|
Il-Magħmudija
Id-Dnub
t'Adam u Eva ma kienx dnub tagħhom biss, iżda ta' l-Umanità
kollha. Tant kien kbir f'għajnejn
Alla li Hu wiegħed li jibgħat lil Ibnu stess kif jidher b'mod ċar
mill-Antik Testment. Ġobb kien
stqarr li "m'hemm l-ebda
bniedem, għandu kemm għandu
żmien, anki ta' ftit siegħat, li hu mingħajr dnub”. David
qalha b'mod ieħor “Fid-dnub nisslitni ommi”. Alla ordna li ssir iċ-Cirkonċiżjoni
mill-irġiel dixxendenti ta' Abraham minħabba t-twemmin primittiv
tagħhom li (a) ir-raġel biss seta' jirriproduċi lilu nnifsu;
(b) il-bidu tal-ħajja jinsab fid-demm u (ċ) it-tixrid tad-demm
ipatti għad-dnub. Iżda Ġesù
qal lil Nikodemu “Il-bniedem irid
jerġa' jitwieled mill-ġdid permezz ta' l-ilma u l-Ispirtu”.
Din hi
t-tifsira ewlenija tal-Magħmudija li litteralment tfisser “tidfen”.
Bl-ilma tal-Magħmudija aħna
nindifnu ma' Kristu u nerġgħu
nieħdu l-ħajja mill-ġdid miegħu. Kuntrarju għal
dak li kulħadd jaħseb, il-Magħmudija ma tagħmilniex
Kattoliċi, iżda permezz tagħha nsiru parti mill-ġisem ħaj
ta' Kristu nnifsu.
Fil-Magħmudija
nirċievu d-doni tal-Fidi, tat-Tama u ta' l-Imħabba. Nakkwistaw id-dritt li sakemm nosservaw
il-Liġi ta' Alla, mmorru ngawduh fil-ħajja ta' dejjem. Il-Magħmudija
tiftħilna l-bieb għas-Sagramenti l-oħra. Ħafna drabi għandna t-tendenza
li nħaltu l-Fidi mat-Twemmin. Il-Fidi hi rigal t'Alla lil dawk li jitgħamdu. It-Twemmin hu l-aċċettazzjoni
tagħna għal dak kollu li għallimna Kristu. Ġesù ma biddel xejn mill-Kmandamenti t'Alla. Għaldaqstant wieħed ma jistax
jemmen f'Alla u fl-istess waqt iwarrab it-Tagħlim tal-Knisja li hi l-ġisem
mistiku ta' Kristu.
Alla fil-Ġustizzja
tiegħu jagħti lil kulħadd l-opportunità
tas-salvazzjoni. Hemm dawk li jsegwu t-Tagħlim tal-Knisja
u dawk l-oħrajn, li għalkemm mhumiex parti mill-Knisja Kattolika, jgħixu ħajja tajba, l-bogħod
mill-ħażen, kif wara
kollox jitolbu l-Għaxar Kmandamenti.
Dawn ta' l-aħħar jagħmlu wkoll parti mir-ruħ ta' Kristu u għalhekk għandhom
id-dritt tas-salvazzjoni.
Il-Griżma ta' l-Isqof / Konfirmazzjoni
Dan hu s-Sagrament
ta' l-impenn fejn in-nisrani jagħżel li jsir jixbaħ lil
Kristu. Għal din ir-raguni
l-Ispirtu s-Santu jsaħħaħ lill-bniedem bis-seba' doni ta' Għerf;
Fehma; Kunsill; Qawwa; Xjenza; Pjetà u Biza' t'Alla, l-istess doni li skond
Isaija (Is 11, 2-3) kien mogħni bihom Ġesù. L-Ispirtu s-Santu
nsibuh fil-komunjoni tal-Knisja permezz
ta' l-Iskrittura u
t-tradizzjonijiet kollha tagħha
li ngħixuhom bil-Liturġija, is-Sagramenti u l-ħajja ta' kull
membru fil-Ġisem ta' Kristu.
L-Ispirtu s-Santu jfittex art fertili fejn bil-għajnuna tiegħu
tkompli tikber iż-żerriegħa tal-Grazzja biex in-nisrani jħares
'l fuq lejn Alla u jwettaq il-ħidma tiegħu madwaru. Dan hu Sagrament li għandna nħarsu
lejh mhux bħala xi
ritwali li jsir għax wieħed laħaq ċerta età,
imma bħala deċiżjoni personali ta' servizz impenjattiv lejn Alla.
Ir-Rikonċiljazzjoni / Qrar
Ix-Xitan u
d-dnub huma rejaltà. Ix-xitan jittantana, imma l-għażla tad-dnub
hi kollha kemm hi deċiżjoni personali tagħna. It-tajjeb jew il-ħażin mhux
dak ta' kif jaħseb l-individwu.
Id-dnub ma mhux biss att kontra l-Liġi t'Alla, imma anki kontra
l-liġi tan-natura, kontrina stess u kontra l-proxxmu tagħna. Illum nippruvaw inwaħħlu
fis-Soċjetà, fl-Ambjent u f'ħaddieħor għan-nuqqasijiet tagħna. Xejn
ġdid! Adam waħħal f'Eva
u din waħħlet fis-serp. Imma
aħna liberi biex
nagħżlu t-tajjeb
mill-ħażin. U
d-dnub hu abbuż mill-privileġġ ta' din il-libertà.
Is-Sagrament tar-Rikonċiljazzjoni hu l-mod
ta' kif Alla jgħidilna “Naf sew li int uman
u dgħajjef, iżda jien dejjem lest li nieħdok lura bħala
ħabib”. Iżda irridu nindmu
minn dnubietna, inqerruhom, nagħmlu ħilitna li ma nerġgħux
nagħmluhom u npattu għalihom.
Il-Qrar mhux ċajta. Id-dnubiet mhumiex bħal xi ftit
imbarazz li nitfuh ġo xkora u narmuh 'l barra. Nistgħu nqarrqu
bin-nies il-ħin kollu iżda b'Alla le għax Hu jaf kull ħsieb
li għandna moħbi f'qalbna.
|