BEJNIETNA 159 - April 2009

Il-Kelma tal-Arċipriet

Kemm nixtieq!

 

Dan ix-xahar, jekk Alla jrid, nerġgħu niċċelebraw il-Festa l-kbira tar-reliġjon tagħna. Kif qalulna l-isqfijiet tagħna fil-pastorali tar-Randan, suppost li għamilna l-erbgħin ġurnata tar-Randan nippreparaw qalbna ħalli ma’ Ġesu’ ngħaddu aħna wkoll mill-passjoni u l-mewt tiegħu.

Iż-żmien tar-Randan huwa żmien ta’ penitenza u rebħ tagħna nfusna biex nitgħallmu ngħixu aħjar il-ħajja nisranija tagħna. Dan jidher mis-simboli li jintużaw waqt il-liturġija: il-kulur vjola, l-irmied, l-eżerċizzi u li nisimgħu aktar il-Kelma t’Alla, il-penitenza li nagħmlu b’mod personali, eċċ.

Imma għalina l-qriema huwa wkoll żmien ta’ stennija biex niċċelebraw il-Passjoni, l-Mewt u l-Qawmien ta’ Ġesu’ permezz tal-purċissjonijiet sbieħ li nagħmlu. U hawn irridu nieqfu u naħsbu.

Kemm nixtieq li kull min jiġi r-raħal f’Ħamis ix-Xirka, l-Ġimgħa l-Kbira u fl-Għid jgħid kemm għandna organizzazzjoni u kemm il-qriema jagħmlu l-purċissjoni minn qalbhom! Kemm nixtieq li jgħid kemm għandna knisja sabiħa!

Kemm nixtieq li kull min jiġi Ħal Qormi għall-purċissjonijiet jinduna kemm aħna nagħmluha mill-qalb! Nixtieqhom jgħidu, “Kemm jidħlu fiha! Verament jagħmluha minn qalbhom!”

Imma nixtieq ukoll li jgħid li meta rana għaddejjin mit-toroq bl-istatwi ra fina lil Ġesu’ ħaj qed ibati għalina!

Nixtieq li jmorru jgħidu li matul it-Tlett Ijiem Imqaddsa, f’Ħal Qormi qisu jkun hemm Ġesu’ qed jerġa’ jgħaddi mill-passjoni, l-mewt u l-qawmien tiegħu.

Jiena hekk inħares lejhom l-purċissjonijiet tagħna – il-Vanġelu permezz tal-istatwi u l-personaġġi. Hawn min l-istorja ta’ Ġesu’ kitibha u dak li kiteb insejħulu Vanġelu u hekk hu. U hawn min joħroġ il-vari tat-tbatija u tar-rebħa ta’ Ġesu’ u l-persunaġġi mat-toroq u dak ukoll insejħulu Vanġelu. U hekk għandu jkun.

Ifraħ għax lilek Ġesu’ wasslek biex ixxandar il-Vanġelu b’dan il-mod. Inti u tieħu sehem jew inti u qed tara l-purċissjonijiet tal-Ġimgħa l-Kbira u tal-Għid il-Kbir, ftakar li inti wkoll qed twassal l-Aħbar it-Tajba tal-imħabba ta’ Ġesu’ lejna l-midinbin.

Min jaf jekk hemmx xi ħadd fuq il-bankina li Ġesu’ jista’ jmisslu qalbu għax jara lilek tieħu sehem b’devozzjoni?

 

 

MILL-ĦAJJA TAL-KOMUNITA TAGĦNA - AVVIŻI

Il-Ħamis 2:         9.30 am laqgħa tal-Mother and Baby Club fiċ-Ċentru.

 

Il-Ġimgħa 3:       Festa tad-Duluri ta’ Ommna Marija Santissima.

                          Fil-11.00 am issir quddiesa għat-tfal tal-iskejjel.

                          Fil-5.00 pm issir quddiesa u wara toħroġ il-purċissjoni bl-istatwa tad-Duluri. Kif tidħol il-purċissjoni, għall-ħabta tas-7.00 pm, issir quddiesa kantata.

                          Fiċ-Ċelebrazzjonijiet ta’ matul dan iż-żmien tant speċjali, jieħu sehem il-Kor tal-Parroċċa ‘Exsultate Domino’.

 

Il-Ħadd 5:          Ħadd il-Palm u l-Passjoni tal-Mulej.   Messalin B: Paġna 172

                          Fid-9.00 am tberik taż-żebbuġ fil-Knisja ta’ Santa Marija Fuq Tal-Blat u wara purċissjoni sal-Knisja Parrokkjali u quddiesa.

                          Wara l-quddiesa tal-5.00 pm ssir il-Festa tal-Via Sagra permezz ta’ meditazzjoni fuq il-Passjoni ta’ Ġesu’.

 

It-Tnejn 6:          It-Tnejn tal-Ġimgħa Mqaddsa.

                          Fis-7.00 pm fil-Knisja ssir laqgħa ta’ talb u kontemplazzjoni fuq Kristu Msallab.

                          5.00 pm laqgħa għall-persuni b’diżabilita’ fiċ-Ċentru.

 

It-Tlieta 7:          It-Tlieta tal-Ġimgħa Mqaddsa.

                          Fis-7.00 pm Via Sagra ‘Ikun li Trid Int’, immexxija mill-Grufan.

 

L-Erbgħa 8:        L-Erbgħa tal-Ġimgħa Mqaddsa.

