Minn meta l-Kummissjoni tal-Ġimgħa l-Kbira ħadet f’idejha l-attivitajiet konnessi mal-Ġimgħa Mqaddsa fil-Parroċċa tagħna, dawn ħadu spinta ferm ’l quddiem.

Fost l-attivitajiet organiżżati mill-Kummissjoni hemm il-Via Sagra fit-toroq bl-istatwa tar-Redentur, il-Pellegrinaġġ Marjan bl-istatwa tad-Duluri, il-Purċissjoni tal-Ġimgħa l-Kbira kif ukoll dik ta’ Kristu Rxoxt nhar Ħadd il-Għid filgħodu.   Kif wieħed jista' jinnota, f’dawn l-aħħar snin, dawn il-manifestazzjonijiet żdiedu ferm fil-popolarità u l-livell.

Din is-sena ma kienitx eċċezzjoni. Kull min segwa xi waħda minn dawn l-attivitajiet żgur seta' jinnota l-parteċipazzjoni ta’ numru kbir ta’ nies li ħadu sehem fihom.   Fost dawn l-attivitajiet, bla dubbju, l-aktar li tispikka hija l-PurĊissjoni tal-Ġimgħa l-Kbira.   Kulħadd seta' jinnota l-progress li sar kemm f’dawk li huma persunaġġi u vestwarju kif ukoll fil-vari l-ġodda li  din is-sena sebbħu l-purċissjoni tal-Ġimgħa filgħaxija u dik tal-Ħadd filgħodu.  Wieħed ma jridx jinsa li l-membri tal-Kummissjoni u xi voluntiera jkunu għaddejjin b’ħidma kontinwa matul is-sena kollha biex seta jintlaħaq dan il-għan.

Fattur importanti li ġab dan is-suċċess mixtieq hu s-serjetà u d-dixxiplina li l-Kummissjoni rnexxiela ddaħħal fost il-parteċipanti kollha.  Naturalment  ringrazzjament  speċjali għandu jmur lid-diversi benefatturi li bl-għajnuna tagħhom saru dawn l-opri ġodda kollha. Importanti  kienu ukoll dawk id-donazzjonijiet żgħar  mogħtija mill-pubbliku ġenerali.

B’wiċċna minn quddiem nistgħu ngħidu li għalkemm il-purċissjoni tal-Ġimgħa l-Kbira fil-parroċċa tagħna hija l-aktar waħda riċenti f’Malta, m’hemmx dubju li hi waħda mill-aktar spettakulari.   Dan hu kollu grazzi għall-ħidma u dedikazzjoni volontarja ta’ bosta individwi li jiddedikaw il-ħin tagħhom jaħdmu bil-kwiet għall-ġid tal-parroċċa tagħna.