第廿三頁
5-10-08 搬遷啟事
原來都有一個多月無寫野，呢排真係好忙，好難埋到位寫野。原本我諗住用盡geocities o既15Mb容量先走，不過無辦法，我想多少少update，但又唔係度度都有frontpage同埋自己網頁o既file可以改，所以隨波逐流地用yahoo blog，enjoy!
http://hk.myblog.yahoo.com/samuelychihang
22-8-08 鸚鵡．假到
鸚鵡到港，俾到我一日假期，當然都係及時雨啦，因為星期三開始個人都有點累，可能係做完野（o個晚放六點）又要秘撈o既成果啦 ，放左工要做野其實都幾甘，一黎體力已經用唔少，二黎太夜食飯同埋舟車勞頓，都幾辛苦。見呢排都寫唔到網誌，都想出力寫下野，「o係賺取o既時間、空間做一d 額外o既野」，阿媽教o既…
今個星期都幾忙，因為每晚都有唔同o既野做。星期二晚去左位舊同事o既喪禮，其實o係呢度我都mention過呢位同事，佢就係o個位好認真，問好多野同埋對case好好o既一位阿姐，係個好純良踏實o既老一輩o既人。一年前左右聽到佢有cancer o既消息，都戥佢難過，希望佢大步檻過啦，可惜癌魔奪命，五十幾歲就要走。佢係一位天主教徒，所以都採用天主教o既形式。一入到去見到佢o既仔女，都好想講番句野安慰佢地，因為我點都係呢位同事o既哎吔上級，好似都要講番d野好d，不過埋到枱簽名我已經講唔出野，心裏面好似有塊石壓住咁，接過吉儀就坐埋同事o個邊。
基督/天主教o既喪禮一般都無中式咁可怕，唔駛燒衣，又唔駛破地獄同搵班喃磨佬唱野，所以個感覺係平靜。而最大o既分別係佢俾到人盼望，即係有一日大家會o係天家（天主教o既「天鄉」）重敍。o係一輪聖詩，懷念生平o既沉重之後，俾到人一種釋懷、望住個天講「你放心去啦」o既感覺。好記得裏面有d句子都幾感人，（因為天主教都幾古舊，所以用字都好特別）有一句佢一打出黎screen，我就差不多喊出黎，就係「你的德行將與你常在，猶如馨香」，睇到呢句，我再回想呢位同我共事五年o既同事，佢o既精神同做事作風，我真係好大感觸…最後係向佢獻乳香o既一段，心口都係有舊大石壓住咁，望住佢張遺照，我好想感激佢對老人家咁好，但我講唔出，即使o係心裏面講，我都講唔出，舊石實在太重喇…
深呼吸幾下，再諗下佢transform成為另一種形式生存，上左佢喜愛o既地方，心口o既大石都輕左，真係衷心o既希望佢去到一個永遠快樂o既地方！
死者已矣，不過對於我地黎講，去喪禮另一種意義就係反省一下自己（尤其係唔恐怖o既西式喪禮），到底我呢一生係咪好白過，有無d野係人地記得，或者值得歌頌架呢？o係roadshow有個廣告，係一間叫alpha o既機構（我相信係基督教機構）出o既（「我要過好呢一生！」），內容就係講一男一女由成長到死亡o既故事，到底我地係咪個個都係好似用啤機啤出黎，再用輸送帶送去拍拖、結婚、生仔、老、病、死架呢？有無d野係o係運輸帶以外，又或者讓自己活得不平凡呢？我往後o既生命我要點樣掌握呢？
講完咁沉重o既野，都講下而家份工啦。有人話「一念天堂，一念地獄」，環境無變過，心境變就會有好大分別，劉華又話「心善則到處天堂」，所以呢個星期都少左去憎而家呢份工，再加上多野做左啦，感覺無咁憎而家呢份工，不過anyway我都預左自己會走，就算唔係出哂黎做private，都會換下工，「做private」出自我呢個追求安定o既人把口，係咪覺得好奇怪呢…
睇到道箕轉左用blogspot，其實都有少少心郁郁，因為geocities有容量限制，超過15mb就唔得，但係如果用yahoo blog好似無限，所以都想轉，不過又好似將自己之前o既努力抹殺左咁，所以都係等我用哂佢15mb先啦，我而家大約用左十三mb左右…講起網上野，千呼萬喚，我終於都已經register左facebook喇，我個email係[email protected]，不過我都唔知佢想做乜，開左又點，又無人傾計，如果大家識的話，不妨聯絡下我…
今次奧運o既最遺憾當然係劉翔跑唔到啦，有人話佢扮野，我只能夠打隻八筒俾佢，因為我不敢苟同，不過我第一時間諗如果用taping可唔可以幫佢捱到出場o個幾廿秒呢？kinesio又好，其他sports tape又好，一條唔得貼兩條，再噴下神仙水頂一頂都好丫，點解polyu 條team唔做呢？還是有d大國手hold住劉翔，唔俾poly o既人掂佢呢？你知啦，中國人始終有怕人叻過自己o既劣根性…
上星期日去左蔡san屋企house warming，睇到佢間屋四四正正，開始二人世界o既生活真係戥佢開心，真係好想快d見下自己將來間屋…o係度祝蔡san安居樂業！
10-8-08 密閉空間
真係成個月無寫野喇，而家d倉頡都打得有d結結巴巴 ，就好似我張書枱咁，好耐都未執過，好亂，有好多野都唔記得擺邊，要好努力咁搵，先知原來塞左埋一邊。有時執書枱都唔可以一步登天，就好似寫呢度咁，得閒黎寫一寫，咁先記得到而家o既東西。
睇番而家o既工作，review同project一下自己o既人生 （人生大計都開始左喇…），想出走大口環o既指數真係越黎越高。呢排有個case訓左好幾個月醫院返番黎住，第一時間護士梗係搵我睇下佢行唔行到啦，呢個人都叫做行到，不過個性好強，唔會聽人講，見佢行 得都唔錯，所以day 1 我放左佢行。
過左個周末，不幸o既事情都發生左，就係呢位院友跌倒，咁無辦法啦，projection都會有錯o既時候，兼且我覺得業界甚至科學界對fall prediction都未做得好，所以大家都有少少膽搏膽，一力承擔，「有事就搵我啦」o個隻。好啦，點都要同佢做d measures o既，好彩間院有bed 同seat alarm，直駁護士室，因為其實呢個人係對腳無力，坐至企階段有d唔穩，至於行路佢其實都ok o既，所以如果有無扶一扶佢起身就ok，所以就用左呢個儀器幫佢。
o係專業上我覺得我自己完全無錯，力唔係一朝一夕練得出，跌就分分鐘都可以，我亦唔想咁快就綁佢（阿安講得岩，做呢d setting真係好似做懲教），兼且綁佢佢都會發癲，一係就拎支棍出黎扑暈佢先算（講笑…），所以我先會用呢個方法。結果放工前有姑娘黑住面咁同我講「阿楊生，唔掂喎，應唔切鐘呀，阿婆又起身又坐低…」，落到office副院同d同事o係度傾，大大聲咁話「係啦，我地邊有咁多人手entertain佢o者」，同事就話「根本佢隻腳就無力行，咁樣都無用個喎」。好啦，從善如流，「護理安老院」行先o既係「護理」，護理就係一切，護理大哂丫嘛，兼且老細出到口話拆左d alarm佢喎（拆左alarm用hip protector喎，唉…你估下佢著唔著？），咁呢個alarm就係老細講完之後o既五分鐘內極速消失左喇。
拆就容易，跌更加容易，而我賴野就更容易，點都要諗d measures啦，見佢重心控制有問題，行路又心急，教佢用架都用唔掂，就俾個rollator佢啦，諗住佢一路推前，CG一路keep住向前，起碼有個位俾佢放穩自己個CG。試左一晚，第日交更o個陣問下護士佢用成點啦，點知身邊有個同事好大聲咁話「唉，嘥氣啦！」，o個陣真係有少少嬲，好想還火同講粗口，最後我都叫大家keep住觀察，睇下係咪真係嘥氣…
呢件事俾我睇到o既，係無論如何你點有rationale，你過唔到班護士社工大姐o個關，你根本無得做。一句「嘥氣」可能係我敏感，但亦都係我做野o既寫照，而且無論你做得幾好，無人會欣賞，你搞到佢識行，護士要睇多件。最好就個個都綁佢，用輪椅推 ，仲要佢唔識反抗o個隻，如果唔係見你係男人，又叫你黎捉住佢…但你搞到佢差左，d屋企人又打黎問長問短，好似你叫左佢阿媽老豆落gym做運動，但其實無理過佢，俾佢齋坐咁。
如果你份工作做d野出黎，人地係覺得「多舊魚」o既，試問你返呢份工仲有無價值？日光之下無新事，呢d野只會一路發生，一路打擊自己o既信心同埋治療熱誠，我都唔想做野做到「兩面不是人」，呢頭有人ban你無用，o個頭又有人問你有無盡力。好老實，呢d case我真係做到盡都係咁，幫唔到佢都真係無計，牛頓話俾我地知呢個世界係有地心吸力o既，所以人始終都會跌，防跌、無跌只係一個烏托邦、理想國， 如果有人覺得可以的話，就o係問米o個陣同馬克思傾飽佢啦！
而家我做得幾多得幾多，做得幾耐得幾耐架喇，睇下我幾時擲低張工作證，走出大口環！ 返呢份工一方面令我好有耐性，而家我搭一個鐘頭車，轉幾廿次車我都覺得ok，如果架車開得快反而係bonus。不過有時就會好反常，一塞車、等車就會忟憎，因為好似被逼俾人困左o係一個地方度咁，好唔自由，好想突破，好想行出呢個車廂，另覓新路，呼吸一下自由o既空氣，同我困住o係大口環o既o個種感覺如出一轍…
我近來成日都拎住部計數機計數，即使係d case落左gym，上哂機o個陣，我都會篤下到底我出到黎會有幾多收入。其實講真有工打底，而自己o既caseload o係未來係穩步上揚的話，我諗唔會差過而家，甚至比而家更好。前個星期東記同其他NGO一樣，加薪5.29%，不過今次係我第一次有得加人工而唔開心，因為即係話我出黎o個陣要出多d力，去賺到而家呢個數。
有人話，出得黎就唔好諗住賺以前o個舊錢喇，其實都岩o既，某程度上都係有少少破釡沉舟，不過始終生活迫人，人生大事又黎緊頭，所以又想睇定d，或者真係圍到而家呢份人工先出黎，免得兩個家庭（現有同埋就黎組成）都唔穩定。阿媽話「打工最好架啦，擘大眼就有糧出，返一個星期又有得休息，返四個星期又有錢收」，我就話如果呢個cycle循環十年，我已經提唔起勁出黎再闖，就好似冷水煮蛙咁。
呢排當然要講下奧運啦，其實睇到奧運都覺得好感動，因為始終都無出錯，你知啦，大陸野有時都靠唔住，記得有次打趣同蔡san講中國探月o既問題，我都希望佢會成功（咁結果都成功左），不過我唔希望見到佢幅月球相右下角會有"NASA"字樣囉。好彩都見唔到，不過中國人就係咁，抄野叻，創造唔叻。
好似奧運講番四大發明，其實中國真係改變左世界好多，但點解會淪落到而家咁o既地步？淪落？你唔係呀，而家咁太平盛世都話淪落？我o既意思係d中國人都仲係咁唔文明，仲係咁無品咁農民。
前排同呂炳耀去左日本長崎o既原爆公園，個感覺好深o既當然係一d國仇家恨啦，始終自己都係中華兒女，另一方面覺得原爆d人都好慘，不過又覺得日本人抵死，仲要包裝到件事自己係受害者咁。不過講到最後，最抵死o既都係中國，完全唔識得自強，人地維新幾百年就可以船堅炮利，同西方接軌，中國仲o係度唔知做緊乜。成日有人話抗戰勝利，真係希望d「愛國份子」唔好咁大聲講，因為如果唔係日本搞珍珠港，美國都唔會掟原子彈去日本，日本都唔會投降，你話你抗戰勝利係咪有少少狐假虎威呢？當然你會話中國都有抗日勝利o既例子喎，例如「台兒莊大捷」之類，不過呢d地區性o既勝利，始終阻唔到日軍鐵騎o既腳步。讀中史（其實最憎讀！）話抗戰後期中國國軍已退到山陵地帶，以險要o既地理環境去制敵，講真咪即係打游擊。打游擊已經係一個在野o既組織所搞o既事，例如塔理班已經唔再係掌管阿富汗呢個國家o既組織，而唔係兩國對決，換言之中國敗退得好緊要，但仲要o係史書上死撐…根本軍隊裝備唔好，將領各懷鬼胎，打o既只係打人海戰術，死十個當五傷，仲要血染的風采仲好似好值得歌頌咁。
睇奧運當然會聽到國歌啦，好奇怪o既係人地d國歌都係「天祐我皇」、神保祐我地國家咁，好似中國咁悲壯都幾特別，血肉長城、做奴隸的人們、冒着敵人的炮火，中華兒女o係奧運呢個大喜日子、o係「搞奧運=國力強大」o既狂想之後，都真係要儆醒一下。
係呀，八月頭同呂炳耀去左九洲玩，玩乜？睇下風景、搭下火車咁啦，其實plan九洲都真係好考功夫，因為市面上講九洲o既書可以話係廢o既（勸大家千祈唔好買），上網要逐個景點去搵車、搵資料其實都幾係野，好彩同呂炳耀一齊搞掂。旅程中最驚險o既係裝呢d資料o既file漏左o係架火車入面，搞到大家都好徬徨。不過好彩呂炳耀醒目，睇到便利店有行車時間表賣，先可以解到圍。今次可以話係搭齊九洲唔同種類o既電車，而除左電車以外，亦都搭到鄉郊地區o既柴油列車（當然唔係噴黑煙o個隻），聽到佢地行車、上斜o個種咆哮同震動，真係覺得好有質感。另外都有好多靚景睇，例如一架叫「seaside liner」o既列車真係o係海邊行駛，亦都搭到「燕子號」子彈火車，滿足左我呢個電車迷。有時覺得去日本除左鍾意佢靚、舒服、整齊外，有火車搭都係一種吸引力。
前排睇左本書叫做《北海道幸福鐡道旅》，裏面當然又係電車啦，不過有d角度佢影得真係好浪漫，例如漫天風雪之下開行o既單列柴油車、o係海邊o既車站等，真係好想去搭下。當然從今次九洲之行得出o既經驗，就係呢d列車通常好疏、好鄉郊，意味住要花一定o既時間先搭到。所以大家去九洲，如果唔係太憎跟團的話，我都係建議跟團好d，因為我地每日都花幾個鐘o係火車上面…
另一樣都講下日本o既名勝，九洲出名o既係溫泉，不過日日都成卅幾度，仲浸乜鬼丫，唔驚中暑咩。另一樣出名o既係火山，今次去左兩個火山，分別係阿蘇火山同櫻島火山，不過我覺得日本人好識得包裝，明明呢d係自然災害，反而可以包裝到好似一個景點咁賺遊客錢，當然仲有原爆館啦，擺明係國恥，不過都以「愛好和平」黎包裝，日本人都幾識做生意…
去九洲亦都睇到當地o既「七夕祭」，雖然同香港o個d花車巡遊無得比，不過都叫做feel下人地o既廟會係點，幾得意…最激氣o既其實係部相機成日神神地，搞到去「鬼之洗板」o既時候無電，去買電又要行番轉頭，所以都miss左一部分o既景點無影相。o個度天氣其實都幾熱，不過無香港咁悶熱，好曬但有微風，我地每日都差不多飲好幾支寶礦力同埋水先得，所以如果大家想去九洲，體驗一下「南國風情」，而你o既另一半又唔係老師的話，最好都係揀春秋時份會好少少… :)
呢排睇緊一本叫做"Reinventing acupuncture" o既書，內容其實係一個英國人講佢四十年o既落針經驗。佢認為針灸搞到咁複雜，某程度上係古人將佢複雜化，等到其他人學唔到。當然對於佢o既說法我係有保留o既，不過我都會追睇落去。點解叫reinventing呢，其實係佢覺得有好多時針灸得同唔得都講唔埋，不如重新去認識同體驗，再寫出黎啦。佢好多時用太沖可以醫到七成以上o既症（佢醫頭痛比較多），而吊詭o既係佢個朋友話用足三里用左好多年，醫左好多人，但結果佢發現佢落緊o既位竟然係陽陵泉！意味住o係呢個double-blind o既實驗之中，落咩位其實都係一樣…針灸fans係咪有少少失望呢？
有時都反思一下針灸係乜呢？到底係用imaginary method去treat imaginary disease，還是真係一門真材實學？到底佢點comment中醫o係時間醫學方面o既領域？自己都開始要依賴針灸為生，所以都好想搞清楚呢d事。而到最後Felix Mann（作者）都會講佢創立o既periosteal acupuncture係咩一回事，未讀到，但有少少期待。今期誠意推介！
講起書，都要講下書展，我地本新書終於出場喇，叫做《中風康復鍛鍊手冊》。睇到自己生出黎o既呢個仔，其實好有感觸，如果呢本書係幫到好多人的話，就真係功德圓滿，而我亦都會好認真review一下自己o既工作，到底係做緊「醫療廢物、廢物醫療」，還是可以企出黎，為香港、世界做一點點事。當然本書出得街實在好多謝余生、蔡san同阿安o既努力，我只係出左少少綿力同埋出左鏡o者。
去左旅行o個陣有個舊同事留言俾我，話見到我本書，恭喜我做左作者，心裏面真係好興奮。年青人有好多精力同時間，但係人大左就要計算下將d精力同時間放o係d咩地方度，所謂「分水嶺」。今次書展有好多人，當然有好多係買趙碩之、傅穎o既寫真，（其實書展書展，基本上都唔係一個逛書o既好地方。因為人又多，有時見到本書要行埋去都好辛苦，有時不如去書局打書釘好過…）不過如果有人睇到呢本書，幫到佢屋企o既公公婆婆，我會覺得好欣慰！本書亦都係我豁出去o既第一步，希望繼續為我走出大口環鋪路，就好似一個囚犯拎住隻匙羮一路o係個地下度挖，挖條地道逃獄一樣…
諗起返工其實覺得感覺一般，話一般係因為自己某程度都接受到搭咁耐車，花咁多時間，當然亦都接受唔到無乜工作滿足感…我仍然企o係「穩定+悶，刺激+唔穩定」，繼續做個平凡人，還是燃燒一下青春o既決擇上…
1-6-08 豈有此理！
呢排忙乜呀？唔記得喇，總之好忙…
呢排有乜做呀？唔記得喇，總之好忙…
呢排係咪好累呀？係呀，無時無刻都想訓覺…
我諗呢幾個問答就係我呢排o既生活寫照。
我諗大家都有講四川地震啦，開頭唔知咁大鑊，不過真係越睇越大鑊、越睇越慘。出動埋空降部隊入去救災，我覺得都幾浪漫，好《雷霆傘兵》咁。有人話一個傘兵帶到幾多野去救人丫，兼且我又見到空投物資o個陣有少少馬虎，有乜理由一pack蒸餾水就咁o係部飛機度擲落地架，唔爆 樽就有鬼啦，點解唔用大木箱同埋降傘呢？不過唔好理，我覺得多一個人就一個人，多半pack水就半pack水，希望裏面o既人可以早日出生天啦…
另一樣係體會到好多正面、救人同埋好人好事，令我對中國有少少改觀（o係呢個moment）。不過我睇到片段都好心up，因為實在死得太多人。其實之前緬甸風災都死左唔少人（好似都係四五萬人），不過大家好似都係中國人，所以都會有感情多少少。錢當然有捐啦，不過今次都觸發到我去捐少少俾緬甸風災o既人，希望大家都唔好遺忘呢班災民。
其實最想嘁o個個位就係溫總同個越講越喊o既小朋友（劉小樺）講「別哭，別哭」，o個陣其實我同呂炳耀食緊野，講真我有少少強忍淚水，個鼻好酸好想喊…我覺得溫總呢一代領導好識得o係正確時候出黎，振奮一下大家，雖然佢講o個d野都係不外乎「救人工作要爭取時間！」、「救得一個得一個！」、「盡量調撥資源救災」之類我都識講出口o既野，不過出自佢把口，仲有佢渣住大聲公個樣 （特色係永遠對唔到個咪講野）同眼神，真係幾convincing。如果想重溫一下o個段睇到我爭d喊o既片，可以去呢度﹕http://hk.youtube.com/watch?v=joyEA2Zm5JU
睇到大地震o既新聞，冷不防又記番起以前中六中七讀o個本《唐山大地震》，呢本係中六中七o個個syllabus入面較為好睇o既一本書，其他例如《西潮》、《漢語語法修辭常識》 等真係不敢恭唯，悶到爆！講下講下，原來呢d已經係十多年前o既事lu…
返新工之前好得閒，有四日o既break，因為明記o個度十四號last day，十五至十八就係自由身，做乜都得。當然啦，放假一定要訓番覺好，所以訓覺都係好重要o既節目之一。原本一心諗住o係呢個時間去搞下個回鄉証，因為仲有半年就夠期， 而我仲係渣緊「回鄉簿」o個d人，兼且想影番多少證件相、見工相咁啦，我而家用緊呢張都係七年前o既相。不過好衰唔衰呢排d皮膚好差，有三粒大暗瘡，所以都係打消左呢個念頭…放假做左乜？都唔 係記得lu…
