Lejn l-aħħar tas-sena 2003 ġew ippublikati d-Dokumenti tas-Sinodu Djoċesan, ġabra ta' dak li nħaseb, ġie magħrbel, diskuss u miktub tul medda ta' żmien u b'parteċipazzjoni daqshekk kbira.  Il-Knisja f'Malta u kull min ħadem biex is-Sinodu jasal għal dokumenti li jagħtu direzzjoni pastorali lill-ħidma tal-Knisja f'Malta jittamaw li dak li hemm miktub fihom issa jitwettaq.

Fost il-proposti li diġa twettqu nsibu dan li ġej:

IT-TWAQQIF TAL-KUMMISSJONI ĠUSTIZZJA U PAĊI (ara Dok. Djakonija u Ġustizzja nr. 37) bl-iskop li tkabbar l-għarfien tat-tagħlim soċjali tal-Knisja u li tagħti kontribut ħaj fid-dawl ta' l-iżviluppi ekonomiċi, soċjali u legislattivi tal-pajjiż;

IT-TWAQQIF TAL-KUMMISSJONI DJOĊESANA FAMILJA (ara Dok. Żwieġ u Familja nr. 45) b'membri ġodda li jirriflettu oqsma differenti tal-ħajja fil-familja;

IT-TWAQQIF TAL-KUMMISSJONI AMBJENT (ara Dok. Kultura-Soċjetà-Knisja nr. 53) biex fost oħrajn tkattar l-għarfien, is-sensibbilità u l-edukazzjoni dwar l-ambjent, speċjalment fid-dawl tal-Kelma t'Alla u tat-tagħlim soċjali tal-Knisja.   Barra dan trid tfassal policy gwida dwar l-ambjent, kemm għal min għandu responsabilità fl-istituzzjonijiet kollha tal-Knisja kif ukoll għal kull nisrani;

IT-TWAQQIF TAL-KUMMISSJONI IMPLEMENTAZZJONI TAS-SINODU (ara Dok. Viżjoni ta' Knisja Komunjoni nr. 54) għall-implementazzjoni tad-deċiżjonijiet pastorali tas-Sinodu;

TWAQQIF TAL-GRUPPI FL-OQSMA DIFFERENTI TAL-KNISJA F'MALTA bħall-parroċċi, il-kongregazzjonijiet ta' ħajja konsagrata, l-għaqdiet u l-movimenti u l-iskejjel li wasslu biex kull parroċċa f'Malta fasslet pjan pastorali għal sena;

TWAQQIF TA' STRUTTURI TA' UNITAJIET PASTORALI U DISTRETTI (ara Dok. Vizjoni ta' Knisja Komunjoni nr. 19) biex jittieħdu diversi inizzjattivi mill-parroċċi biex jaħdmu aktar flimkien;

DEĊIŻJONI LI TOGĦLA L-ETÀ TAL-GRIŻMA (ARA Dok. Liturġija u Sagramenti nr. 30 u Dok. Xandir tal-Kelma nr. 15), deċiżjoni mħabbra ftit ta' żmien ilu.

Dawn huma xi ftit eżempji li juru kif is-Sinodu qed jitwettaq.  Id-Dokumenti tas-Sinodu jagħtu wkoll valuri mportanti ta' ispirazzjoni għall-ħajja nisranija li wieħed għandu jgħix u li kultant jitolbu "bidla fil-qalb".   Huwa diffiċli li wieħed ikejjel it-twettiq imma bl-attitudni sinċiera ta' kull wieħed u waħda minna, żgur li naslu biex iseħħ dak li ġie propost wara tant studju u diskussjoni li finalment ġie approvat mill-Arċisqof.

Tajjeb li wieħed jara l-attitudnijiet li jistgħu jgħinu jew ifixklu t-twettiq tad-Dokumenti tas-Sinodu:

Dak li jgħin:

Kollaborazzjoni: "jien lest li naħdem ma' ħaddieħor";

Inkoraġġiment għat-tajjeb: "fejn saret jew issir xi ħaġa tajba, jien lest li ninkoraġġiha bil-fatti";

Konverżjoni tal-qalb: "fejn hi meħtieġa bidla għall-aħjar, ukoll jekk tfisser sagrifiċċju, jien nidħol għaliha";

Impenn: "jien lest li nagħti s-sehem tiegħi b'mod sħiħ u ma nfarfarx fuq ħaddieħor";

Ħeġġa: "nitħeġġeġ jien biex nimla lil ħaddieħor b'entużjażmu ġdid".

Dak li jfixkel:

Sfiduċja: " u iva, ħafna paroli u ma jinbidel xejn";

Qtigħ ta' Qalb: "dan kollu sforz kbir li m'hu se jiswa xejn";

Status Quo: "dejjem hekk għamilna - mhux aħjar nibqgħu kif aħna!";

Indifferenza: "jagħmlu huma!";

Individwaliżmu:  "jien nimxi għal rasi, għax hekk l-aħjar".

Naturalment l-attitudnijiet ħadd ma jista jinfurzahom.  Joħorġu mill-qalb tal-bniedem, minn fejn joħroġ ħafna tajjeb u jista' joħroġ ukoll ħafna ħażin.   L-isfida f'dan iż-żmien ta' tiġdid għall-Knisja f'Malta, hi li kull nisrani ma jintrikibx minn attitudnijiet li jfixklu, imma li jiġġedded fl-ispirtu ta' mħabba u solidarjetà biex ikun jista' permezz ta' djalogu sinċier jagħti s-seħem tiegħu biex jitwettaq fil-prattika dak kollu li hemm propost fid-Dokumenti tas-Sinodu.