F'Raħal
Ġdid hawn bosta nies li matul il-ħajja tagħhom għaddew
minn avventuri uniċi, storiċi,
patrijottiċi u li dwar l-atti ta' eroj li wettqu ftit li xejn
nafu. Dan l-aħħar kellna
x-xorti li niltaqgħu ma' Paul
Camilleri ta' 83 sena, li b'entużjażmu kbir irrakontalna minn
xhiex għadda matul it-Tieni Gwerra Dinjija meta kien iservi fin-Navy Ingliża u dik Pollakka.
Paul
Camilleri ilu joqgħod f'Raħal Ġdid mill-1964. Twieled ir-Rabat fil-5 ta' Frar 1921,
iben Eugenio u Katarina Bonello fost sitt ulied li ħamsa minnhom għadhom
mimlijin bil-għomor. Hu
żżewweġ fl-1946 lil Tilda Busuttil u kellhom tifel u 3
bniet, kollha miżżewwġin.
Paul, ilu armel għal dawn l-aħħar 14 il-sena. Hu
nannu ta' ħdax. Fi tfulitu
attenda l-iskola primarja tal-Gvern u fl-1939, wara żmien jaħdem f'lukanda f'Għajn
Tuffieħa, daħal fin-Navy
Ngliża bħala Assistant
Steward.
Paul ġej
minn familja li kellhom rabta sew man-Navy
Ngliża u kienu ż-żijiet li ħajruh jagħmel l-għażla
tiegħu li kif qalilna qatt ma
ddispjaċih li għamilha minkejja
l-perikli kbar li għadda
minnhom. Wara kors qasir f'HMS St Angelo sab ruħu fuq id-destroyer HMS Cossack flimkien ma'
sitt Maltin oħra. Fl-ewwel vjaġġ,
waqt li kienu f'Alexandria, faqqgħet il-Gwerra u ntbagħtu jeskortaw
convoy lejn Malta. Wara sagħtejn leave fuq l-art f'Malta, sbarkaw għall-Ingilterra. Wara re-fit fid-dock ta'
Portland ġew assenjati xogħol ta'
pattroljar fin-North Sea u l-ewwel lejl ħabtu ma' vapur
merkantili. L-HMS Cossack ġarrbet ħsarat kbar fejn mietu ħamsa
mill-ekwipaġġ. Wara
t-tiswijiet meħtieġa fl-Iskozja, l-HMS Cossack kompliet bil-patrolling fin-North Sea u teskorta l-convoys lejn in-Norveġja u lejn
ir-Russja.
Matul
is-sentejn fuq l-HMS Cossack,
Paul għadda minn ħafna esperjenzi
koroh bħal
maltempati kbar u
battalji feroċi fuq
il-baħar u mill-ajru. Jiftakar
il-famuż attakk fuq l-armed auxillary ship Ġermaniż
l-Altmark, fejn il-Cossack, fi Frar
1940, salvat għadd ta' priġunieri Ingliżi
mill-ilmijiet inġazzati tal-Josing Fjord fin-Norveġja. Li kieku ma kienx l-intervent tal-Cossack, l-Altmark kienet tispiċċa f'qiegħ il-baħar
bin-nies kollha ta' fuqha, fosthom wieħed Malti.
Paul
iddiskrivilna kif il-Cossack
kellha sehem kbir fl-għarqa ta' disa' destroyers Ġermaniżi fil-battalja ta' Narvik u dik
tal-famuża battleship Ġermaniża Bismarck, bastiment
attrezzat bl-aħħar teknologija u li kien deskritt bħala
“the unsinkable”. Tifkiriet li
żgur Paul qatt ma jista'
jinsa'!!
Paul
jirrakonta wkoll kif f'Lulju 1941 waqt skorta ma' convoy lejn Malta kienu attakkati bl-aktar mod feroċi
mill-ajru. Damu ħamest ijiem sħaħ,
lejl u nhar, action stations u ma
jiklux ħlief galletti u “bully beef”. Dan kien l-istess convoy li l-qawwiet Taljani aktar
tard ippruvaw jeqirdu bl-attakk ta' l-E-Boats
li sar fuq il-Port il-Kbir. Wara
waqfa ta' sagħtejn f'Malta, il-Cossack
salpat lejn l-Ingilterra fejn xahar wara ġiet mgħarrqa mill-għadu. Fortunatament Paul u sħabu l-Maltin
kienu baqgħu Malta bil-leave. Fuq il-Cossack Paul iddistingwa ruħu fil-ħidma u x-xogħol
li wettaq u ta' dan kien, kif jgħidu l-Ingliżi, mentioned in dispatches.