19號返東記新工，第一次聽院長親身同我orientation，一次過留o係同一個地方成八個鐘，對於我呢d遊牧民族黎講都係一個好大o既挑戰。始終返左五年都係四圍行，而家要我坐定定都真係「會考有難度」。o個度一如我所料啦，都係one man band，都好o既，我呢d人都係一個人做野好d，最怕就係o個d辦公室政治同埋氣氛，例如要埋下堆、吹下水之類，不過老細唔俾我坐運動室，一定要我坐office。咁算啦 ，諗住新黎到都唔好咁多要求住，問番師兄點解要坐office，佢話老細想team building喎，其實坐office暫時就無乜問題，不過我諗日後試多一輪我都會同老細講調番去運動室好d…
第一日返工我爭d遲到，因為由我屋企去到大口環要個半鐘（唔係以前o既半個鐘！！），兼且我都唔明點解朝早架971會係單層，要我由旺角企到入去，入到去仲要就黎夠鐘，搞到我要跑，真係幾深印象。唔知大家有無去過大口環，o個度其實除左一間地攤小販之外，一間舖頭都無，食野只能夠搭食，著住套制服（即係有藍間、三個袋 、茶餐廳伙記o個種，不過好衰唔衰佢俾左三件女裝我著…）都唔知去邊度好。
有好幾日我都換左件制服出街行下，其實大口環無野好，電話電台都收唔到，不過係近海邊同埋靜靜地，一眼可以睇到太平洋、長洲同埋好多好多貨櫃船，即係以前社會書講o既「水深廣濶」，好多遠洋船o個d呢…每日我都出去行下，拉下筋，就係最大o既娛樂喇。
不過好景不常，有日老細召左我入房，心諗都係問下你「返工習唔習慣呀？」之類啦，點知佢話佢想著制服o既同事盡量留o係院入面，又話咁樣係唔想走火警o個陣點唔齊人數，唔知我係咪安全喎。o下，走火警？一聽就知係「念你的台詞，多麼仁慈」啦，一聽就知呢d唔係理由，一句到尾即係唔想我出去啦。之後又話更衣室、休息室o個邊有時會有人唔見野，叫我唔好留o係o個度，咁即係叫我留o係office啦，office得幾個妹妹仔，大家都唔岩channel o既，佢地通常講去sogo掃左咩平貨，邊隻零食好食，點搭嗲呀！如果唔係工作上o既野基本上都無得搭咀。o係office度無野做就梗係上下網啦，不過大庭廣眾，想check下股價都唔係咁好意思，休息室又唔俾去，出大廳同d院友坐即係提早開工啦，咁叫我去邊好丫？
如果無野做不如打電話俾呂炳耀啦，點知老細又叫我唔好袋電話返工，叫我飛線返office喎，我心諗「你唔係呀，咁都要管？」，我同女朋友講野係咪要俾埋你聽埋呀！x&($%()@!#)$！真係好想講番句「豈有此理」，阿blue jeans唔該出一出黎丫！
俾佢咁樣講完我無即刻反駁佢，第一我o個日都幾眼訓、第二我唔想咁快得罪老細，不過出到黎我真係好唔開心，黑哂面，出去闖o既念頭又出現！好似道箕咁，我諗住俾一個限期呢份工﹕半年至一年度啦！
其實都聽人講過東記搾人都搾得幾盡，今次都領教到喇，不過講真咁o既工作環境並唔係有人一手做成，而係由上而下都有呢種文化，大家又唔去表達意見（或者反抗）先會咁。
其實跟我做野o個個PCW都話佢地食飯係食半個鐘，一向都俾東記「剝削」緊架啦（講真佢平時份人都幾nice，無乜怨言，都係第一次聽到佢用呢d咁負面同強硬o既字眼）。見大家o既工作時間又夾唔到（lunch大家食12:45，我食到1:45，佢食到1:15就開工），我就梗係問老細佢地食飯係咪食半個鐘，如果係的話下晝有無tea break啦。點知老細話佢自己食完飯會即刻返office做野，到下午肚餓先食塊餅喎，ok，你咁多野做有好多原因，我都好欣賞你咁搏殺，不過我覺得食飯食半粒鐘係咪真係去得盡左少少，兼且佢話唔想d人編更時特登要編tea break入去，搞到d同事唔想做野喎。大佬而家係你爭人半粒鐘呀！仲話人地去食tea聚集有問題，係咪本末倒置左少少呀社工！
當然有人欣賞自己仆心仆命為間院我都好贊成，不過其實做野係講mission，講和諧，唔係講管制、指引，你管得人太死o既大家返工咪返工囉，多一分鐘都唔會再俾你，唔會返早一分鐘益你，你可以逼佢地、搾乾佢地o既每一分鐘，不過你得到佢o既勞力，而唔係歸屬感、使命感。或者你會話「我叫佢番黎都係做野之嘛，駛乜要佢有歸屬感呀」，咁你就錯喇，歸屬感係一樣好powerful o既工具，到第時你真係要人extra俾時間出黎幫手，江湖救急o個陣，我睇下邊個會幫你！
星期六返番去明記，俾番d相同事，同同事傾開，佢都話明記個team building做得好d，大家做野會投入，同事之間好close，我都好認同，我覺得呢個係明記o既優點，當然佢跟足政府o既point黎開post亦係佢另一樣o既reputation，正如師兄所講，明記d工點都多人寄過東記就係咁解。管理唔係「治亂世，用重典」咁簡單，當然有d野我覺得要渣得正，不過如果連食飯時間o既人身自由都要管，我覺得呢間機構同管理文化真係好有問題！
blue jeans出一出黎丫唔該！
豈有此理
曲：黃良昇 詞：某人 編：黃良昇
月冷星淒風蕭索 仍是未慣獨我行 長夜說荒唐 總少你
問到底幾許掙扎 濃霧劃破是太陽 年月歎從容竄身退
從前同話過 勝利 火中花 香且燙 抓緊它 一於要得到
吶喊呼叫 悲觀充塞憤怒 憂鬱掩飾冷酷 豈有此理
熱情熱誠熱愛 困擾著未來 找不到振作所在
盡情盡狂盡放 比煙花燦爛 難自控 你我已變癲瘋
讓理想冰封生綉 疲倦面對俗世人 雲霧裡躲藏不相見
情隨時日變 勝利 火中花香且燙 欣賞它 不必要得到
( 又再衝刺 ) 呼叫 ( 清風分躺兩袖 ) 悲觀充塞憤怒
( 彼此應該信任 ) 憂鬱掩飾冷酷 ( 一再擁有 ) 豈有此理
熱情熱誠熱愛 要感受未來 忍 不需要靠走運
盡情盡狂盡放 此生多燦爛 期望你與我鳥瞰天空
用信心輕輕輸送 成敗面對願我能 能讓我光芒 閃一次
要睇MV可以去呢度，有youtube真係好，好多經典都可以留得住﹕ http://hk.youtube.com/watch?v=0YZH1oKB4yU。叉開少少，我覺得o個句「總少你」好似講緊粗口，另外我覺得有少少X-Japan，黑超、火光、無厘頭有個BB仔，好鬼搖擺，好鬼80年代，好鬼激動！！（當然今次成日講「豈有此理」，除左件事令我好嬲之外，都係因為香港寬頻o個個廣告，如果有興趣都可以去youtube 摷下…）
20號終於都完成左我o既碩士生涯喇！如無意外我可以畢業，開始人生o既新一頁，唔會俾功課同埋上課時間所籠罩。有好多人生大計要搞、要部署，希望都可以一一完成同完滿啦。 呢排都有去睇酒席o既野，我心目中覺得「年半前去睇？唔駛咁早呀」，不過好不幸地由esd life裏面睇d disscusion forum講，而家行規都要年半前搵定。咁同呂炳耀試下周圍問下行情先啦，點知「皇延」系列不幸地只係得旺角廣華街、尖沙咀粵海酒店，前者下面係街市，睇到都唔開胃，後者o係寶勒巷，好難搵兼且個場麻麻，九龍灣因為租約問題未能確定下年時間。彩福佐敦full左，彩晶有人話d野唔好食，美心o既映月樓full哂，荃灣綠楊o既美心皇宮full埋，星光行翠園有位不過個場好長，兼且裝修好舊，只能擺第二志願，你話呢個真係咩時代？
行婚展o個陣排左三四個字先入到去買飛同埋參觀，其實都有d感觸，香港真係太多人喇，做乜都要搶先，要排隊。o個陣諗如果生於外國，我book個禮堂、花園駛唔駛好似香港咁慘烈呢，兼且我睇到d人為左可以secure自己o既大日子，會越黎越早book場，第時可能一拍拖已經要諗book邊度咁變態。睇住呢班同我差不多年紀o既人，我覺得我地真係由細爭到大，細個就爭入大學、爭工作，而家要結婚就爭book野、爭參觀，人生就係充满競爭，充滿要搶先他人o既時候，一秒都唔停得。一諗起咁樣我d腎上腺素就即刻上升，真係要快d爭贏呢班人先得，我唔想成為下一個望門輕嘆o既人！
20-4-08 時、刻、情、景
寫於四月二日﹕
先前去左某大慈善機構in一份 "senior PT II"，其實一開始都有D緊張，因為都唔知自己係咪做 I o既材料，第一次俾人問「不如你講下你o既優點同缺點」，都有少少語塞。最後 in落覺得其實呢份工都係請你去解決埋o個d好婆媽o既問題，例如「如何引誘dementia病人做運動？」（佢都dementia左由鬼得佢啦！）、「非資助部家屬諸多要求你做唔做？」（無理由但又要我做o既我會唔做！）、「護士話個case要綁但你又覺得佢行，你撐自己觀點定係聽護士講？」（集體負責制，我堅持 盞俾人鬧爆…），當然我唔會答括號入面o個d野，我會圓滑少少咁打完場，不過in完之後又諗，日後真係要我落手落腳去面對o既時候又點呢？最後冷不防阿院長突然間問 "constraint induced movement therapy"，真係好彩先排寫書有搵過下journals，如果唔係真係 O 哂咀…
in左一兩次有「人事部經理」o既工，我覺得人事部經理先係呢舖機o既「大佬」，因為佢地好識得搵你心入面o個句。佢好直接咁問我「咁你而家做緊o個度係咪無乜發展呀？」咁，我o個陣都唔知答乜好，答無又好似踩明記，答有咁你做乜又要走先？不過最尾我本能地答左有，因為明記真係有好多自由空間做野，只不過我係嫌人工比市值低 同埋title唔好o者…
in o個陣我越講越有火，唔係講得好o個d火，而係對於社福界同埋PT之間o既火，仲有講d PT開個gym場出黎，唔理d case o既情況。成日話要人搞小組，我就話不如你諗下夠唔夠人手去做先啦。我覺得如果我上左任，我會睇下人力資源有幾多，我可以做到幾多野，幾時會飽和。因為野係無窮盡o既，但人就得咁多，無番咁上下數據，d高層會信咩？呢d話我當然無講出口，不過我都希望俾佢feel到我係有心做好d case o既physio，雖然呢d咁前線o既心態並唔係佢地杯茶…
in份工之前都見到同事同埋一位成日見工都碰到面o既師姐，大家都話我地呢幾年畢業o既人人工最差，工作又多，互相交流之下發現而家有某d NGO對於「mid-point制度」都仲有計傾，可以拉長多一至兩個points，兼且假期仲會多好多添！真係in唔成呢份 I都有番d得著。第時見到「軍隊」o既工，真係要留意下！
另一方面由於呢間咁野要人地o係份application form入面一定要你填「最近期僱主」as referee，結果先斬後奏地寫左我個 I 落去，諗住之後補番個email say sorry希望佢諒解啦，不過估唔到收到o既message好溫暖，真係要講聲多謝！
in完呢份工照舊有好多感觸，老實講，一路o係入面in，一路講o個d都係d好婆媽o既問題，點樣搞小組、面對多投訴o既家人、面對同護士o既衡突（唔知點解護士總係人數最多，但同其他人衡突最多o既一行），其實問心都唔係咁鍾意做呢d非clinical o既婆媽野…返出黎即刻同實習緊o既（其實我o個朝要實習）蔡san講，份工好嘔心呀！
所以「人生交叉點」又黎喇，如果有份工好好pay，但係只係要你做一d好嘔心o既工作，例如解決頭先所講o既問題，你做定唔做？有人話梗係做啦，你請得到我一定奉陪，有人又話如果做d野唔開心o既，一動不如一靜啦…好喇，做o既企o係左邊，唔做o既企o係右邊，開始！
寫於四月二十日﹕
十四號去左東記驗身，因為我接受左呢個offer，因為佢個title好少少、人工好少少、假期又多少少，況且好似阿媽話齋﹕「入去做下囉，做得唔開心借d二咪出黎做（private）囉」，又記得阿安o既金句之一﹕「做過一日都叫做做過丫」，所以人生交叉點我係企左o係「yes」o個一邊o既…
自己對於呢個決定都好堅決，老細問我係咪人工唔夠，佢可以申請加番我年資，又問我係咪想要多d admin經驗，不如調我去院舍做，我兩者都答唔係，因為新一份工多o既係一個唔同o既title，第時自己o既 portfolio可以好睇少少，講真而家都已經做緊多少admin、所謂PT I野，如果仲係一個 II都無人會recognize，所以為左呢個title（同埋市儈d講當然係個薪酬啦），就算返大口環咁刁轉都係要走。
其實我都收到風院舍會走兩個師妹，所以今次明報係三個地方一齊出post，薪金方面我已經好強力咁同老細強調唔好寫point 12，要寫面議，因為咁樣真係「請風濕」（Choi, 2008），無人會睇得呢份工上眼。而家05-07畢業o既，乸埋都要緊二字頭，你寫你16k係咪想唔請人呀！好彩今次真係從善如流，如果唔係我都唔知幾時先請到人。其實都叫左老細出post o個陣寫埋有得做outpatient，不過可惜個ad係中央出o既，所以無寫要做乜，如果唔係我估都有番多少叫座力過院舍o個兩份。
就黎要走啦，心態上開始有少少放。放o既意思唔係話唔俾心機做野，而係好想o係剩餘o既時間入面再搞好d手頭上o既症同工作，即係好似有番d告別作咁。例如搞番一次PTA訓練咁，一黎因為下一個PT我都唔知幾時請到，二黎好想感謝呢一班俾幫我工作，等我o係clinical入面有所進步o既同事們。唔捨得當然有d啦，今次走並唔係乜野政治問題，或者做得唔開心，而係為自己前途打算。其實我都未通知d前線同事我要走，希望到時可以同佢地食番餐飯，多謝番佢地啦。另外都要每個centre寫番張多謝咭俾佢地，cheer up下而家呢種低氣壓。
終於都考到o個個死人 IT test喇！！！第一我都要繼續講呢個test根本係浪費我地o既時間，第二我想講我好開心，因為唔駛再山長水遠un車上去o個個無雷公咁遠o既「文瀾堂」，你話如果我係讀中大、住逸夫我就話tat對拖就去到考o者，上去都唔知花我幾多時間，考考下隔離o個位同學（針灸班同學）一坐低就因為無帶學生證同身份證而無得考，真係戥佢可惜…另外開心o既係好似向畢業邁進左一大步咁，而家剩低o既就只有實習同埋份大論文喇。
呢份論文老師講過要有「前瞻性、創新性」，不過到左呢個時候我要求o既只係份論文「生生性性」，快快趣趣做左佢，過埋個presentation我就可以甩難！其實我都開始俾呂炳耀鬧，因為份論文成日話做都好似無乜進展，亦都阻住大家見面o既時間…而成日心掛掛有份野未做，亦都俾左好多不必o既壓力自己，打機都打得唔開心，總係烏雲蓋頂咁…
甩難之後真係要開始諗下人生大計，同埋事業上o既進展，同相應o既行動…原來世界真係好大，睇完上次本書之後彷彿又開左d竅，諗野諗得全面左，有目標左，而唔係日復一日咁工作，當然我都要工作要搵錢，但我知我為乜工作，我o既mission係乜，亦都好似有一個夢想咁。
呢排個股市好番d，結果都入左少少，希望可以第時幫我賺番部洗衣機或者電視返黎。有人話個市已經入牛轉熊，入左寒冬咁，不過我又覺得而家有上有落，有水位o既都可以做下買賣。雖然無以前秒秒鐘上落幾千點咁狂野，不過又好似有番d位俾人出出入入，亦少左一份因為較早前 因為買唔到（可能只係一兩日或者一兩分鐘前），而睇住隻股票好似火箭咁颷升o既無奈。
無人敢話個股市短期內會向好，不過我又覺得ok啦，有上有落，可以試下走短綫，俾自己一d經歷。我覺得近年我多左d經歷，真係牛市見過，熊市又見過 （車，懶係偉大咁…）。近來roadshow教人睇圖表測股市，都幾有意義喎，唔知大家有無留意呢？最後要講番句衝浪都要量力而為。投資涉及風險， 價格可升可跌，亦要留意第二市場可能有限，到其時可能變成毫無價值，投資前應了解風險，並徵詢專業顧問意見，本文字亦不構成任何推銷……（下刪十萬字免責聲明）
上星期三去做仔o個陣忽然間收到個同事電話，話想黎睇下個仔點做喎，唔，咁即係個仔唔駛我做啦，其實我又無乜感覺，自問都真係做到盡，咁佢又無乜進展，家人又唔多鍾意，又話佢識人開physio clinic想試下喎。咁呢度個老細當然唔想drop左呢個仔啦，因為除左我上門之外，仲有OT先生日日都同佢做手o既rehab，少左佢老細會賺少好多，就唯有搵番以前做開佢o個個physio出山幫手…
一路做佢同一路同呢位physio傾，開始發覺自己有少少技不如人，人地真係將個gait pattern形容得好好，反觀自己叫個仔行好d但又唔知點入手，所以真係要好虛心咁同呢位師弟學習。其實聽完佢講我唔開心左一陣，唔係因為o個d師兄師弟o既問題，而係自己做左三四個月，好似都唔識點入手，反而呢位師弟可以逐個point去解釋佢o既gait pattern，我覺得自己好渣，要好好檢討下。雖然好多人都話做private係咁架啦，d case有權選擇，不過如果做得好o既佢就唔走啦。我唔知佢會做成點，不過自己確係少左d經驗去睇gait，去諗野。
做完last一次仔同就呂炳耀去佐敦「雙星」食晚飯，諗住不如食好d鋸下扒啦，點知呢間野d扒細得可憐，個三文魚扒只係有三塊威化餅咁大，仲要好薄，價錢又唔合理，又唔係好坐過人，用咁o既價錢去扒王食真係食到捧住個肚走啦，但食完呢間都好似未夠，想去對面元氣補番多少野食咁，d侍應態度又一般，愛理不理咁，呢間野我已經black-list左喇！
十七號晚同蔡san講緊電話o個陣上網，忽然o係yahoo見到伍晃榮逝世o既消息，真係覺得好突然。雖然話「人生自古誰無死」，不過佢o既離開又好似真係突然左少少，不過都好丫，快快趣趣唔駛捱。第二朝聽 903 當然又係講佢啦，一路講一路用羅文o既《好歌獻給你》黎襯底，忽然間好唔捨得呢個咁鬼馬o既人走，o係返工途中o既巴士度我其實就黎想喊出黎咁滯。同好多香港人一樣啦，其實佢o既報導係《新聞報道》入面o既一份甜點，我唔會特別追睇佢o既報導，不過每次睇完都唔會令我失望，好好笑。
o個句「波係圓o既」我覺得一般啦，其實我最鍾意o個句係「朗拿度好波o個陣真係好好波架！」，睇完o個次報導我笑得好開心，記得o個次我有寫o係我網誌入面，搵到有獎！haha。懷念佢o既人話「波係圓o既」下一句應該係「打過先知」，又有人話佢o係短短o既幾分鐘入面帶俾人歡樂同破格o既報導，係好專業同敢於創新o既表現，我都好認同。事實上無佢咁o既報導手法，亦都無後來者o個d輕鬆o既格調。每個人o既離去總係帶俾我地一d懷念，其實亦再一次提醒我地做人做事o既精神。o係度都送呢首歌俾佢﹕
好歌獻給你 - 羅文
曲︰馬飼野康
詞︰鄭國江
＊歌聲飄送千千里 不計距離
歌聲飄送萬萬里 跨遠地
歌聲句句唱出愉快少年事
好歌一生伴著您
重唱 ＊
＃好歌獻給您 讓愛藏心裏
陽光在我心裏照耀 光輝歡笑永伴隨
好歌獻給您 願您藏心裏
惟願為您解去愁悶 快樂在歌聲裏
重唱 ＊,＃
＋好歌獻給您 願您藏心裏
