電車go！（京阪和篇）（Mar-05）
今次自己同屋企人去日本，一為散心，二為朝聖，朝咩聖？睇下咪知囉…
呢度叫上本町，係我地住o既地方，上面就係我地間酒店，亦都有機場limousine bus直達，可以話四通八達。估唔到無得住交通方便個package又平d o既「富士屋」，都有間咁方便o既，真係塞翁失馬，唯一唔方便就要駁一駁車（150円）去鶴橋站先搭到大阪環狀線四圍去。
大阪環狀線
一聽就知係成個圈咁啦，同東京o既山手線差不多，大站如大阪、大阪城公園、難波等都去到，不過由於係成個圈咁啦，如果想由圈o既一面去第二面就比較花時間。不過大站o既好處就係可以接駁到其他車同由好多車駁埋去，例如我地酒店o個度o既近鐵啦、JR入京都呀咁。大阪環狀線架車幾易認，成架橙色，個樣都幾醒神架，由於我地去o個幾日都係平日 返工時間啦，所以都幾多人搭。而由於玩《電車go！》o既時候實習過啦，所以對呢條線特別熟識。
醒神o既橙色車身（攝於鶴橋站）
好趁車到留倩影（好似攝於大阪城公園站）
the holy place!（勁鍾意左邊o個張！！）
呢度可以話係我o既聖城麥加，可以一探運輸手o既工作實況，我呢位同事好似叫做大嶋曜。有次見佢地換更，發覺除左個工事包之外，手上仲有支野拎住，原來每位運輸手都有佢地o既私家Q，係用黎剎車用o既，即係《電車go！》街機版同埋右邊幅相度o個位運輸手右手拎住o個條野呢…o係操控上佢地都好穩陣， 隻手未開車係唔會放開個brake o既，而埋站亦都唔似我咁用到七或者八度停車咁多，頂多都係五六度已經可以停定架車架喇，埋站剎得唔重，好穩陣。不過話時話，停車有時都會差一兩米， 都acceptable o既，唔扣你時間啦！
講起運輸手，其實我仲拍左佢Video添，一路睇佢地行車，一路佢地就好似作法咁，因為一見到d通行訊號，佢地就要好大動作咁向前面指一指，好特別，呢個係我o係十分像真o既《電車go！》裏面睇唔到o既，真係「打萬次機不如行萬里路」。另外除左運輸手車尾仲有個叫做conductor o既人，佢地係負責報站同埋到左站之後按制，令月台出廣播同音樂催d乘客上車o既。
JR京阪線
入京都都順理成章地搭埋JR啦，因為有全包o既Kansai passport嘛，o係大阪站上車。
以為逢藍車就係入京都？咁就錯喇，一去到大阪站第一架藍車就黎喇，差d上埋車架喇，但一睇原來係去高槻，我就唔敢上喇。之後搭番寫住京都o個班（右圖），睇番個站牌先知高槻原來係大阪同京都o既一個中途站，真係抹一把汗…
落車後影o既，係咪好《電車go！》o個d過版畫面呢…
o係京都返黎其實都有d麻煩，又因為拎住張Kansai passport啦，一去到月台諗住同阿工作員confirm下係咪可以搭啦，因為返親大阪都係特急（仲要係以前我個筆盒上面o個部雷鳥！），點知阿人員唔知係咪未見過，講一大堆日文，之後因為言語不通大家就唔理大家喇。望住個牌，先知出名準時o既電車，都有delay o既時候，有部返大阪o既會遲廿五分鐘，唔通路面有事？
天又黑啦，同兩老o係個站度睇下仲有咩車同o係咩月台返大阪，拎住張Kansai passport，都係打死罷就喇，見車入大阪就上，結果俾我地上到另一部特急（下圖），好似廿分鐘度就返到大阪喇，抹第二把汗！其實都係自己無信心之過啦，明明話Kansai passport除左新幹線之外乜都包架嘛，又唔敢上，又要問人…
最後搭左呢部特急，ok舒服啦
，之前有部「雷鳥」架，即係以前筆盒上面o個部呢，但搭唔到lu…
酒店樓下o既近鐵
（咦，老豆？）
搭近鐵我都係搭一個站去鶴橋轉大阪環狀線o者，由於Kansai passport唔包近鐡啦，所以每朝都要用150円去鶴橋。去到鶴橋一般市民會去精算機補錢，然後就入閘搭大阪環狀線，但由於我地用Kansai passport係包JR o既，所以唔駛用張近鐵飛做精算，就可以出閘搭JR，所以我都儲左好多張近鐵飛做書籤！。近鐵我都無乜點研究，因為次次都係搭一個站就走人，我記得佢地係會去到奈良o既，亦都記得好多火車站都有「近鐵百貨店」，就係咁多囉…
御堂筋線
呢架咁有動感o既車，就係大阪o既另一條命脈「御堂筋線」喇，由大阪站去難波心齋橋區必搭啦，因為佢就係一條直線咁cut 過大阪環狀線，所以由大阪環狀線o既一邊去另一邊，好多時會揀呢條線。
由於有Kansai passport啦，所以都唔駛買飛，直出直入。感覺上呢條線都幾旺，而難波除左係購物旅遊區之外，亦都係好多長途車o既轉駁站，例如去空港同去和歌山o既南海電車等等。去難波站可以學到幾個日文字，因為御堂筋線o既難波站係用全日文寫o既，間接地令我記得番「なんば」呢幾個日本字。另外大阪站身為一個大站啦，但御堂筋線係叫佢做梅田o既，所以要睇熟d路線圖呀！亦由於佢係穿過好多遊客區啦，佢o既報站亦都比較先進，除左用聲帶報站之外，佢每個站都編哂編號，例如某個站會用什麼「m19」表示，等d外國人唔會 lost in translation。
