L-Ordni  Sagri  (Is-Saċerdozju)

Ir-Reliġjonijiet kollha għandhom xi xorta ta' Saċerdozju. Jista' jissejjah Patrijarka, Sultan, Saħħar, Shaman, Iman, jew bniedem mediku.  Dawn  huma  kollha  magħżulin  mill-allat  jew  minn  xi ħadd li jifhem il-misteri moħbija ta' l-allat.   Is-saċerdozju Lhudi kien mwaqqaf minn Alla nnifsu meta dan talab lil Mosè biex jordna lil ħuh Aaron u lid-dixxendenti tiegħu maskili.   Fl-Aħħar  Ċena Ġesù waqqaf is-Saċerdozju tal-Liġi l-Ġdida.  Hekk seħħet il-profezija ta' Eżekiel (Eż Kap. 34), li bassar li Alla nnifsu għandu jkun l-uniku u l-veru Ragħaj.    Il-mewt fuq is-Salib kienet il-final tas-Sagrifiċċju Divin.   Meta t-tempju ta' Ġerusalem kien meqrud, daqstant ieħor inqered ukoll is-saċerdozju Lhudi. Ġesù għażel bħala l-ewwel saċerdoti tiegħu tnax-il bniedem ordinarju, fosthom erba' sajjieda u kollettur tat-taxxa.

Ġesù offra l-aqwa sagrifiċċju fuq is-Salib u kien waqt l-Aħħar Ċena li ordna lid-dixxipli tiegħu jkomplu jagħmlu dan.  L-Aħħar Ċena, il-Mewt fuq is-Salib u l-Quddiesa huma ħaġa waħda. Ġesù ma waqqafx is-Saċerdozju fuq dak ta' Aaron, imma fuq dak ta' Melkisedek li offra l-ħobż u l-inbid bħala sagrifiċċju.

Is-sagriffiċċji dejjem jinvolvu li jkun hemm qtil u distruzzjoni tal-vittma.  Dawn kienu jsiru biex il-bniedem jogħġob lill-allat jew  biex tintalab l-għajnuna tagħhom; inkella għall-maħfra ta' dnubiet nazzjonali jew individwali.

Is-Saċerdozju nisrani huwa sejħa speċjali minn Ġesù Kristu.   Ħadd ma jista' jsir Saċerdot jekk ma jsejjaħlux Kristu.   Hemm min jaċċetta din l-istedina u min  ma jaċċettax minħabba flus jew xi ħaġa li toffri d-dinja.   Jista' jkun hemm min jitlob il-vokazzjoni li ma tiġix aċċettata minn Kristu.

Għad hawn bżonn tas-Saċerdoti illum il-ġurnata? Iva. Irridu nifhmu li mingħajr is-Saċerdot ma jkunx hemm l-Ewkaristija li mingħajrha ma jkunx hemm Knisja Kattolika.  L-Ewkaristija hija l-qalb u r-ruħ tal-Knisja Kattolika.

L-Ewkaristija

L-ommijiet malajr jgħidulek li tarbija tkun trid iddaħħal f'ħalqha kull ma tara. It-trabi jużaw is-sens tat-togħma biex jidraw x'hemm madwarhom.   L-omm turi l-imħabba tagħha lejn it-tarbija wkoll permezz ta' din il-fakultà.  Mhux ta' b'xejn li Ġesù tana ġismu stess biex nieklu u demmu biex nixorbu.   Meta hu qal lil dawk ta' quddiemu (Ġwanni Kap. 6) biex jagħmlu dan, ħafna ma emmnux dak li kien qed jgħid u qabdu u telqu.   Meta Ġesù sab ruħhu waħdu ma' l-Appostli staqsiehom jekk riedux jitilqu huma wkoll.

Grazzi għal dak li wieġbu Pietru, ħadd minnhom ma telaq.  San Pawl wissa' lill-Korintin li jekk ma jagħmlux distinzjoni bejn biċċa ħobż u l-Ġisem ta' Kristu jkunu qed jissugraw li jitilfu ruħhom u jkunu ħatja tal-ħajja ta' Kristu jekk jieklu Ġismu bid-dnub.

San Tumas Akwinu jgħidilna li "Dak  li  ma  nifhmux bis-sensi tagħna, għandna naċċettawh permezz tal-fidi."   Studjużi medjovali jfakkruna li għalkemm ħafna affarijiet jidhru l-istess ħaġa, s-sustanza tagħhom tkun differenti.   It-Teorija Quantum tikkonferma dan.   Xjenzjati moderni skoprew li kull ma hawn fid-dinja madwarna hu kompost minn ċelloli inviżibli u misterjużi li huma stess mhux kapaċi jispjegaw.  Dan il-fenominu ta bidu għall-eżistenza tal-pjaneti, l-istilel, il-baħar, il-ġisem tal-bniedem, is-siġar u lil dak kollu li jinsab fl-univers.  Għaldaqstant m'għandux ikun diffiċli għan-nisrani li jemmen li bl-istess mod Ġesù juża s-sustanza tal-ħobż u l-inbid biex jibdilhom f'ġismu u f'demmu u b'hekk isiru l-persuna tiegħu.

Fl-imħabba tiegħu Ġesù jibdilna għal ftit minuti f'tabernaklu ħaj bih ġo fina, bħal ma kien f'ġuf ommu, misteru ta' fidi kbir li lanqas l-istess Luteru ma ċaħad. "Dan hu ġismi, Dan hu demmi."   Din hi bħal dik id-dikjarazzjoni li Alla għamel lil Mosè f'ħuġġieġa nar qalb l-għollieq "Jiena Hu, Jiena Neżisti, Jiena Ħaj."   Ġesù żied juri li l-ġisem u d-demm huma tiegħu nnifsu biex jemfasiżża li fl-Ewkaristija hu ma hux biss bniedem, imma wkoll Alla.

Imberkin huma dawk li mingħajr ma jaraw ix-xbiha ta' Ġesù jemmnu li qed jirċievuh ġo fihom.   L-Ewkaristija hija r-ruħ tal-Knisja Kattolika.   Tressaqna lejn il-ħajja ta' dejjem għax hi l-ikel spiritwali tagħna.  F'dinja kkomplikata mimlija gwerra, terrur u mibegħda, Ġesù fl-Ewkaristija jibqa' jirrenja bħala l-Prinċep Ewlieni tal-Paċi.