陪伴渡過黑暗長夜 我活在歌聲裏
重唱 ＋
％這歌唱一次 您會即刻永遠記住
裏面帶著愛 裏面帶著笑與淚
這歌唱一次 記起您 唱萬次
一般勾起了可愛往事
近排可能唔駛去做個仔同埋就黎走啦，多左一份閒心，少左一份急趕，好似平日PTA先生成日播o既老翻碟咁啦，平時我都唔會理佢唱乜，因為都係d舊到爆o既《無言的結局》、《愛拼才會贏》之類，不過今次呢隻碟真係mix得幾好，好多間唱片公司o既歌都齊（真係係老翻先做得到！），俾我聽到好多中學時代、卡啦OK時代聽到o既合唱歌。例如周慧敏同林隆旋（！）o既《流言》（一聽o個陣以為林隆旋係張信哲，係咪忘記左呢隻林龍船呢…）、彭羚（！）同張信哲o既《註定相愛》、仲有楊千嬅同梁朝偉o既《地下鐡》（唔知係咪呢個歌名），真係聽到都有少少冧，有少少掛住呂炳耀…
前日買左隻何韻詩o既《goomusic
collection》，因為裏面實在有太多好歌，例如個MV好有爭議性o既《勞斯萊斯》、《化碟》、「暗裏進行更自在，不相戀誰會受害」o既《明目張膽》、新少少o既《木紋》、《韻律泳》等等。呢排幾鍾意聽《韻律泳》，因為覺得d詞寫得唔錯，有默契又自由自在o既感覺，「眼裡有彼此，韻律也不需，憑一個默契，陪著你，舞翩翩，跳下去」、「太快了肯等，太慢了肯追，才可以絕配，成伴侶，一世同舞，跳下去」…
我覺得呢排有多番少少靈感，好多感覺都可以好好地記低，好耐都未試過寫咁多，你都好耐未試過睇咁多，hahaha…
五月尾會有一次studygroup，請大家留意！
24-3-08 辭職創業
其實無乜心機做野（論文、溫書），不如o係度寫下日記（或者月記）啦。呢排睇左一本好書，叫做《富爸爸﹕辭職創業》，裏面講到好多創業者o既困難同埋心理準備，換句話講創業其實係由每月有糧出到一分一毫都要自已賺番黎。點解買呢本書呢，當然係用黎諗下自己o既前途問題啦，到底自己有咁o既勇氣未先？答案梗係未啦！
不過一路睇覺得有樣野講得好好，就係「使命」。好似以前都講過，做野點都要講你自己o個句o既"mission statement"，如果你o既statement係「搵多d錢」、「安穩o既生活」、「求其交到貨就算啦」，咁你應該唔好創業住，不過如果你有其他使命，亦都有好o既產品同埋團隊去配合你，出去闖下都唔係一件壞事。
有人會出去創業，但係會覺得「我每個月至少要賺番 $（某個數）先得」，咁其實都未係一個創業者o既態度，咁樣只係一個另類雇員，繼續跌入財務o既不自由之中。因為你未打破到「追求穩定收入」呢份恐懼，亦進入唔到將來「財務自由」o既大門。創業者衰d講句係要破斧沉舟，出左黎要預左有日子係無錢搵，仲要好阿Q咁話我出黎係學野，預左會生意失敗，不過會反省同改善，創業係一種自我挑戰同自我完善o既態度，而唔係一種搵錢方法（當然成功的話會有好多錢），如果要搵，不如做住而家呢份工，然後買下股票好過…
睇完呢本書有好多反省，亦覺得本書講緊好多阿安o既特質，頭腦又好似進步左，知道好多做生意o既野（產品、顧客、心理、團隊等），文字好淺白，我一個假就睇哂，所以我好推介呢本書俾想出黎創業o既人（例如就黎出黎開診所o個d），我覺得自己仲未係出黎創業o既材料住，仲有少少驚，不過由於我地o個行o既人工好快見頂（除非做左PT1），我都會諗下幾時出黎，不過我都係繼續唔想搞診所…
聽蔡san講而家個市簡直係火紅，據聞有06年畢業o既師弟妹話如果份工無20k+20日大假都唔駛旨意佢轉工，真係好想問一句我01年至06年係咪去左流浪（格拉斯哥定香港？）、我係咪俾外星人捉左、呢幾年我做過乜，點解而家份人工同佢地只係差少少？而家starting已經係18k仲有allowance/ commission， d師弟妹都話要揀，我地當年4k幾野都仆到去做，有呢d工見仲要好興奮咁話俾阿媽知，然後大叫一聲"yes"，都係要講番句「生不逢時」…
其實我地呢一代真係生活係一個斷層，前面o個d師兄師姐個個做哂P1、SPT，住洋樓養番狗、渣Benz食林杮，d師弟妹而家個個20k人工，我地搵工就碰釘最多，人工同岩岩出黎o個d人又差唔多，唉…難道真係要出黎搏一搏？不過正如之前o既阿Q精神啦，我地學到o既係佢地未必有經驗同心理質素，所以我相信我地呢代應該可以有更好o既成就…
呢排有一個case refer左落黎，又令我回到沙士o既日子，因為呢個case據綫報係有過MRSA，但係要上門做chest。一黎呢個case係總剖掟落黎o既自負盈虧case，無得推，二黎人地只係要PT 服務（你睇我地幾咁有用！），所以都係要硬住頭皮，著住件焗到爆o既保護衣上去拍，大汗叠細汗。其實阿伯無乜點，不過無乜反應，SaO2又時高時低，不過通常一拍佢痰，佢就會升番，好神奇，但係其實佢有個國內護士幫手，所以都唔明佢叫我地上去做乜…
上到去當然同阿姑娘交流下啦，不過我諗係國內o既溝通風格係咁啦，鍾意未講野之前「得」下你先，我問姑娘有無同佢拍痰呀咁，佢就話「我做左護士四十幾年喇，你話我識唔識丫！」。ok，你勁，你最勁，不過老實講你叫得做私家看護，無理由你唔做chest ，而搵我做囉。當我道明自己o既來源、來意，唔係同佢爭生意之後，佢d「鋼」先收番埋。
有時幾唔鍾意同呢d人工作，因為我都係一番好意，又或者咁講啦，上面競爭咁激烈，人浮於市，如果眼白白俾人搶左份野黎做就真係勢係假，所以都係要銼下人銳氣先，我呢d見得少風浪o既溫室小子，又點會明丫。點都好，之後同阿姑娘都相安無事（除左成日嫌我阻住佢routine外），大家都係做野o者，所以都希望o係未來盡快彈番個case俾阿姑娘做…
今日天氣好好呀，不過我都係同屋企人飲下茶，無乜點陪佢地去玩。其實呢個假期想同佢地去下塔門，但係前兩日都係陰雲密佈，所以都係打消左呢個念頭，好彩擒日都可以同佢地燒野食。有時天氣就係咁難測，當有興緻o個陣個天就落大雨，但事務纏身o個陣就鬼死咁好天…諗番屋企兩老都一把年紀，其實都希望帶佢地玩多d。記得阿媽同我傾計，佢話如果所有家中包袱都放低哂，佢好想周圍去玩去遊歷，我好認真咁答佢﹕「咁你要好好保養身體喇」。可能因為我見得太多老人家，知道光陰有限、世事無常，所以都希望佢地身體健康，玩多d，見識多d野…
呢排個股市真係好殘呀！殘到我隻1800都係值$15.x，不過有危就有機，所以又覺得有少少手痕想入下貨，當然都係睇定d先啦，個個都話三四月會大冧多一次，都要睇下日後事態如何…
最後又要鬧中大。
前個星期六同蔡san去考o個個什麼IT proficiency test，第一我好唔認同點解用電腦都要考，你係咪當我石器時代o既人呀！我地呢個世代由DOS到vista都玩過啦，仲考？你考乜「 」野呀？第二係好唔認同佢份卷o個d野，個powerpoint要整到d字飛黎飛去，講真就算你做present都唔會用呢個style啦，考黎真係o徙鬼氣。最後我想講中大d交通真係好差，o個d校巴半粒鐘先一部，仲要死下死下咁上山，真係有無搞錯！完全唔便利學生。到最後我唔知點解我肥得好慘烈（每逢我太偏激、太驕傲、太有信心等等，個天都會咁樣玩番我轉頭），半份卷紅哂，我真係覺得好侮辱，我word, excel, powerpoint, antivirus都死左，好似我全部都唔識用咁，我仲係「IT盲」咁，最慘係我都唔知點解會肥，但係無得check卷，真係好想爆粗！好想投訴！anyway為左畢業，我聽日都會去考多次，希望快d搞掂佢，快d畢業…
另外係忙份論文啦，今次我揀左個冷門題目黎做（真係"lorry jean"…），不過點都好我都會捱大佢，五月前做得好好睇睇，再諗下其他人生大計！睇完《辭職創業》，忽然間覺得個世界大左好多好多…
2-3-08 共創和諧社會
終於都感受到一點春天o既氣息，無咁凍，唔會成日搵衫著，一坐耐d就手腳冰冷o個隻。其實諗起上黎身體都係差左少少，以前感冒好快可以搞掂，而家symptoms無左，不過成日借d意想發出黎咁，食少少熱氣野都唔得o個隻。睇道箕個網頁話無乜人update個網頁，唔知係咪講緊我呢，不過都係o既，我真係又成個月都無update過。
其實做野都做得幾burnout，好想搵d突破，兼且機構仍然有「midpoint詛咒」，過多幾年自己已經係所謂max，到時諗點走又好似太遲，遲又走早又走，不如而家…不過自己又細膽，怕出黎唔夠穩定。呢幾日成日都諗呢d問題，覺得如果他日做唔到PT1點都要出黎架啦，無理由搵份二萬四o既PT2坐過世架，但係又覺得出黎做好似手停口停，過返以往freelance o個種o既流離生活，心情好似企o係十字路口上…
上星期日上左阿安o既taping堂，覺得佢o係兩年間進步左好多，諗番自己坐在明記咁耐，叫做有少少做街症o既經驗之外，skill上真係無乜特別進步，有時人地繼續黎睇都覺得唔好意思。呢排我開始睇番多d書，我覺得睇書真係可以令個人無咁頹，當然啦，中醫有句說話（唔記得原文）係「與其睇熟哂本《針灸大成》，不如落手做多d case好過」，所以都想搵多d渠道出黎做下症，試下野。就快開治療師會啦，大老闆問我地有乜野訓練需要，其實我心裏面都有答案，不過始終同隔離台一齊，又唔方便講，我覺得training就一定係skills，有skills個人無咁頹，無咁頹自然留到人，吸引到人入黎做，另一樣好structural o既就係caseload，如果一朝廿九幾隻症，點做先？有幾好o既 skills都淪為receptionist啦，所以我覺得要成個配套一齊落，有訓練就要有好d o既caseload，好o既分流制度，如果唔係都係得個桔…
有日搭地鐡由將軍澳返鑽石山做野，諗住好地地訓番覺啦，點知隔離o個位大叔好有中氣咁講電話，不過聽佢講野都幾得意，亦都幾恐怖，內容大致係咁o既﹕
「我以前都提出過呢個問題架啦，係你班大粒佬覺得我細，唔聽我支笛之嘛！@#$#@%$#%^&（粗口）」
「好，我講又唔聽，而家（佢上級）就o係度話呢個係問題，我!@#$%@#$%^%^！我即刻o係個會度@%爆佢啦，我話你咪X出聲呀，而家先黎講，點做呀，我講又唔聽………!@#&%&&$&%%$^…（粗口）」
「好丫，以前平平地換度普通閘又唔換，而家話年度尾要洗番d錢先黎換，我咪一於搞大佢囉，報左廿幾萬架。（有少少得意忘形）X！你吹呀，仲要整埋落地玻璃添呀…根本（佢老細）就無遠見，唔識分配d錢，一早聽我講就唔駛洗咁多啦，而家跟指引要做廿幾萬，又要寫statement澄清，抵X佢死架，我理鬼得佢呀，一於有咁大咪玩咁大囉，咩呀！@#$%##%#%^^%！」
成程大致上係講呢d野啦，不過我覺得大人o既世界真係好恐怖，尤其是建築業呢d咁陽剛味咁重o既行業，真係三句唔埋兩句就會爆粗，要識得過濾先得，又因為咁，佢地d所謂o既指引、規則要定得好死。不過事情點會係完美丫，定得咁死他日有漏洞咪又係俾人炳。可怕o既係其實好多人都係帶住一份怨氣、戾氣返工，以destructive o既角度睇事情，一朝不得志就記住人，「睇下你到時點死」，直頭係戾鬥戾，根本唔係想間公司或者個project好。呢d到底係乜野文化？睇到而家o個d好收得o既電視劇都係「復仇」、爭產，「耳聽七分假，眼見未為真」，睇下你點死o個隻，香港又點會係一個和諧社會？
有日坐小巴，又聽到小巴司機同d熟客仔訴心聲，佢話小巴而家要經紀律部隊宿舍，不過自此以後投訴就多左好多，有d甚至不近人情，小巴阿叔精警o既形容係「係又投，唔係又訴」。話說有日有個女仕上左車但係八達通無錢又無散紙，咁司機就俾佢坐住先啦，諗住返工時間好心幫下人，點知架車未返到總站，站長已經打佢手機問佢係咪無收人錢，搞到司機好似好心做壞事咁。
情與理啦，兩個都岩，不過老一輩o個種「寬容下」、「人情味」似乎就消失o係而家「先進」、「開明」o既指引、投訴、問責身上。以前細個我地係點大架？你差五毫子先買到野食，食物部嬸嬸都唔收你啦。隔離陳太唔得閒，都擺阿明仔過黎睇下電視啦。o個陣個社會有無咁多爭拗？而家開明左、先進左，越叫社會要和諧o既人越令社會唔和諧。對人唔好唔會有一點悔意，仲要係應份，因為著數我拎哂，有錢我搵先，你死你事，人地對自己唔好就要「問責」、「投訴」、「你咩態度呀！」、「睇下你點死」，社會和諧已經係一個烏托邦，留番俾馬克斯啦，上到天堂就烏托邦喇…
講少少時事，有位成功人士開記招話想做某某處處長，佢o個種站起來o既動作好明顯係佢訓練人公關技巧入面o既一套肢體語言，不過講公關技巧，佢咁小題大做，我就覺得佢交戲交到過哂火位，到底d係佢o既精密計算，還是一時火遮眼呢？但你咁成功、咁好公關技巧無理由控制唔到自己情緒呀嘛？！有人俾野俾你做，你又願做o既咪低調少少接左佢囉，到上左任，就輕舟已過萬重山啦，根本就唔駛咁多肢體語言，什麼「為學歷岐視平反」講得咁重。仲要話呢個係「三煞位」，而家我有得印印腳都唔印，一定要深入呢個虎穴咁偉大，個位咁唔筍你又走去做？有時我都唔明呢位公關界、危機處理界、傳媒界名人，點解用一個咁唔好o既方法去處理件事，大人o既世界真係好難明。
可能朋友間太耐無見喇，第一句都係「近排搞乜呀？」，係呢，你近排又搞乜呀？
我繼續為畢業論文努力啦，因為一籌莫展，另外放左工繼續做下隻仔，無乜起色，屋企人又多意見，不過都係繼續做咁囉。而家少左陰天同埋寒冷o既時間，個人都有番多d動力去做野，搭車免得過都唔會訓覺，亦都睇多左書。o係睇書o既過程中我搵番理想中o既自己，好似原本無氣o既汽球，而家充番多少少氣咁，好想繼續有inspiration，好想搵日抽離一下日常生活同工作，偶然做一個自閉仔，淨係睇書、諗野、四圍行同埋discuss下針灸、fascia之類o既問題，畢竟全世界對身體o既認識實在太少喇，「醫學昌明」只係一個相對o既形容詞。
好想搵大家打下波！
9-2-08 一年之計
嘩嘩嘩，相信今次都係最耐無update o既一次，眨下眼已經係08年！趁住新年流流，梗係要講下恭喜說話啦，唔係會俾阿媽鬧，所以先同大家拜個年。首先祝大家o既人生大計一帆風順，讀緊書o既學業進步，快d畢業，大家都步步高陞，同埋生意興隆啦！
做乜咁忙呢，其實忙都係其次，體力同o個顆閒心就真係好緊要。有時做完野返屋企已經好累，兼且而家一個星期有三晚秘撈啦，其他時間要休息、陪女友等等，所以自然對呢度忽略左，不過咁，其實只要的得起心肝，都可以寫呢度o既係咪？事在人為o者。
有時聽道箕講野都好有道理，正如我以往o既比喻啦，道箕同阿安係「冷靜與熱情之間」o既組合。團年飯o個陣聽道箕講唔收referral 所帶來o既問題，令我重新睇番自己檔野唔收referral o既問題。畢竟做野都係安全d好，有熱情無腦袋都係壞大事o既多。上到broad唔通同佢地講，醫生d referral都係廢o既，得LBP三隻英文字母，自己做diagnosis好過咩？所以有時自己諗o既野，o係成年人o既世界係唔同d。有時都會諗香港都會走向越黎越多訴訟o既時代，有少少想讀番個law黎保護下自己。因為就算你唔去搞人，有時d人都會借d二就告你，又或者好多時做野都係憑住一d commonsense，但原來法律上係唔可行o既，所以真係識番少少法律會好d，用黎保護自己同埋家人…
除左referral之外，都聽到阿姨去in私家醫院o既消息，覺得原來in一份工唔係好似NGO咁簡單，因為真係要好expert一樣野，兼且有好多知識已經脫節左好耐，所以一路聽一路都心驚。早陣子對份工真係burn out哂，返工好似行屍走肉咁，所以都有諗過去第二d渠道工作，兼且成日聽蔡san講「出面真係job等人架，間間NGO都買唔到服務！」，真係諗好唔好出黎私家做呢？不過聽到阿姨o既經歷，都係留返o係度好似好d。
有時覺得出面個市唔係唔好市，不過係d II位多，其實逗開咁上下人工，都唔係好有動力想走，我諗就好似冷水煮青蛙咁，慢慢就知死…蔡san又話其實NGO越黎越多會搞private clinics，所以有番d private經驗都係好o既，我諗都岩o既，不過實在要我而家跳出黎逗低d人工去做private，又好似唔係咁ok，另一方面諗，要浸就要趁年青時候浸啦，無謂七老八十，人地當你係expert o既時候先出去做unilateral PA。呢d問題反覆地問黎問去，對自己o既前途問題，有時真係無乜辦法…
講起個市，呢排都幾波動，有心水但都唔敢郁住，唔知會唔會低處未算低。其實股市都係一個心理遊戲，你唱好個市，大家有理無理都會死入去買貨，你話波動市，個個就一買一賣，見到位就走，所以話人心難測就係咁…
新年喎，有咩野做呢？當然係搵場戲睇下啦，《長江7號》有周星馳，不過每朝聽《在晴朗的一天出發》o既盧覓雪講原來都唔係咁好笑，所以都係放棄左，結果我揀左《魔法奇緣》，因為都幾搞笑，新年梗係想笑下啦…另一套我唔係太鍾意o既係《功夫灌籃》，第一好似抄周星馳o既《少林足球》，當然你會話係打緊籃球喎，周杰倫又型仔、對眼又似余生，梗係唔同啦咁，不過有少少舊瓶新酒囉總係。另一樣唔滿意o既係用功夫去跳到離地九萬幾呎入樽，好似失去左籃球要向高度挑戰o既趣味－－就係因為有高度而射唔入籃，就係人類o係射入與射唔入之間o既刺激性同娛樂性。如果個個人都跳到九萬幾呎高，命中率100%，咁仲打乜鬼野籃球呀！打乜野單擋呀！打乜野陣地戰呀！mark咩人呀！guard咩臭呀！goal tending就大把！個比賽已經完全無可觀性，已經唔再係籃球比賽。就正如而家o既戰機打空戰，已經係o係度「超視界作戰」，根本o係未睇到對方，只係個什麼雷達掃到n公里外有架敵機，然後大家鬥快按掣射飛彈咁，同以前二次大戰o個種互相纏鬥o既dog-fight好唔同，好唔夠浪漫！
終於都搞掂左本書啦，第一個唔係要多謝Parco，而係真係要多謝余生。我其實出o既力真係唔多，係多得余生o係全本書入面o既資料同編輯，仲有吹雞叫大家返黎做野（兼且有時我做做下野要早走），本書先可以面世，講到呢一點我都幾慚愧。不過本書有個雛型，希望出版o個陣可以大賣啦。其實寫o個陣都想力求寫多d野，有多d資料俾公眾，兼且紓發一下感情，不過我地都要顧及市場，如果寫到好厚、好多字、賣得好貴，本書一定唔好賣，係薄薄地，六十八蚊左右d人先肯買，如果寫到幾百頁厚，不如搵Churchill-livingstone出版，再問Margaret Mak用唔用佢做Poly教科書啦！
呢排真係好凍，基本上我o係雲南得番黎o既感冒，到而家都未清得哂，今年都係凍得好恨o既一年，好似無俾我地break過咁，d婆仔都識問﹕「點解d科學家話全球暖化，但係而家咁鬼凍架」咁，唔知幾時先可以暖番d呢？
