|
anhon ta
makahalam-ut
mga tinaga ko nga gin bilin
padayon! padayon!
kag sa pihak,
padayon ko man nga pagapas-anon
ang kalbaryo
sang akon kaugalingon nga krus.
daw
sa indi dapat, hu-o matuod
apang anhon ta,
mabaskug ang huyop sang hangin.
kasubong ta
dahon... laya...
wala mahimo nga ginapalid,
kag kung diin pakadto,
wala ta mahibal-an.
basi
man sa ulihi maabot ang ti-on
ang diutay naton nga damgu
aton man ma-agum.
ukon basi man sa ulihi
kita paga-agumon
sang damgu naton.
pagkahulog
ang
imo maka galanyat nga kaanyag
ang dalit nga naga-bulag
sa akon mga mata
agud ‘di ko makit-an
nga ikaw kag ang imo kaanyag
lunsay lamang pinutos nga unod kag tul-an.
padayon
nga naga lanog
sa akon paminsaron
ang mga tinaga kag paandam
sang mga sampaton:
“mahuyang
ang pang huna-huna,
kinahanglan mo mag andam.”
apang
ang imo mga yuhom
ang naglabugay sa akon balatyagon
kag nag tulod nga magbalik
sa kina andan-
ang pag dugas sa dinugasan.
|
luyag ko magbugtaw kamingaw
nga duag
sang kagab-ihon
makabulungol nga kalinong
nagakadlaw ako sa akon
akig nga kaugalingon
tani ang kaagahon maabot na
luyag ko na nga magbugtaw
kag indi na magbalik sa pagtulog.
balaan
nga palamangkutanon
ano gid bala ang mangin balaan
sa imo mga mata?
sa isa ka tiun?
sa isa ka semana?
may kinalain gid ayhan?
kasubong ko ang ilahas nga kabayo
di hagop kag sutil sa pag-hangop
sa tanhaga sang imo mga mata.
ano gid bala ang maghigugma sa imo?
ukon mangin isa ka abyan?
sa pihak sang tanan
nga pagtahod kag pagkahadlok.
nabulag ang akon mga mata
sang mga handum
nga mag gahom sa dutan-on nga mga bagay.
sugiri ako, o sugiri,
ano gid bala ang mangin isa ka tumuluo
sa pihak sining mga katungdanan
kag ano ang kamatuoran
sa likod sining akon tinuohan?
|
