کابوس

سابیر صدیق

هه‌وا سارده‌

کات:

کابووسه‌

رۆژگار‌ ده‌می ژه‌نیوه‌ته‌ ناو برینم

من برینم!؟

یا ئازار و ژانه‌ سه‌رم

یا جگه‌ره‌ی

نێوان په‌نجه‌ی

سه‌رقافڵه‌چی ڕێی قه‌ده‌رم

*                    *                     *

کزه‌بایه‌

ئاسمان گرژه‌

ڕۆژگار ده‌می ژه‌نیوه‌ته‌ ناو برینم

کات:

برینه‌

ته‌مه‌ن:

زه‌رده‌خه‌نه‌ی نێوان گریه‌و پێکه‌نینه‌

باوکم:

سۆفییه‌کی نه‌ناسراوه‌

ووڕوکاسی عه‌شقی خاکه‌

دایکم:

ئافره‌تێکی بێسه‌واده‌

ده‌روون پاکه‌

من:

ئاخێکی گه‌رووی مێژووم

تۆ:

کۆته‌ره‌ی

چوا ڕێیانی چاوه‌ڕوانیت

من:

کۆرپه‌له‌ی منداڵدانی بای قه‌ده‌رم

تۆ:

زامێکی ساڕێژ نه‌بووی دڵی زه‌ویت

تۆ:

ڕه‌نگه‌

هیچیان نه‌بیت

"من" یش :

جگه‌ره‌ نیم

بابایه‌کی قه‌له‌نده‌رم

گه‌رچی ئاسمان

گرژ و مۆنه‌ و

کزه‌ بایه‌

زۆر بێزارم

ئاله‌م پاڵتۆ قورس و ڕه‌شه‌

که‌وا ئه‌مشه‌و کردمه‌ به‌رم

مالوومه ‌    1987