一年之計在於春，我心裏面都有少少計劃，希望可以完成啦！仲有，大家都讀左唔少野，好想搞下study group，兼且我起碼有年幾無打籃球喇，真係好想搞番次…
o係度再祝大家繼續豬籠入水、前途一片光明！
21-12-07 理療極端份子
又係困自己o係房對住電腦o既時候，上一次係咁o既時候應該係上次一炮過完成兩篇論文，雖然質素真係無乜，不過交到貨已經算笑。呢排忙到爆炸，真係好爆炸o個隻，每晚都係同呂炳耀講一陣電話就收線訓覺，見幾個鐘頭面咁。有好多戲都好想睇，但係根本一d時間都無。今晚埋到枱打呢篇野，我直頭覺得我而家先呼吸緊空氣，亦好想吐出身體o既「累」氣…
呢排忙功課啦，忙完功課就考試，相信你叫我再take多一個長course我都會諗下先。雖然我講到好忙，不過都係一件好事，因為交完d功課後我有個中學同學（丁啟船）結婚，之後第二日我要去做 另一個friend o既渣車兄弟，晚上就去阿姨o既婚宴。多左一個home case要做，其實係做仔o既，話難唔難，不過要同佢溝通都要一定o既時間同埋耐心。忙o既都係應該忙o既工作，不過真係幾想有一條「裂縫」，break一下自己…
考完試其實都幾開心，所以忽然間自己o係度搗蛋，同呂炳耀講我無帶學生證，無得考試，搞到佢…唉…嚇親佢真係唔好意思，雖然已經雨過天情（嘩呂炳耀好大量o既…），不過o係度真係要公開地同佢講一聲對唔住同埋錫番…
新鮮熱辣地in左某道教團體o既工，其實佢要o既野似一個安全主任多過一個physio，兼且一人承擔全個團體（包括老人服務、學校、廟宇）o既職安，真係幾challenging，早知個expected salary寫得狼死d啦！不過我諗我都無乜機會入下一round interview，因為我聽到我之前o個個同對方傾得好投緣，而in 我o個陣就多左個人事部經理入黎，唧都唔笑o個隻，所以氣氛都係一般，再加上自己串串貢，話呢份工好challenging，又反問佢地會唔會睇自己d工傷case，所以都咪駛旨意有得再in。
in下工其實個人o既心態又成長左d，一黎可以rewind一下自己呢幾年o既成就，二黎有d憧憬可以逃離而家o既流離生活。我諗如果真係要靠自己o個行維生，我地呢一代o既就只有幾條路﹕搵PT1位（瀕危品種，買少見少）、等升PT1（論資排輩，仲要我大老細唔buy我老細，我諗我都無運行）、出黎開clinice（風險高、回報低兼激心）、乖乖地做番mid point o既PT2（好過無…）。
咁當然你話我可以開間cafe o既（我地都有成功例子啦），無問題，只要唔好開physio clinic就得喇，我地呢一代人真係無乜著數，乜野咸苦都捱過，但係甜頭永遠無我地份，而家d師弟妹寫expected salary都萬五起錶（但d英文差到我唔識睇），仲話爭取入職薪酬等同speech therapist o既價錢（當然我都贊成，但係點解d人咁遲先realize呢樣野？），諗下自己做左咁多年人工都係多佢一截仔，都真係想問下自己係磋砣歲月，定係生不逢時。到底我地「01一代」可以點樣生存呢？
早前同一位言談一向激進o既同學仔傾計，其實都好少同佢接觸，因為佢d話題我總係搭唔上咀同唔識俾反應。佢話不如轉行啦，做case永遠都做唔好仲要俾人問候，又永遠都無發達。都係o既，不過我覺得如果真係用「發唔發達」黎睇我地o既專業，我諗我地o既「專業壽命」會好短（當然如果真係想轉行就真係快d轉喇）。
我就相信「無乜插柳」呢個 concept，即係話有d人唔覺唔覺咁做野，佢只係專注o係自己o既本業，碌下碌下可以做得好大、好成功，但相反有d人顧住短期o既回報，做case會無心機，無心機就做得唔好，做得唔好就遲早俾人叮走。我覺得世事好得意，做野一定係睇動機（唔係道箕），係睇你自己心入面o個句「使命與宗旨」。如果本住搵錢，相信一定做得唔好。又或者咁講啦，由細到大我都唔識講大話，如果叫我心裏面「錢錢錢」，但外表做到好「專業至上、實力至強」、勁有愛心同衝勁，我諗唔駛幾耐我一定穿崩，所以都係踏踏實實咁捱落去吧啦…
有另一位朋友（又或者半個老細）佢係另一個故事，話說佢做左無耐保險就已經入 top 5，即係上哂報紙，加入什麼「ABC保險公司藍寶石圓桌武士會」o個d呢…佢同我講有d同事都覺得好驚訝，問點解一個做左幾個月o既師奶可以晉身top 5，佢就答其實多d去做下義工，識多d人咪得囉咁，之後班同事就一齊去做義工喇。我唔係想研究佢點樣入 top 5，我相信無理由一班保險經紀唔識做義工去擴張自己o既人脈，不過呢個人無將「我要搵好多保單」呢個concept擺入個腦入面去做義工，只係o係佢（真心地）做義工o既時候同人傾下計，咁樣就撈到客，仲要係大客。我唔知呢d係咪叫「無心插柳」定係「真心無敵」，不過呢個人一向做乜野都好成功，好有眼光、走左最前，我好佩服佢。佢令我相信用真心去做野，個結果一定好…
席間又有一個叫做「理療塔理班」，泛指一d讀完undergrad仲要去讀書同埋繼續鑽研醫術o既人，當然我都係一份子啦，你地都係架（其實我幾buy呢個「極端份子」o既名號，又或者可以叫「物理治療解放組織」或者「理療泰米爾之虎」）。不過我做極端份子，都係想自己做case有滿足感多d，而知多d野除左搵錢之外，其實我真係對生命好有興趣，好似就快搵得出一個人點樣可以活得健康o既答案咁，所以我鍾意讀書、睇書同聯想（唔係「lenovo」！）。可能你都係塔理班o既一份子，不過唔好覺得孤單，你不是一個人行路的。不過有一點要注意，而呢位同學亦講得好對o既就係要知道自己做緊乜，你要做塔理班就做好佢，唔好一時o係度頹，一時就拎住塔理班o既AK-47。
聖誕就到喇，今次會同呂炳耀去旅行，希望開開心心、影多d靚相啦！其實呢幾個月大家都見得唔多，所以都好感謝呂炳耀o既忍耐同諒解。今年我去唔到大家o既聖誕party，不過我人唔到都禮到，希望抽到份好野啦！
返埋聽日就放假喇，其實都開始holiday mood，有d case無乜進展都唔執住，等充完電返黎後一鼓作氣搞掂佢。呢排都好想學下野（返阿蓋達？），因為我o既治療需要一d火花同點化，唔知大家有無興趣讀myofascial release呢？
講到讀書，我講番轉頭，如果諗住升職的話，真係要讀番d management或者OSH野，因為以頭先份工為例啦，話就話做clinic manager，不過要落手做case o既時間唔多，一個PT都搞得掂成間clinic，所以如果想份resume convincing少少，真係不妨o係呢兩方面落下功夫。骨子裏我仍然覺得做physio最緊要打得，因為當總幹事行埋一邊話你知佢個shoulder痛左好耐，問你有乜advice，唔通仲叫人敷下hot-pack先咩，你唔好玩啦PT 1。不過做前線太強o既人一定上唔到位（至少d社工會咁諗，佢care間centre d數據多過你俾d case問候o既數據，care 賺左幾多，多過你滿足感有幾多），所以o係職場上都要把握呢d人o既口味，要「對味」，趁住有位就好apply左先，到時有閒心先戴番塔理班o既頭套、拎番起支AK47掃番幾件patient…
祝大家有個快樂聖誕，新年進步。呀，仲要恭喜道箕就黎做新郎，同埋多謝佢網頁裏面講關於揀鑽石o既information，貫徹道箕o既冷靜、獨到同一針見血，"I think you have done a good job!" (Smith, 1999)
8-12-07 巧婦難為無米炊
嘩，好耐都未寫過野，我知道今日如果我唔寫，我諗呢幾個星期都無時間寫。因為下星期會好忙，星期頭忙埋份功課同埋溫書啦，星期四會一併搞掂佢，星期五晚有隻freelance要first visit，星期六全日返工，晚上去飲，星期日下午做兄弟，晚上去我阿姨個婚宴。再下個星期都差不多做冬，然後我就去旅行喇…
一口氣數完我個schedule，係咪覺得好pack呢？不過唔好忘記其實每晚放工後都仲有時間，不過呢d時間總係唔太好駛，沖完涼食完飯睇下報紙傾下電話就過左去喇…
前幾日睇左個報導都幾搞笑，話說大陸農村有人嫁女，但離奇地o係o個日o個家人個雞場d雞死哂，有人懷疑係禽流感啦，不過又無理由d雞幾分鐘內死哂咁齊整個喎，查根究底原來呢家人嫁女o個日燒左十分鐘炮仗，d雞全部嚇死哂。其實農村燒下炮仗幾唔閒呢，不過而家d雞隻隻都逼o係豆潤咁大o既籠入面，一d運動都無，唔似以前通山跑，自然心血少啦。睇完呢單新聞我笑左一分鐘左右，因為覺得好搞笑，不過諗諗下其實人類都面臨住差唔多o既問題，唔襟嚇唔襟激唔襟捱，好似一位physio話齋，大隻但係好潺弱…繼而靈光一閃，諗起我o既發明﹕physical 豬欄。
另一單係o個d花邊新聞版o既，報導瑞典一間顧問公司研究聖誕老人o既行程。佢話如果聖誕老人要如期o係四十八小時內派哂d禮物俾全世界o既小朋友，佢架鹿車要以時速5800km/h飛行，而聖誕老人由煙卥爬入屋再擺低份禮物o既成個過程一定要o係卅四微秒內完成。咁講都好似好簡單，不過顧問公司話如果鹿車要以咁o既時速飛行，仲要拖住咁多禮物，架車會因為同空氣摩擦而焚毁，好寫實咁話俾你知呢個世界無聖誕老人，不過如果你相信仲有聖誕老人的話，你應該會信佢o既智慧同能力可以克服呢d困難o既，做人都係浪漫少少好…
前排見左份NGO o既工，有少少感嘆，覺得NGO如果係請PT II o既，都唔好咁大期望（當然家福會走離島o個份PT II例外啦，去到真max），因為NGO而家根本無可能俾到年資我地呢班人，尤其是新服務，咁當然請centre supervisor又或者PT I又例外啦…
話說上次去左一間將會開o係我屋企附近開張o既院舍見工，介紹完自己之後，個院長就直接了當地咁同我傾我o既expected salary呢個問題。其實我都係寫番而家o個個人工，心諗返工近d又唔駛四圍撲都好丫，不過佢話佢同總部傾過，就算我有適合佢地o既經驗同年資，佢都係俾得萬七我。聽到咁都覺得唔駛再傾落去啦，而家個市真係好到你唔信，d師弟可以萬七蚊加佣金仲要做private都無興趣，同我地當年每個月$4275兼且有八九個人（同學或者師兄師姐）爭真係不能同日而語。不過又唔好意思直接咁推佢，唯有繞下圈先啦。點知佢係都係啄住o個點問我，所以到最後我都只有拒絕，無理由唔逗而家份糧去開始一份新工o者，聽完佢介紹，我就更加覺得無得傾…
o個度其實係合約院舍，三成政府七成自負盈虧，連護士都只能夠俾mid point當max，心諗真係「巧婦難為無米炊」，暗地都同佢祈一下禱，希望佢地可以憑住愛心同智慧好好地咁做落去。試諗下合約院舍會不時俾社署查牌，兼且你出得呢個人工請護士都唔慌請得多，d護士仲要不斷流失添，咁責任自然就落o係班PCW度啦，PCW做多兩做又會叫辛苦，開始玩野，多聲氣，到時服務有咩差錯就互相卸責，家人一日投訴就投到黑，到時真係拿手唔成世。你可能覺得我悲觀左少少，人地未開舖就先打沉對方，不過自從in完呢份工之後，我好明白點解當日社工要上街、要衝擊社署，社會服務並唔係咁做架！
另外受惠於出面個市好啦，我有個PTA同事（即係AA）都走左，結果換左個中年婦女入黎做。呢個人斯斯文文，又幾醒目，不過係醒目到我覺得有少少唔舒服o個種，有乜野都叫我白紙黑字寫低，話驚佢聽錯喎，有時叫佢幫手安排d野啦，佢又話自己新上任仲要低職位，唔話得到事喎，心諗對住呢個人都係同佢打下官腔算數，呢d人應該經過辦公室文化o既洗禮先變成咁。呢間中心d收費一向都無乜問題，收費無問題自然case開心、同事放心啦，點知大老細話佢地o個個收費方法唔好，要用套票形式收喎，咁當然會有磨擦啦。其實我個人就最怕唔和諧o既氣氛，兼且最憎d人o係度呻窮，佔據「弱勢社群」o既高地向我地發炮，雖然我唔係直接同佢地接觸，不過遇着d人o係度呻中心改黎改去，又算緊自己有無俾中心呃佢o個寶貴o既幾廿蚊o既時候，我開大聲左個收音機，希望可以麻醉一下大家。o係另一方面我個心又同情呢班人，因為有部份人真係窮，但係有需要治療，其實幫呢d the lost、the last、the least o既人唔係明記o既精神黎架咩？到最後我酌情俾左兩個人一d優惠，搞到o個位新同事俾說話我聽，o個日我搵唔到自己o既立場，o係公事公辦同埋酌情處理之中迷失，有d唔開心…
所以話好人難做，你對佢好就得失大老細兼有說話聽，你與佢地為敵就自己受罪，睇到「惠民署」咁o既情況，覺得他日都係唔 做好人，一黎破壞左個制度，二黎同事又難做，三黎我都唔顧得咁多，救得就救，做到就做，我又唔係什麼救世主…
可能你會覺得一開始就唔好理咁多，梗係一早就唔做好人啦，做左對自己無益，到時出左亂子又難收科，不過我覺得做人都要有番少少人情味，如果人人都咁自私，只顧自己，社會就會好冷漠。就好似我睇住一個之前好有理想o既社工，基於「社會服務」呢四個字努力咁做服務，幫得就幫，又豁免某d case o既一d小收費，到而家乜都落簿、一毫子都唔收得少咁。都岩o既，要幫到更多o既人一定要先保護到自己，兼且o係一個「透明年代」乜都講機制、指引，使用酌情權只會帶黎麻煩…
其實今期要完成兩份功課，一份係綜述針灸o係某方面o既發展，另一份係要寫一個針灸研究o既方案，今次我貪心左少少，希望可以一雞兩味，搵一堆journal返黎而做兩份唔同o既功課，因為第一份其實就係第二份o既intro，而第二份根本可以天馬行空，因為只係寫，唔駛做。最後唔知可唔可以將呢堆料做埋畢業論文呢？
（都幾大貪喎你…）
下次見！
14-11-07 斑馬online？
終於都可以寫下野…
上星期係「吳宜婷」，無停過，四號要去花墟賣物會做義工，之後一個星期返六日工、三晚學，星期日全日要做兄弟，今個星期亦都要返六日工，所以真係難得有一晚忙裏偷閒，原本諗住去飛髮o既，不過大累，都係返屋企好過。
返到屋企食飯先知原來屋企d飯咁好食，當然啦食左廿幾年阿媽o既手勢，點會唔好好食？不過其實係因為出得去食野太多，晚晚都係快餐店或者canteen、叉燒飯或者單餸飯，所以而家一返到屋企食飯我都會好珍惜，四、五餸一湯，白飯任裝，仲要唔駛$$、無人趕你走。又可以同屋企人傾下計啦，老豆其實一向都好少講野，如果間屋剩低兩老，佢地基本上都唔會點傾計，所以我返到黎，亦都或多或少俾機會大家傾下計、講下野…
呢排鍾意番聽歌，一黎因為個股市睇唔睇、聽唔聽都罷就，要發未輪到我，愛股中交建繼續好穩健，我隻股票基金仍然係要蝕錢，要入市亦都唔係時候（都唔知幾時先係時候？），諗住佢跌番幾千點入下貨，點知呢頭跌o個頭就整個「大奇蹟日」V型大發彈，玩咩…再加上呢排download左幾隻想聽好耐o既歌，所以呢排鍾意聽番手機裏面o既歌多D。
樂壇新人同新歌有如恒河沙數，不過呢排聽到周柏豪o既《六天》覺得好有passion。即係如果大家放左學去poly主場唱K o個陣已經有呢首歌，我係會力竭聲嘶地唱o既o個類苦情歌。o個句「從來沒我份，犠牲當做例行，我慣了傷心」我諗我會勁嗌，亦都好鍾意o個句「我努力迎合你，只配做犠牲品，引爆藥引」，苦情得黎有d搞笑，引爆藥引…中段亦都有唔少嗌位，好掂！
另外好開心可以搵到陳亦凡o既《淘汰》，周董o既曲式同阿陳原來都幾夾，不過阿陳d普通話要改善下先得。最後一首係哥哥o既《風繼續吹》，事源有位同事o既鈴聲係呢首歌，聽到佢電話響有衝動想佢唔好咁快聽住…有一次搭van仔又聽到司機大叔播呢首歌，覺得以前d歌都幾好聽，d歌詞亦無而家咁多隱喻，「我勸你早點歸去，你說你不想歸去」，唔會好似而家o個d「你還嫌不夠，我把那陳年風褸送贈你解咒∼」咁間接同要諗畫面，叫你走就走啦…
記憶上《男人KTV》都幾好聽，而我都亦鍾意泳兒o既歌。前排the pancakes又出碟，我呢個粉絲當然支持啦，去唱片舖o個陣見到「東京事變」又出碟，o係掙扎左一陣之後，我就買左兩隻碟咁多。講真上次隻love psychedelico我都未聽得哂，今次呢兩隻我諗都要d時間去消化一下。正所謂最慘o既莫過於我部discman o係呢個時候死左，想問下有人知道邊度仲有discman賣？？
而家d電視節目都幾多元化，除左忽然再重聚o既《歡樂叉燒》之外，亦都有d個名我都唔係好明o既節目，例如《斑馬．在線》同《五個半A+料》等等。到底「斑馬在線」係代表「斑馬線」、「斑馬在一條線上」，定係「斑馬online」呢？但係睇節目o既片段我唔覺得佢係一套斑馬紀錄片，亦都唔似講上網o既節目，片中亦都無斑馬穿插過鏡，真係有少少耐人尋味…
唔知點解一開波話我無時間，但今次寫出黎o既感覺係我聽左好多歌、聽左好多碟同睇左好多電視咁o既…
樓市不斷咁升，有人仲話下年會升兩成，後年再升兩成，真係想問下我份糧係咪都照呢個方法升呢？對於人生將要發生o既大事，又平添左一個頭痕o既地方，租樓我條氣係唔太順o既，因為人地都係蝦你無首期o者，兼且而家租同買差唔多錢，不如九成按揭，用多少少錢做業主好過…唔知點解呢幾年先知道理財、投資係咁重要，反而有好多人o係呢方面好早開竅，亦都可以有較為安穩o既打算、享受住呢幾年經濟起飛o既成果，真係「各有前因葉蒨文」…
唔知係咪個人無咁投入啦，賣物會我都唔太落力，因為d貨真係賣唔到，亦都唔知可以點賣，今次賣乜呢？賣蠟燭…姑娘都講得好岩，d蠟燭係好靚，不過真係要識貨之人同埋有興趣玩呢d野先識得欣賞。好多人行埋黎只係話「好靚呀」，拎起然後又放番低，所以我呢個諗住去到大展拳腳、做 top sales o既年宵名咀都無乜辦法。
值得一提o既係我遇到一次「瘦田無人耕」o既真實版，話說我放工前要賣一箱裝有好多膠碟、茶杯同埋公仔o既貨，咁當然力sale公仔先啦，個個都鍾意同拎上手，銷情都ok。不過賣賣下有位印巴籍阿姐起勢咁摷我貨箱入面o個d膠碟，結果掀起左一次膠碟搶購旋風，唔同國籍o既人，包括賓賓、師奶、印巴籍阿嬸都加入摷野行列，唔駛五分鐘，o係我又用英文講價又用中文答人o既期間清左我呢箱貨，都可算係一個奇蹟…
講下返學啦，今個月尾我會請兩日假，用黎了斷o個兩份論文，講真份野我只係十劃有一撇，感覺有d吃力，希望o個四日可以了斷左佢啦。同d 一個星期返五日學o既人傾計，開始又問自己係咪太過唔捱得、少爺仔，不過身體倦唔倦真係呃唔到自己o既，又岔開少少諗，我係咪成日都想有一個standard去跟從呢？一個人要點樣先叫做捱得？係咪返三日學叫辛苦係唔捱得呢？我到底係咪有自己o既風格，唔駛理人地點睇呢？
講番今次o既實習真係聖恩浩蕩，竟然容許我地搵相熟o既中醫診所實習，一諗起中醫，就諗起Danny，我地同佢洽談中，希望成到事啦，唔駛返大陸之餘，亦都學到比較古典o既針灸方法啦…
27-10-07 PNF, Brunnstrom, Bobath...
