Maronè Matthee
Eg-skeiding
Lyf het mos van kop geskei,
weerskant van draad staan hul en wei.
Kop hier, lyf dóér,
met af-en-toe 'n koekeloer.
Kop kan lyf nie meer gebied,
'n lasbrief het kontak verbied.
Maar kop sal lyf verlei, ek weet,
en sal hul weer één graspol vreet.
Maronè Matthee
Jy
in elke woordval,
tussen elke komma,
sien ek jou
gekamoefleer deur metafore
omarm deur rym
jou oë gekleur met balpunt ink
jou gelaat vermom op kladpapier
'n verkleurmannetjie
tussen reënboogwoorde
tog onmiskenbaar
jy
Maronè Matthee