                          Wara l-quddiesa tas-6.00 pm, issir il-Via Sagra u wara purċissjoni u benedizzjoni bir-relikwija tas-Salib Imqaddes.

 

Il-Ħamis 9:         Ħamis ix-Xirka.   Messalin B: Paġna 204

                          Niċċelebraw it-twaqqif tas-Saċerdozju u tal-Ewkaristija. Fil-għodu l-Knisja tkun magħluqa. Is-saċerdoti bħal-lum jingħaqdu flimkien ma’ l-Arċisqof fil-Kon-Kattidral ta’ San Ġwann għall-Quddiesa tal-Griżma li fiha jġeddu l-wegħdiet saċerdotali tagħhom u jitbierku iż-żjut imqaddsa.

                          4.00 pm quddiesa fil-Knisja tal-Vitorja.

                          5.00 pm quddiesa fil-Knisja Parrokkjali.

                          6.30 pm Konċelebrazzjoni Solenni li fiha jsir il-ħasil tar-riġlejn simbolu tal-imħabba u s-servizz li għandu jkollna bejnietna bħala kommunita’. Kif tintemm il-quddiesa ssir il-purċissjoni b’Ġesu’ Ewkaristija lejn l-Artal tal-Adorazzjoni.

                          8.45 pm Visti lil Ġesu’ Ewkaristija. Nistiednu b’mod speċjali lill-fratelli u lil dawk kollha li se jieħdu sehem fil-purċissjoni tal-Ġimgħa l-Kbira.

                          11.00 pm Nishru ma’ Ġesu’ f’Siegħa Adorazzjoni flimkien fl-10.30pm mal-Grupp taż-żgħażagħ ‘Link’.

 

Il-Ġimgħa 10:     Il-Ġimgħa l-Kbira  -  Jum l-Akbar Imħabba.   Messalin B: Paġna 211

                          Fis-6.00 am, 7.00 am, 8.00 am u 9.00 am, visti flimkien. Nixtiequ li kemm jista’ jkun il-visti jsiru flimkien f’dawn il-ħinijiet.

                          3.00 pm Ċelebrazzjoni tal-Passjoni u l-Mewt ta’ Ġesu’  -  Qari tal-Passjoni ta’ Ġesu’ skond San Ġwann; it-Talb tal-Kommunita’; l-Adorazzjoni tas-Salib u t-Tqarbin.

                          5.30 pm tibda l-Purċissjoni tal-Ġimgħa l-Kbira li tfakkarna minn dak li għadda Ġesu’ għall-imħabba tagħna.

 

Is-Sibt 11:          Sibt il-Għid.

                          5.00 pm jibda l-qrar fil-Knisja Parrokkjali.

                          8.00 pm Quddiesa tal-Vġili tal-Għid li fiha naraw l-Istorja tas-Salvazzjoni, jiġifieri dak li għamel Alla ma’ missirijietna u magħna.  Messalin B: Paġna 232

                          Min jixtieq jista’ jixtri xemgħa mill-Knisja stess.

 

Il-Ħadd 12:        L-Għid il-Kbir.   Messalin B: Paġna 271

                          Quddies fis-6.00 am, 7.00 am, 8.00 am u fid-9.30 am.

                          9.00 am Purċissjoni ta’ Kristu Rxoxt. Meta tasal ħdejn il-Knisja tal-Vitorja, jsir it-tberik tat-tfal bil-figolli.

                          5.00 pm Quddiesa Solenni tal-Għid il-Kbir.

 

It-Tnejn 13:        Illum tibda l-Ottava tal-Għid.

                          Jibda t-tberik tal-familji skond il-programm. (ara l-programm).

 

L-Erbgħa 15:      9.30 am inżuru lil ħutna anzjani f’San Vinċenz.

Il-Ħamis16:        Wara l-quddiesa tal-4.30 pm tingħata l-Barka Sagramentali.

                          9.30 am coffee-morning b’risq il-Knisja.

                          9.30 am laqgħa tal-Mother and Baby Club fiċ-Ċentru.

 

Il-Ħadd 19:        It-2 Ħadd tal-Għid tas-Sena B.   Messalin B: Paġna 279

                          Fil-11.30 am issir il-quddiesa tal-Magħmudija.

                          Fl-4.30 pm quddiesa fil-Kappella tal-Ħlas bil-preżentazzjoni tat-trabi.

 

It-Tlieta 21:        9.30 am irtir għan-nisa u xebbiet għand is-sorijiet Franġiskani.

 

Il-Ħamis 23:       Solennita’ tal-Patrun tagħna San Ġorġ.

                          Fis-6.30 pm Quddiesa Solenni, Kurunella, Innu, Antifona u Barka Sagramentali.

 

Il-Ħadd 26:        It-3 Ħadd tal-Għid tas-Sena B. Messalin B: Paġna 284

                          Illum ukoll ikun iċċelebrat Jum il-Karita’. Il-ġbir kollu li jsir fil-knejjes imur

                          għall-istituti ta’ karita’ li għandha l-Knisja f’Malta.

 

It-Tnejn 27:        Mons. Arċisqof se jagħti l-Ministeru tal-Lettorat lil ħames seminaristi fosthom

                          Rene’ Cilia mill-parroċċa tagħna. Iċ-ċelebrazzjoni ssir fil-Knisja Parrokkjali.

Jonathan Spiteri ma’ Desiree’ Mangion (10 ta’ Frar)

 

 

• Lura għal Paġna 'Mill-Ħajja tal-Komunita Tagħna - Avviżi'

·          Lura għal Paġna Prinċipali

15-03-2009