原來又兩個星期…
好彩星期五睇左醫生，請左日病假，連埋短週可以放三日，如果唔係真係幾辛苦（精神上）。今個星期應酬較多，但係要做o既野就一路積壓住﹕寫書、搵料做功課、溫書（例如PNF，至於點解要睇，見下文）、要返新亞圖書館拎書俾呂炳耀等等，仲加埋一個星期返三日學啦，無日得閒，真係幾辛苦。年紀大真係無咁捱得，不過又咁睇啦，到底自己真係唔捱得定係無俾機會自己去鍛練身體呢？睇到有D朋友平日返工已經係返shift，仲o係兩年之內讀完一個同自己行 完全無關o既degree（想轉行喎…），星期六日仲要走去讀韓文，然後仲要cher埋d功課，但都精神奕奕，晚晚ICQ到夜一夜，其實係咪自己唔捱得呢？
呢排接左一個好富貴o既case，我真係好懷疑點解社署會批呢d咁o既case俾我地呢d機構，蠶食左私人市場。呢個人四十多歲，其實中左風年零，已經不斷試唔同o既treatments，例如定期有中醫上門開藥同推拿、又有個朋友同佢針灸同做運動，但都批左入我地o既frail case名單內。呢位男士係一個生意人，屋企養左四隻狗同一個工人，沖涼雖然老婆做得好辛苦，但佢又唔俾外人（工人）同佢沖，我地當然都唔駛旨意俾到服務佢啦，真係想問下你想我地d家務員阿姐同你做d乜好？兼且佢已經係一個好experienced o既接受治療者，久病成醫，所以對好多treatment佢已經講到有無效，做呢個case都要打醒精神。其實佢咩treatment都做過，所以我都要諗番d人地未做o既野俾佢，如果唔係就會好似好廢咁，睇到佢thumb有少少movement，就諗下佢可唔可以用PNF做啦，希望趁佢後生可以快d返到黎。惟自己唔係太熟o個d patterns，所以都想溫下書…
星期五o個日一次過搞掂左積壓左o既銀行事務，又同屋企人飲左餐茶，所以都幾寫意。人o既心情真係好受環境影響，趕頭趕命返到去就覺得中大大得太緊要，行餐死先返到去食飯 同上堂，借書仲要搭車上到鬼咁遠…但擒日搭校巴返到中大覺得原來o個度都幾寫意，尤其是上到新亞一望無際o既海景，圖書o個排無敵海景座位真係好舒服，可惜我全個下晝都係望住個mon搵資料，所以o徙左…
擒日因為要借書俾呂炳耀做功課o既關係，返左poly睇左一陣書，順便續埋個圖書證（喂，幾時搞返個拉把睇戲團呀？），雖然唔係睇左好耐，不過都搵到唔少寶藏，尤其是睇番一d關於CVA o既台灣書好有得著（所以好想去台灣睇書！！）。可能因為英文退化哂啦，兼且以前無o個種經驗去消化裏面d野，好多時睇"steps to follow"之類o既書都係揭下d圖片，睇下有咩運動岩做咁。今次呢本講Brunnstrom o既，個封面好老土，雖然你會話學乜鬼野丫，bobath都未熟，不過原來我地唔多唔少都做緊類似Brunnstrom o既野，兼且都係o個句啦「條條大路通羅馬」，lumbar rotation中外醫家都係咁做架啦，大家做中風都係睇reflex，都係做差不多o既野。擒晚o係屯門走o既時候一路揭一路揭，心裏面又有番一團久違o既火，到底我街症o個d陳年CVA有無得搞？o個個富貴CVA又點？
星期五同一間復康中心o既老細食飯，其實佢係我以前傷記o既主任，而家出黎開左間好創新o既中心。今次主力都係參觀下佢間中心同埋同另一位傷記同事敍下舊o個隻。我發覺呢位老細好有觸覺，亦都好有心推新服務，所以佢o既生意唔係一般私人clinic咁簡單，業務亦都包括埋其他相關o既行業、設計業等等。席間佢都講左PT同OT o既分別，我覺得我地o個行就算俾人蠶食都好，o係明眼人之中情況都未算太壞…反而係自己o個行d人唔爭氣，做得唔好，先俾到位人地入，身為社工o既佢都有少少替我地不值。同佢食左餐飯，個人好似醒左d咁，開始問番自己做緊乜，做得好唔好等等，所以我好想溫書！
今日係去BBQ o既日子，不過有少少天陰，希望唔好落雨啦。遲少少我會出門口，因為想做左gym先去燒野食，因為無做運動太耐喇…
14-10-07 orz
仍然繼續兩個星期一次，不過好多時寫唔寫同心態都好有關係，有時覺得放假咪抖下囉，做乜咁辛苦o者，兼且呢排做case手風唔多順，有少少improvement但又停左o係度，所以都想睇下書，尤其是d anatomy黎充實下自己，不過到最後都係埋左電腦，打下週記（或者雙週記）。時間真係好寶貴、訓覺亦都好寶貴、做到case好寶貴、relax下自己亦都好寶貴，真係好難取捨…
前排睇報紙睇到「火星文」呢個term，其實係指大陸人為左逃避網絡上o既審查而建立o既語言，泛指大家o係網絡上o既一d用語，例如表情符號之類。不過一睇維基百科就笑到我停唔到口，尤其是o個個「失意體前屈」、同埋「踢牙老奶奶」，無聊的話，大家可以去呢個網址度睇睇﹕http://zh.wikipedia.org/w/index.php?title=%E5%A4%B1%E6%84%8F%E9%AB%94%E5%89%8D%E5%B1%88&variant=zh-tw，或者o係google打「火星文」三個字睇睇﹕。
可能你會覺得好無聊，不過起碼都in少少，知多少少網絡o既文化啦。而家聽d後生仔講野真係聽唔明，因為佢地講野真係好快，要好細心先聽到佢個重點所在，好似我有一位同事咁，佢講野我聽得唔多，不過佢電腦打字超快，所以我同d同事都稱佢為新人類，即係好識電腦，但溝通上有少少困難o個d人（又或者係同我地d老餅溝通上有困難o既人），即係好似"diehard 4.0"入面o個個IT仔咁…
近排個股市都幾可怕，所以都係得個睇字，感受到「跌下就好喇」o個種無奈o既黑心。呢排幾鍾意聽商台o既 "uncle six"講股，因為都講得幾有感情同生鬼，亦都好informative，唔會講下近期走勢同埋基本因素就算。兼且新城財經台廣告已到達飽o既地步，主持人講唔夠兩分鐘就要去一去廣告同新聞，真係幾無癮。有人話下年樓市都會升兩成，真係令我有d吃驚，不過呢個「渣隻股票兩個月已經嫌耐」、股市上落一千點閒閒地o既火箭時代，有咩係唔可能呢？所以真係要為置大計同人生大事努力一下先得喇…
呢排o係中心做case o既時候都不忘睇下電視，當然《交易現場》會留心聽下啦，不過有d卡通片都幾好睇，例如《彈珠人》，同埋《放學ICU》入面o個套卡通咁（一聽到ICU呢個節目名，就覺得係深切治療部，點解放學就一定要入ICU咁唔老黎o既呢？）。《放》入面o個套卡通我「立」左一陣，裏面講d卡通人物入左去一張一格格o既稿紙入面，結果有人打翻左個墨水樽，搞到成個環境漆黑一片，睇唔到野，真係幾得意。唔知係咪太耐無睇卡通片，我覺得呢個情節好得意好清新。o係「惠民署」屍橫遍野、隻隻都係磨到爛哂o既膝頭、大家黎到都係為求一電o既環境當中都可算係一個清泉。
本書總算開始到寫喇，叫做完成左一part，仲有兩part未完成，真係要加把勁先得喇，黎緊仲有好多野要做，例如剪裁內容、排位、校對等等，真係幾忙下，希望可以早日見到佢出世啦！正所謂秋高氣爽啦，都想搞番次outing，例如燒野食咁，唔知大家得唔得閒呢？
1-10-07 出埃及記
好耐都無同大家見面喇（次次都係呢句，有無句新d？），恭喜你睇到今次o既update，亦都感謝你繼續check住呢度。
呢幾年都係「婚宴盛放的季節」，好多身邊o既朋友都宣佈結婚，十一月至十二月我已經有三單罰款，真係好犀利呀，o係度都要恭喜呢幾位準新郎新娘先！
計下計下結婚條數原來都唔野少，如果仲想有個安樂窩的話就真係要加把勁喇，又要裝修同買傢俬電器，有首期都未必夠錢裝修。（順帶正字一下，有家具店個招牌寫住「傢俱」，o個個「俱」字我有少少保留，應該係「俱樂部」個俱字黎個喎…）
而家個樓市亦係嚇人，聽聞租個淘大花園單位可以六千八蚊落樓，即係蝦人無首期o者，兼且租左咁貴o既樓，每個月可以儲到幾多錢首期買樓？儲到o既錢到第時又追唔追到個通脹呢？答案好明顯係要投資下啦，不過可惜呢排我手上d股票都唔郁，郁都係升幾毫子，本金又少，結果都係食之無味棄之可惜，中人壽每日都升，真係戥早著先機o既人高興。不過我覺得「直通車」開通後個市可能會回一回氣，有人又好信邪咁話十月係股災月，到時睇下有無資金入番少少貨先得。
其實唔止我地呢d打工仔，就算係做生意o既我都覺得要投資一下，因為有d野真係講唔埋，如果投資得太多去一d會折舊o既不動產入面，有乜事上黎真係渣都無，所以點都要做番d投資對沖一下風險。haha，連三妹都講投資你話驚唔驚？
過多幾日，如果o個份senior therapist唔搵我，我就可以宣佈呢份工certified喇。都無所謂啦，小試牛刀，不過亦都有個警號俾自己，因為我份CV寫得極求其。一黎係因為部機無左word，我要用excel打啦，二黎係我平日都無乜心機去update，所謂養兵千日，而家荒廢得太耐，反而好難去pickup番，要的起心肝去強化一下先得喇。數數手指o係明記都做左四年，真係話長唔長，係我做得最耐o既一份工，如果唔係個pay得point 19又無得升職，都唔會諗其他地方，始終他日養妻活兒都係男人o既職責。
講起湊細路，有日阿媽幫手湊小表妹，聽到隔離有個家長話「我地住漾日居o既小朋友係開心d架」，我覺得呢句話都幾妙，住得漾日居都係非富則貴，咁有米o既情況下，d小朋友又點會唔開心呢？不過用另一個角度睇，物質豐富左，都要d家長識湊先得o既，如果唔係個個都變哂小惡霸、唔輸得o既小魔怪。不過講到底都係古巨基o既新歌《錢錢錢錢》！
業界前排因為轉介問題而變得鬧哄哄，顯然呢個擺低左廿年o既課題又拎番上檯喇，加d想像力的話，劇情可以如《出埃及記》般引人入性（唔係任達華做主角o個套呀！！）…
我地呢班流落荒野o既子民，每日等住天上跌落黎o既嗎哪（referral）黎維生o既人，幾時先可以去到「流奶與蜜之地」，真真正正出埃及成立以色列國呢？我地要用幾多心血，先可以洗淨當年o個班怕事o既老前輩o係立法局入面講o既說話呢？有無一位救世主、彌賽亞o係當中出現呢？
我好讚嘆o個位諗得出「自我轉介」o既仁兄，因為佢將個辯題扭轉左，令個辯論行出左一步。不過當然有醫生反對啦，因為佢地係既得利益者嘛。所以如果俾我天馬行空地提議，我覺得除左「自我轉介」可以行得通之外，其他轉介方式亦都可行，用一d distraction o既方法，繞過辯論o既熱點。例如我地社福界就唔一定由醫生轉介啦，由社工、護士轉介都得，仲要做足戲，個個case都有佢地referral添。循住呢種方式，其實我地可以推出「溫馨轉介」、「友情轉介」，即係做physio就一定要轉介，但由邊個轉介就無乜所謂，芥蘭強又得、蛇仔明又得、茅躉華都得！咁樣可唔可以幫到我地打呢場仗呢？
當然，精明o既你都知我o係度吹水啦，兼且我地呢d「門外叩門者」、小薯，都係d無乜議事能力o既塘邊鶴。醫生o既借口一向都係我地無專業知識去診斷病症，怕我地延誤，其實佢地有無實例可以拎出黎講？點解用唔同system睇症o既中醫又唔會被指延誤症狀？而我地其實都有common sense啦，見個case咁耐都唔好仲唔彈俾醫生咩，到時我轉介d生意俾d醫生添啦！況且大家本科o個陣都有讀過ITD之類o既course，所以我又覺得無問題。但要塞住班醫生個口，其實可唔可以諗下搞一d course去俾全人類重溫下diagnosis呢？當然，做呢d野都係一個抗衝醫生o既gesture，講真班醫生本身又有幾多無判錯症、無延誤診治丫？
另外我覺得我地應該好好地咁紀念何應輝先生，因為人地身為左「醫生」之後話我地無料到o個番話，真係一針見血咁指出poly班lecturer廢、同埋外國月亮份外圓。唔飲水思源？呢d咁o既term o係而家呢個世代仲點會用架？呢d叫做適者生存，你有無資金去讀個脊醫返黎先？當然脊醫同主流醫生「忽然一線」真係令我覺得好奇怪。
另外有一位醫生話如果我地無referral之下睇症可以被釘牌，真係好多謝佢o係「後doctor-is-god」年代裏面散播一d咁o既歪理，令我又諗出另外一招奇招，就係全香港可以搵一個月完全唔收referral做症（當係推廣月），之後physio之間互相告對方唔收referral（尤其是NGO o個班！），最好釘哂我地全部人d牌添（到時連A Leung都俾人釘埋，睇下個broad邊個坐！），因為大家拖住呢個牌都不如一d市面上o既亡命之徒咁自在，佢地有錢買機，藝高人膽大就得。做ultrasound要拎牌咩？踢cybex要拎牌咩？帶水療要有牌咩？拎住呢個牌，under醫生o既剝削大家覺得仲有意思嗎？最後我諗到可以搵一位彌賽亞出黎俾我地告，律師費、安家費我地全行一齊籌俾佢，官司完左之後再俾間clinic佢打骰又或者入HA做番個平凡o既physio，就好似猶太人告發耶穌，再將佢釘死o係十字架一樣，用呢位烈士o既血，洗清我地祖先o既罪，阿們！
嘩，真係好激進，當然呢d都係行唔通o既，如果打爛仔交呢d都可以派上用場，不過大家係斯文人，所以要用argument。但係切忌用「醫生d referral都係寫LBP三個字架啦」黎做理據，因為咁樣d醫生只會話「最多我寫得清楚少少，俾埋MRI report你囉」咁，大家就O哂咀無聲出架喇。今次呢仗都係鬥智鬥謀，一向怕事、不涉足江湖o既業界睇黎要面對一場硬仗。而如果呢一仗失敗左，睇怕我地要繼續流落荒野十年八載…
講番讀書o個度啦，始終都係拗底drop左科《經典選讀》，至於其他科就hea下hea下過啦，睇下黎緊o個份論文點樣交左佢就算，兼且都要開始諗下份大論文點寫，而我都想去一趟台灣睇下書，因為想見識下阿安講o既「針灸地下軍火庫」。其實返學都幾辛苦，唔知係咪因為咁，我個肚腩都好似細左少少。未來有好多野都要努力，真係要共勉一下！（「研習室」有新問題，大家不妨回應一下！）
9-9-07 28
話咁快就九月 ，真係成個月都未寫過野（包括呢度同埋本書…） -_-
又大一個月喇，好多謝呂炳耀呢兩日同我準備o既一切，希望快d願望成真啦！
今日睇左《黎多件衰鬼上帝》，講挪亞方舟，成套戲都好搞笑，不過亦都幾有意義，就好似聽左一場久違了o既道（係自己唔返教會聽o者…），牧師講「祈禱」呢個題目一樣。套戲裏面o既神話人祈禱，希望神俾到自己家庭和氣、勇氣等等。但佢都唔會俾到你，神只係會俾機會你去實踐呢d野，例如家庭團聚o既機會、又或者有件事要用自己o既勇氣去面對等等。聽完呢番話又覺得佢幾《荒漠甘泉》喎，可能寫呢個故仔o既人都係想帶出呢點掛，睇完之後覺得好有意思，睇到和平鴿飛過又覺得好有味道…
上星期一開學，上左《針灸古代經典選讀》呢一科，呢科應該係成個master course入面最有期待o既一科，雖然事前Danny潑冷水咁話呢d科目都係同你讀下《內經》，講下篇經文好有道理，最後大家都係無乜得著。不過見教授係內經專家，佢自己做研究「生」o個陣就係研究內經就令我對呢科有d期待。第一堂講「針的道理」，咩叫針的道理？唔係話乜病點針、針幾多次、咩穴位，而係要明白天地萬物點樣化生。
o個晚學左好多term﹕太初（令我諗起約翰福音第一句﹕「太初有道，道與神同在，道就是神」）、仲有太極、陰陽、五運六氣、由無極到兩極到化生成三而變萬物、仲有素問《八正神明論》o既「八正」原來係「立春夏秋冬+春秋分+夏冬至。神明=微妙」等等o既 fundamental野，令我諗番起以前勁諗無謂野、睇聖經、 睇《蘇菲的世界》o個種感覺。諗番自己以前成日諗呢d問題，仰望天空o既感覺，恰巧就同上完堂行出課室，睇住中大o個片星空一樣，心中仲有d火熱。不過火熱之後又係一聲嘆息，生活到底都有d逼人 ，時間都有d緊逼。我可唔可以有d抖抖o既感覺，「飛出這個太空」呢？
返呢d學例牌d教授會問下邊個係physio，果然都係得我一個舉手，然後教授就話﹕「看來物理治療都不太注重經典…」。睇住佢地成班中醫本科生，之後有個fresh grad拎住張中醫註冊試合格證出黎俾隔離位睇，真係幾羨慕人地可以取得一個咁o既地位。而坐o係課室角落o既我就好似三不像，講名門正宗o既manip我唔識、講針灸都係拎到少少COMT出黎用，當然好多人都仲係「腰背委中求、頭面合谷收」，但係如果人地做中醫發d力，已經可以 蓋過我地，況且我地係乜？我地好容易俾人取代，但無人可以取代o個張合格證。當然你話我地都有註冊，但問題係人地有之餘可以開藥，如果針灸再做得classic少少， 開埋機、又可以簽假紙，我地已經無定企。
可能我唔o係漩渦入面啦，我睇PU o既bulletin又睇得幾開心，裏面講未來係中西醫同我地交流同交手o既機會，天馬行空咁話可唔有得讀中醫+physio雙學位，我覺得又不無道理，當然名門正宗又會出黎講野 啦。未來係咪要咁行，我地開機又可以開到幾時？如果人地anat有底、識得manip、任意開機我地o個行已經企哂o係度，係咪？就算係名門正宗o既manip，又有無trademark係只準physio用呢？要專業就要有壟斷性、高門檻，我地到底係咪專業呢？
講完。
講真都好耐無約大家出黎食飯或者study group，真係要講句唔好意思，其實study group停左咁耐係我同蔡san o既COMT II唔係太有得著，所以無乜好share，而大家又無乜新野學左，所以都停左好一段時間無搞。我其實有個構思，就係做個reading group，例如大家一齊睇anatomy trains然後share d內容，我覺得咁樣可以細水長流少少，唔駛下下等大家有新野學，你知啦而家都係大家o既「洗錢年」，o係追求知識之餘都應該留番個錢傍下身（或者用黎俾贖金）好d。唔知大家覺得我呢個舊idea點呢？
仲有一提o既係「零舍論盡會」有份senior therapist同埋centre supervisor請資深（5年以上）o既physio（5-9-07明報），大家可以留意下，話唔定可以一登龍門，大展拳腳！喂，講緊你呀！
講開以前我地一出黎o既艱苦歲月真係今時唔同往日，而家新入職都已經萬八，o個陣我地四千幾一份part-time都八九個人爭！兼且當年做part time，工時唔長，如果真係要埋單計數，都唔知係咪砌得夠五年經驗，所以我成日同蔡san講我地真係生不逢時，四年升PT 1 o既HA黃金年代無我地份，而家風平浪靜少少先知薪酬原來同fresh grad差唔多，有無搞錯！不過我知個天咁安排一定有佢o既道理，所以都係要繼續沉著應戰！
