Din hi l-ewwel okkażjoni tiegħi li ġejt mitlub nikteb dwar il-festa ta' Kristu Re li saret f'Raħal Ġdid nhar il-Ħadd 25 ta' Lulju 2004.

L-ewwel nett nixtieq li nintroduċi ruħi.  Ġejt stazzjonat f'dan id-Distrett f'Novembru 2003 u din kienet l-ewwel darba f'40 sena servizz fil-Korp tal-Pulizija li kelli nieħu sehem dirett fl-organizzazjoni ta' din il-festa.   Xi żmien wara li bdejt il-ħidma tiegħi fostkom kont ġejt avviċinat mill-Kappillan tal-Parroċċa, Dun Noel Vassallo, biex norganizzaw laqgħat mal-partijiet kollha nteressati fl-organizzazjoni tal-festa.  Iltqajna mal-Kumitat tal-Festa u mal-Kumitati taż-żewġ Każini tal-Banda biex nirranġaw xi differenzi li seta' kien hemm bejn il-partijiet konċernati.

Wara diversi laqgħat li saru f'atmosfera kordjali ntlaħaq ftehim bejn il-partijiet kollha bl-iskop uniku li l-festa tkun qima għal Kristu Re u mhux okkażjoni ta' xi xorta ta' pika bejn naħa jew oħra.

Ir-riżultat  kien is-suċċess li ntlaħaq matul iċ-ċelebrazzjonijiet tal-festa speċjalment waqt it-tlugħ fuq il-kolonna ta' l-istatwa ta' Kristu Re il-Ġimgħa filgħaxija.   Fil-bidu nħasset xi ftit ta' tenzjoni, iżda fl-aħħar il-partijiet kollha spiċċaw ikantaw flimkien 'Viva Kristu Re' u 'Viva l-Pawlisti'.   Hekk għandu jkun l-ispirtu tal-Festa Titulari - ċelebrazzjoni f'għaqda waħda fejn il-Pawlisti jfaħħru lil Kristu Re patrun tal-Parroċċa u ta' Raħal Ġdid.

Nisperaw li fil-futur dak li għamilna din is-sena jkompli jitkattar biex ikollna festa denja ta' din il-Belt li sservi ta' eżempju ta' għaqda kollettiva għal bliet u rħula oħra madwar Malta u Għawdex.

Qabel nagħlaq dan il-kumment nixtieq nirringrazzja lil kull min b'xi mod kellu sehem fl-organizzazjoni tal-festa ta' din is-sena.   Fost dawn hemm il-Kappillan tal-Parroċċa u l-Kumitat tal-Festa; Is-Sindku u l-Kunsilliera tal-Kunsill Lokali Paola; Il-Presidenti u l-Kumitati tas-Soċjetà Filarmonika G.M. Fra Antoine de Paule u ta' l-Għaqda Soċjali Mużikali Kristu Sultan; il-Każini Politiċi tal-Partit Nazzjonalista u dak tal-Malta Labour Party; il-Kumitat tal-Hibernians F.C. u lista kbira ta' nies oħra li għalkemm ma humiex parti minn xi Għaqda jew Każin għamlu l-parti tagħhom flimkien mar-residenti kollha tal-lokal biex intlaħaq dan is-suċċess.   Nispera li ma nsejt lil ħadd f'din il-lista ta' nies li kollettivament ħdimna flimkien biex nilħqu l-għan ewlieni tagħna.   Nagħlaq billi nirringrazzja wkoll lill-Uffiċjali u l-Membri kollha tal-Korp tal-Pulizija stazzjonati fl-Għassa ta' Raħal Ġdid għall-ħidma tagħhom waqt il-festa ta' Kristu Re.