Għalkemm jiena wkoll bniedem midneb xorta ħassejt il-bżonn li nikkummenta dwar din l-imġieba li tinkwieta lil kull min hu serju, kemm jekk hu raġel u anke jekk hi mara.    Bqajt  mistgħaġeb  kemm  dan  l-aħħar  ġranet  smajt nies inkwetati bis-serjetà bil-ħsara li qed tiġri bid-diżonetà.    Il-ħażin jibqa' ħażin mhux għaliex xi nies huma konservattivi jew antiki iżjed minn oħrajn, iżda għaliex in-natura fil-bniedem baqgħet dik li kienet u l-persuna ta' sess differenti  tibqa'  dejjem   tattira  lil  bniedem  speċjalment   meta mġieba   partikulari  kienet  u  baqgħet   ħażina  u  taffetwa ħażin minn fejn tgħaddi għalkemm mhux bl-istess mod.

Hemm bżonn li kulħadd jerfa' r-responsabilità tiegħu.   Ma naqbel xejn ma dawk li jgħidu li għandhom il-libertà li jilbsu  kif  iridu  u  ħaddieħor  għandu  jagħmel  ħiltu biex ma jħarisx.  Filwaqt li dan l-aħħar qiegħdin jittieħdu diversi miżuri marbutin mat-tipjip u ħarsien ambjentali, jien nħoss li kull nisrani għandu jħares lejn ir-responsabilità u jgħin u jħobb lil dawk li għandu madwaru u mhux itellef jew jikkundizjona l-libertà ta' ħaddieħor.  Ma naħsibx li wieħed għandu jistenna li jkun hemm liġijiet biex joqgħod attent x'jagħmel, iżda kull nisrani huwa dejjem obbligat li jifforma ruħu  biex  ikompli  jitgħallem  dwar  dak  li  huwa  ħażin  u jagħmel ħsara anke jekk hu jaħseb li dan m'għadux ħażin.   Mhux kull  moda hija tajba. Mhux għax ħafna jagħmlu hekk ifisser li nista nagħmel  hekk  jien  ukoll.

Niftakru li quddiem Alla kulħadd huwa responsabbli ta'  għemilu.