12-8-07 美國次級按揭問題惡化
今個週末心情好似放假一樣，咁當然週末梗係放假啦，你係講緊廢話呢？不過由於家中兩老都去左旅行，成間屋得我同家姐，家姐又成日去街，所以可以感受下一個人o係屋企o既寧靜。有人鍾意熱鬧，有人鍾意寧靜，不過其實兩者都係必要o既，熱鬧固然開心，不過寧靜可以令自己沉澱一下，諗下野亦都唔錯。
星期三見左個「十大奇案」，個case騎呢到爆，中年婦女（特徵係﹕1. 講野好急，2. 係咁逼問你有無得醫，3. 將自己d 骨刺、五十肩問題化成無限大，4. 聲稱有depression，5. 想知答案多過想醫病），申訴兩隻腳踭行路o個陣好「浮」喎，好似踩住棉花咁，但如果佢用前掌黎行路就會無事。一聽到「踩住棉花」，即刻諗佢係咪myelopathy啦，點知又唔太似，兼且似又點丫，我地可以做到d乜？佢份人都幾緊張，仲有depress，真係唔敢亂黎，其實都掙扎過話俾佢知我o既懷疑，不過始終都話左俾佢知，唉，我諗佢都有排驚。做PT應該無乜野做，而用COMT方面亦都搵唔到太多positive findings，呢個人下次會再黎，真係希望可以幫到佢，不過我打定輸數，同佢講如果呢四次都無進展佢都要另請高明。前晚同阿安講起以前跌打個師傅，我地成日覺得佢好business，又或者搞synthetic manual physio therapy唔岩，不過人地真係將佢學到o既野用出黎貢獻呢個世界，病人少d pain都少d人depress同跳樓啦（我成日諗而家俾depression o既diagnosis係咪好易，因為差不多我個個中年case都有），但相反我地做到d乜？療程長、無hands on、無relationship building，其實係咪推緊個病人去跳樓呢？
就住上面o個個奇案，真係希望各方好友能夠俾少少hints我…
星期五真係估唔到柏布黎得咁快，食飯前收到中心同事話治療小組因為三號風球要 cancel，叫我唔駛去，食完飯返番去中心就開始有人話會掛八號，聽到收音機宣佈掛左八號真係好開心，走o個陣都禁不住笑左出黎，而且返屋企途中都好順利（梗係啦，我住四順區喎），唔見有人逼巴士o既場面。（上次去梅窩覺得住離島幾好丫，不過睇到d人返長洲無船搭都幾慘，打消左呢個念頭）好耐都未試過享受呢個員工福利。無啦啦得到「半天假」，可以「聽一聽心經喝啖熱茶」，不過我無咁做，因為我o係屋企訓覺…
放我半天假，若未太清醒，再放半天假…（突然間好想聽許志安d舊歌）
呢排聽新聞單單都係用「美國次級按揭問題惡化，觸發全球股市下跌」黎開頭，真係好蝴蠂效應，無一倖免，我o既資產蒸發左少少啦，好彩都仲有d渣拿，不過下個星期都幾驚佢又再跌，所以余生講得岩，今次打風黎得好岩，等個市唔好再跌住…（我知阿媽又會鬧爆我，因為我又話打風好）
擒晚睇港男睇得好開心，似一個遊戲節目多過一個選美秀，同埋好羨慕d男士有六舊腹肌，今次同埋呂炳耀睇，知道女士點樣揀，不過我覺得endup都係要有動感同咁上下大隻同高度先OK，你睇拉大小提琴o既男士，真係同學生哥差唔多，點俾分你呢？另一位大叔我就覺得佢勇氣可嘉，見到佢緊張之餘亦都有d疲態，心裏面都為佢鼓掌！
5-8-07 想一想，香港
星期三去左一間茶餐廳食下午飯，睇到亞視新聞全程直擊皇后碼頭清場o既行動，個心都有d感觸，所以即使食哂個飯（通常我四個字可以食哂走得），但係都坐o係度睇到夠鐘先走。有人話保衞皇后班後生仔係阻住地球轉、發展才是硬道理，又有人打趣咁話有呢班人o係度阻住清拆仲好，唔好等政府乜都拆、拆得咁痛快咁話。睇住段新聞就好似睇緊一場由香港對巴西o既世界杯總決賽，明知香港會俾巴西數到爆，范俊業可能撲到虛脫，巴西龍門可以得閒到食完個杯麵先返黎企都得o個隻，但又心癢癢希望波係圓o既，香港點都入番一兩粒就已經係贏左o個種心情。對於上面兩種人o既睇法，我比較認同後者o既睇法，亦覺得今次係拆天星o既餘震，其實仲有好多問題例如屏風樓、保育太源街、灣仔街市等等都係今次行動之後令人更關心o既。我都知自己都係「忽然保育」o個隻，因為之前都未諗過有呢樣野，不過我好認同有人話香港係一個舊o既紫砂茶壺，唔好洗左裏面o既迹o既道理，因為如果咁樣，香港o既歷史面貌都會被抹走，香港就同國內一般城市無分別，我地引以為榮o既「中西交流處」去哂邊？其他地方有過一段精彩o既殖民地管治o既故事嗎？而一座座摩天大廈（好想問下裏面係咪真係租得哂出去），下面個shopping mall間間舖頭都同其他shopping mall一樣﹕有間百佳廣場或者taste、citisuper、有間豐澤、屈臣氏、有一渣例如 bossini、giordano、jessica、suzuka、CEU、zara之類o既時裝舖同有gigasports、馬拉松o既體育用品公司又係咪我地想要o既野呢？
想一想，香港。
星期一還番架車俾舅父，正式告別我「有車階級」o既生活，還俾佢o個陣諗住講多d俾佢知架車而家o既情況啦，但反而佢好似好想快d拎番架車咁，哦左幾聲就渣部車走左喇，我都幾唔捨得…有架車其實係唔錯o既，星期日做下屋企人o既「飲茶專車」、車下屋企人去郊外玩下已經此刻無價。可惜而家停車場租真係好貴，唔渣部車都要俾千六，油價又不斷升，兼且又要儲下錢，所以都係趁牌簿到期前俾番佢，費事轉左名先黎唔要。可能大家都未見過我以前部車，又或者以前應承左「第時坐我車」但我又未做到o既真係唔好意思…
希望將來可以做得番有車階級啦…
呢排做野都做得幾頹廢，一黎caseload開始勁多，一個下晝有廿個case，有一日廿個case之中仲有五個新case，搞到我要做到六點先走。開始又明白「門內人」o既心理，因為當惠民署遍地哀鳴o既時候，有時真係想同佢地電下就算，偏偏自己又唔抵得，個個都要捽下先安樂。我覺得做理療就好似開餐館咁，你可以開老麥，食套餐，好唔好食一回事，亦可以開私房菜，限量發售，個個食指大動。不過而家我又唔係自己開舖，case量要多，想做到私房菜o既級數就真係無可能，不過我都希望mass production之餘起碼可以做到意粉屋之類o既級數，而唔係老麥、又或者d奶茶無乜誠意o既一般茶餐廳，不過講真而家只係去到大快活級數，有好多case我都睇唔砌，食住餐先…兩者o既平衡都要好準確咁拿捏，又或者咁講，老細可能只係想你做無heart o既大牌檔、做老麥就算，d客食完好走啦，你同我整乜鬼「芒果海鮮大蝦沙律」同「墨魚汁焗飯」o者！
講到大家o既期望，又要講下點樣build up 我地o既image，其實老麥同私房菜之間都有好多定位點，自己想做到咩level呢？老細有咁o既期望係咪因為以前太頹，d老人家踢下沙包電下TENS就算呢？老人科少左一個殿堂級人馬，其實老人科係需要有一個咁o既人o既，因為老人o既身體情況實在太複雜，有無人可以rule out到 drug interaction同身體情況虛弱之下個老人家點解會咁樣唔舒服？猜呢個謎係咪比猜一個成年人點解low back pain更有難度？更要經驗？所以點解話做geri好頹？點解話做geri學唔到野？
少年筆耕…未開始過…
29-7-07 《勇気100%》
星期六返工總係帶住一種疲乏o既感覺，不過好彩返工o個陣聽o既節目《茜奇公園》都幾好聽，一黎多歌聽啦，二黎佢講o既野都係自己有時o既諗法。咁實用主義o既人又會話喇，呢d咁o既DJ都係懶多愁善感o者，不過你又要諗下如果對生活無感覺，日日返工放工行shopping mall，咁又點解要請呢個人黎做節目呢？其實我地o既生活有好多野可以體驗同埋令自己有好o既感覺，學下點樣欣賞下生活、聽d好聽o既歌、接觸唔同o既文化、俾少少時間企o係度睇住d無聊o既野，生活其實都好值得享受。
擒日去左中心o既活動，同醫院裏面o既physio溝通，知道佢地一個下晝做廿隻cases。以前總係覺得自己比醫院o既physio差一截，無乜信心同佢地講野，不過今時今日同佢地o既SPT講野，感覺都好自然，大家都係做野都係同行o者。其實o係裏面做野真係要有番多d人事技巧，因為人太多、department又太多。活動完左之後大家都四散，我又問自己o既前路係點，再一次無乜頭緒。前幾日有個朋友打俾我，話出面個景真係好正，有d好騎呢o既人都請，出到黎傾expected salary可以寫兩皮野都有計傾，寄三封信有三個interviews，真係前所未有，對於我黎講真係有d心郁郁，做得咁辛苦都係同一個師弟妹差唔多人工…以前點樣困難都唔講喇，而家真係要睇下點樣把握呢個機遇。
有時都唔想寫d行內太負面o既野，因為呢度都有唔同界別o既讀者（仲有人睇架咩？），正所謂「家醜不出外傳」。有日收到蔡san電話，話有個case minor stroke入左醫院，PT唔多理佢，就叫佢返屋企，我唔知點唔理法，不過o個位憤世嫉俗o既阿伯竟然話我地o個行「呃神騙鬼」，真係聽到都幾心傷。以前做跌打o個陣都聽到d 阿哥阿姐話做完PT「無x用」，我都算，不過今次講到「呃神騙鬼」我諗大家真係要諗下再咁落去大家可以做多幾多年。我以為我阿婆以前做完AMA無人理，淨係記得去OT度踢波係個別事件，不過其實呢d野都係越聽越多。
我再講，又會做「叩門者」架喇，不過我都想講多少少。我真係好想問下班醫院o既大哥大姐o係醫院度做乜？點解咁多case都得唔到治療，或者簡單o既advice，呢d係咩服務呀？你成日話唔夠人，工作壓力大，但都要俾人睇到醫院係值得俾錢你個department先 ？而家o既做法係寧願病人出去搵第二d physio做都要manage到o個一定數量o既人，結果服務就做成咁，咁有乜理由d病人唔會帶住一股怨氣行出department呢？到左佢地出到黎市場，可能已經唔再搵physio，搵針灸搵跌打搵脊醫，咁對業界係咪好事呢？
叩完門，做番門外漢先。
唔經唔覺亞視o既《勝者為王》已經做哂，我睇o個陣秦漢已經癲左，而陳庭威就著哂西裝，風山水起o個隻。無線o既《明成皇后》又唔知係咪做哂，換左套我幾鍾意睇o既《忍者亂太郎》。呢套野我最鍾意o既係佢o既主題曲《勇気100%》，好有朝氣，不過都好難搵得番lu，唔知大家有無呢？另外love psychedelico出番新碟，我呢個fans梗係買左啦，都係一貫o既style啦，鍾意o既人會繼續鍾意，話佢地墨守成規無厘進步o既就繼續話啦…
今次旅行順道慶祝我地一週年，我地去左大阪、高山、白川鄉、京都、奈良等地區，d景真係好靚，坐幾粒鐘車都抵o既，雖然都有段小插曲，不過大家都了解大家多左。最開心o既係我呢個電車迷搭左好多種電車，由普通車到新幹線都有，不過繼續搭唔到雷鳥號，希望下次可以同佢合照同搭埋佢啦。今次除左影相都蓋左幾個站o既站印，睇黎我又多樣野要儲喇…
少年筆耕正式開始！
11-7-07 7-11
繼早前零七年七月七日之後，今日係梗有一間o係左近o既日子﹕seven-eleven。（網上見到有人寫「些粉」，真係好有創意，另一個我幾鍾意o既網上諧音 term係「賣飛佛」）
架車終於都整好喇，整車師傳好強調盞頭燈係原廠o既，仲俾埋個盒我睇添，咁我又好奇問佢要幾多錢啦，唔知點解佢猶疑左一陣，然後答我「百五蚊」，之後有少少口窒窒咁話佢係用車行o既discount去買，其他人可能貴d喎。咁我又諗喇，如果我一介草民去到原廠都係賣二三百o者，點解o個二三百都要dum我咁耐？
整完車去左深井行下，因為一直都想行下o個條沿海o既公路，渣到入去天氣好好，泊車又唔駛錢，所以都幾寫意（所以話有時有車真係幾好…），去左個無乜人o既沙灘（無人游水，因為水質極差，但附近有燒烤爐…），仲去埋青馬大橋o既展覽館添。睇到人地臨海而建，個名好典雅o既豪宅真係好羨慕，因為個海景真係好無敵，我呢d打工仔真係得個恨字。
蔡san叫我考慮下central recruitment喎，其實都唔係咁想，因為自己真係怕返醫院，二黎入去做inpatient就係煎下魚，去到outpatient就做reception，d人埋黎就叫佢去拉腰，我都唔想。不過有時諗工作滿足感係咪真係可以蓋過薪金o既吸引力同現實呢？上次都講過自己個pay scale就黎玩完，其實呢排都係諗緊樣野，因為如果一路做落去就好似話俾你知你一世都只係得呢份人工，但係而家o既工作亦都有不俗o既滿足感，所以好矛盾。我而家到底要去搵政府工、讀多d書轉行定係搵d生意做下咁呢？講到開private clinic其實我又有少少保留，「唔係喎，唔熟唔做嘛」，我知，不過要做到比打工更高人工就真係有d難度，況且呢輪好似有d clinics放盤，都唔知係咪做唔掂，明明個市係好個喎，自己一介草民又點做到呢？
只有／仲有三年時間俾我思想我o既未來同轉變…我可唔可以更進一步？而家係咪我o既轉捩點？
由於星期六仲返半日工，holiday好重啦，收到大老細愛將o既電話o既時候都鬆懈左，無啦啦打黎問我去邊度旅行，咁如實回答啦，又問我幾時返，結果我都如實回答左佢，換黎o既係o個個星期假裏面o既其中一日要返工，真係激死（真係想打爆佢！），聽完呢個電話我真係幾嬲，不過呢d野又唔可以表現出黎 ，免得好似好小器（不過俾著你嬲唔嬲先？）。有時呢d位真係要醒少少，如果唔係就俾人食硬。不過我欣賞佢夠「where」爛塊面去傳達大老細o既訊息，真係不愧為一個資深o既社工、大老細愛將 一號。o個日其實係某區o既一個大型護老日，某大醫院o既PT都會出動，雖然無得放假好陰公，不過都想聽下佢地入面做野o既情況，睇下o係o個區享負盛名個個都話服務差o既部門係咪真係差得咁犀利…
星期六特登放半日去睇「長者健康及時尚生活展」（好似係），開頭都抱好大期望，諗住睇下有咩新o既產品或者潮流，例如其他國家o既老人服務係點之類，不過都有少少失望。韓國個攤位已經拆哂，只係得番一個估計係韓藉o既阿姐坐o係度，日本o個個直頭人去樓空，唔通trader先准睇？展出o既野有d貴到一般老人家都買唔起或者唔願意買，而其他就好似一d NGO o既攤位，展出下d theraband、沙包、開瓶器、有放大鏡o既指甲鉗之類，無乜特別。不過睇到有間私人搞o既日間中心都幾有創意，可惜地點好似差左少少（土瓜灣），整體上都無乜得著。 見到又有人提起「扭毛巾機」呢件發明，雖然只係一幅構想圖，不過都叫醒左我…
其後上左去睇明愛白英奇o既設計展，睇到一班年青人o既活力同創意，真係好火熱、好有動感（同埋 la la la）。雖然有d作品我覺得唔係咁ok，不過都覺得佢地花左好多心血去做。睇住佢地就覺得自己老餅同無動力，創意已經老早放埋一邊，去實現創意o既力量更加唔見埋 。以前好鍾意聽903，而家反而鍾意聽財經台，以前會花好多時間諗d無聊野，大地任我行，而家有得停低，無乜腦咁睇電視已經係好好，不過好彩仲睇到報紙o既專欄，而家唔駛返學又可以多d時間睇下書…
對於前途、生活我係咪杞人憂天左d呢？
25-6-07 無妄之災
呢排渣多左部車，不過好不幸地上個星期日發生左次無妄之災。架停左o係停車場o既車俾人撞花左，不過個車主都好負責任，留低左車牌俾管理處聯絡番我。其實架車又唔係撞得好花，都不過係個泵把翹左少少，同埋盞車頭燈爆左少少，同佢傾左一輪覺得佢都係負責任o既人，所以大家都心平氣和，本來佢想俾三百蚊我打發我走，不過我當然唔制啦，盞燈就算搵到零件都仲要搵師傅整，大大話話都唔止三百，所以佢話去佢相熟o既車房整，咁ok啦，結果今個星期日就跟左佢去粉嶺…
去到粉嶺就覺得有d奇怪，無啦啦叫我地去飲下茶先，等師傅搵零件喎，咁ok啦照等，結果o係粉嶺spend左成個幾鐘等佢，等到佢個所謂師傅喇，佢就幫我用暴力屈番個泵把入去，咁都ok o既，整左我都唔覺架車俾人撞過，不過頭燈o個度佢話搵唔到零件，佢又問我俾三百我搞掂件事得唔得喎。我心諗如果你做車房都話難搵，我一介草民點搵呀？好明顯有人就想慳錢，唔想咁快就搵原廠零件啦，所以到最後都reject左佢o個三百蚊offer，點都要佢整番好。
不過有少少覺得唔知佢係咪o係度dum我波鐘，講真佢某程度上都負責任，俾番d油錢我，不過最驚第日我急佢唔急，我架車又要俾番舅父，所以如果唔整番佢靚靚仔仔就會幾「摘洗」，唔通又俾舅父個電話佢地咩。二黎架車又夠期要驗，都唔知搞幾耐，所以又係一個變數。其實佢整唔係問題，不過下下入黎都幾花時間，好似今日咁都俾佢拖左成個早上，第一星期日已經無得大覺訓，八點幾要出車入粉嶺，第二仲要我入到粉嶺咁遠，真係有無搞錯！
之後行公路o個陣架車又kick到舊路面o既金屬碎片，唔知係咪之前有車跌左出黎，個沙板「嘭」左一聲，真係好驚佢爆呔…
煩完架車就順手同呂炳耀入大埔玩，事關上次同屋企人去過好熟路（其實由粉嶺入大尾督沿途都要睇好多地圖，而我搵地圖o個陣有少少躁，sorry，錫番錫番，啜啜…），行下行下估唔到去番上次同阿brain佢地行鹿頸o個度（行程尾聲，有好多士多飲野o既地方），不過停留左一陣，影張相就走喇。o個日雖然好似好有陽光，不過好似拍戲o個d人造雨咁一面有太陽一面落雨，好奇怪，所以都唔係太想落車，兼且落車又熱啦，都係o係部冷氣車入面睇下風景仲好。去到新娘潭就梗係要落下水啦，其實自從上次F.7讀bio o個陣落過去搵specimen之後，今次都係第二次落水，不過好大分別o既係今次水中o既生物少左好多，唔知係唔係時候定係點啦，我記得以前去o個陣一放隻腳入水已經好多魚仔蝦仔o係腳邊游過，而家真係搵條魚毛睇下都無。唔知係我地o係下游水太急定係污染得太嚴重呢？anyway真係要好好地珍惜我地o既地球，減少污染（o個日渣左一百七十幾公里路，真係咁大個仔第一次，不過渣左咁耐車同停車唔熄匙涼冷氣已經污染左唔少空氣…）。
前排睇報紙睇到部豐田o既混能estima真係極有興趣，七人車身形、K-car耗油量，可以為自己荷包同環境都出番分力，不過都係諗好喇，養車真係幾昂貴，尤其係有d人生階段要邁進o既時候…下個月同舅父架車一別，都唔知幾時先可以再o係馬路奔馳…
