Ta’ kull sena f’Ħamis ix-Xirka, l-Papa jibgħat ittra lis-Saċerdoti.   Bħala  nisrani  ma  nistax  ma  jimpurtanix  mis-saċerdoti,   mill-ħidma tagħhom fil-parroċċa tagħna, mill-ħajja li jgħixu u mill-futur tal-parroċċa tagħna.   Fil-ħarga li għaddiet, f’din il-paġna tkellimna dwar is-saċerdoti, reliġjużi u missjunarji li ħarġu mill-parroċċa tagħna u li qed jaħdmu u jagħtu servizz f’parroċċi oħra.   Meta wieħed iħares lejn is-sitwazzjoni fil-parroċċa jaħseb li n-numru ta’ saċerdoti huwa kbir mhux ħażin, għalkemm 3 biss huma taħt is-sittin sena.  

Jista’ jkollna aktar vokazzjonijiet mill-parroċċa?   Fl-ittra tiegħu l-Qdusija tiegħu il-Papa tkellem dwar l-importanza ta’ l-abbatini fil-ħajja tal-parroċċa.  Nixtieq li nagħmlu riflessjoni dwar dan.  Nammira l-impenn ta’ l-abbatini fil-ħajja parrokkjali.   Illum differenti mis-snin l-imgħoddija.   L-impenn ta’ l-abbati ħafna drabi jfisser ukoll impenn għall-ġenituri u tal-familja kollha.   Ħafna minnhom  huma żgħar  u   għadhom  jiddependu  mill-ġenituri  f’ħafna affarijiet.   Żgur li f’isimkom jenħtieġ li napprezzaw is-sagrifiċċju ta’ dawn il-ġenituri li għall-ġid ta’ uliedhom lesti li jadattaw il-ħajja tal-familja.

Meta qed nitkellmu dwar l-abbatini ma niftakrux biss f’dawk li jagħtu servizz fil-knisja ta’ Għajn Dwieli, fil-knisja ta’ l-Erwieħ u dik ta’ l-Agostinjani f’Ħal Tarxien.   F’isimkom nixtieq ngħid grazzi lil Fr Michael Bellizzi u lil dawk kollha li jgħinuh fil-grupp ta’ l-abbatini fil-knisja parrokkjali, lil Fr Joe Saliba li jieħu ħsieb l-abbatini ta’ Għajn Dwieli u anke lil dawk li jieħdu ħsieb abbatini mill-parroċċa tagħna li jservu fil-knejjes ta’ l-Erwieħ u ta’ l-Agostinjani.

Nagħlaq b’appell ħalli jekk xi tfal li se jagħmlu l-Preċett jixtiequ jidħlu abbatini tajjeb li jkellmu lil dawk responsabbli minn dan il-grupp fil-knejjes fejn jattendu.