達通打機
the beauty of 咭係d人用完錢之後張咭都仲係一張咭，無多無少，咁d人駛錢就會更加不知不覺喇。機舖係一個幾駛得多錢o既地方，有時見到d人成楝銀擺o係檯面，一陣就無哂，又要唱過…不如用八達通打機啦，一次過入佢幾廿蚊，打到抽筋都得，必一必，不知不覺，機舖自然收錢收到手軟喇…
war game軍醫
自問未打過war game，唔係好知d規則同埋有無「軍醫」o既存在。有次諗到其實可以每隊有一個軍醫，佢手上只有一支洗走d彩彈漬o既清潔劑，唔准有槍，專門幫d中左彈o既同伴洗走d漬。咁d漬洗走左就梗係當個士兵無事啦…但因為軍醫都會俾人射死，所以醫「傷者」o既時候都要好小心，而點樣coordinate軍醫醫人亦都好考工夫，我諗都會幾刺激。敵方或者會搵人追殺軍醫，軍醫要小心自己之餘又要醫人。而因為派左人去追殺軍醫，亦間接少左d人幫手去做其他objective…殺唔殺，救唔救都係一個好重要o既決定，一個軍醫可以令個game更多變數，真係諗得過架！最多猜輸o個個做囉…medic！medic！
充氣式月台空隙填滿系統 Pneumatic Platform Gap Filling System (PPGFS)
個中文名好冗長，我知， 所以諗左個簡稱俾佢。佢係一個充氣o既裝置，裝o係月台邊，一有車黎o既時候就自動充氣，填滿列車與月台間o既空隙，架車閂門o既時候就放氣收番起，防止列車同個氣墊互相磨損。如果唔整air bags，就可以諗下整一d伸縮o既鐵片，架車黎未開門o既就打開，方便d人上落車嘛。有咁o既裝置就唔怕d人叉錯腳啦，不過我都係覺得air bag flexible d，個cost平d！
搭地鐵同火車o既時候，個咪都會成日叫你「留意月台與車廂之間o既空隙」，尤其是一d彎d o既站，架車同個gap o既距離就相對遠d喇。時不時都聽到有人叉錯腳o既新聞，之前都有位朋友咁樣叉錯腳添。所以無論提住你又好，用d閃燈閃住你又好，個gap一日存在，就一定有人會叉錯腳，點解我地唔可以面對 番個問題，fill up 左個gap呢？唔知點寫呢個proposal俾幾間鐵路公司呢？
天井球場
香港地少人多，籃球場就更加係供不應求，旺區閒閒地每個半場有五隊跟緊，真係等開波都等到發霉。有日打完波，行過公屋o既天位，忽然間諗起 nike o係個船艙裏面踢波o既廣告，不斷諗o係密封場地打籃球o既情況。其實只要有心人自備一塊標準籃板，將佢掛o係呢d公屋o既欄杆（一樓）上面，再畫好個場，就可以係一個好好o既三人場喇，o係裏面打波，又有壓逼感，打得好樓上d 人會歡呼，打得唔好隨時擲野落黎，你話係咪激先？
見到天井位o個個所謂羽毛球場唔係荒廢，就俾人晾衫，係咪o徙左佢先？點解唔物盡其用，變為較受歡迎o既三人籃球場呢？
可拆式電子琴
彈結他o既時候，其實都想有多d樂器玩下，例如一個琴丫，但要帶哂出黎都幾慘，唔好話鋼琴咁威丫，帶部電子琴出黎都好吃力。所以若果有部可以分開幾part o既電子琴，帶到出街先砌，你話幾好呢？家下d科技咁發達，我諗好容易做到架o者…
實用的geri products
今次唔玩無聊喇，有兩件實用o既產品介紹﹕
1 號產品﹕gel pad 「渣」手
有個用開frame o既 case有日話我知佢隻手渣到好痺，咁好明顯係隻手壓住個架成日，壓到痛啦。睇到d mouse有個pad，其實 d frame o既渣手位可唔可以用呢d物料去做呢？卸到力個喎，再唔係用d貴d o既輪椅坐墊料做，你仲手痛丫拿！
事後同道箕分享過，佢話其實渣frame係用pisiform黎出力，而唔係用手掌o既，咁一下子，呢個產品就被打沉喇。
2 號產品﹕婆仔手機 X 平安鐘
拿，絕對有得搞架呢個！家下d手機出到越黎越細，完全忽略一班長者o既需要，再加上有線電話o既限制，令佢地無法o係街上面甚至廁所內同其他人聯絡，有乜事就等人救。有時諗d手機商會唔會出d老人手機呢？key feature係大大粒o既按鍵同聲控功能啦，另一樣係同平安鐘合作，令佢成為全天候o既求救工具。唔講花巧，一部字體大、黑黑實實好渣手o既手機，我估d老人家已經好buy，仲可以慳番有線電話費，家人、ngo仲可以隨時隨地搵到佢添！
好想好想將呢個idea交去有關單位！！
physical 豬欄
呢個 idea過時左少少，不過都想post下。話說有一排咪好興d「哮喘豬」o既，其實係d人想d豬多d瘦肉。其實要減肥，就唯有運動節食啦，我諗豬都係一樣掛，其實可唔可以o係豬欄度造一部好大o既 treadmill，一夠鐘就開機，d豬就係咁跑係咁跑，咁咪幫到佢地減肥囉，幫到佢，就即係幫到你地呢d咁咀「雕」o既人類啦…
另外其他家禽家畜都可以咁做架…
係呢個夜空o既background之下，係咪引發到你好多好多幻想o既空間呢？如果係的話，不妨同我交流下！！