چۆله‌که‌کانی حسین میسری

سابیر صدیق

میوان

هێشتا

قومێ خه‌م مابوو

شته‌کانم کۆکرده‌وه‌

بلوزه‌ شه‌رابیه‌که‌م له‌به‌ر کرد

مناڵیم له‌ ملمه‌وه‌ ئاڵاند

فووم له‌ چرا کردو

شیرو

ووڕکه‌که‌یم

له‌ بیر چوو..

* * * *

شته‌کانم کۆکرده‌وه‌

پاڵتۆ ڕه‌شه‌که‌م له‌به‌ر کرد

گه‌نجێتیم کرده‌ مه‌چه‌کم

جگه‌ره‌و

بێده‌نگییه‌که‌یم

له‌بیر چوو

* *   **     **

شه‌وێک بوو قوورس

حه‌سره‌ت له‌ دڵم ده‌تکا

هێشتا قومێ خه‌مم مابوو

پێڵاوه‌کانم هه‌ڵکێشا

پیریه‌تیم دا به‌ کۆڵما

فووم له‌ چرا کردوو

عه‌ترو

عه‌شقه‌که‌مم

له‌بیر چوو

** ** ** **

ئیحساس

ئه‌و:

مانای ئومێد

له‌گه‌رووی ته‌یره‌کانا

ئه‌و:

مانای ئیمان

له‌ناو ڕه‌گی گوڵه‌کانا

که‌بیر له‌* ئه‌و* ده‌که‌مه‌وه‌

زه‌ینم تێکه‌ڵ به‌ ڕه‌نگی گیا ده‌بێ

ڕۆحم پڕ ده‌بێ له‌ ڕێحانه‌

**    **     **

ئه‌و:

مانای هه‌تاو

له‌به‌ر ده‌رگای ماڵه‌که‌ما

ئه‌و:

مانای ئیحساسی ئاو

به‌که‌ناری  ڕێ ی کۆچما

ئه‌و:

مانای ژنێک

ناوم نابوو* تاقانه‌*

که‌بیر له‌ *ئه‌و* ده‌که‌مه‌وه

زه‌ینم زه‌رد هه‌ڵده‌گه‌ڕێ

ڕۆحم پڕ ده‌بێ له‌ گریان

مانای سۆز و

مانای عه‌شق و

مانای قودسیه‌تی نیشتمان

عاتیفه

ئێره‌‌‌:

پڕه‌ له‌ بۆنی غرور ته‌نیایی

له‌ گمه‌ی کۆترو

گه‌ردیله‌ی یاقووتی

له‌سه‌رماو

له‌ژنه‌ به‌فرینه‌

لێره‌:

سه‌وزایی سنه‌وبه‌ر

عه‌به‌سی لێده‌ڕژێ

لێره‌:

غوربه‌تێک به‌ ئه‌ڵماس

سه‌رنج و ته‌ماشا ده‌کوژێ

**   **    **

ئه‌وێ:

شێداره‌و ته‌م و مژ

پڕه‌ له‌

گه‌ردیله‌ی غیره‌ت و متمانه‌

پڕه‌ له‌

ته‌ڕایی عاتیفه‌

له‌ گه‌رمی هه‌ناسه‌ی ئه‌سپه‌ ژن

له‌وێ:

به‌ ته‌نیشت بێده‌نگی مانگه‌وه‌

به‌کراسی هه‌ناری و

به‌بۆنی قۆخه‌وه‌

له‌وێ:

لای فولکه‌ی * ئاسکه‌کان*

که‌پڕه‌

له‌جوانی و له‌ هاوڕێ

به‌یانی

سه‌عات* نۆ * ده‌تبینم... به‌یانی

به‌یانی که‌ لێره‌

سه‌وزایی سنه‌وبه‌ر

عه‌به‌سی لێده‌ڕژێ

به‌یانی که‌ لێره‌

غوربه‌تێک به‌ ئه‌ڵماس

سه‌رنج و ڕوانینم ده‌کوژێ

زستانی 2002 یۆتۆبۆری