Dahil dito’y labis na papuring muli ang natanggap nina Florante na lalo namang ikinapagselos at ikinagalit ni Adolfo sapagkat ang tanging inambisyon niya sa buhay ay makuha ang pag-ibig ni Laura at mamuno sa Albanya. Lihim na nagplano si Adolfo ng paraan upang mawala si Florante sa kanyang landas. Muling nagkaroon ng mga labanang pinamunuan ni Florante. Natalo niya ang hukbo nina Miramolin gayundin ang labimpito pang iba’t ibang kaharian. Sa gitna ng pagkapanalo at pagbubunyi ay nakatanggap siya ng liham mula kay Haring Linceo na nagsasaad na kailangan niyang bumalik sa Albanya. Ang kanyang hukbo ay iniwan muna kay Menandro at dali-dali siyang naglakbay patungong Albanya. Subalit pagdating niya roon ay natuklasan niya na ang lahat pala ay patibong lang ni Adolfo. Hinuli siya at ikinulong. Nalaman din niyang pinatay ni Adolfo ang hari at idinamay pa si Duke Briseo, ang kanyang ama. Ang pinakamasakit ay ang narinig niyang si Laura ay nangakong magpapakasal kay Adolfo. Pagkalipas ng labingwalong araw sa bilangguan, si Florante ay inilabas ng mga tauhan ni Adolfo isang gabi, dinala sa gubat at itinali sa puno ng higera kung saan siya natagpuan ni Aladin. Dalawang araw na siyang nakatali sa puno ng higera at sa labis na panghihina’y pinanawan ng malay at nagising na lamang sa kandungan ng Morong si Aladin.