Primitiva Muñoz

Click here to listen to Primitiva.

Hermanos, ñoqa parlamuykichis kay kasetninta. Qankunaman saludamuykichis, tukuy kay Betanzospi llank'arqankichis, chay enteroman: Hermano Meier, Adkins, Rosenvall, Runi, Esloan, Larkin, Eduardosman, Cavenderman. Tukuy qankunaman saludamuykichis entero familiaykichisman, tataykichisman, mamaykichisman. Y kunan kay p'unchaypi saludamuykichis entero familiaman, hermanitosniykichisman, hermanitasniykichisman, q'ala qankuna, tukuy familiaman.

Y munani ñoqa kay kasetninta parlarimpuyta. Agradeceyki, agradeceykichis hermanos tukuy qankunata kay p'unchaykunaspi kay cheqa inglesiata rejsichiwasqaykumanta. Agradeceykupuni, agradeceykichispuni astawampis kay cheqa evangeliota kay llajtaman chayachimusqaykichismanta. Kunan kay religiompi kaspamanta may kususisqa kani, kay cheqa inglesiapi tarikuspa. Agradeceni tukuy qankunata, jinaspistaj Dios Tatanchistawan, Wawan Jesucristotawan.

Y ñoqayku rerqayku temploman iskayniyku qhari-warmi y Mirianintin, rejserqankichis chay wawitayta mayorcita Mirian Muñoz. Y pay kunan kashan tawa watanmanña rishan. Y kunan kay sullk'a kaj wawaytaj Nefi Muñoz siete mesesniyojña. Y ñoqayku rerqayku temploman Mirianwan ima. Kinsantiyku sellakamoj rerqayku. Y ñoqa manchay kusisqa karqani templopi. Y manchay ñoqa kusisqa tarikorqani jaqay templopi.

Arí hermanos, kunan willamusqaykichis. Kunan temploman rerqayku, chaykunaspipis pruebasta reciberqayku pero mana urmarqaykuchu. Astawampis tukuy pruebasta atiparqayku imaraykuchus Señorninchis nisqanman jina tukuy ima pruebasta atipasun niwanchis. Chayrayku atiparqayku ni ima juchaman urmaspa. Tukuy ima juchasta atipaspa purerqayku y pruebastapis atipaspa purerqayku. Y chaywampis tukuy sonqo templopiña jaqay tarikorqayku y manchay gustawarqa. Jaqaypi ma piensarqanichu, ma yuyarqanichu jampuyta, kutimpuy kay llajtaman. Munarqani quedakapuyta. Manchay gustawarqa imaraykupichus Señorninchispa wasinta rikuspa manchay sonqoy t'ikarerqa. Manchay kusisqa tarikorqani jaqaypi, como si fuera tukuy familiaywan tinkapuyman jina karqani templopi. Chayrayku manchay kusisqa karqani.

Chaywampis ñoqa parlamushani Prima y tarikuni Betanzos llajtapi tukuy familiasniywan: iskaynin wawasniywan, mamaywan, suegraywan, suegroywan, tukuy Muñoznintin entero. Y allin tiyakushayku, sanus.

Y qankunata kay chhika unay mana rikuspa phutiykuykichis. Manchay sonqoy nanawan. Y munani ujtawan tinkuyta. Mayk'ajchus tinkusunchis. Mana ni kaypi tinkusun chayqa, janaj pachallapiñachá.

Kunan parlamuyta munaykichis Hermano Muchhumanta. Kaypi tarikuyku paywan kay Betanzos llajtapi. Manchay kusisqa kani Hermano Muchhuwan tinkorqospa, uyan rikorqospa. Piensani jinamanta entero qankunawan tinkuspa, jinapi paywan tinkuspa. Y chantapis kunan kay hermano diariu tinkullashayku kay hermanowan. Kaypi kashan patapi, Paulinoj wasimpi. Y chaymanta traducishanku, traducishanku Felikisnintin diariu. Quechua palabrasnin tijrashanku Castellanomanta. Manchay fuerteta llank'ashanku. Manchay kusisqa kani chaymanta jinaspistaj.

Tukuchanaypay ñoqa willay munaykichis kay inglesiamanta testimonioyta. Yachani ñoqa tukuy sonqoywan kay inglesia cheqa kasqanta, verdadera kasqanta. Yachani Dios Tatanchis, Jesucristo Wawanwan kawsasqanta. Tukuy sonqoywan jinaspistaj yachallanitaj Santu Espiritu kasqanta. Jinaspistaj yachallanitaj profeta kawsasqanta. Y primero kay inglesianchis restauraj profeta José Esmit. Chaymanta kunitan mismo kawsakushan Espencer Kimball. Chay profestanchis Diosninchismanta yachachij, sut'inchaj palabrasninta. Yachani tukuy sonqoywan kay cheqan religion kasqanta. Astawampis yachani cheqa inglesia kasqanmanta. Tukuy sonqoywan kusisqa tarikuni kay inglesiapi kaspa. Ni imamanta phutikuspa manchay kusisqa kani kay inglesiapi. Yachanipuni doce apostoles ima kasqanmanta kay inglesiapi. Chayllata nimuykichis Señor Jesucristoj sutimpi. Amén.

03/09/2000