Naħseb li kulħadd jaqbel miegħi li din is-sena kienet waħda vera mpenjattiva, mhux biss għax kien hemm l-elezzjonijiet tal-Kunsill, imma wkoll f'dak fejn tidħol il-festa titulari ta' Kristu Re.

L-iskop prinċipali tagħna kien li, bil-kollaborazzjoni ta' kulħadd, permezz ta' komunikazzjoni diretta, nżidu l-parteċipazzjoni ta' kull għaqda u ta' kull ċittadin li verament għandhu l-interess tal-lokal u l-festa, mingħajr ma nidħlu f'piki esaġerati.

Il-festa qed tieħu xejra differenti mis-snin ta' qabel.  Dan minħabba l-fatt li matul l-aħħar snin, il-parroċċa għandha l-vara tat-Titular, u għalhekk il-festa kull ma tmur qegħda tinbidel.

Qegħdin nitgħallmu mill-iżbalji ta' snin preċedenti u, bil-koperazzjoni ta' kulħadd, qegħdin nirbħuhom.  Il-laqgħat li saru matul is-sena ma' l-għaqdiet konċernati ħallew il-frott mixtieq.   Għad hemm ħafna xi jsir u rridu nkomplu nitkellmu ħalli, bi pjan serju, naslu biex ikollna waħda mill-isbaħ festi ġewwa pajjiżna.

Innutajt li din is-sena kien hemm aktar parteċipazzjoni mir-residenti f'dawk li huma funzjonijiet liturġiċi.  Dan juri kemm għandhom għal qalbhom il-festa l-Pawlisti u li jawgura lil min jorganiżża aktar ħidma għall-gejjieni.

Naħseb li kien hemm ħafna affarijiet li marru tajjeb, però jien dejjem emmint li kulħadd għandu dritt għall-partiċipazzjoni f'kull attività tal-festa. Fis-snin li ġejjin, għandna naħdmu bis-sħiħ biex inneħħu dawk il-ftit differenzi li għad hemm u naħdmu biss biex il-festa tkompli tikber u ssaħħaħ l-għaqda fostna.

Tieħu gost tara ħafna żgħażagħ jipparteċipaw fl-armar u f'diversi attivitajiet oħra.  Dawn iż-żgħażagħ ħaqqhom veru prosit għax-xogħol li jagħmlu matul is-sena kollha.  Veru jistħoqqilhom l-apprezzament tal-lokal kollu.

Jien dejjem ħassejt li min għandu ċerta età għandu l-obbligu li jara li dak li jeżisti llum, irrid itejbu għal ta' warajh.  Għalhekk ħafna minna għandna nkomplu nibnu fuq dak li hemm ħalli ż-żgħażagħ tagħna jkollhom il-festa garantita, kemm għalihom, kif ukoll għal uliedhom.

Naħseb li ma tkunx ħaġa sewwa li nagħlaq u ma nsellimx lil dawk kollha li jaħdmu wara l-kwinti biex l-festa tagħna tkompli tisbieħ, speċjalment lill-Kumitat tal-Festa u l-Korp tal-Pulizija.  Dawn ta' l-aħħar kienu strumentali fit-tmexxija tal-bon ordni u t-traffiku.

Insellmilkom.