Meta spiċċa
mill-leave ġie trasferit għall-bażi
tas-submarines HMS Talbot f'Lazzarett bħala steward mal-fizzjali Polakki fejn
dam matul il-blitz kollu ta' l-1941-42. It-tifrik u l-ġarr tal-feruti u
l-mejtin ma kienu xejn għal qalbu u voluntarjament issieħeb mal-crew tas-sottomarin Pollakk Sokol li kellu xi ħsarat.
Peress li minħabba l-attakki mill-ajru ma setax jissewwa f'Malta, ħarbu
baxx baxx fuq magna waħda biex jissewwa f'Ġibiltà, jivvjaġġaw
il-ħin kollu f'qiegħ il-baħar ħlief għal xi ftit ħin
bil-lejl. L-esperjenza tal-gwerra
fuq is-Sokol kienet ferm aktar iebsa u movimentata minn dik ta' fuq il-Cossack. Kellhom jissorveljaw il-Baħar
Artiku partikularment għall-battleship
Ġermaniż Tirpitz li kien
qed jistaħba fil-fjordi tan-Norveġja fejn baqa' għax
beża' joħoroġ fl-apert. Mis-Sokol attakkaw bit-torpedoes
diversi sottomarini u bċejjeċ tal-qawwiet navali Ġermaniżi
li ma naqsux milli jirrejaġixxu kontrihom ukoll. Kellhom iħabbtu
wiċċhom ma' maltempati
kbar u attakki
mill-ajru. Riedu jgħaddu
ħafna ħin fid-dlam, bla ebda ħoss f'qiegħ il-baħar
fost il-mines u d-depth charges. Imma l-batteriji riedu jiġu ċċarġjati
u tabilfors kienu jridu jitilgħu għal xi ħin fil-wiċċ,
ġeneralment matul il-lejl.
B'hekk il-ħajja ta' dawk li jgħixu fi spazju mill-aktar
limitat tinbidel totalment għax matul il-lejl irid isir ħafna xogħol
li normalment isir matul il-ġurnata.
Għal Paul u sħabu, dejjem
on the alert jistennew
il-mewt, il-ħajja fis-sottomarin ma kinietx faċli.
Wara
żmien diffiċli fin-North
Sea is-Sokol intbagħat fil-Mediterran u għal darb'oħra
kien stazzjonat f'Malta minn fejn kienu jagħmlu xi patrols fil-kanal ta' bejn Malta u
l-Italja. F'waħda minn dawn
l-operazzjonijiet attakkaw u għarrqu żewġ bastimenti
merkantili u għamlu ħsarat estensivi f'ieħor waqt li
kien ħiereġ minn port taljan. Finalment intbagħtu fil-Lvant
Nofsani fejn ġew stazzjonati f'Beirut. Fl-attakki li għamlu kienu għarrqu
15-il bastiment ta' l-għadu fosthom wieħed anti-submarine
u ieħor E-boat. Meta rritornaw lura f'Malta, fi Frar
1944, Paul kontra qalbu ġie attaċċjat fil-bażi
tas-sottomarin Medway.
Fis-sentejn li
dam fuq is-Sokol, Paul mhux talli sar ħabib kbir
tal-Polakki, imma anki tgħallem sew il-lingwa tagħhom. Hu kien l-uniku Malti fi crew ta' 32. Kien steward
fi kċina zgħira, iżda waqt xi attakk kellu xogħol ieħor
biex jgħin lill-baħrin l-oħra. Barra milli kien jieħu ħsieb
l-apparat li jtella' fil-wiċċ jew iniżżel
is-sottomarin, meta kienu jintużaw il-kanuni xogħolu kien li
jnewwel il-balal. Kienu jgħixu
l-parti kbira ta' ħajjithom fil-dlam, jorqdu matul il-ġurnata u
jaħdmu u jieklu matul il-lejl meta jitilgħu fil-wiċċ. Meta kienu jintlemħu mill-għadu
barra milli jinżlu fil-qiegħ kienu jridu jitfu wkoll il-magni u
lanqas jitkellmu għax kull ħoss kien jinqabad minn fuq.
Paul irċieva diversi unuri
għas-servizzi qalbiena li ta waqt
żminijiet diffiċli. Ġie onorat mill-Gvernijiet ta'
l-Ingilterra u ta' Malta;
mill-awtoritajiet Pollakki u mill-Qawwiet Navali Ngliżi. B'umiltà kbira Paul qalilna li l-Midalji
kollha li ngħata, madwar 15
il-waħda, kien irregalhom lill-War
Museum ta' Malta fejn jinsabu esebiti f'post prominenti fejn wieħed
jista' japprezza sew il-qlubija ta' Paul.
|