正所謂唔係你財就唔入你袋啦，前排股市一片悶局，手上隻工行(1398)（寫埋no. 似唔似睇緊《經濟日報》呢…）死下死下，諗住都搵多d其他股黎「加強投資力度」，為未來打下穩固少少o既基礎啦。度左好耐終於都搵到一兩隻合心水，但o個陣又諗個價會唔會可以再低少少呢？結果等左幾個星期，個價一直都無低過，仲一味升添，睇岩o個兩隻而家都升成個幾兩蚊，真係有少少望股輕嘆，「唔係你財唔入你袋」。買股票都幾考EQ（Yu, 2007），有時見到個大市升，自己手頭o個隻就郁都唔郁都幾激氣，有時諗不如趁低吸多少少貨，平均化左個成本佢啦，但又諗間公司咁o既大好市都無動力升，仲擺咁多錢入去做乜呢？所以都幾忐忑，真係要打俾阿Kenny同沈大師問下…（呢排食飯o個陣成日聽新城財經台o既《投資高手》，幾鍾意沈大師o個d「騎呢五行術數講股法」…）
而家做CRP其實都已經習慣左個模式，亦都希望可以搞得「職業化」多少少，收番HA價錢，做番private o既水準。因為而家個收費實在太低，我真係驚附近o既跌打師傅過黎淋我紅油，你知啦跌打師傅分分鐘後欄都有幾廿件兵器架嘛…講笑o者，呢排有個case都幾得意，係頭三隻手指有numbness，我完全無check佢cervical，因為我d manip係零，check左都唔知有咩好做，不過好奇怪地按佢肺俞、心俞、厥陰俞個symptom可以減好多，而針佢必針o既內關就好左好多，所以都有少少成功感。不過佢另一隻手就頑固d，無乜穴位可以幫到手，唔知大家有咩高見？礒谷療法？manip？taping??
另外睇下個pay scale先知自己原來已經時日無多，上望只係得三個points可以跳，好直接咁問自己「我一生係咪就只係搵咁多人工？」，當然比上不足比下有餘啦，但人點都要向前望o既，所以都會努力少少工作希望有得升。而家做多左職安健野，開始覺得搞呢d咁o既野個人本身要有少少信念，因為其實大家都係摸住石頭過河，你唔識時大家都係睇你頭，所以點都要有d say話要點做，如果覺得係岩o既就要堅持，我諗就可以做得出自己o既風格，唔會為做而做，嚴謹少少，可持續發展少少…
PU近來寄左份bulletin俾我，其實由上年一位同屆出黎開clinic而幾鍾意季羨林o既同學以來，我覺得PU進步緊，有番少少隊形。今次呢位同學雖然唔係editoral 個list入面，不過收到o既都帶一點火辣o既味道。例如有一版俾一d同業講下一d不平事，同埋阿會長o既文筆都帶一點火辣同不平鳴o既感覺，同某些報喜不報憂o既組織有d唔同。如果講實力學會當然係領先啦，不過我相信PU可以做得出更好o既成績。就好似內文有人講過「做o個行當然想o個行旺」，真係希望承你貴言…
講住咁多先。
16-6-07 「影人靚，影靚人」
又一段時間先黎到部有限度服務o既電腦入面寫野。呢排好似咩機都死，mp3機撞下就熄機、相機個電池蓋爛到七彩、電話就無啦啦cut線，所以買左部多功能o既手提，自己唔駛拎咁多野返工。部腦真係好唔掂，format唔到，word用唔到，插個card reader就真係read-only，唔可以寫野入張咭入面，有少少吹脹…買左個80G harddisk返黎都係用唔到，只好死死氣咁用住呢部有限度服務o既電腦…
前排睇左《happy feet》，發覺原來呢套係一套悲劇，覺得佢好得意只係前菜，後面佢為左對抗人類而俾人捉左去動物園o個度就最悲，動物園好似對你好好，每日有魚餵飽你，但係你失去最重要o既自由。其實我覺得去到呢一點套戲好似收唔到科，只係有少少牽強咁話企鵝仔識跳舞，然後又俾人類帶返去南極，救番全族企鵝，如果世事真係咁完美就好喇。
我覺得而家好多動物片都係講人類同動物之間o既對立，人類好似過份得好緊要，所以o係不斷咁沉醉於「好得意呀…」o既歡樂之中，其實都值得反省一下。我知咁講係好掃興，好地地睇場戲變左咁有負擔，就好似美食當前要你顧念非洲飢民咁，不過諗番而家個地球，又或者香港都污染得好勁，呢排出去探訪熱到爆肺，由頭濕到落腳，變左好有男人味。大家越黎越靠冷氣，香港又多屏風樓，郁d就五六十層，怪風四起，好似就黎末日咁。而家睇到d超豪o既樓盤廣告，真係覺得發展商好無良，而住入去o既人亦都有少少自私，因為佢犠牲左附近居民o既空氣質素。但係呢樣野就好似用冷氣咁無可厚非，你用我用大家用，無得話邊個唔岩邊個唔著，生活嘛…
呢排CRP都搞得唔錯，忙得黎有成功感，夫復何求呢？而因為用左針灸，搞到多左好多社區人士（非老人家）入黎睇症。在於自己想實習多d黎講係好事黎o既，而且有幾個可以用到COMT搞到，雖然未清得哂，但已經好有成功感。不過由於做COMT都要用時間，起碼半個鐘先做到個first assessment，所以都有唔少人要等，兼且亦都冷落左淨係入黎做下運動、電下TENS o既老人家（結果有個老人家話要退出，我都無乜挽留…好似好衰啊呵？）。有人就叫我唔好對d社區咁好喇，事關佢地積住o係度大家都做唔到野，而d師奶做完亦都大肆宣揚，三十蚊有得針，搞到d同事都好驚排隊排餐死同亂，又演變成以前水療排大隊o既情況。 阿brain有句野講得好岩，做呢d服務係要「有人排隊得黎又唔好太多人」…
講到呢度我都覺得有少少矛盾，因為一黎好想有多d adult case黎睇我，因為佢地反應快，做treatment成功感高，又可以試下Danny d野得唔得，但要睇佢地我就要分好多身出黎，兼顧唔到班老人家，所以都諗緊有乜解決方法。其實都有諗過分時段去砌，希望可以解決到問題啦。另外一個死位就係referral問題，因為d社區人士無睇過醫生，而明記經過一次法律訴訟之後，已經好驚有咩法律問題，所以都好想快d清哂班社區人士，就好似人地為求搵筆快錢而挺而走險o既心態…
我覺得咁o既setting俾到我咁o既自由已經係我o既期望，不過世界都係無咁簡單。好多人覺得做NGO他條、頹、等收工、月月有糧出，但做NGO o既治療師唔係只係單打獨鬥、睇住自己盤生意咁簡單，仲有機構o既使命、政治因素、風險等等o既考慮因素…
呢排Danny講「經筋」，其實佢都話呢d野無乜章法，所以都不外乎係推下、按下咁，但又幾好用。我覺得呢樣野可以推廣俾更多PT用，因為佢anatomy o既成份好重，亦都好易掌握，而業界亦都有人極度唔信中醫，所以呢樣唔係咁中醫野應該可以推到俾佢地用，而就算你覺得呢d直頭係fascial野、係anatomy trains野都無問題，其實呢樣野都係另一個角度去解決某d問題o者…不過無左章法上o既考慮，就會俾人覺得唔專業，o係度捽下捽下就話醫病咁，所以好多patient都問「如果我第時去推拿得唔得？」，唔dramatic、唔夠pro，呢個係佢o既缺點所在。而因為唔駛點用腦，用用下就可能墮入「一針靈」o既陷阱入面，邊度痛整邊度，呢樣野我都要去克服…
呢排電視聽得最多、聽最多o既係「回歸十年」同埋「香港始終有你」，七一又黎喇…可能呢幾年香港走出谷底、自己又無咁多時間諗野啦，自己怨氣都少左，不過有d野就點都洗唔甩，就係六四o既境象。就好似細個俾阿媽打左鑊金，一世都記住呢樣野，身體仲有條籐條「lung」咁。有人反問如果當六四唔清場（有人話唔係屠城喎…），中國會有而家o既繁華咩？我覺得呢個係馬後炮o既睇法，始終當權者係會有思想o既，問題係一個一個咁解決，人民仍然要食飯、工作，國家始終要繼續以一個方式營運落去，世事亦都好似一條河咁流動同演變，中國會塌下嗎？唔會。而如果頭先個假設係成立，咁我都可以話結束左一黨專政之後中國可以更強大啦係咪？
其實對大陸我都係麻麻，唔鍾意大陸人o個種「格」、唔鍾意o個種「大、多、差」o既口味、唔鍾意上面除左騙子，乜都係假o既現象，好想同呢d野劃清界線，所以我想叫自己做香港人多d。以前填出入境表o個陣都會堅持寫BN(O)，不過九七後自己都局住寫番「中國藉」，費事俾人問，兼且我覺得BN(o)呢個concept好奇怪，我都答唔出自己係咪英國國民。記得有次聽到戴卓爾夫人話談判o既時候仍想保留番香港o既主權，仲要o係門口PK，我到而家都覺得有少少可惜，如果而家我地仲係英國殖民地，我地又會係點呢？「生娘不及養娘大」？
頭先睇明珠台o既"news report"，講d移民左加拿大o既家庭o既情況，睇到佢地o既仔女由於o係外國大，已經當左加拿大係佢地o既家鄉，加拿大o既鬼仔性格已經係佢地o既性格，反之父母就覺得自己始終係華人，d仔女點都要有番d華人o既心態，例如天倫、少d自我中心咁…其實自己都係一樣，祖先都係大陸落黎，不過到左我呢一代，o個種「認祖歸宗」、尋找家鄉o既心態已經消失，我已經係一個香港人。
回歸十年係我成長o既十年，由A level到出黎做野都成長緊，有好多事件發生，原來十年就咁就過左，建華之亂、七一大遊行、沙士、自遊行、新移民、phone-in節目、釋法等等…每一件都有一個故事，一種好獨特o既經歷同感受。我唔知o係第二d省市會唔會有咁o既歷史同經歷，o係回歸慶祝得火熱之際，我覺得自己同香港close左…
不過有少少唔鍾意o既係香港比以前更加大陸化，開口埋口都好重大陸色彩o既term﹕「關愛」、「和諧穩定」、「打造」、「平台」、冗長o既有「全力爭取提升核心競爭能力」、「取得階段性成果」、仲有每條屋村都聽到o既半咸淡廣東話、金紫荊廣場o既拍照人群等等，都令我覺得有少少唔舒服…
唔知大家對回歸有咩感受呢？
幾乎成為左月刋咁滯，不過我都會繼續努力寫下呢度，今晚我將會去玩瑜珈班，希望強身之餘對自己o既治療有多d體會同cross-over。講到業界大家都擰擰頭，有d profession物以罕為貴，去澳門講個talk可以 $6000/hr，可以有位無人做，唔加人工俾自己行都仲要加俾對方爭d無乜責任心、身在private心在HA o既人。仲要我地每日死砌爛砌，人地做下d簡單野就逗到同我地一樣甚至更高o既人工…大家捱左咁多年都叫做有番份好d o既人工，反之新出黎o既一班就可以加增薪點，有時都會覺得「生不逢時」呢個term好貼切，最低潮o個陣一個星期都係得一兩份part-time工搵o既係我地、入職無得分享增薪點o既優待又係我地、入職後即刻「0-3-3」減薪又係我地…當然用人工黎衡量大家係蝕底左o既，大家仲記唔記得四份一post都大把人爭、有人四千蚊請你都即刻制o個個大時代？大家捱過呢一個時代，多左一份歷練，思想就應該與「安逸o既」、「頹廢o既」唔同，o係度勉勵我地呢一群繼續發奮努力！
有樣野我成日都唔記得講（其實除左呢樣應該仲有好多），就係我好鍾意Canon ixus廣告入面o既slogan﹕「影人靚，影靚人」，呢句野玩食字玩得好好，到底「影靚人」係影d好靚o既人，定係影到d人好靚呢？呢句野都俾到好多空間消費者去幻想，唔知佢賣成點，不過呢句slogan我好鍾意！
25-5-07 blurred
提一提大家，今期其實係孖裝黎o既，所以你可以拉落少少睇五月八號寫左o個篇先。大家唔好以為呢度真係摺左呀…
實在有太多野想寫喇，但又唔知點樣記載。每日就就好似搭住一部高速火車，窗外見到o既景物都係由電線杆、農田、村屋所組成o既「不變」畫面，想用相機影低o既時候總覺得每一個shot都係一樣，但又好似有少少唔同咁。每日好似都係咁過，但總有d同之前o個日唔同咁。望番部電腦都係format唔到，掃左N次毒都係無反應。裝多左個Norton，結果部機慢到抽筋，要剷都剷唔走，download 左原廠o既uninstaller都唔得。而家部機只係用word用唔到，所以anyway我都會用住先，對住佢我都無乜辦法…
從邊度講起呢？
星期四搞左去旅行o既事，好開心，畢竟都可以爭取二人相處o既時間，跨越地域o既限制。不過請假o既過程就激化左我心裏面對大老細o既不滿。可能我自由慣啦，one man band，唔似醫院d人放假咁要抽假，不過我真係唔係好接受到要提早一年去請年假，我都係鍾意隨心所欲多d（有邊個唔鍾意？）。另一樣過份o既就係老細好似唔想我放假咁，最好就係我o個十幾日大假，每個月放一日半日消哂佢，阻唔到d服務。今次遞假紙俾佢佢亦都有d微言，問我呢排做乜請咁多假，係咪好事近？唔理佢出於好意定係點，我覺得我以咩理由請假唔需要同你講，o係唔影響服務之下，拎假係我o既權利之一，而我有喜事亦都會公告天下，唔駛你阿姐操心…
o係度等佢張假紙批o既時候，我真係諗過如果佢用某d借口唔批我o既，我會劈炮！
大家都知道我有架車啦，不過我諗我會o係八月前俾番舅父。因為自從前排架車無電死左之後，我開始覺得我無咁o既資源（包括時間、金錢）去養佢，兼且佢性能真係幾差，開左冷氣上斜（西貢公路出九龍方向），踩油踩到落地板都係得四十七八公里左右。右前輪嚴重OA，擰軚擰到盡會有「梗梗」聲等等。我有諗過如果他日舅父真係過架車俾我，相信我都會o係短期之內換番部千五cc，不過咁樣就會好尷尬。其實錢唔係無，不過亦都要留番d黎張羅一下人生大事，時間就真係無乜喇，講真我而家都唔知乜野叫做得閒，不過知道o係有限資源入面做到野就真係要set個可達到o既目標同輕重緩急，如果唔係會好frustrated。如果放工後想去游水，就唔好諗住夜晚有時間同體力寫網頁。如果睇報紙，就唔好諗住o個晚可以溫到書、睇到Danny d notes。一山不能藏二虎，一晚都唔可以定兩個objectives咁貪心。
無論係時間、體力、金錢我都 arrange得小心左好多。星期日我通常唔會遲過十一點起身，因為起碼早上我可以睇下書、寫下個網頁，一個星期要留一至兩日自己休息、睇報紙同處理一d積壓o既野，例如填稅單、報名表、睇下書等等。唔知點解生活好似好多姿多彩，不過好似無乜空間抖氣。買左套CSI返黎我都要分幾次先睇到一集，更唔好講自己有乜野靈感喇，每日做野都有少少reflexive（唔係道箕追求做case做到熟哂o個種reflex），總之你咁問我我就俾呢個反應你，無乜靈魂咁。
到底係太多野要做、要搞，還是呢個係心理上o既問題呢？有時聽到d朋友問我最近忙咩呀？我就好似唔知忙乜咁，anyway大家會覺得我好忙﹕「唉，你咁忙，第時再約你啦」，我亦都覺得自己好忙。當佢地問我係咪返朝九晚五o既時候，佢地又會好驚訝咁話「嘩，你就好啦放左工仲有大把時間」之類，當你知道人地返私人公司，要鬥遲走，有d要返shift，我就有少少啞口無言，唔知點應佢o既感覺…
就好似話俾人知o係部高速火車入面望出窗外見到d乜咁…
最後好期待六月十六號上瑜珈堂！
8-5-07 寫在前面
30號晚終於考埋個試，正式放sem-break，考試o既題目都唔係太深，不過就有d答案模棱兩可唔知點揀，整體…都係唔講喇，免得講左又會有反效果。如果講考試，我今次好入到戲，因為每條mc我都係搵佢最突出、最搶眼o既答案黎研究，但如果講到學唔學到野，係咪咁academic，我諗就一d都唔係，似應付考試多d。個試其實都無乜點溫 ，睇左幾個鐘notes就入去考，有少少考底子同推理，例如有一題無啦啦問堂上無教（或者我走左堂先教）o既「異經子母補瀉法」，好彩以前上過Danny堂打左底， 如果唔係都係企哂o係度。
今次我都覺得自己好唔嚴謹，亦都覺得人讀master 我讀master，咁樣讀法似乎又唔係太好咁。睇番佢講同Danny講o既野其實就無乜衝突，兼且容易明好多，不過自己就好似無乜心機溫。諗深一層Danny講o既當然有道理啦，不過有時臨床o個陣睇住個証，又唔多熟，點都要做番d野o既時候，master教o個d都可以幫下手。所以我開始認真少少咁對待master d 內容，作為自己另一條出路，萬一physio野唔得可以用，COMT唔得可以用佢，幫自己建立一條理療階梯，咁樣我諗會對我同對個master返黎有用d。起碼可以好似道箕咁講到自己做緊乜，想有乜野effect，而唔係一味o係度試下試下咁…
四月完左啦，不過好似過左好耐都未到咁。就好似上次去完澳門咁啦，而家諗番都好似好耐以前o既事咁。今個月真係幾多野做，第一take up左職安呢個位啦，先知呢個遊戲原來唔易玩。因為有好多表要填，亦有人會expect你去做巡查，做突擊，講真以我o既時間真係做唔到。所以今年都想下放多d野俾各區o既同事做，費事走到氣咳。今年個year plan都未做，annual evaluation亦未做，所以都要加把勁去熟習職安呢個遊戲。諗番好多physio都好想淨係做case，唔好做咁多admin，我就覺得其實呢d都係一個exposure黎o既，兼且都可以磨練到溝通技巧同管理技巧，都幾實用。當然淨做case有佢o既好 處，單打獨鬥其實就係我地physio呢行o既格。
最近見到某大慈善機構又請PT1，雖然人工同真係 1 爭成條街，不過又令我有幾分遐想，睇下有無得轉下工。明記咁好都轉？都想睇下外面世界點啦，又可以試下見工，兼且而家走幾間centre都幾辛苦，大老細又幾癲，同埋唔知明記今年有無凍左我薪（要等月結單，但如果係o既話我到max之日將會係十年之後！），所以都有少少離心。其實都係麻麻地想走。
不過聽朋友講外面個景真係好到加零一，有某間NGO o係通知某個決定錄用o既人之後一個星期，主動打多次俾呢個人話會再加多一千蚊人工俾佢，另外又聽講做private o既人工都有二字頭，真係聽到心都紅埋。不過呢d都係「門外叩門」，睇住人地發，自己有無咁o既才能入到去呢？
其實上面o個幾段野五一已經打好，不過呢排個電腦都係好麻煩，有少少中毒o既癥狀，搞到又要磁碟重組又要scan野。其實scan左出黎都係中左一隻adware兼且已經洗走左，但係個電腦都仲係好怪，第一開word同realplayer會無反應，第二關機好慢，開左word無反應之後會關唔到機，真係要請教下各大高手到底我中左咩劇毒。
中毒o既final solution都係剷機啦，不過最抵死係一去到剷機o個陣部機話俾你知佢要禁止呢樣野，真係有少少吹脹。而家部腦都叫做仲郁得，都用下先啦，不過疑點仍然存在，所以有咩都backup住先，另外自己帶返工o個隻手指都係scan密d，唔好成為帶菌者。
22-4-07 the matrix 又 reloaded?
