Son moitas as revistas de todo tipo que hoxe nos rodean, e
variados os temas que as compoñen. A maioría delas toman o camiño da
especialización, o da formalidade, ou convírtense en mensaxeiros de
determinados grupos con obxectivos case sempre polítcos.
O noso gusto pola Historia, Xeografía, e Historia da Arte (como alumnos desta Facultade que somos), polas Humanidades en xeral, así como outras disciplinas que nos poden aportar novos horizontes á realidade en que vivimos xestou, alá nunha tarde soleada de Marzo do ano pasado, a idea da creción dunha revista.
Tería que ser algo informal, para ler e comenta-los temas en
calquera sitio, como na cafetería. Os contidos serían flexibles, serios pero de
lectura fácil, e nos que habería desde artigos dun traballo de investigación
ata a recensión dun libro que cres que vale a pena ler, ou un congreso ó que
asistiches, unha viaxe, un lugar, algo que che fixo reflexionar,.... Temas de
actualidade sobre os que queres da-lo teu punto de vista, comentarios, creación
literaria. Unha revista aberta a todos, participativa, onde todos marquémo-
-lo rumbo a seguir, que en
principio parte desde o achegamento ós estudiantes, á sociedade, xogando un
papel importante a divulgación e a reflexión. Ademais tentarase dar información
ós universitarios, de bolsas, cursos, congresos, conferencias, etc.; de todo
aquilo que a xente quere saber pero que sempre se entera logo de que pasou.
Estas son a grandes rasgos as pautas que nos marcamos, de ti
depende que vaia adiante ou non. Neste primeiro número podes ver mellor por
onde van os tiros, os contidos e as divisións. Se che gusta pódesnos apoiar de
dúas maneiras, lendo a revista e aportando ideas, ou participando nela directa
ou indirectamente. Directamente botándonos unha man na confección, e
indirectamente pero de gran importancia, enviándonos escritos teus á dirección
que en páxinas interiores che indicamos, e así poder ser publicados.
Nun mundo como o actual, onde os valores que priman son os da
utilidade e competitividade, entendidos mecánica e tecnicamente, apoiados coa
desculpa do progreso, outros posicionamentos distintos teñen unha recepción
social moi reticente, deixándolles pouco sitio para podérense desenvolver. É
por isto que desde estas follas queremos abrir unha porta para todos aqueles
que aínda cren que ó ser humano lle interesan outras moitas cousas. Vós
diredes.