Kemm-il darba kuljum fit-talba tal-Missierna ngħidu “Tiġi Saltnatek”… Imma x'inhi u f'hiex tikkonsisti is-Saltna ta' Kristu?

Is-Saltna ta' Kristu hija Saltna ta' Mħabba.   L-imħabba li biha Kristu jrid jimla l-qlub tagħna, il-familji tagħna, l-iskejjel u l-postijiet  tax-xogħol tagħna.   L-imħabba ta' Krstu issostni dak kollu li Huwa ħoloq u ħalla f'idejn il-bniedem.  Kristu huwa l-istess imħabba  u  meta  l-bniedem   jifhem  dan  jinduna  li  huwa   maħluq   biex  jgħix f'għaqda ma' Alla, ma' ħutu l-bnedmin  u  l-ħolqien kollu.

Is-Saltna ta' Kristu hija Saltna ta' Ġustizzja. Irridu nżommu f'moħħna dejjem il-ħtiġijiet ta' ħutna kollha li huma fil-bżonn.  Irridu nkunu l-vuċi ta' min ma għandux vuċi.   Il-ħajja hija rigal iżda hija wkoll responsabbilità.   Responsabilità li nużaw dak li Alla tagħna biex ngħinu lill-oħrajn.

Is-Saltna ta' Kristu hija Saltna ta' Paċi. Jeħtieġ l-ewwelnett ikollna l-PaċI f'qalbna, imbagħad jista' jkollna l-Paċi ma' l-oħrajn: fil-familji tagħna, fl-iskejjel u fil-postijiet tax-xogħol tagħna kif ukoll ma' dawk kollha ta' madwarna huma ta' liema fehma huma.

Għalhekk f'dawn il-jiem li fihom qed niċċelebraw il-Festa ta' Kristu Re nitolbuh li tiġi Saltnatu - Saltna ta' Mħabba, Saltna ta' Ġustizzja u Saltna ta' Paċi.