Mera Gwalior mahan

Gwalior shahar, ek shandar shahar ek jandar shahar. The best part about this beautiful city is - I was born here. Shahar chota sa hai, par dil ke kareeb hai (aur dilli ke bhee). Ye wo shahar hai jahan year 1977 main ek veer, honhar balak ne janam liya. Brashpati ka tez, 70 hathiyon ka bal, aur......(Any comments from Ashutosh parashar? ?) Age chal kar yah veer balak Rahul Garg naam se prakhyat hua.

Haan to, main kah raha tha ki ye Gwalior kee mittee ka sobhagya hai jo isne aise sapoot ko janam diya ... Iskee abo hawa nirali hai. Tang sarken, chotee galiyan. Aksar bhind murena ke saath iska naam jora jata raha hai. Aj bhee jab Gwalior ka koi student doosre shahar main room talashne jata hai to makan malik bahar se hee darwaja band kar deta hai aur kehta hai ki hum Bhind morena aur Gwalior ke logon ko kamra nahin dete.Baat baat par mar pitai hona aam baat hai.

Par ye shahar hai ...jo dil ke kareeb hai ...100 main se 100 baiman phir bhee mera Gwalior mahan. Iske saath judeen hain chand yaden jo kambakht ise bhoolne nahin detee. Hosh samabhala aur dekha ki Gwalior ka matlab Sarafa Bazar hota hai. Jab shayad 6 sal ka raha hooonga tab dada kee unglee pakar kar Maharaj Bada tak jata tha, jahan mujhe ek imartee aur garam doodh ka kulhad pilaya jata tha. Wo din bahut yaad ate hain .

Thora bara hua to laga ki nahin Sarafe ke bahar bhee koi duniya hai. Kampoo, sarkar aur sawari- bachpan main in teeno main bara confusion rahta tha. Carmel Convent School meree aglee manjil. Ahobhagya Gwalior ke jo ise CCS jaisa achha school aur mujh jaise bahut achhe student mile. Ghar se falka bazar tak ka safar-Yaad ata hai Hari Raman Agrawal jiske sath main school jata tha. Last period main barabar class ke bahar tak taki lagaye dekhta tha ...Mummy ko itnee der kaise ho gayee. Phir jaise hee wo dikhteee theen to phir akhiree ke 10 minute teacher kee baat par ilkul dhyan nahin lagta tha. Ha..Ha..

Gwalior main ghoomne layak kuch achhe jagah bhee hain dokhe se. Aur isee dokhe se ye kuch achhe paryatan sthalon main se ek hai. Gwalior ka Kila, Jaivilas palace, Surya mandir , avismarniya hain.

Gwalior ka medical college- jahan hamne kitnee baar bina authorities kee permission ke Table Tennis ke daur bichaye the.Agar Mansih Bhalla, Amit banwari, Vivek arora,Subhash Gupta is site ko padh rahe honge to unhain yaad hoga. Medical College kee table jo aksar bharee rahteen theen- bahut dukh detee theen. AG office ya Madhao pustakalaya..phir yahin kuch baat bantee thee.

Khair yaden to yaden hain. Yadon main chehre hain, bashinde hain, bajar hain , sadke hain , buildings hain , khamosh sa Gwalior shahar hai jo kabhee nahin bhulaya jaa sakta.

Koi Gwalior ka bashinda mere ghar ka pata poochte poochte is site par aa takraya to mujhe bahut khushi hogee. Gwalior main kahin jana ya na jana , mere ghar jaroor ana...(aur sath main bahut sare gifts bhee lana) Mera dar khula hai khula hee rahega....(provided gifts lana aap na bhoolen.)