Ek Kahani
Pahle thoda sa mauhal kheencha jaye...
Apne hisse ki zindagi to ham ji chuke hain chunni baboo,
ab to bas dhadkanon ka lihaz karte hain.
Kya kahen ye duniya walon ko jo,
akhiri saans par bhi etraj karte hain.
Dil ke chhalon ko koi shayri kahe to koi parvah nahin,
takleef to tab hoti hai jab koi.. vaah vaah karta hai.
---Devdas
Ab ek chotee see kahani.Please send in your feedbacks at [email protected].
Ek alas see subah , halki see bayar , ...ped par panchee baitha soch raha hai ...samundar ke us paar kya hoga ? ? ...shayad koi anjana sa desh ...jahan bahut bada jungle hoga ...is apne jungle se bhee bada aur chayadar ....aur vishal ..aur sundar ....samundar main jo jahaj jaa raha hai agar main us par baith joon to us anjane desh main pahunch kar wahan ke ped par lage ber khaoonga ...suna hai wo bahut meethe aur sunhare hote hain . suna hai wahan patte aur hare aur hawaen aur thandee hotee hain....main udan bharta hoon aur jahaz par jaa baithta hoon ....Jahaz bahut sundar hai ....Kitnee chahal pahal hai ...main fudak kar sabse oonche khambe pe shan se baith jata hoon.,..Wah ...kya baat hai ...main saree duniya ka raja hoon ...charon taraf chote chote admee , athah samundar ...Ye sab mera hai ..Mujhse khush aj koi nahin ....sab taraf mera raj hai ,.,.,is samundar se achha kuch nahin ...mera purana jungle...hunh ,,,ab to main raja hoon ...ha.. ha.. ha..
Jahaz apni gati se chalta hai ....panchee sabse oopar khambe par baitha baitha apnee kismat par itra raha hai ...itne bade samundar ka malik ...itna bada jahaz ..uske kadmon par jhuka hua hai .....khula asman sab uska hai .....wo jor se peehoo peehoo bolta hai ...aur sirf uskee awaz poore vatavaran ko gunjayman kar detee hai ...wo khushee se fool uthta hai ...par fir sochta hai ,,,,, kitna achha hota ki agar wo gilharee bhee yahin hotee ..wo chooha ...aur wo bandar , uske dost bhee agar uske saath hote...wo ped ke neeche jo kokhal tha jismain barsat main panee bhar jata tha aur mor aa kar wahan nachta tha ...jo cheenti kee lambee kataren,,,agar wo sab bhee uske saath hoteen to wo aur khush ho jata .....kitna yaad ata hai use apna ghna jungle , wo apna vishal ped jiskee chaon main usne apnee porree jindagee bitayee thee....Kitna achha hota agar wo us poore samandar aur poore jahaz ko bhee apne saath le ja pata ...apne doston ke paas...
Sochte hue usne nischai kiya ...aur wo apne khambe se uda usne us khambe par se ek chota sa tinka uthaya aur samundar se do boonde chonch main bhareen aur ud chala apne jungle kee taraf ....udte udte thak gaya ,,,,jahaz bahut peeche choot gaya tha ....par sab taraf uska samundar hee tha ...athah aur vishal ...koi kinara na tha ...koi manjil na thee,...uska jungle kho chuka tha ...wo bahut udas ho gaya ,,,,shayad jahaz par wapas jana padega ...shayad aur koi rasta bhee to nahin ....bojhil man se wo apnee chonch main tinka dabaye aur panee kee do boonde samete wapas jahaz par chal deta hai ..aur khambe par aa kar baith jata hai ...Par aaj samundar ka raja bahut dukhee hai ...Aj ye vishal samundar uska majak uda raha hai ...Wo akela hai ...nirash hai ....kal fir ud jaoonga ....is baar aur pakke iradon ke saath ,,thode aur tinke aur thodee aur boonde...apne jungle main wapas chala jaoonga main .....wahan par mere ek naya samundar hoga ,,,ek naya asman hoga ...Jahan mere dost honge ...gilharee , chooha , wo koyal...cheetiyon kee lambee kataren , wo tota aur wo mor jo panee barasne par nachta tha .......wo ooncha sa pahad......jahan mera ghonsla hoga ...wo bada sa ghana vriksha jahan mera ghar hoga ...Sooraj doob raha hai ...lahren shant hain ....do boonde sookh gayee hain ....tinka kahin hawa main ud gaya hai ,,,Panchee ne apne sir ko pankhon main chupa liya hai ...Kal phir udna hai ....Tinke aur panee ....poora ka ppora samundar ,..mera ghonsla , mere dost ..
--Rahul
Home
|