ad-hoc和歌山﹕南海電鐵
諗住第二晚先去大阪睇「固力果」，結果第一晚已經去左，所以行程比預期早左完成。去到第二日下晝食完有名o既「金龍拉麵」之後，就膽粗粗帶兩老搭車去和歌山玩喇。跟住旅遊書話難波站會有「南海電鐵」o既車站，結果就去買左一套四張o既套票喇﹕套票一份四張啦，有搭南海電鐵o既來回車票，來回Porto Europa（一個有歐洲色彩o既主題公園） o既和歌山巴士票同入場券﹕
車到喇！左上角o個張係我影得最滿意o既，因為架車已經行得好慢，所以影出黎唔會好似「御堂筋」咁有動感，而且d顏色o既對比亦都好sharp，令我對南海電鐵更有好感。車程大約一個鐘度啦，途經一d個名好型仔o既站，例如單字一個「窪」咁，而另外好驚訝o既係架車o既conductor竟然係一位幾靚o既姐姐添！去到和歌山o個頭會有「和歌山市站」同「和歌山港站」（好似係尾站），記住o係和歌山市站落車呀！
講起和歌山都不能夠不講下當地o既風土人情，o個度其實都未係太旅遊區，所以識講英文o既人可以話係一個都無，而車站旁邊o既「近鐵百貨店」亦都同香港o既國貨公司差唔多。一落火車就搵巴士去Porto Europa主題公園啦，所以就問下站長，站長雖然講日文，但都feel到佢好有心機教我地搭邊部巴士，又寫又做手勢。之後當佢知道原來講錯左巴士o既no.俾我地知之後，又特登踩番單車黎叫我地搭第二部早d到站o既，真係覺得咁先係服務態度囉，唔怪得日本無劉華o個個廣告啦！
另一樣特別o既係o個度無咁大城市，結果就係老人家或者d師奶比較多。去到都差唔多兩點幾啦，交通都幾繁忙，真係幾驚搭車去到個公園收工！咁話哂都未係一個旅遊區啦，o個度就連快餐店d menu都係寫日文o既，仲要係我唔多認得o既「羅馬字」，口喝想叫杯野飲下都唯有四圍搵汽水機。
其實和歌山有名o既係和歌山城，不過我地由於買左入園券又趕住入場所以無去到。講番個公園其實都一般，荔園級質素啦，所以都無乜特別影相。不過隔離o既「黑潮市場」就比較好行d，可以睇下海鮮，如果早d到應該會睇到劏魚表演，仲有時間的話可以去食海鮮自助燒烤添。好feel到o個度o既小鎮風情同埋渡假feel，最印象深刻o既係臨走o個陣o係海邊見到佢地o既發電廠，你話呢度真係幾咁偏呢…
日落西山呢張係咪幾得呢，都係時候返大阪喇，臨走睇到有「女性專用車輛」o既車卡，幾得意丫…由於都搞左大半日啦，搭搭下車大家都訓哂lu…
Kansai passport
以下一set就係關西passport，其實都幾貴下。佢包你搭京都同大阪o既某d巴士啦，例如京都o既旅遊線﹕100、101、102等，基本上搭多幾次巴士已經回左張京都pass o既本。而由於京都無乜火車啦，主力靠巴士，所以都唔駛愁無用武之地。大阪one day pass就o徙左d，淨係用黎搭左一兩次「御堂筋線」，因為搭JR已經去到「大阪城公園」、「難波」等熱點喇。而另外巨都包你一程返空港o既JR或者南海電鐵，但由於間酒店樓下就有 limousine bus站o既關係啦，壓倒性o既方便，亦唔駛兩老拎住d行李行上行落搵車，結果都係無用到。講到用得最多，當然係o個張JR票啦，搭大阪環狀線又係佢、入京都都係佢。
如果你問我呢set野抵唔抵，我就覺得要睇你行程點行囉，又如果間酒店下面無limousine bus ，你就可以用埋o個張JR空港線添。其實講到呢d pass，都有好多俾你揀，去大阪前不妨參考下旅遊書。
左起﹕大阪一日乘車證、京都一日乘車證、JR四日乘車證（有「鶴橋站」印架！）
上左﹕南海電鐵空港線車票、JR空港線車票、下﹕收據、資料
、規則。
雖然話去日本朝聖，但睇番香港o既鐵路系統其實都有好多可取之處。第一行車o既時候無咁不穩定，咁當然係路軌保養好啦，也許香港路軌唔多，另外行車較慢都係覺得行車比較唔穩一個原因之一。第二係佢地o既報站同月台操作都仲係用人手，比起香港所有都係用聲帶同埋每個月台都有月台長或者訊號系統落後，不過各處鄉村各處例，人地反而準時囉。
另外日本人真係好有禮貌，試過好多次搭長途車個conductor要去車頭，每當佢行過車與車之間o既門o既時候，佢都會同大家鞠個躬，好似話打搞哂咁，呢樣真係好鬼窩心，唔怪得o個邊無劉華o既廣告啦！ 今次京阪和之旅其實好開心，因為第一次自由行同埋可以同兩老體驗一下自由行o既苦與樂，當然仲有影左好多電車o既相啦！