遲左兩個星期先寫呢度添。
今次遲係因為先排病左一輪，因為上星期四去左游水（當時得廿度左右），凍到死，做左熱身落左水已經無哂，再加上星期五朝早返工o個陣上左部雪車，d風係咁吹住個頭，搞到感冒之餘條trigeminal又發作。而家都叫做好d喇（有無八成？），都有o既。所以都唔係好得閒同有體力去寫呢度。
今次病特登試下神農嚐百草，我開頭無睇醫生，o係屋企搵d 感冒茶飲，由我皮毛o既診斷得知我係冷親而得病o既，所以揀左麻黃桂枝o個隻茶黎飲，得出o既結果係飲感冒茶係可以止流鼻水o既，大約可以止到四個鐘頭左右。不過唔知係咪d藥未夠濃啦，好似好多日都斷唔到尾，中間d鼻涕由透明轉黃我又懷疑係咪「寒熱轉化」，之後上完Danny堂之後個頭好痛，所以星期四都要睇番西醫請左日SL。
正所謂小病是福，其實今次病假都有少少偷懶o既成份，有時一諗起返到去「惠民署」（由余生發明，我幾鍾意呢個形容我地工作環境o既term）個個婆仔拎高褲腳話腳痛都幾厭倦，兼且真係頻撲得好緊要啦，o個日病假都可以話係及時雨。唯一覺得唔開心o既係醫生話我點解條trigeminal nerve咁敏感，如果食藥改善唔到要照腦喎，諗落都幾驚，不過我諗自己係抵抗力差先咁o者，而家都無痛，不過有時吹頭d風吹埋黎都有少少唔舒服…
今個星期病o既唔止係我，仲有架車。有次同舅父傾過，佢比較擔心架車舊電池，因為大大話話都用左三年幾，而我又少開車，所以舊電會快d死。話口未完有日去停車場o個陣見到架車d防盜燈無咁明亮，心諗都係大鑊，結果真係撻唔著。當時有諗過搵的士佬駁過江龍，不過救得一時又救唔到一世，結果舅父叫我去買番舊電返黎換，擒晚搞掂左。
心諗換汽車電池雖然未做過，但都唔係咁危險咋嘩，不過舅父又講到好簡單，對番d正負極就ok，咁唯有頂硬上啦。其實我都算怕死架喇，我全程都戴住對膠手套換，又唔敢用d金屬器具，不過好彩成個過程都好順利，係臨駁番負極o個陣個防盜大叫左一聲嚇親o者。今次換電其實都幾辛苦，因為舊電係放工o個陣o係附近o個d汽車零件舖度買，然後一個人捧返停車場，舊電大大話話都幾廿磅重架，搞到而家我d upper trape、biceps都有d痛…
前排睇《經濟日報》睇到因為大陸o既經營環境唔理想，所以有番廠家o係香港做番車衣工廠。睇到o個篇特稿都幾感動，因為班幾廿年前係工廠妹o既師奶阿姐可以搵番佢地生命o既中心，可以利用佢地青春時候o既技藝去謀生，o係工作間又識到差唔多年紀o既師奶，放左工去打牌，仔大女大賺到錢又可以自己駛、買野黎打扮下，唔駛o係屋企等天黑，助人自助，又能夠振興經濟。我覺得呢間工廠俾到佢地除左一份工之外，係一個人o既生存意義，睇到有咁o既工廠，睇到班師奶重拾佢地昔日o既風采，我o個刻真係有少少感動…
星期三上Danny堂，o個種火熱o既心又返多少少黎喇，可能你唔buy佢o個套野，但佢對classic針灸o既鑽研我覺得連中大o既教授都比下去。上完堂有幸同偶像一齊搭地鐵，好開心啊…
擒晚臨訓o個陣諗住整理一下上次深圳買o既書啦，結果拎起左本《富爸爸、窮爸爸》黎睇，都幾inspire到自己，近期少有。今年黎其實少左好多靈感同啟發，每日就係返工放工但又唔鍾意份工同老細，夜晚又返埋d無聊學，好勞碌咁過日子。真正能夠停低審視一下自己要點行o既時間並唔多。睇左半本書覺得自己又好似落入左 matrix咁（唔好意思，又係講matrix…），根本我地被工作所吞沒，每日就係為左保住份工而努力工作，努力工作然後努力駛錢，升左職加左薪就再洗多d，到老其實一d資產都無、檢視一生除左必左個仔出黎同叫做一個專業人士之外就無乜意義。
有時行過街睇到d young couples帶住d仔女，心裏面都諗呢條係咪自己都要行o既軌跡呢，但如果要我行落去，而我又想維持而家o既生活o既話我又會感到吃力。事關人工唔會o係一年之內勁升幾倍，但洗費就多好多倍，結婚要錢啦、租樓或者供樓要錢啦，裝修要錢啦，到第日有埋小朋友o既時候而大家又努力工作的話，份糧可能都仲夠支撐到個家庭，但只係夠，而唔係有餘，我地日後退休後要點過呢？係咪係好似我d case咁靠政府養、一路話d仔女唔理自己一路又掛住佢地、住o係一間自己買落但殘到痺o既舊屋度渡過餘生呢？
諗到呢度我覺得有少少寒，因為時間係唔等人o既，有d野要o係合適o既 time frame裏面完成，但心理上、財政上未有呢個o既準備。我唔係抗拒，只不過想o係自己落入軌跡之前諗下往後再往後o既日子係點囉。每當我諗到我地花大半世人所得o既錢去供樓、層樓老左又要維修，到第時我地老哂就係得o個四度唔食得、唔會生錢出黎o既牆o既時候我就覺得生命係咪就係止於呢個境界呢？再睇埋呢本書就好似Neo開頭俾Morpheus叫醒咁有d驚恐、o係繼續平凡咁過一生同做一個改變現狀o既人之間掙扎。又或者唔好講到咁大啦，我開始問自己，我到底有無理想？我退休後想做d乜野？
今朝拎住呢本書o個陣我覺得好有啟發，好想花多d精神同體力快d去睇哂佢，明白佢o既concepts，因為時間係唔等人o既。我覺得佢講o既野好岩，學校只係教我地成為一個好雇員，為金錢而工作，阿媽阿爸只會叫你讀好d書、入間大公司做野平步青雲，無教你投資同點睇錢呢樣野。我地怕無錢所以工作，但生活又令我地一路一路咁駛錢，結果一生好似金錢o既奴隸，一世都係同錢打工，而呢種態度亦令到返工好乏味，去到既乏味但又要做o既愚蠢地步。
睇完呢幾part我開始有番少少火，對於工作同埋自己長遠o既前景多左d反思，希望實現到理想中o既生活啦…
繼續睇書先…
10-4-07 四月勿雨
長假期剩番一日，所以都特別o係度寫下野同埋換番個新background俾大家。今次揀綠色除左因為以前未用過之外，係因為有次睇到citisuper o既意大利美食宣傳單張裏面都係用呢個色o既配搭，我覺得幾清新，況且春天（應該係夏天）都到左啦，正所謂「青赤黃白黑」，所以春天應該係綠綠地o既…
講番上次study group都幾有得著，得著係知道自己manip真係到左「零」o既地步。我竟然唔記得grade IV係for stiffness、我唔識palpation、唔記得左thoracic spine係摸緊上一節、唔識feel邊節係stiff之類，又覺得自己唔係一個好o既治療師，因為有好多地方都要進修同惡補，即係修補…o係度好多謝阿brain同道箕o既介紹啦（阿brain你要俾d信心自己呀！你講得唔錯架！！），我覺得movement diagram真係一種理性與感情o既結合，好有意思，就好似女朋友問你「你有幾愛我呀？」呢d咁抽象難答o既問題，你可以用一個圖表去化解哂，然後女朋友可以滿意地笑住伏o係你膊頭度咁…其實臨床上有無用同有無人用我就唔知，不過我再一次感受到外國人o個種「求本求真」o既精神，唔似中國人o既「差不多先生」。就好似上次上某針灸教授o既堂咁，佢俾o既diagnosis有少少老屈o既成份，明明個case無《中診》書講o既氣滯血瘀o既病徵，例如胸悶、刺痛、晚間痛，但佢話d人一做完手術就會氣滯血瘀喎…聽到佢咁答我都 dead-air左一陣，之後都係覺得唔好o徙時間聽佢講書，返去訓下覺好過。
另外係手法演示o個part啦，浸過咸水真係唔同d，我同蔡san都feel到有少少manip高手o既影子，道箕level高我地好多皮…即係好講得出自己做緊乜、feel緊乜、到咩位就俾力落去之類，不過話又講番轉頭，其實呢d野係咪最basic而我地又搞得唔好架呢？相比起道箕，我就覺得師姐o係討論上無咁firm，無咁有point可以講到，我諗都係怪PolyU班教授唔多ok所致啦，所以皇上講得好岩﹕點都要入名校！
諗番自己個master course真係得啖笑，希望快d hea埋佢，自己就生生性性，做多d case拎下經驗，亦都好期待下個星期上Danny堂…唔知大家有無留意《老友日記》（一個早上十點零鐘for老人家o既電視節目），Danny都有份上去講下穴位（講「腰痛點」），另外脊醫都會講下點樣揀床，其實呢個節目對大家都幾有啟發，至少有d野你係唔熟o既，人地講左出黎，第時遇到呢d問題就可以解答到。有時覺得做醫者都要有番d say，例如人地問你點樣揀枕頭、睇physio定跌打好、你同隔離台有咩唔同呢d咁簡單o既問題都要答到，如果唔係就幾無面囉…
七號同蔡san上左深圳睇書，其實返大陸都係麻麻地鍾意，不過去書城就另計，所以行程上都唔想改動得太多，臨出門口阿媽又提我小心d偽鈔，仲要記住自己俾出黎o個張銀紙（$100紙）幾多號no. ，因為有人會偷龍轉鳳，先話你真o個張係假，然後再拎張假o既黎俾你，我真係好感慨，點解去一個國家旅行要咁提心吊膽架呢？（上到去俾錢我都記左一次我張銀紙o既編號﹕QQ5154404，好似係…）
照番以往o既路線，都係「舊書城、譚魚頭、新書城」，不過今次去唔到譚魚頭食野。因為譚魚頭全部都變哂做火鍋枱，無得點小菜，但我同蔡san當時就想食小菜多d，諗番o個d魚皮再加白飯真係好鬼正，不過既然無得食就去左「永和大王」食牛肉麵，都唔錯o既，似好大碗o既「味味一品牛肉麵」囉。言談間講到大家o既置業小計（唔係咩大計），都係覺得荃灣比較適中少少，而且又知多少少個行情係點，買居屋有咩後果，同埋諗清楚買上車盤個目標，當然都係得個講字啦…今次都買左唔少書，不過其實買DVD仲多，一共買左百幾蚊，有d碟真係平到你唔信，就好似以前上映o既《戰火旗績》只賣$26、《巴別塔》賣$16（！！仲要係正版），真係唔買都對唔住自己同祖國o既同胞。另外買左本關於音樂治療o既書，裏面講到用五行o既「宮商角徵羽」黎配合治療，都幾過癮，所以都買左。其實睇番而家d書都要揀過先買，因為即使係一d名家所出o既書，有用o既都係佢講theory o個part，前面o個d「俞穴學」、「經絡學」基本上都係狂抄書，無驚喜。買左咁多野，最後都希望有時間可以睇到同埋有得著…
假期去左澳門玩左兩日，d friend個個都話「嘩你又去呀！」，係呀，無計啦，大家d假期都夾唔到，又唔鍾意返大陸，諗住跟下團搭下飛機，點知都係請唔到好o既假期。今次繼續熟悉澳門o既地形啦，不斷咁講「o下，原來係咁去架咋！？」，因為原來有好多地方行下行下就到，而旅遊書裏面o既食肆都食得五五六六，有d仲要係第二次去食添。幾推介三盞燈o既「成群小食」，裏面d緬甸撈麵唔錯、「乙水」仔o個間魚翅麵都幾好架，不過呂炳耀話唔好食喎，豬扒包唔駛排隊又同大利來差唔多水準（我覺得啦）。唔知幾時又會去第四次呢…
擒晚由濠江回港，覺得當地真係好旺，成架船爆哂，兼且仲有好多自遊行或者大陸團入住酒店，要check-in都要等起碼三個字！又睇番香港o個單賣假野o既新聞，我 d 悲觀情緒又出番黎，如果連購物天堂呢個招牌都撐唔起，香港唔知有d乜野可以做旅遊天堂囉…由於返香港o個陣有d趕啦，所以都想搵個地方匆匆地食下野就算，最好當然有老麥啦，不過唔知大家覺唔覺澳門真係無乜麥記，o係「乙水」仔有一間啦，另外o個d我就無乜印象見過，唔通澳門人唔鍾意食牛？
行過地產鋪都有望下人地d樓啦，發覺都幾平，百零萬成千呎仲要對海，不過睇落就舊左少少。另外都望下有無physio啦，o係我所見之中就無，不過d西醫招牌之中又見到有，唔知係咪個西醫做埋啦，有時諗唔知o係o個面發展會點架呢？
今個假期其實都俾左好多objectives自己，都就黎可以完成哂，例如update呢度一次啦、執下份CV啦等等，不過最慘o既係呢個四月無啦啦凍到死，搞到我想游水o既美夢幻滅。原本諗住假期第一日朝早就即刻走去游啦，不過自己又晏起身，睇住個天一路黑，一路落大雨，直到今日都係咁o既死款！
原來假期要玩要享受，就要早d起身。當然你可以o係假期享受訓覺呢樣野，但如果又要享受埋其他野兼且同呂炳耀去到街的話，都係早d起身好d。其實一到下晝食野已經覺得時間無多。有時諗如果朝早早起左，下晝眼訓咪訓番囉，不過呢句話都係用黎「乙水」自己…好多時下晝都係無時間訓，但係做多左野始終係做多左野，同訓得好晏之後「o下？已經下晝喇」o個種失落感好唔同…
岩岩check email check到老細俾我份AE啦，不過由於假期關係我係唔會打開黎睇o既。聽聞呢排private市場好好景，入職都萬七，有私院仲出到萬八，我又會諗自己可以o係明記做到幾耐呢？唔做又係咪可以轉到私人市場呢？未來我o既人工係咪就係得咁多？唔好講養車喇，到時有家要養係咪夠洗呢？我o既生活質素會係點？有日報紙報導醫院急症室有physio，阿媽即刻拎黎俾我睇，又話人地著住套制服幾咁pro（但都係做緊IFT），我著o個件就成套校服咁。不過聽講入醫院主力都係入Inpatient煎魚、要入OPD都幾難，況且o個度 caseload太多又會壓死自己，做唔到好o既醫者，所以入醫院做係咪咁好呢？我o係明記話哂人地都會叫我一聲「楊生」，點都會有杯茶飲下丫，所以都唔理阿媽講乜喇…
有晚臨訓前好想返poly講番堂 professional seminar，教化一下我地師弟妹，俾佢地知道理療界曾經有幾咁苦先到而家呢個境界、physio亦都唔係乜野勁人，d跌打分分鐘勁你十倍、o係社福界你個老細係社工唔係PT 1、做geri頹唔頹係睇自己唔係睇環境、o係社福界你唔係治療師，係治療活動協調員，做活動最緊要有outcome measure交數…亦都想去open day講下physio真係做d乜，唔係為宣傳而宣傳，講到懶有意義、救急扶危、服務社會o個種，而係俾人知我地o個行真係點，有無得升、薪酬係點，又同佢地傾下人生o既計劃係點，等人地選科o個陣唔會好似自己咁盲樁樁，要發達就唔該你揀account或者揀law，o個度幾皮野一個月…聽聞poly又想加番學額，我梗係覺得唔好啦，岩岩先至有個小陽春，你唔係咁樣整冧個市咁自私呀嘛？
四月係新財政年度o既開始，亦係自己o係一輪人事調動後、接掌五個CRP service單位o既時候，希望一帆風順，能做o既都去做！