رأس البر
أحسنها مصيف ف الدنيا
فى راس البر
فى ارض سهلة رمليه
لاحجر ولاصخر
واقعه ع النيل فى ناحيه
والتانية البحر
جنة وحواليها المية
ف بلادنا مصر
فيه المساكن مبنية
بالغاب والقش
هيكلها عماويد خشبية
ما فيهاش ولا خدش
عشش جميلة وصحية
بها اضخم فرش
ومجهزة بفرع الميه
وأود للعفش
العشه طول قايمه بذاتها
لها نمرة وصف
اربع شوارع حواليها
بهواها الجاف
والشمس ناشرة اشعتها
من فوق السقف
فيلا عظيمة بمنافعها
وتزيد ع الوصف
م الفجر كل الناس قايمه
م النوم للاكل
ومصيفين عاملين لمه
بيلموا الشمل
بأرواب على اخر فرمة
وجميلة الشكل
ماشيين يعفروا م النجمه
ويشقوا الرمل
رايحين على البحر المالح
بين كر وفر
والموج وزبده بيصافح
ويبوس البر
وبيسحب الرمل ورايح
من مد وجزر
والريح بيدوى بصوت واضح
فى عز الحر
والمستحمين ف الميه
فى لعب وقزح
من كل مله وجنسيه
هايصين وف فرح
سكالانس حكم المدنيه
وترش الملح
عالم باجسام بشرية
ويطول الشرح
وع البلاج ستات ترسى
وتنام ع الشط
متمددين جنب الكرسى
اغصان تتمط
وبياخدوا فيه حمام شمسى
يا حلاوة البط
الوسط بالكلاسين ماكسى
والباقى زلط
وفيه هوانم وصبايا
احلى م الشهد
تحت الشماسى والراية
بيشموا الورد
اللى بتنظر ف مراية
وتشوف الخد
واللى بتقرا ف رواية
وواخدها الوجد
فسحه ورياضة وسباحه
والدنيا حر
والجسم عريان ف الساحة
وبكيفه الامر
على طبيعته المرتاحة
لاهدوم ولا حجر
والجاية اكتر م الرايحه
لما للعصر
فىساعه المغرب فرحه
خارجين الكل
يمشوا على النيل للفسحة
بحواجب قفل
والريحة م الفساتين فايحة
وعقود الفل
والبنطلونات كدا سايحة
وعليها التل